Iˉsaˍreˍlaˆ chaw maˇ˗awˍ ve Yaˬhoˉvaˬ htaꞈ baˬ taˉ leh maˇ heˆ heˆ ve gʼuiˬ sha htaꞈ oˉ kʼoˍ kʼawꞈ pui ve yoˬ. Hkʼe te leh, Yaˬhoˉvaˬ yawˇ hui ve mvuhˇ miˬ htaꞈ Hpiˇliˇtiˆ chaw uˉ peunˍ tcuh ve yoˬ. Yaꞈ hkʼaˇ, Iˉsaˍreˍlaˆ chaw teˇ hpaˍ hpaˍ Yaˬhoˉvaˬ htaꞈ haꞈ chehˇ sheˍ ve yoˬ. Teˇ gʼaˇ lehˬ Maˍnawˍ yawˇ teˇ ca yaˇ maˇ cawˬ. Teˇ nyi htaˇ, Yaˬhoˉvaˬ lehˬ yawˇ ve awˬ miˇ ma geh mvuhˇ naw ma tcuh yaˇ htaꞈ kʼai tcuh leh yawˇ htaꞈ kʼoˆ piˇ ve, ‘nawˬ yaˇ paˍ teˇ gʼaˇ cawˬ la tuˬ yoˬ. Yawˇ lehˬ Iˉsaˍreˍlaˆ chaw htaꞈ Hpiˇliˇtiˆ chaw ve laꞈ sheh hkʼaw ponˬ piˇ leh Naˍzaˍriˆ te tuˬ yoˬ.’ Naˍzaˍriˆ aˬ htoꞈ ma le shiˍ˗aˬ laˇ? Naˍzaˍriˆ lehˬ Yaˬhoˉvaˬ ve kanˉ te ve chaw hpehꞈ leh yawˇ ve uˉ hkeh mvuh maˇ gʼa nuˆ.

Oˇ ve hkʼawꞈ nawˉ, Maˍnawˍ yaˇ paˍ paw la leh yawˇ htaꞈ Sanˍsonˍ tehꞈ meh piˇ ve yoˬ. Yawˇ uiˍ la ve teˇ yanˇ, Yaˬhoˉvaˬ yawˇ htaꞈ awˬ gʼaˇ uiˍ la tcuh ve yoˬ. Sanˍsonˍ laˇ caˬ shiˉ htaꞈ tiˇ pehˍ gʼa ve yoˬ. Teˇ pawˆ htaˇ, yawˇ Hpiˇliˇtiˆ chaw 30 gʼaˇ htaꞈ tiˇ pehˍ piˇ ve yoˬ. Hpiˇliˇtiˆ chaw yawˇ htaꞈ nyi bawˬ jaˇ leh tiˇ pehˍ gaˇ ve yoˬ. Teˇ haˉ htaˇ, Sanˍsonˍ Gaˍsaˍ venˇ lo zuhꞈ muiˉ kʼa chehˇ htaˇ, mvuhˇ shawˉ htaˇ Hpiˇliˇtiˆ chaw yawˇ htaꞈ tiˇ pehˍ tuˬ laˇ venˇ yehˬ miˉ lo ca law taˍ ve yoˬ. Yaꞈ hkʼaˇ, sheh kʼaw hkui htaˇ, Sanˍsonˍ tu la leh laˇ venˇ yehˬ miˉ lo kʼai ve yoˬ. Yawˇ laˇ venˇ ve yehˬ miˉ htaꞈ hpaˆ sheˬ leh Heˍbronˍ venˇ awˬ paˇ lo ve hkʼaw pui hkʼoˆ lo taˆ taˆ˗e ve yoˬ!

