Iˉsaˍreˍlaˆ chaw heh puiˉ hkʼaw chehˇ ve aˬ laˬ hkʼe 40 hkʼawꞈ gaˬ peuˬ. Yawˇ hui awˬ gʼaˇ uiˍ jaˇ ve laiˉ venˇ htaꞈ maꞈ bawˆ gʼaˇ ve yoˬ. Chi teˇ hkui yawˇ hui Yawˇdanˍ iˉ kaˆ lawˬ mvuhˇ nyi tawˆ hpawˇ Mawˇbaˆ miˬ tawˍ kuiˬ lo deh chehˇ taˍ leh Gʼuiˬ sha ka tiꞈ te piˇ taˍ ve mvuhˇ miˬ hkʼaw loꞈ˗e tuˬ awˬ yanˇ gaˬ˗oˬ ve yoˬ. Mawˇbaˆ ve jawˇ mawˇ Baˍlehˆ lehˬ, Iˉsaˍreˍlaˆ chaw mvuhˇ miˬ gʼa kʼai ve htaꞈ kawˆ leh Iˉsaˍreˍlaˆ chaw htaꞈ hkeu piˇ tuˬ Baˍlanˍ meh ve hawˉ hkʼaˆ teˇ gʼaˇ htaꞈ Mawˇbaˆ mvuhˇ miˬ lo kuˬ laˬ ve yoˬ.

Yaꞈ hkʼaˇ, ‘Iˉsaˍreˍlaˆ chaw htaꞈ nawˬ maˇ gʼa hkeu piˇ’ tehꞈ Yaˬhoˉvaˬ Baˍlanˍ htaꞈ kʼoˆ piˇ leh Baˍlanˍ maˇ kʼai. Jawˇmawˇ Baˍlehˆ 2 pawˆ teˇ pawˆ kʼawꞈ kuˬ leh ka tiꞈ te piˇ ve, nawˬ loˍ ve hkʼe piˇ laˇ tuˬ yoˬ. Yaꞈ hkʼaˇ, Baˍlanˍ maˇ kʼawꞈ kʼai sheˍ. Gʼuiˬ sha yawˇ htaꞈ kʼoˆ piˇ ve, ‘nawˬ Mawˇbaˆ mvuhˇ miˬ lo kʼai hpehꞈ ve yoˬ. Yaꞈ hkʼaˇ, ngaˬ kʼoˆ laˇ ve hkʼe ceh nawˬ gʼa kʼoˆ ve yoˬ.’

Baˍlanˍ piˉ laˬ htaꞈ ciˇ leh Mawˇbaˆ mvuhˇ miˬ awˬ hawˉ hpawˇ lo kʼai ve yoˬ. Yaˬhoˉvaˬ yawˇ htaꞈ tawˍ piˇ˗oˬ ve kaꞈ, Iˉsaˍreˍlaˆ chaw htaꞈ hkeu piˇ tuˬ yawˇ awˬ hkʼaˇ gu ve yoˬ. Yaˬhoˉvaˬ ve mvuhˇ naw ma tcuh yaˇ yaꞈ kʼaw hpuiˇ lo 3 pawˆ hkʼa gaˬ huˉ tawˍ piˇ ve yoˬ. Baˍlanˍ mvuhˇ naw ma tcuh yaˇ htaꞈ maˇ mawˬ. Yaꞈ hkʼaˇ, piˉ laˬ mawˬ ve yoˬ. Awˉ lawˉ teˇ pawˆ, piˉ laˬ mvuhˇ naw ma tcuh yaˇ htaꞈ mawˬ leh yaꞈ kʼaw hawˉ lo yaꞈ˗e ve yoˬ. 2 pawˆ teˇ pawˆ, piˉ laˬ lehˬ haˉ hpawˇ cawˬ kuiˬ lo kʼai leh Baˍlanˍ ve hkui sheh htaꞈ haˉ pui shawˆ hkʼaw sheˬ ve yoˬ. Awˬ leh meuˇ teˇ pawˆ gaˬ leh piˉ laˬ miˬ chaˇ hkʼoˆ lo boˆ sheˬ ve yoˬ. 3 pawˆ pawˆ kaꞈ Baˍlanˍ yawˇ ve juˇ fuiˍ taˬ htaꞈ yuˬ leh piˉ laˬ htaꞈ gʼaˇ hteꞈ jawꞈ hpehˇ ve yoˬ.

