Iˉsaˍreˍlaˆ chaw Siˉnaˆ heh puiˉ hkʼaw Paˍranˍ lo te leh Kaˍdehˆ lo gaˬ la htaˇ, Yaˬhoˉvaˬ Moˉseˍ htaꞈ kʼoˆ piˇ ve, ‘12 chaw ceuˬ hkʼaw chaw jaˆ 12 gʼaˇ htaꞈ leuˆ yuˬ leh ngaˬ Iˉsaˍreˍlaˆ chaw htaꞈ piˇ tuˬ ve Hkaˍnanˍ mvuhˇ miˬ lo ca jaˆ nyi tcuh˗oˆ.’ Moˉseˍ chaw jaˆ 12 gʼaˇ htaꞈ leuˆ yuˬ leh kʼoˆ piˇ ve, ‘mvuhˇ miˬ oˇ ve miˬ hkuiˇ daꞈ leh naˍ, yawˇ hui awˬ gʼaˇ uiˍ leh gʼaˇ nuˇ leh naˍ, chaw oˇ ve teˇ hpaˍ aˉ po kʼo hkʼaw chehˇ ve leh naˍ, maˇ heˆ leh venˇ hkʼaw chehˇ ve leh naˍ ca jaˆ nyi˗o.’ Oˇ ve hkʼawꞈ nawˉ, chaw jaˆ 12 gʼaˇ hkʼaw ve Yawˇsuˆ leh Kaˍlehˆ kaꞈ Hkaˍnanˍ mvuhˇ miˬ lo kʼai ve yoˬ.

40 nyi peuˬ hkʼawꞈ nawˉ, chaw jaˆ kʼawꞈ la leh yawˇ hui lehˬ, maˉ nawˆ shiˍ, aˉ ci ku shiˍ, leh a pehˉ meuˇ shiˍ kaꞈ shaˉ kʼawꞈ la ve yoˬ. Yawˇ hui kʼoˆ ve, ‘mvuhˇ miˬ oˇ ve miˬ hkuiˇ daꞈ jaˇ. Yaꞈ hkʼaˇ, oˇ kaˬ lo ve chaw awˬ gʼaˇ uiˍ jaˇ leh lanˇ venˇ kaꞈ mvuh jaˇ ve yoˬ.’ Kaˍlehˆ kʼawꞈ kʼoˆ ve, kʼai˗a veuˬ ngaˬ hui chaw oˇ ve teˇ hpaˍ htaꞈ gʼaˇ tuˬ yoˬ. Aˬ htoꞈ ma te Kaˍlehˆ chi hkʼe kʼoˆ ve shiˍ˗aˬ laˇ? Awˬ lawn kʼo, Yawˇsuˆ leh Kaˍlehˆ Yaˬhoˉvaˬ ga laˇ tuˬ yonˍ ve yoˬ. Yaꞈ hkʼaˇ, chaw jaˇ 10 kʼoˆ ve, ‘taˇ kʼai!’ Oˇ kaˬ lo ve chaw uiˍ jaˇ mvuh jaˇ ve chaw lonˉ hpehꞈ ve yoˬ. Ngaˬ hui yawˇ hui htaꞈ tehˆ daꞈ nyi ve kʼo, paˉ ceꞈ hui˗ehˬ cawˬ ve yoˬ.

Iˉsaˍreˍlaˆ chaw awˬ gʼaˇ nuˇ leh yawˇ hui hkanˇ leh kʼoˆ daꞈ ve, ‘ngaˬ hui Eˇjiˇtuꞈ lo kʼawꞈ kʼoꞈ˗e tuˬ, awˬ hoˉ awˬ suhˉ teˇ gʼaˇ ca˗a veuˬ. Aˬ htoꞈ ma te chaw lonˉ laꞈ hkʼaw ca suh˗e tuˬ ve le?’ Yawˇsuˆ leh Kaˍlehˆ kʼoˆ ve, ‘taˇ kawˆ nawˬ hui  Yaˬhoˉvaˬ hkawˇ na yuˬ cawˇ ve yoˬ. Yaˬhoˉvaˬ ngaˬ hui htaꞈ haꞈ shaˉ laˇ tuˬ yoˬ.’ Yaꞈ hkʼaˇ, Iˉsaˍreˍlaˆ chaw maˇ na yuˬ ve awˬ hkʼoˆ kaꞈ, Yawˇsuˆ leh Kaˍlehˆ htaꞈ tiˇ pehˍ gaˇ ve yoˬ!

Yaˬhoˉvaˬ awˬ lawn chi ve htaꞈ hkʼaˬ hkʼe te tuˬ le? Yawˇ Moˉseˍ htaꞈ kʼoˆ piˇ ve, ‘ngaˬ Iˉsaˍreˍlaˆ chaw htaꞈ laiˉ ceuˬ te piˇ ve htawˇ, yawˇ hui ngaˬ hkawˇ maˇ na yuˬ. Chi htaꞈ pa taw, yawˇ hui heh puiˉ hkʼaw 40 hkʼawꞈ chehˇ leh choˬ kaˬ lo gʼa suh˗e tuˬ yoˬ. Yawˇ hui htaꞈ ka tiꞈ te piˇ taˍ ve mvuhˇ miˬ hkʼaw gʼa chehˇ tuˬ, yawˇ hui ve yaˇ leh Yawˇsuˆ leh Kaˍlehˆ ceh tiˉ cawˬ ve yoˬ.’