Yeˍriˆhkoˇ venˇ luˬ kʼai ve awˬ lawn Hkaˍnanˍ mvuhˇ miˬ lo bvuhˬ kʼai ve yoˬ. Hkaˍnanˍ mvuhˇ miˬ hkʼaw chehˇ ve jawˇ mawˇ teˇ hpaˍ pawnˇ daꞈ leh Iˉsaˍreˍlaˆ chaw htaꞈ bawˆ daꞈ tuˬ dawˇ cheˆ ve yoˬ. Yaꞈ hkʼaˇ, Hkaˍnanˍ mvuhˇ miˬ hkʼaw cawˬ ve Giˇbonˍ venˇ lehˬ Iˉsaˍreˍlaˆ chaw htaꞈ maꞈ maˇ bawˆ daꞈ gaˇ. Yawˇ hui aˉ poꞈ tzuhꞈ keu ve veuꞈ leh Yawˇsuˆ geh kʼai leh kʼoˆ ve, ‘ngaˬ hui laˬ vuiˇ jaˇ ve yoˬ. Eˇjiˇtuꞈ mvuhˇ miˬ leh Mawˇbaˆ mvuhˇ miˬ htaꞈ Yaˬhoˉvaˬ te piˇ ve awˬ ceuˬ ngaˬ hui gʼa kaˇ ve yoˬ. Ngaˬ hui htaꞈ maꞈ maˇ bawˆ laˇ tuˬ, ka tiꞈ te laˇ˗oˆ. Ngaˬ hui nawˬ hui ve awˬ ceˬ te tuˬ yoˬ.’

Yawˇsuˆ Giˇbonˍ chaw hui htaꞈ yonˍ leh maꞈ maˇ bawˆ daꞈ tuˬ ka tiꞈ te piˇ ve yoˬ. Yaꞈ hkʼaˇ, 3 nyi gaˬ leh yawˇ hui vuiˇ kuiˬ lo laˬ ve maˇ heˆ ve htaꞈ yawˇ gʼa shiˍ ve yoˬ. Yawˇ hui Hkaˍnanˍ mvuhˇ miˬ lo ceh chehˇ taˍ ve yoˬ. Yawˇsuˆ Giˇbonˍ chaw hui htaꞈ na piˇ ve, ‘aˬ htoꞈ ma te ngaˬ hui htaꞈ heˍ laˇ ve le?’ Yawˇ hui kʼoˆ ve, ‘ngaˬ hui kawˆ jaˇ! Yaˬhoˉvaˬ nawˬ hui awˬ tan maꞈ bawˆ laˇ tuˬ yoˬ tehꞈ ngaˬ hui shiˍ taˍ ve yoˬ. Ngaˬ hui htaꞈ a ciˉ taˇ tiˇ pehˍ laˇ tehꞈ lawˬ hkawˉ ve yoˬ.’ Yawˇsuˆ ka tiꞈ htaꞈ haꞈ shaˉ taˍ leh yawˇ hui htaꞈ maˇ tiˇ pehˍ piˇ ve yoˬ.

Maˇ maw maw gaˬ leh Hkaˍnanˍ mvuhˇ miˬ hkʼaw ve jawˇ mawˇ 5 gʼaˇ lehˬ maꞈ yaˇ htaꞈ shiˍ veu laˇ leh Giˇbonˍ venˇ htaꞈ ca bawˆ la ve yoˬ.  Yawˇsuˆ leh yawˇ ve maꞈ yaˇ teˇ haˉ tanˇ hkuinˇ yaꞈ kʼaw juˇ leh Giˇbonˍ chaw hui htaꞈ ca ga piˇ ve yoˬ. Mvuhˇ htiˇ la leh yawˇ hui maꞈ bawˆ daꞈ leh Hkaˍnanˍ chaw teˇ gʼaˇ teˇ hpawˇ lo hpaw˗e ve yoˬ. Yawˇ hui hkʼaˬ teˇ kaˬ lo hpaw˗e ve maˇ kʼoˆ, Yaˬhoˉvaˬ lehˬ yawˇ hui htaꞈ vaˇ shiˍ lonˉ ce teˍ piˇ tcuh ve yoˬ. Mvuhˇ nyi teˇ kaˬ tiˉ chehˇ tuˬ Yawˇsuˆ Yaˬhoˉvaˬ geh lawˬ ve yoˬ. Mvuhˇ nyi teˇ kaˬ tiˉ maˇ chehˇ jaw ve htawˇ, aˬ htoꞈ ma te Yawˇsuˆ oˇ hkʼe te lawˬ ve le? Yawˇsuˆ Yaˬhoˉvaˬ htaꞈ yonˍ ve pa taw, teˇ nyi tanˇ vanˇ mvuhˇ nyi teˇ kaˬ tiˉ chehˇ taˍ leh Iˉsaˍreˍlaˆ chaw Hkaˍnanˍ mvuhˇ miˬ ve jawˇ mawˇ leh yawˇ hui ve maꞈ yaˇ teˇ hpaˍ htaꞈ maꞈ bawˆ gʼaˇ ve yoˬ.