Oˇ ve hkʼawꞈ nawˉ, Yaˬhoˉvaˬ piˉ laˬ tawˇ yaw puiˉ tuˬ te piˇ ve yoˬ. Piˉ laˬ Baˍlanˍ htaꞈ kʼoˆ piˇ ve, ‘nawˬ aˬ htoꞈ ma te ngaˬ htaꞈ jawꞈ laˇ ve le?’ Baˍlanˍ kʼoˆ ve, ‘nawˬ ngaˬ htaꞈ yaꞈ taw tuˬ te laˇ ve yoˬ. Ngaˬ aˉ htaw pfuhˇ taˍ ve hkʼe kʼo, nawˬ htaꞈ chaw pehˍ laˇ tuˬ yoˬ.’ Piˉ laˬ kʼoˆ ve, ‘nawˬ ngaˬ htaꞈ ciˇ toˇ chehˇ ve laiˉ hkʼawꞈ gaˬ peuˬ ve maˇ heˆ laˇ? Ngaˬ nawˬ htaꞈ chi hkʼe te laˇ jaw˗aw laˇ?’

Hkʼe te leh, Baˍlanˍ mvuhˇ naw ma tcuh yaˇ htaꞈ mawˬ tuˬ Yaˬhoˉvaˬ te piˇ ve yoˬ. Mvuhˇ naw ma tcuh yaˇ kʼoˆ ve, ‘Iˉsaˍreˍlaˆ chaw htaꞈ taˇ ca hkeu piˇ tehꞈ, Yaˬhoˉvaˬ nawˬ htaꞈ kʼoˆ laˇ ve maˇ heˆ laˇ?’ Baˍlanˍ kʼoˆ ve, ‘ngaˬ te yaꞈ jaˇ peuˬ. Ngaˬ aˉ hkʼaw lo kʼawꞈ kʼoꞈ˗e tuˬ yoˬ.’ Mvuhˇ naw ma tcuh yaˇ kʼawꞈ kʼoˆ ve, ‘nawˬ  Mawˇbaˆ mvuhˇ miˬ lo kʼai hpehꞈ ve yoˬ. Yaꞈ hkʼaˇ, Yaˬhoˉvaˬ kʼoˆ tcuh laˇ ve hkʼe ceh nawˬ gʼa kʼoˆ ve yoˬ.’

Baˍlanˍ Yaˬhoˉvaˬ hkawˇ na yuˬ˗aw laˇ? Maˇ na yuˬ. Yawˇ coˇ caˇ leh Iˉsaˍreˍlaˆ chaw htaꞈ 3 pawˆ hkʼa gaˬ hkeu piˇ ve yoˬ. Yaꞈ hkʼaˇ, teˇ pawˆ le le Yaˬhoˉvaˬ lehˬ Baˍlanˍ hkeu ve tawˇ htaꞈ Iˉsaˍreˍlaˆ chaw awˬ pon awˬ bon naꞈ piˇ ve tawˇ hkʼe hpehꞈ tcuh ve yoˬ. Oˇ ve hkʼawꞈ nawˉ, Iˉsaˍreˍlaˆ chaw Mawˇbaˆ chaw hui htaꞈ maꞈ bawˆ gʼaˇ leh Baˍlanˍ htaꞈ tiˇ pehˍ piˇ ve yoˬ. Baˍlanˍ awˉ lawˉ htaˇ kaꞈ Yaˬhoˉvaˬ hkawˇ na yuˬ ve kʼo, yawˇ maˇ gʼa suh taˬ.