Iˉsaˍreˍlaˆ chaw Eˇlaˍkaˍnaˆ meh ve awˬ miˇ ma 2 gʼaˇ cawˬ ve yoˬ. Teˇ gʼaˇ lehˬ Haˍnaˆ awˬ nu ve teˇ gʼaˇ Peˍniˇnaˆ hpehꞈ ve yoˬ. Yaꞈ hkʼaˇ, yawˇ Haˍnaˆ htaꞈ a ciˉ haꞈ jaˇ. Haˍnaˆ yaˇ maˇ cawˬ ve pa taw, Peˍniˇnaˆ yaˇ laiˉ gʼaˇ cawˬ leh yawˇ htaꞈ kʼoˆ guiˇ gʼuiˬ guiˇ piˇ ve yoˬ. Eˇlaˍkaˍnaˆ lehˬ teˇ hkʼawꞈ le le yehˬ kʼa htaꞈ Shiˉlonˍ venˇ lo kʼai leh bon yehˬ hkʼaw oˉ kʼoˍ ca pui ve yoˬ. Teˇ pawˆ htaˇ, Eˇlaˍkaˍnaˆ yawˇ haꞈ jaˇ ve awˬ miˇ ma Haˍnaˆ nyi ma luˬ jaˇ ve htaꞈ gʼa mawˬ ve yoˬ. Yawˇ htaꞈ awˬ gʼaˇ piˇ leh kʼoˆ ve, ‘Haˍnaˆ˗oˬ, taˇ hawˬ ngaˬ nawˬ htaꞈ haꞈ jaˇ ve yoˬ.’

Hkʼe te leh, Haˍnaˆ teˇ gʼaˇ tiˉ bon lawˬ chehˇ ve yoˬ. Yawˇ hawˬ taˍ leh Yaˬhoˉvaˬ ga laˇ tuˬ lawˬ ve yoˬ. Yawˇ Yaˬhoˉvaˬ htaꞈ ka tiꞈ te piˇ ve, ‘nawˬ ngaˬ htaꞈ yaˇ paˍ teˇ gʼaˇ cawˬ tcuh laˇ ve kʼo, yawˇ a shaꞈ teꞈ chehˇ ve teˇ co˗e nawˬ ve kanˉ htaꞈ te tcuh laˇ tuˬ yoˬ.’

Paw hkuˇ Eˇliˆ lehˬ Haˍnaˆ gʼaˇ hteꞈ hawˬ chehˇ ve htaꞈ gʼa mawˬ leh tzuhˬ bvuhˆ ve tehꞈ dawˇ ve yoˬ. Yaꞈ hkʼaˇ, Haˍnaˆ kʼoˆ piˇ ve, ‘Jawˇmawˇ˗oˬ, ngaˬ tzuhˬ bvuhˆ ve maˇ heˆ. Ngaˬ dawˇ haˍ jaˇ leh choˬ kaˬ lo Gʼuiˬ sha htaꞈ hto piˇ chehˇ ve yoˬ.’ Eˇliˆ yawˇ dawˇ yaꞈ ve tehꞈ shiˍ ve teˇ yanˇ, yawˇ yawˇ htaꞈ kʼoˆ piˇ ve, ‘nawˬ lawˬ ve hkʼe Gʼuiˬ sha awˬ bon naꞈ laˇ piˇ˗oˆ.’ Peuˬ leh Haˍnaˆ nyi ma sha leh kʼoꞈ˗e ve yoˬ. Oˇ ve hkʼawꞈ nawˉ, teˇ hkʼawꞈ maˇ gaˬ sheˍ htaˇ, yawˇ yaˇ paˍ teˇ gʼaˇ cawˬ la leh yawˇ htaꞈ Saˍmo˗eˍ laˆ tehꞈ meh piˇ ve yoˬ. Haˍnaˆ hkʼaˬ ma ha lehˬ ve nawˬ dawˇ mawˬ˗aw laˇ?

 Haˍnaˆ Yaˬhoˉvaˬ geh ka tiꞈ te taˍ ve hkʼe yawˇ maˇ leunˇ. Saˍmo˗eˍlaˆ awˬ e ve cuˇ maˇ dawˬ ve teˇ yanˇ, Haˍnaˆ yawˇ htaꞈ bon yehˬ hkʼaw kanˉ te tuˬ shiˍ kʼai ve yoˬ. Yawˇ Eˇliˆ htaꞈ kʼoˆ piˇ ve, ‘ngaˬ bon lawˬ ve hkʼe yaˇ chi teˇ gʼaˇ gʼa leh yawˇ a shaꞈ teꞈ chehˇ ve teˇ co˗e Yaˬhoˉvaˬ ve chaw hpehꞈ tuˬ yoˬ.’ Eˇlaˍkaˍnaˆ leh Haˍnaˆ teˇ hkʼawꞈ le le Saˍmo˗eˍlaˆ geh ca guiˇ piˇ leh aˉ poꞈ awˬ suhˉ kaꞈ yuˬ kʼai piˇ ve yoˬ. Yaˬhoˉvaˬ lehˬ Haˍnaˆ htaꞈ yaˇ paˍ 3 gʼaˇ leh yaˇ miˇ 2 gʼaˇ kʼawꞈ cawˬ la piˇ ve yoˬ.