Iˉsaˍreˍlaˆ chaw Yaˬhoˉvaˬ htaꞈ baˬ taˉ leh maˇ heˆ heˆ ve gʼuiˬ sha htaꞈ oˉ kʼoˍ ca kʼawꞈ pui ve yoˬ. Aˍmawˇniˆ chaw yawˇ hui htaꞈ ca bawˆ la htaˇ, maˇ heˆ heˆ ve gʼuiˬ sha yawˇ hui htaꞈ teꞈ chiˉ kaꞈ ga piˇ maˇ gʼa. Iˉsaˍreˍlaˆ chaw laiˉ hkʼawꞈ gʼa tuꞈ hkanˍ chehˇ ve yoˬ. Awˬ leh meuˇ gaˬ leh Yaˬhoˉvaˬ geh lawˬ leh kʼoˆ ve, ‘ngaˬ hui yaꞈ kʼai peuˬ. Canˇ paˍ laꞈ hkʼaw a ciˉ ponˬ laˇ˗oˆ.’ Iˉsaˍreˍlaˆ chaw a shu yawˇ ve shaˉ hoꞈ htaꞈ te luˬ leh Yaˬhoˉvaˬ htaꞈ oˉ kʼoˍ ca kʼawꞈ pui la ve yoˬ. Yaˬhoˉvaˬ yawˇ hui tuꞈ hkanˍ chehˇ ve htaꞈ maˇ kʼawꞈ mawˬ gaˇ ve yoˬ.

Maꞈ bawˆ paˍ Yeˍhpaˍtaˆ meh ve teˇ gʼaˇ htaꞈ leuˆ yuˬ leh Aˍmawˇniˆ chaw hui htaꞈ maꞈ bawˆ daꞈ tuˬ sheh kʼai tcuh ve yoˬ. Yawˇ Yaˬhoˉvaˬ htaꞈ ka tiꞈ te leh kʼoˆ ve, ‘maꞈ bawˆ daꞈ ve chi teˇ pawˆ ngaˬ hui gʼaˇ tuˬ ga laˇ ve kʼo, ngaˬ aˉ hkʼaw kʼoꞈ˗e htaˇ, yehˬ hkʼaw ve chaw ngaˬ htaꞈ awˉ lawˉ ca haꞈ yuˬ la ve teˇ gʼaˇ ngaˬ nawˬ htaꞈ chiˇ aꞈ laˇ tuˬ yoˬ.’ Yaˬhoˉvaˬ Yeˍhpaˍtaˆ ve bon lawˬ hkawˇ htaꞈ na yuˬ piˇ leh yawˇ htaꞈ maꞈ bawˆ gʼaˇ tcuh ve yoˬ.

 Yeˍhpaˍtaˆ aˉ hkʼaw gaˬ la htaˇ, awˉ lawˉ ca haꞈ yuˬ la ve teˇ gʼaˇ lehˬ yawˇ ve yaˇ miˇ hpehꞈ ve yoˬ. Yawˇ ve yaˇ miˇ tinˍ hteˆ kʼaˍ hkʼeˆ leh, yawˇ htaꞈ ca haꞈ yuˬ la ve yoˬ. Yeˍhpaˍtaˆ hkʼaˬ hkʼe te tuˬ le? Yawˇ Yaˬhoˉvaˬ htaꞈ ka tiꞈ te piˇ taˍ ve htaꞈ maˇ leunˇ. Yawˇ kʼoˆ ve, ‘yaˇ miˇ˗oˬ, nawˬ lehˬ, ngaˬ ve nyi ma htaꞈ peꞈ hkoˇ tuˬ te laˇ ve yoˬ. Awˬ pa Yaˬhoˉvaˬ geh ka tiꞈ te taˍ peuˬ ve htaꞈ gʼa haꞈ shaˉ ve yoˬ. Nawˬ Shiˉlonˍ venˇ lo bon yehˬ hkʼaw kanˉ te tuˬ, awˬ pa shiˍ kʼai laˇ tuˬ yoˬ.’ Yaꞈ hkʼaˇ, yawˇ ve yaˇ miˇ kʼoˆ ve, ‘ngaˬ pa˗oˬ, nawˬ Yaˬhoˉvaˬ htaꞈ ka tiꞈ te taˍ peuˬ ve hkʼe te˗oˆ. Ngaˬ awˬ chawˇ geh 2 ha pa hkʼaw hkʼoˆ lo ca guiˇ toˇ tuˬ awˬ yanˇ a ciˉ peꞈ laˇ˗oˆ. Oˇ ve hkʼawꞈ nawˉ, bon yehˬ hkʼaw ngaˬ kanˉ ca te tuˬ yoˬ.’ yawˇ a shaꞈ teꞈ chehˇ ve teˇ co˗e, bon yehˬ hkʼaw kanˉ te ve yoˬ. Awˬ chawˇ hui kaꞈ teˇ hkʼawꞈ le le Shiˉlonˍ venˇ lo ca guiˇ la piˇ ve yoˬ.