Eˇjiˇtuꞈ mvuhˇ miˬ lo tawˆ la ve aˬ laˬ hkʼe 2 ha pa peuˬ hkʼawꞈ nawˉ, Iˉsaˍreˍlaˆ chaw Siˉnaˆ hkʼaw paˇ lo aˉ po kʼo te chehˇ taˍ ve yoˬ. Yaˬhoˉvaˬ Moˉseˍ htaꞈ hkʼaw hkʼoˆ lo kuˬ taˆ˗e peuˬ hkʼawꞈ nawˉ, yawˇ htaꞈ kʼoˆ piˇ ve, ‘ngaˬ Iˉsaˍreˍlaˆ chaw htaꞈ ponˬ piˇ taˍ ve yoˬ. Nawˬ hui ngaˬ ve awˬ liˇ tawˇ hkawˇ htaꞈ na yuˬ leh haꞈ shaˉ taˍ ve kʼo, nawˬ hui lehˬ ngaˬ ve chaw ceuˬ hpehꞈ la tuˬ yoˬ.’ Moˉseˍ hkʼaw hkʼoˆ lo yaꞈ la leh Yaˬhoˉvaˬ aˬ htoꞈ ma kʼoˆ laˇ ve awˬ lawn Iˉsaˍreˍlaˆ chaw htaꞈ kʼoˆ maˍ piˇ ve yoˬ. Iˉsaˍreˍlaˆ chaw hkʼaˬ hkʼe yaw hkʼawꞈ piˇ ve le? Yawˇ hui kʼoˆ ve, ‘Yaˬhoˉvaˬ kʼoˆ ve hkʼa peu˗eˬ htaꞈ ngaˬ hui na yuˬ leh gʼaꞈ te tuˬ yoˬ.’

Moˉseˍ Siˉnaˆ hkʼaw hkʼoˆ teˇ pawˆ kʼawꞈ tawˆ˗e ve yoˬ. Yaˬhoˉvaˬ yawˇ htaꞈ kʼoˆ piˇ ve, ‘3 nyi gaˬ kʼo, ngaˬ nawˬ htaꞈ tawˇ yaw laˇ tuˬ yoˬ. Iˉsaˍreˍlaˆ chaw Siˉnaˆ hkʼaw hkʼoˆ lo taˇ taˆ la tehꞈ kʼoˆ piˇ˗oˆ.’ Moˉseˍ hkʼaw hkʼoˆ lo yaꞈ la leh Iˉsaˍreˍlaˆ chaw Yaˬhoˉvaˬ hkawˇ na yuˬ tuˬ gu hehnˇ taˍ˗oꞈ kʼoˆ piˇ ve yoˬ.

3 nyi gaˬ leh hkʼaw hkʼoˆ lo Iˉsaˍreˍlaˆ chaw moˬ hoˆ beh taˍ ve mvuhˇ tiˉ po˗eꞈ ba chehˇ ve htaꞈ gʼa mawˬ ve yoˬ. Yawˇ hui mvuhˇ tawˍ mvuhˇ htehˆ ve awˬ hkawˇ leh behˬ heh ma awˬ hkawˇ bvuhˬ tawˆ la ve htaꞈ gʼa kaˇ ve yoˬ. Yaˬhoˉvaˬ lehˬ aˬ miˍ geh teˇ geh hkʼaw hkʼoˆ lo yaꞈ la ve pa taw, Iˉsaˍreˍlaˆ chaw hkʼa peu˗eˬ kawˆ jaˇ ve yoˬ. Hkʼaw teˇ shiˍ hkʼa peu˗eˬ htaꞈ mvuhˇ hkʼawˇ hoˆ beh taˍ leh hiˆ hiˆ naˇ naˇ hpehꞈ la ve yoˬ. Behˬ heh ma hkawˇ shaˬ te shaˬ hehnˇ la ve yoˬ. Gʼuiˬ sha kʼoˆ ve, ‘ngaˬ lehˬ Yaˬhoˉvaˬ hpehꞈ ve yoˬ. Nawˬ hui ngaˬ awˬ hkʼoˆ awˬ kaˍ awˬ nu gʼuiˬ sha htaꞈ oˉ kʼoˍ maˇ gʼa pui.’

Moˉseˍ hkʼaw hkʼoˆ lo teˇ pawˆ kʼawꞈ taˆ˗e leh Iˉsaˍreˍlaˆ chaw Gʼuiˬ sha htaꞈ oˉ kʼoˍ pui ve awˬ hkʼaˇ leh, Yaˬhoˉvaˬ nyi hkʼaˇ suh tuˬ ve awˬ hkʼaˇ shiˍ la tuˬ Moˉseˍ htaꞈ awˬ liˇ tawˇ hkawˇ piˇ ve yoˬ. Moˉseˍ awˬ liˇ tawˇ hkawˇ hkʼa peu˗eˬ htaꞈ bvuhꞈ keu taˍ ve yoˬ. Oˇ ve hkʼawꞈ nawˉ, Iˉsaˍreˍlaˆ chaw htaꞈ gʼaw maˍ piˇ ve yoˬ. Moˉseˍ gʼaw peuˬ hkʼawꞈ nawˉ, yawˇ hui kʼoˆ ve, ‘Yaˬhoˉvaˬ kʼoˆ ve hkʼa peu˗eˬ htaꞈ ngaˬ hui te tuˬ yoˬ.’ Iˉsaˍreˍlaˆ chaw Gʼuiˬ sha htaꞈ ka tiꞈ te piˇ ve yoˬ. Yaꞈ hkʼaˇ, yawˇ hui ka tiꞈ htaꞈ haꞈ shaˉ gʼa tuˬ laˇ?