Awˬ hkʼawꞈ nawˉ htaˇ, Iˉsaˍreˍlaˆ chaw Yaˬhoˉvaˬ htaꞈ baˬ taˉ leh maˇ heˆ heˆ ve gʼuiˬ sha htaꞈ oˉ kʼoˍ ca pui ve yoˬ. Meˇdiˍanˍ chaw Iˉsaˍreˍlaˆ ve to nuˇ to shaˆ hkʼawˇ leh gʼawˇ hpaꞈ mvuhˬ naweh leh iˉ shiˍ teˇ hpaˍ 7 hkʼawꞈ hkʼaˬ gaˬ te luˬ piˇ ve yoˬ. Iˉsaˍreˍlaˆ chaw haˉ kʼoˍ leh hkʼaw hkʼoˆ lo gʼa ca hpaw chehˇ ve yoˬ. Yawˇ hui Yaˬhoˉvaˬ ga laˇ tuˬ lawˬ ve yoˬ. Giˉdonˍ meh ve hawˉ hkʼaˆ teˇ gʼaˇ geh Yaˬhoˉvaˬ mvuhˇ naw ma tcuh yaˇ htaꞈ kʼai tcuh ve yoˬ. Mvuhˇ naw ma tcuh yaˇ yawˇ htaꞈ kʼoˆ piˇ ve, ‘Yaˬhoˉvaˬ nawˬ htaꞈ leuˆ yuˬ leh cheuˬ jaˇ ve maꞈ bawˆ paˍ hpehꞈ tcuh laˇ tuˬ yoˬ.’ Yaꞈ hkʼaˇ, Giˉdonˍ na nyi ve, ‘ngaˬ hkʼaˬ hkʼe te leh Iˉsaˍreˍlaˆ chaw htaꞈ ga piˇ gʼa tuˬ le? Ngaˬ teꞈ chiˉ kaꞈ te maˇ puiˉ.’

Awˬ tehˬ awˬ na Yaˬhoˉvaˬ Giˉdonˍ htaꞈ leuˆ yuˬ ve yoˬ tehꞈ hkʼaˬ hkʼe te yawˇ yonˍ gʼa ve le? Yawˇ yawˬ mvuh miˬ chaˇ hkʼoˆ lo teh taˍ leh Yaˬhoˉvaˬ geh lawˬ leh kʼoˆ ve, ‘shawˉ pawˍ mvuhˇ shawˉ htaˇ, yawˬ mvuh htaꞈ ceh tiˉ ciˬ gʼuiˬ nehˆ leh miˬ guiˬ goˇ lehˍ cawˬ ve kʼo, nawˬ ngaˬ htaꞈ yehˇ leh Iˉsaˍreˍlaˆ chaw htaꞈ awˬ tehˬ awˬ na ga piˇ tcuh gaˇ ve yoˬ tehꞈ ngaˬ shiˍ ve yoˬ.’ Mvuh htiˇ la htaˇ, yawˬ mvuh nehˆ leh miˬ guiˬ goˇ lehˍ cawˬ sheˍ ve yoˬ! Giˉdonˍ Yaˬhoˉvaˬ geh teˇ pawˆ kʼawꞈ lawˬ leh kʼoˆ ve, shawˉ pawˍ mvuhˇ shawˉ htaˇ yawˬ mvuh maˇ nehˆ leh miˬ guiˬ nehˆ lehˍ cawˬ la piˇ˗oˆ. Awˬ tehˬ awˬ na oˇ hkʼe hpehꞈ la ve yoˬ.  Yaˬhoˉvaˬ yawˇ htaꞈ leuˆ yuˬ ve yoˬ tehꞈ Giˉdonˍ shiˍ leh Meˇdiˍanˍ chaw htaꞈ maꞈ bawˆ tuˬ maꞈ yaˇ shaw hpoˆ ve yoˬ.

Yaˬhoˉvaˬ Giˉdonˍ htaꞈ kʼoˆ piˇ ve, ‘ngaˬ Iˉsaˍreˍlaˆ chaw htaꞈ gʼaˇ tcuh tuˬ yoˬ. Yaꞈ hkʼaˇ, nawˬ maꞈ yaˇ maˇ jaˇ ve kʼo, nawˬ ve awˬ gʼaˇ awˬ shaˉ htaꞈ pa taw maꞈ bawˆ gʼaˇ ve yoˬ tehꞈ nawˬ dawˇ la tuˬ yoˬ. Maꞈ yaˇ hkʼaˬ ve teˇ gʼaˇ kawˆ ve kʼo, kʼoꞈ˗e loˬ tehꞈ teˇ gʼaˇ le le htaꞈ kʼoˆ piˇ˗oˆ.’ Maꞈ yaˇ 22,000 gʼaˇ kʼoꞈ˗e leh maꞈ yaˇ 10,000 gʼaˇ htaꞈ yawˇ leuˆ yuˬ ve yoˬ. Yaꞈ hkʼaˇ, Yaˬhoˉvaˬ kʼoˆ ve, ‘maꞈ yaˇ maˇ jaˇ sheˍ. Yawˇ hui htaꞈ iˉ kaˆ lawˬ lo iˉ kaˆ shiˍ taw piˇ˗oˆ. Iˉ kaˆ dawˬ chehˇ htaˇ, canˇ paˍ htaꞈ fanˬ taˍ ve chaw ceh tiˉ leuˆ yuˬ˗oꞈ.’ Iˉ kaˆ dawˬ chehˇ htaˇ hkʼa dehꞈ fanˬ taˍ ve chaw 300 gʼaˇ ceh tiˉ cawˬ ve yoˬ. Yaꞈ hkʼaˇ, Yaˬhoˉvaˬ ka tiꞈ te piˇ ve maꞈ yaˇ 300 gʼaˇ ceh tiˉ Meˇdiˍanˍ chaw 135,000 gʼaˇ htaꞈ maꞈ bawˆ gʼaˇ tuˬ yoˬ.

Oˇ ve teˇ haˉ Yaˬhoˉvaˬ Giˉdonˍ htaꞈ kʼoˆ piˇ ve, ‘chi teˇ hkui Meˇdiˍanˍ taꞈ yehˬ htaꞈ ca bawˆ˗e loˬ!’ Giˉdonˍ lehˬ maꞈ yaˇ teˇ gʼaˇ le le htaꞈ behˬ heh ma leh aˬ miˍ tuˉ keu taˍ ve muꞈ hkʼu lonˉ ka taˍ tcuh ve yoˬ. Yawˇ kʼoˆ piˇ ve, ‘ngaˬ htaꞈ hkʼa dehꞈ nyi taˍ leh gʼaꞈ te˗o.’ Giˉdonˍ behˬ heh ma meuˆ leh muꞈ hkʼu htaꞈ dawˆ leh aˬ miˍ tuˉ ka taˍ leh cawˉ lawˉ cawˉ lawˉ te leh kuˬ ve, ‘Yaˬhoˉvaˬ ve aˉ htaw leh Giˉdonˍ ve aˍ htaw!’ Maꞈ yaˇ 300 gʼaˇ htawˇ chi hkʼa shuˍ gʼaꞈ ve yoˬ. hkʼe te leh, Meˇdiˍanˍ chaw kawˆ jaˇ leh teˇ gʼaˇ teˇ kaˬ hpaw˗e leh yawˇ hui hkʼaˇ yawˇ hui bawˆ daꞈ ve yoˬ. Yaˬhoˉvaˬ Iˉsaˍreˍlaˆ chaw canˇ paˍ htaꞈ teˇ pawˆ kʼawꞈ gʼaˇ tcuh ve yoˬ.