Paw hkuˇ Eˇliˆ yaˇ paˍ 2 gʼaˇ cawˬ ve lehˬ Hawˇhpaˍniˆ leh Hpiˇneˍhaˆ meh ve yoˬ. Yawˇ hui paw hkuˇ ve kanˉ htaꞈ te leh bon yehˬ hkʼaw chehˇ ve yoˬ. Yawˇ ve yaˇ 2 gʼaˇ Yaˬhoˉvaˬ ve awˬ liˇ tawˇ hkawˇ htaꞈ maˇ na yuˬ leh Gʼuiˬ sha ve chaw htaꞈ maˇ daꞈ ve awˬ ceuˬ te piˇ ve yoˬ. Iˉsaˍreˍlaˆ chaw Yaˬhoˉvaˬ htaꞈ to nuˇ to shaˆ ca tuˉ tanˇ la htaˇ, awˬ shaˍ daꞈ kuiˬ lo Hawˇhpaˍniˆ leh Hpiˇneˍhaˆ yuˬ caˇ ve yoˬ. Eˇliˆ yawˇ ve yaˇ paˍ te yaꞈ ve htaꞈ shiˍ ve htawˇ teꞈ chiˉ maˇ kʼoˆ piˇ ve yoˬ. Yaˬhoˉvaˬ chi hkʼe tiˉ te tcuh tuˬ laˇ?

Saˍmo˗eˍlaˆ lehˬ Hawˇhpaˍniˆ leh Hpiˇneˍhaˆ aꞈ kehˉ a shaꞈ i jaˇ. Yaꞈ hkʼaˇ, yawˇ oˇ ve 2 gʼaˇ htaꞈ maˇ henˇ yuˬ. Yaˬhoˉvaˬ Saˍmo˗eˍlaˆ htaꞈ nyi hkʼaˇ suh jaˇ. Saˍmo˗eˍlaˆ zuhꞈ muiˉ kʼa chehˇ ve teˇ haˉ htaˇ, yawˇ htaꞈ kuˬ tu piˇ ve awˬ hkawˇ gʼa kaˇ ve yoˬ. Yawˇ Eˇliˆ geh gʼuiˇ kʼai leh na nyi piˇ ve, ‘nawˬ ngaˬ htaꞈ kuˬ ve laˇ?’ Yaꞈ hkʼaˇ, Eˇliˆ kʼoˆ piˇ ve, ‘ngaˬ nawˬ htaꞈ maˇ kuˬ. Ca kʼawꞈ zuhꞈ˗e loˬ.’ Saˍmo˗eˍlaˆ ca kʼawꞈ zuhꞈ˗e leh kuˬ ve awˬ hkawˇ htaꞈ gʼa kʼawꞈ kaˇ ve yoˬ. 3 pawˆ teˇ pawˆ kuˬ ve awˬ hkawˇ Saˍmo˗eˍlaˆ gʼa kʼawꞈ kaˇ ve teˇ yanˇ, chi ve Yaˬhoˉvaˬ hkawˇ tehꞈ Eˇliˆ shiˍ ve yoˬ. Yawˇ Saˍmo˗eˍlaˆ htaꞈ kʼoˆ piˇ ve, teˇ pawˆ kʼawꞈ kuˬ laˇ ve kʼo, ‘Yaˬhoˉvaˬ˗oˬ ngaˬ htaꞈ aˬ htoꞈ ma kʼoˆ laˇ gaˇ ve le? Ngaˬ na taˍ ve yoˬ’ tehꞈ yaw hkʼawꞈ piˇ sheˍ.

Saˍmo˗eˍlaˆ ca kʼawꞈ zuhꞈ˗e leh kuˬ ve awˬ hkawˇ gʼa kʼawꞈ kaˇ ve, ‘Saˍmo˗eˍlaˆ˗oˬ! Saˍmo˗eˍlaˆ˗oˬ!’ Yawˇ yaw hkʼawꞈ piˇ ve, ‘Yaˬhoˉvaˬ ngaˬ htaꞈ  aˬ htoꞈ ma kʼoˆ laˇ gaˇ ve le? Ngaˬ na taˍ ve yoˬ.’ Yaˬhoˉvaˬ yawˇ htaꞈ kʼoˆ piˇ ve, ‘Eˇliˆ ve yehˬ kʼa htaꞈ ngaˬ ciˍ yanˍ piˇ tuˬ yoˬ tehꞈ yawˇ htaꞈ ca kʼoˆ piˇ˗oˆ. Awˬ lawn kʼo, ngaˬ ve bon yehˬ hkʼaw yawˇ ve yaˇ paˍ venˇ baˆ te ve htawˇ, shaˍ tiꞈ maˇ piˇ.’ Teˇ nyi le le te jaw ve hkʼe Saˍmo˗eˍlaˆ lehˬ mvuhˇ htiˇ la htaˇ, bon yehˬ yehˬ miˉ ca hpaw˗e ve yoˬ. Yaˬhoˉvaˬ aˬ htoꞈ ma kʼoˆ laˇ ve yawˇ paw hkuˇ Eˇliˆ htaꞈ kʼoˆ piˇ maˇ haˆ. Yaꞈ hkʼaˇ, Eˇliˆ yawˇ htaꞈ kuˬ leh na nyi piˇ ve, ‘Yaˬhoˉvaˬ nawˬ htaꞈ aˬ htoꞈ ma kʼoˆ laˇ ve le? Ngaˬ htaꞈ hkʼa peu˗eˬ kʼoˆ laˇ˗oˆ.’ Saˍmo˗eˍlaˆ Eˇliˆ htaꞈ hkʼa peu˗eˬ kʼoˆ maˍ piˇ ve yoˬ.

Saˍmo˗eˍlaˆ uiˍ la˗oˬ ve htawˇ, Yaˬhoˉvaˬ yawˇ geh chehˇ sheˍ ve yoˬ. Yaˬhoˉvaˬ Saˍmo˗eˍlaˆ htaꞈ leuˆ yuˬ leh tcuh kaˍ paˍ leh suhˉ jehˬ paˍ te tcuh ve yoˬ tehꞈ Iˉsaˍreˍlaˆ chaw teˇ gʼaˇ le le shiˍ taˍ ve yoˬ.