Oˇ ve hkʼawꞈ nawˉ, Hpiˇliˇtiˆ chaw Sanˍsonˍ ve awˬ miˇ ma Deˍleˍlaˆ geh kʼai leh kʼoˆ ve, ‘aˬ htoꞈ ma te Sanˍsonˍ awˬ gʼaˇ uiˍ ve awˬ lawn nawˬ ngaˬ hui htaꞈ hto laˇ ve kʼo, hpu 5,500 htehꞈ peꞈ laˇ tuˬ yoˬ. Ngaˬ hui yawˇ htaꞈ htawnˍ hkʼaw lo yuˬ keu gaˇ ve yoˬ.’ Yawˇ hpu heuˆ gaˇ leh yawˇ hui kʼoˆ ve hkʼe te piˇ ve yoˬ. Awˉ lawˉ htaˇ, aˬ htoꞈ ma te Sanˍsonˍ awˬ gʼaˇ uiˍ ve Deˍleˍlaˆ htaꞈ maˇ kʼoˆ piˇ. Yaꞈ hkʼaˇ, yawˇ teˇ hkui teˇ hkui na piˇ ve pa taw, Sanˍsonˍ yawˇ htaꞈ kʼoˆ piˇ ve, ‘ngaˬ Naˍzaˍriˆ hpehꞈ ve pa taw, uˉ hkeh mvuh teˇ pawˆ kaꞈ maˇ nuˆ jaw. Ngaˬ uˉ hkeh mvuh nuˆ ve kʼo, ngaˬ ve awˬ gʼaˇ nuˇ kʼai tuˬ yoˬ.’ Sanˍsonˍ awˬ lawn chi ve Deˍleˍlaˆ htaꞈ kʼoˆ piˇ ve pa taw, kawˆ tuˬ uiˍ jaˇ.

Deˍleˍlaˆ ‘yawˇ ve awˬ lawn htaꞈ shiˍ˗oˬ’ tehꞈ Hpiˇliˇtiˆ chaw htaꞈ haˆ ca kʼoˆ piˇ ve yoˬ. ‘Yawˇ Sanˍsonˍ htaꞈ pfuhˬ tehˉ kʼu hkʼoˆ zuhꞈ tcuh leh zuhꞈ muiˉ kʼa  peuˬ hkʼawꞈ nawˉ, yawˇ shu htaꞈ kuˬ leh uˉ hkeh mvuh nuˆ baˬ tcuh ve yoˬ. Hkʼe te leh, yawˇ kuˬ leh kʼoˆ ve, ‘Sanˍsonˍ˗oˬ, Hpiˇliˇtiˆ chaw teˇ hpaˍ gaˬ la peuˬ.’ Sanˍsonˍ tu la htaˇ, yawˇ ve awˬ gʼaˇ maˇ cawˬ. Hpiˇliˇtiˆ chaw yawˇ htaꞈ yuˬ kʼai leh mehˆ shiˍ nyiˇ paˉ paˉ juˆ peꞈ piˇ leh htawnˍ hkʼaw lo yuˬ keu piˇ ve yoˬ.

Teˇ nyi htaˇ, Hpiˇliˇtiˆ chaw laiˉ hinˉ gʼaˇ Daˍgonˍ gʼuiˬ sha ve bon yehˬ hkʼaw hpawnˬ la leh kʼoˆ ve, ‘ngaˬ hui ve gʼuiˬ sha ga laˇ leh Sanˍsonˍ htaꞈ yuˬ gʼa peuˬ! Sanˍsonˍ htaꞈ yuˬ tawˆ la leh ngaˬ hui htaꞈ pyawˍ tuˬ te maˍ laˇ tcuh˗oˆ!’ Yawˇ hui Sanˍsonˍ htaꞈ yehˬ hkuiˉ daw 2 maˬ awˬ kaˍ lo huˉ tcuh taˍ leh kʼoˆ guiˇ gʼuiˬ guiˇ piˇ ve yoˬ. Sanˍsonˍ awˬ hkawˇ bvuhˬ chaweh kʼoˆ ve, ‘Yaˬhoˉvaˬ˗oˬ, ngaˬ htaꞈ awˬ gʼaˇ teˇ pawˆ kʼawꞈ peꞈ laˇ˗oˆ.’ Oˇ teˇ hkui Sanˍsonˍ ve uˉ hkeh mvuh kʼawꞈ zuhˍ la˗oˬ. Yawˇ awˬ gʼaˇ hkʼa cawˬ ve yehˬ hkuiˉ daw htaꞈ caꞈ leh bon yehˬ hkʼaw chehˇ ve chaw teˇ gʼaˇ le le leh yawˇ htaꞈ kaꞈ paˍ nyiˉ tcuh leh suh˗e peuˬ ve yoˬ.