Moˉseˍ Siˉnaˆ hkʼaw hkʼoˆ lo chehˇ htaˇ, Iˉsaˍreˍlaˆ chaw Gʼuiˬ sha htaꞈ oˉ kʼoˍ pui tuˬ, Yaˬhoˉvaˬ Moˉseˍ htaꞈ aˉ po kʼo bon yehˬ te tcuh ve yoˬ. Yawˇ hui teˇ kaˬ ca kʼawꞈ chehˇ htaˇ, aˉ po kʼo bon yehˬ kaꞈ gʼa hpaˆ kʼai ve yoˬ.

Yaˬhoˉvaˬ Moˉseˍ htaꞈ kʼoˆ piˇ ve, ‘Iˉsaˍreˍlaˆ chaw a shu teˇ gʼaˇ aˉ po kʼo bon yehˬ te tuˬ gʼa ga gaˇ ve kʼo, mawˇ teˇ hpaˍ tanˇ la tuˬ kʼoˆ piˇ˗oˆ.’ Yawˇ hui hpu, shi, kuiˇ, shehnˉ shiˍ, tcuhˉ hkʼeun, yawˬ mvuh, daꞈ jaˇ ve hpa, to nuˇ to shaˆ ve awˬ guiˬ kʼuˉ maˇ maˇ tanˇ la ve yoˬ. Hkʼe te leh Moˉseˍ kʼoˆ piˇ ve, ‘mawˇ tanˇ la ve maˇ jaˇ˗o, taˇ yuˬ veu laˇ loˬ!’

Laꞈ shaˉ maˉ te puiˉ ve hawˉ hkʼaˆ yaˇ miˇ laiˉ gʼaˇ aˉ po kʼo bon yehˬ gʼa ga te la ve yoˬ. Yawˇ hui kanˉ te puiˉ tuˬ, Yaˬhoˉvaˬ cuˇ yiˍ piˇ ve yoˬ. Teˇ hpaˍ kʼo, gʼoꞈ hkeh gʼawˬ ve, hpa chiˇ ve, hpa tawˉ nehˉ ve yoˬ. Awˬ kaˍ awˬ nu ve chaw kʼo, haˉ pui shehnˉ, shi, suhˆ hkʼaw htawˆ ve kanˉ te ve yoˬ.

Yawˇ hui Yaˬhoˉvaˬ kʼoˆ piˇ ve hkʼe, aˉ po kʼo bon yehˬ te ve yoˬ. Yawˇ hui daꞈ ve hpa teˇ hkʼoˆ yuˬ leh aˉ po kʼo bon yehˬ 2 bawehˇ hpehꞈ tuˬ tawˍ ve yoˬ. Teˇ bawehˇ kʼo daꞈ kehˬ jaˇ ve chehˇ kuiˬ tehꞈ kʼoˆ ve yoˬ. Oˇ kaˬ lo aˍhkeˇshaˍ suhˆ leh shi te taˍ ve ka tiꞈ shaˉ caˆ ta kʼoˍ teh taˍ ve yoˬ. Teˇ bawehˇ kʼo daꞈ kehˬ ve chehˇ kuiˬ tehꞈ kʼoˆ ve yoˬ. Oˇ kaˬ lo shi te taˍ ve kawˆ faiˇ, hpui lawˇ teˇ maˬ leh sha hawnˉ tuˉ tanˇ kuiˬ teh taˍ ve yoˬ. Aˉ po kʼo bon yehˬ ko taˍ ve hpa awˬ kaˍ lo kuiˇ hkehˇ pe le leh uiˍ ve tuˉ tanˇ kuiˬ teh taˍve yoˬ. Iˉsaˍreˍlaˆ chaw Yaˬhoˉvaˬ hkawˇ na yuˬ tuˬ yoˬ tehꞈ ka tiꞈ te taˍ ve htaꞈ dawˇ nawˇ tuˬ, ka tiꞈ shaˉ caˆ ta kʼoˍ teh taˍ ve yoˬ. Ka tiꞈ shaˉ caˆ aˬ htoꞈ ma htaꞈ kʼoˆ gaˇ ve le shiˍ˗aˬ laˇ? A yeˇ uiˍ jaˇ ve ka tiꞈ hpehꞈ ve yoˬ.

 Yaˬhoˉvaˬ Aˍronˍ leh yawˇ ve yaˇ paˍ htaꞈ leuˆ yuˬ leh paw hkuˇ te tcuh ve yoˬ. Yawˇ hui aˉ po kʼo chi htaꞈ nyi haꞈ shaˉ leh Yaˬhoˉvaˬ htaꞈ tuˉ tanˇ piˇ ve yoˬ. Aˍronˍ teˇ gʼaˇ ceh tiˉ paw hkuˇ lonˉ hpehꞈ ve pa taw, daꞈ kehˬ jaˇ ve bawehˇ hkʼaw loꞈ˗e hpehꞈ ve yoˬ. Yawˇ awˬ to, yawˇ ve yehˬ kʼa, leh Iˉsaˍreˍlaˆ chaw hkʼa peu˗eˬ htaꞈ Gʼuiˬ sha venˇ baˆ hpehˇ piˇ tuˬ, yawˇ 1 hkʼawꞈ 1 pawˆ bawehˇ oˇ ve hkʼaw ca tuˉ tanˇ piˇ ve yoˬ.

Iˉsaˍreˍlaˆ chaw Eˇjiˇtuꞈ mvuhˇ miˬ lo tawˆ la ve 1 hkʼawꞈ gaˬ leh aˉ po kʼo bon yehˬ te peuˬ ve yoˬ. Chi teˇ hkui, yawˇ hui Yaˬhoˉvaˬ htaꞈ oˉ kʼoˍ pui kuiˬ cawˬ ve yoˬ.

Yaˬhoˉvaˬ ve awˬ meꞈ awˬ hponˇ aˉ po kʼo bon yehˬ hkʼaw biˇ sheˆ leh aˉ po kʼo hkʼoˆ moˬ chehˇ taˍ ve yoˬ. Aˉ po kʼo hkʼoˆ moˬ chehˇ taˍ ve kʼo, Iˉsaˍreˍlaˆ chaw teˇ kaˬ kaꞈ maˇ kʼai. Yaꞈ hkʼaˇ, hkʼaˬ htaˆ leh moˬ tu kʼai ve kʼo, teˇ kaˬ kʼawꞈ jiˆ kʼai yanˇ gaˬ˗oˬ tehꞈ yawˇ hui shiˍ ve yoˬ. Yawˇ hui aˉ po kʼo bon yehˬ hpaˆ taˆ leh moˬ awˬ hkʼaˇ suh gʼaꞈ kʼai ve yoˬ.