Yaˬhoˉvaˬ Moˉseˍ htaꞈ kʼoˆ piˇ ve, ‘ngaˬ geh hkʼaw hkʼoˆ lo taˆ la˗o. Ngaˬ nawˬ htaꞈ haˉ pui baˉ hkʼoˆ lo awˬ liˇ tawˇ hkawˇ bvuhꞈ taˍ laˇ tuˬ yoˬ.’ Hkʼe te leh, Moˉseˍ hkʼaw hkʼoˆ lo taˆ˗e leh 40 nyi 40 haˉ chehˇ taˍ ve yoˬ. Yaˬhoˉvaˬ lehˬ awˬ liˇ tawˇ hkawˇ 10 hkawˇ haˉ pui baˉ 2 maˬ hkʼoˆ lo bvuhꞈ keu leh Moˉseˍ htaꞈ piˇ ve yoˬ.

Awˬ yanˇ maw la htaˇ, Moˉseˍ baˬ taˉ laˇ peuˬ tehꞈ Iˉsaˍreˍlaˆ chaw dawˇ ve yoˬ. Yawˇ hui kʼoˆ ve, ‘ngaˬ hui htaꞈ shiˍ kʼai laˇ tuˬ gʼuiˬ sha teˇ gʼaˇ te laˇ˗oˆ.’ Aˍronˍ kʼoˆ piˇ ve, ‘nawˬ hui ve shi naˍ vawˇ teˇ hpaˍ ngaˬ geh yuˬ veu laˇ˗oˆ.’ Hkʼe te leh, Aˍronˍ lehˬ shi nuˇ shaˉ hoꞈ teˇ maˬ te ve yoˬ. Iˉsaˍreˍlaˆ chaw kʼoˆ daꞈ ve, ‘chi ve lehˬ ngaˬ hui htaꞈ Eˇjiˇtuꞈ mvuhˇ miˬ hkʼaw shiˍ tawˆ laˇ shehˍ hpaˇ ngaˬ hui ve gʼuiˬ sha hpehꞈ ve yoˬ!’ Yawˇ hui shi nuˇ shaˉ hoꞈ htaꞈ oˉ kʼoˍ pui leh hti caˇ hti dawˬ ve yoˬ. Yawˇ hui te ve cawˇ˗aw laˇ? Maˇ cawˇ. Awˬ lawn kʼo, Iˉsaˍreˍlaˆ chaw Yaˬhoˉvaˬ teˇ gʼaˇ htaꞈ ceh tiˉ oˉ kʼoˍ pui tuˬ yoˬ tehꞈ ka tiꞈ te taˍ peuˬ ve yoˬ. Yaꞈ hkʼaˇ, yawˇ hui ka tiꞈ te taˍ ve htaꞈ maˇ gʼaꞈ te ve yoˬ.

 Iˉsaˍreˍlaˆ chaw aˬ htoꞈ ma te chehˇ ve htaꞈ Yaˬhoˉvaˬ mawˬ leh yawˇ Moˉseˍ htaꞈ kʼoˆ piˇ ve, ‘nawˬ haˆ te kʼoꞈ˗e loˬ. Iˉsaˍreˍlaˆ chaw teˇ hpaˍ, ngaˬ ve hkawˇ htaꞈ maˇ na yuˬ leh shaˉ hoꞈ htaꞈ oˉ kʼoˍ pui chehˇ peuˬ. Moˉseˍ lehˬ haˉ pui baˉ 2 maˬ htaꞈ yuˬ leh hkʼaw hkʼoˆ lo yaꞈ la ve yoˬ.

Aˉ po kʼo paˇ lo Moˉseˍ gaˬ la htaˇ, Iˉsaˍreˍlaˆ chaw liꞈ hkawˇ kʼa ve awˬ hkawˇ htaꞈ gʼa kaˇ ve yoˬ. Yawˇ gaˬ la leh yawˇ hui pawehˇ te leh shi nuˇ shaˉ hoꞈ htaꞈ oˉ kʼoˍ pui chehˇ ve htaꞈ gʼa mawˬ ve yoˬ. Moˉseˍ beuꞈ jaˇ. Yawˇ haˉ pui baˉ 2 maˬ htaꞈ miˬ chaˇ hkʼoˆ lo baˬ ce leh hkoˇ kʼai ve yoˬ. Yawˇ shi nuˇ shaˉ hoꞈ htaꞈ laꞈ haˉ te luˬ leh Aˍronˍ htaꞈ na piˇ ve, ‘chaw chi teˇ hpaˍ nawˬ htaꞈ hkʼaˬ hkʼe kʼoˆ laˇ leh chi taw taw haiˬ ve kanˉ htaꞈ te ve le?’ Aˍronˍ kʼoˆ ve, ‘ngaˬ htaꞈ nyi ma a ciˉ taˇ zuhˆ laˇ sheˍ. Chaw chi teˇ hpaˍ nyi ma hkʼaˬ hkʼe cawˬ ve nawˬ shiˍ taˍ ve yoˬ. Yawˇ hui gʼuiˬ sha teˇ gʼaˇ heuˆ gaˇ leh ngaˬ shi teˇ hpaˍ htaꞈ aˬ miˍ hkʼaw baˬ keu leh shi nuˇ ehˉ te tawˆ la piˇ ve yoˬ!’ Aˍronˍ chi hkʼe maˇ te cawˇ ve yoˬ. Moˉseˍ hkʼaw hkʼoˆ lo kʼawꞈ taˆ˗e leh Iˉsaˍreˍlaˆ chaw htaꞈ Yaˬhoˉvaˬ venˇ baˆ hpehˇ piˇ tuˬ ca lawˬ hkawˉ ve yoˬ.

Yaˬhoˉvaˬ yawˇ ve hkawˇ htaꞈ ha lehˬ ha kʼa na yuˬ ve chaw htaꞈ venˇ baˆ hpehˇ piˇ ve yoˬ. Iˉsaˍreˍlaˆ chaw htaꞈ sheh kʼai shehˍ hpaˇ Moˉseˍ hkawˇ htaꞈ na yuˬ ve hkʼaˬ hkʼe taw a yeˇ uiˍ ve mawˬ˗aw laˇ?