Sawˉluꞈ suh peuˬ hkʼawꞈ nawˉ, Daˍviˆ 30 hkʼawꞈ gaˬ htaˇ, jawˇ mawˇ gʼa te ve yoˬ. Jawˇmawˇ te ve laiˉ hkʼawꞈ peuˬ hkʼawꞈ nawˉ, mvuhˇ hpeuꞈ la teˇ haˉ htaˇ Daˍviˆ hawˉ yehˬ hkʼoˆ taˆ˗e leh nyi peu ve teˇ yanˇ, daꞈ jaˇ ve yaˇ miˇ teˇ gʼaˇ htaꞈ mawˬ ve yoˬ. Yawˇ lehˬ chaw htaꞈ peu leh ca chaˬ nyi tcuh htaˇ yaˇ miˇ oˇ ve Baˍtaˍsheˍbaˆ meh leh Uˇriˆyaꞈ ve awˬ miˇ ma hpehꞈ ve htaꞈ gʼa shiˍ ve yoˬ. Daˍviˆ lehˬ chaw teˇ gʼaˇ htaꞈ kʼai tcuh leh Baˍtaˍsheˍbaˆ htaꞈ yawˇ ve hawˉ yehˬ hkʼaw shiˍ laˬ tcuh leh yawˇ geh zuhꞈ ve yoˬ. Peuˬ leh Baˍtaˍsheˍbaˆ yaˇ hu la ve yoˬ. Daˍviˆ yawˇ te taˍ ve htaꞈ faˉ taˍ ve yoˬ. Maꞈ bawˆ daꞈ kuiˬ lo Uˇriˆyaꞈ gʼuˇ suhˍ peuˍ tcuh leh maꞈ yaˇ awˬ hkʼawꞈ nawˉ hpawˇ hpfuhˆ kʼawꞈ la tcuh˗o tehꞈ yawˇ ve maꞈ poˍ htaꞈ kʼoˆ piˇ ve yoˬ. Bawˆ daꞈ kuiˬ lo Uˇriˆyaꞈ suh peuˬ hkʼawꞈ nawˉ, Daˍviˆ Baˍtaˍsheˍbaˆ htaꞈ heuˆ ve yoˬ.

Yaꞈ hkʼaˇ, maˇ daꞈ ve teˇ ceuˬ le le te ve htaꞈ Yaˬhoˉvaˬ mawˬ ve yoˬ. Yawˇ hkʼaˬ hkʼe gu tuˬ le? Yaˬhoˉvaˬ tcuh kaˍ paˍ Naˍtanˍ Daˍviˆ geh kʼai tcuh ve yoˬ. Naˍtanˍ Daˍviˆ htaꞈ kʼoˆ piˇ ve, ‘paw sha ve chaw teˇ gʼaˇ yawˬ cawˬ maˇ jaˇ. Haˍ gʼawˇ ve chaw teˇ gʼaˇ kʼo, yawˇ haꞈ jaˇ ve yawˬ teˇ hkeh tiˉ cawˬ ve yoˬ. Yaꞈ hkʼaˇ, paw sha ve chaw oˇ ve teˇ gʼaˇ lehˬ haˍ gʼawˇ ve chaw ve yawˬ teˇ hkeh tiˉ ve htaꞈ hiˉ yuˬ ve yoˬ.’ Daˍviˆ nyi ma zuhˆ jaˇ leh kʼoˆ ve, ‘paw sha ve chaw chi teˇ gʼaˇ suh keunˍ ve yoˬ!’ Naˍtanˍ Daˍviˆ htaꞈ kʼawꞈ kʼoˆ piˇ ve, ‘paw sha ve oˇ ve teˇ gʼaˇ lehˬ nawˬ yoˬ!’ Daˍviˆ nyi ma luˬ jaˇ. ‘Ngaˬ Yaˬhoˉvaˬ htaꞈ te yaꞈ peuˬ’ tehꞈ yawˇ Naˍtanˍ htaꞈ kʼoˆ piˇ ve yoˬ. Daˍviˆ venˇ baˆ te yaꞈ peuˬ hkʼawꞈ nawˉ, yawˇ ve yehˬ kʼa dawˇ haˍ tuˬ laiˉ ceuˬ gʼa hpuˇ ve yoˬ. Yaˬhoˉvaˬ yawˇ htaꞈ ciˍ yanˍ piˇ ve htawˇ, maˇ suh tcuh. Awˬ lawn kʼo, yawˇ ka tiꞈ yeˬ leh nyi ma nuˇ nehˬ ve yoˬ.

Daˍviˆ Yaˬhoˉvaˬ htaꞈ bon yehˬ te piˇ gaˇ ve yoˬ. Yaꞈ hkʼaˇ, Yaˬhoˉvaˬ lehˬ Daˍviˆ ve yaˇ paˍ Sawˉlaꞈmonˍ htaꞈ leuˆ yuˬ leh bon yehˬ te tcuh ve yoˬ.  Sawˉlaꞈmonˍ bon yehˬ te tuˬ ve mawˇ yehˇ hkʼeun teˇ hpaˍ Daˍviˆ ca teh taˍ piˇ leh kʼoˆ ve, ‘Yaˬhoˉvaˬ ve bon yehˬ lonˉ lehˬ, daꞈ jaˇ nyi sha jaˇ leh awˬ meh bvuhˬ ve gʼa hpehꞈ piˇ ve yoˬ. Yaꞈ hkʼaˇ, Sawˉlaꞈmonˍ a shaꞈ i sheˍ leh ngaˬ awˬ hkʼaˇ hkʼa dehꞈ gʼa gu piˇ taˍ tuˬ yoˬ.’ Kanˉ chi htaꞈ te tuˬ Daˍviˆ hpu tanˇ tanˇ maˇ jaˇ. Laꞈ shaˉ maˉ cheuˬ jaˇ ve chaw laiˉ gʼaˇ htaꞈ htawˇ ca taˍ ve yoˬ. Yawˇ Sawˉlaꞈmonˍ htaꞈ shi, hpu leh Keˍdaˍ suhˆ chi Tuˇruˆ leh Siˉdonˍ venˇ hkʼaw yuˬ laˬ taˍ ve yoˬ. Daˍviˆ maˇ suh sheˍ htaˇ, bon yehˬ te tuˬ gu taˍ ve awˬ hkʼaˇ Sawˉlaꞈmonˍ htaꞈ maˍ piˇ ve yoˬ. Yawˇ kʼoˆ ve, ‘ngaˬ yaˇ bon yehˬ te tuˬ Yaˬhoˉvaˬ a pa htaꞈ gu teh tcuh laˇ ve yoˬ. Taˇ kawˆ. Yaˬhoˉvaˬ yaˇ htaꞈ ga laˇ leh awˬ gʼaˇ yuˬ tawˆ leh haꞈ hanˉ ve awˬ hkʼaw lo te kʼai˗o.’