Iˉsaˍreˍlaˆ chaw Eˇjiˇtuꞈ mvuhˇ miˬ lo tawˆ kʼai ve awˬ hkawˇ Hpaˍrawˇ gʼa kaˇ htaˇ yawˇ kʼawꞈ sheˉ lai ve yoˬ. Yawˇ maꞈ yaˇ htaꞈ kʼoˆ piˇ ve, ‘iˉ mvuhˇ lawˬ htaꞈ hkʼa dehꞈ gu hehnˇ leh yawˇ hui awˬ hkʼaˇ suh gʼaꞈ yuˬ kʼai˗o. Ngaˬ yawˇ hui htaꞈ maˇ hpehˇ piˇ.’ Hkʼe te leh Hpaˍrawˇ leh yawˇ ve maꞈ yaˇ Iˉsaˍreˍlaˆ chaw awˬ hkʼaˇ suh gʼaꞈ yuˬ kʼai ve yoˬ.

Yaˬhoˉvaˬ lehˬ tanˇ vanˇ htaˇ moˍ yehˬ hkuiˉ daw htaꞈ cuˇ ve mvuhˇ hpeuꞈ htaˇ aˬ miˍ yehˬ hkuiˉ daw htaꞈ cuˇ leh yawˇ ve chaw htaꞈ sheh kʼai piˇ ve yoˬ. Yawˇ yawˇ hui htaꞈ shiˍ laˬ leh laˇ tsuhˇ gʼuiˬ nyi lo gaˬ la htaˇ, oˇ kaˬ lo deh chehˇ taˍ ve yoˬ.

Hpaˍrawˇ leh maꞈ yaˇ Iˉsaˍreˍlaˆ chaw hui awˬ hkʼaˇ suh gʼaꞈ yuˬ laˬ ve htaꞈ yawˇ hui gʼa mawˬ ve yoˬ. Yawˇ hui Eˇjiˇtuꞈ maꞈ yaˇ leh laˇ tsuhˇ gʼuiˬ nyi awˬ kaˍ lehˉ lo chehˇ taˍ ve yoˬ. Iˉsaˍreˍlaˆ chaw Moˉseˍ htaꞈ ca kʼoˆ piˇ ve, ‘ngaˬ hui gʼa suh tuˬ yoˬ. Nawˬ ngaˬ hui htaꞈ Eˇjiˇtuꞈ mvuhˇ miˬ lo maˇ shiˍ tawˆ la cawˇ.’ Yaꞈ hkʼaˇ, Moˉseˍ kʼoˆ ve, ‘taˇ kawˆ! Yaˬhoˉvaˬ ngaˬ hui htaꞈ hkʼaˬ hkʼe te ponˬ laˇ tuˬ ve htaꞈ law nyi taˍ˗oꞈ.’ Moˉseˍ lehˬ Yaˬhoˉvaˬ htaꞈ awˬ tehˬ awˬ na gʼaˇ va ve yoˬ.

Iˉsaˍreˍlaˆ chaw deh chehˇ taˍ ve aˉ po kʼo hpaˆ baˬ˗oꞈ tehꞈ Yaˬhoˉvaˬ kʼoˆ piˇ ve yoˬ. Oˇ teˇ haˉ htaˇ, Yaˬhoˉvaˬ moˍ htaꞈ jiˆ laˬ leh Iˉsaˍreˍlaˆ chaw leh Eˇjiˇtuꞈ chaw hui awˬ kaˍ lehˉ lo tawˍ taˍ piˇ ve yoˬ. Eˇjiˇtuꞈ chaw hui hpawˇ lo naˆ hoꞈ piˇ leh Iˉsaˍreˍlaˆ chaw hui hpawˇ lo awˬ gʼeuˆ ba piˇ ve yoˬ.

Yaˬhoˉvaˬ Moˉseˍ htaꞈ laˇ tsuhˇ gʼuiˬ hkʼoˆ laꞈ sheh che peu tcuh ve yoˬ. Oˇ ve hkʼawꞈ nawˉ, Yaˬhoˉvaˬ lehˬ mvuhˇ haw htaꞈ teˇ haˉ tanˇ hkuinˇ meuˆ laˬ tcuh leh  laˇ tsuhˇ gʼuiˬ gʼoꞈ pa ko taˍ ve hkʼe nyiˇ hkoˇ hpehꞈ la tcuh ve yoˬ. Iˉsaˍreˍlaˆ chaw laiˉ lanˬ gʼaˇ laˇ tsuhˇ gʼuiˬ awˬ kaˍ lehˉ lo goˇ lehˍ gʼa juˇ kʼai ve yoˬ.

Hpaˍrawˇ ve maꞈ yaˇ Iˉsaˍreˍlaˆ chaw hui awˬ hkʼaˇ suh laˇ tsuhˇ gʼuiˬ lo gʼaꞈ yuˬ kʼai ve yoˬ. Hkʼe te leh, Yaˬhoˉvaˬ maꞈ yaˇ htaꞈ kawˆ jaˇ piˇ lawˬ leh yawˇ hui iˉ mvuhˇ lawˬ ve gaˉ yaw tawˆ˗e piˇ lawˬ ve yoˬ. Maꞈ yaˇ gʼaˇ hteꞈ kuˬ leh kʼoˆ ve, ‘Yaˬhoˉvaˬ yawˇ hui hpawˇ chehˇ leh ngaˬ hui htaꞈ bawˆ laˇ chehˇ ve yoˬ. Ngaˬ hui choˬ kaˬ lo tawˆ kʼai˗a veuˬ!’

Yaˬhoˉvaˬ Moˉseˍ htaꞈ kʼoˆ piˇ ve, ‘nawˬ ve laꞈ sheh laˇ tsuhˇ gʼuiˬ hkʼoˆ lo che peu˗o.’ Hkʼe te leh gʼoꞈ pa ko taˍ ve hkʼe iˉ kaˆ paˆ ce la leh Eˇjiˇtuꞈ chaw hui htaꞈ hoˆ beh sheˬ ve yoˬ. Hpaˍrawˇ leh yawˇ ve maꞈ yaˇ suh peuˬ ve yoˬ. Teˇ gʼaˇ kaꞈ maˇ ponˬ.

Laˇ tsuhˇ gʼuiˬ teˇ hpawˇ lo kʼo, Yaˬhoˉvaˬ ve chaw maˇ maˇ yawˇ htaꞈ chiˇ mvuh leh kʼoˆ ve, Yaˬhoˉvaˬ “gʼaˇ shehˍ hpaˇ hpehꞈ ve pa taw, yawˇ htaꞈ kʼa muiˬ chiˇ mvuh piˇ˗oˆ. Awˬ lawn kʼo yawˇ lehˬ iˉ mvuhˇ leh iˉ mvuhˇ ciˇ shehˍ hpaˇ hui htaꞈ laˇ tsuhˇ gʼuiˬ hkʼaw baˬ keu peuˬ.” Gʼuiˬ sha ve chaw kʼa muiˬ chiˇ mvuh chehˇ htaˇ, yaˇ miˇ teˇ hpaˍ tinˍ hteˆ leh pawehˇ te ve yoˬ. Teˇ gʼaˇ le le awˬ tehˬ awˬ na gʼa ponˬ ve pa taw, ha lehˬ jaˇ ve yoˬ.