Yaˬhoˉvaˬ Saˍmo˗eˍlaˆ htaꞈ kʼoˆ piˇ ve, ‘Yeˍsehˇ ve aˉ hkʼaw lo kʼai˗o. Yawˇ ve yaˇ paˍ teˇ gʼaˇ Iˉsaˍreˍlaˆ chaw awˬ hkʼaw lo jawˇ mawˇ te tcuh tuˬ yoˬ.’ Hkʼe te leh, Saˍmo˗eˍlaˆ Yeˍsehˇ ve aˉ hkʼaw lo kʼai ve yoˬ. Saˍmo˗eˍlaˆ Yeˍsehˇ ve yaˇ paˍ uiˍ htaꞈ mawˬ htaˇ, ‘Yaˬhoˉvaˬ chi teˇ gʼaˇ htaꞈ leuˆ yuˬ ve yoˬ’ tehꞈ yawˇ dawˇ ve yoˬ. Yaꞈ hkʼaˇ, Yaˬhoˉvaˬ yawˇ htaꞈ kʼoˆ piˇ ve chaw chi teˇ gʼaˇ maˇ heˆ. ‘Awˬ hkiˇ awˬ naˬ htaꞈ ceh nyi ve maˇ heˆ. Yaꞈ hkʼaˇ ngaˬ lehˬ, nyi ma htaꞈ nyi ve yoˬ.’

Yeˍsehˇ lehˬ yaˇ paˍ 6 gʼaˇ htaꞈ shiˍ veu laˇ leh Saˍmo˗eˍlaˆ htaꞈ maˍ piˇ ve yoˬ. Yaꞈ hkʼaˇ, Saˍmo˗eˍlaˆ kʼoˆ piˇ ve, ‘Yaˬhoˉvaˬ yawˇ hui htaꞈ maˇ leuˆ yuˬ, nawˬ yaˇ paˍ kʼawꞈ cawˬ sheˍ laˇ?’ Yeˍsehˇ hkʼawꞈ piˇ ve, ‘Daˍviˆ meh ve yaˇ paˍ leh teˇ gʼaˇ cawˬ sheˍ. Yawˇ yawˬ hawˉ kʼai˗oˬ.’ Daˍviˆ gaˬ la htaˇ, Yaˬhoˉvaˬ Saˍmo˗eˍlaˆ htaꞈ kʼoˆ piˇ ve, ‘ngaˬ chi teˇ gʼaˇ htaꞈ leuˆ yuˬ ve yoˬ!’ Saˍmo˗eˍlaˆ Daˍviˆ ve oˉ kʼoˍ htaꞈ naˍ manˇ pfuhˍ piˇ leh Iˉsaˍreˍlaˆ chaw htaꞈ uˉ peunˍ tuˬ Sawˉluꞈ awˬ tan jawˇ mawˇ te tcuh ve yoˬ.

Awˬ hkʼawꞈ nawˉ gaˬ leh Iˉsaˍreˍlaˆ chaw Hpiˇliˇtiˆ chaw htaꞈ maꞈ bawˆ daꞈ ve yoˬ. Hpiˇliˇtiˆ chaw maꞈ poˍ Gawˇliˇyaꞈ meh ve teˇ gʼaˇ cawˬ ve yoˬ. Yawˇ awˬ to uiˍ jaˇ leh teˇ nyi le le Iˉsaˍreˍlaˆ chaw htaꞈ tanˬ daꞈ ve yoˬ. Gawˇliˇyaꞈ kuˬ leh kʼoˆ ve, ‘ngaˬ htaꞈ ca bawˆ la tuˬ chaw teˇ gʼaˇ htaꞈ leuˆ yuˬ˗oꞈ. Chaw oˇ ve teˇ gʼaˇ ngaˬ htaꞈ tiˇ pehˍ gʼa ve kʼo, ngaˬ hui nawˬ hui ve awˬ ceˬ te tuˬ yoˬ. Ngaˬ yawˇ htaꞈ tiˇ pehˍ gʼa ve kʼo, nawˬ hui ngaˬ hui ve awˬ ceˬ gʼa te tuˬ yoˬ.’

Teˇ nyi htaˇ, maꞈ bawˆ tuˬ hpoˆ chehˇ taˍ kui lo awˬ viˉ paˍ hui htaꞈ Daˍviˆ caˇ tuˬ ca yuˬ kʼoˍ piˇ ve yoˬ. Yawˇ Gawˇliˇyaꞈ kʼoˆ ve tawˇ htaꞈ gʼa kaˇ htaˇ yawˇ jawˇ mawˇ Sawˉluꞈ htaꞈ kʼoˆ piˇ ve, ‘ngaˬ yawˇ htaꞈ ca bawˆ tuˬ yoˬ.’ Sawˉluꞈ kʼoˆ piˇ ve, ‘nawˬ yaˇ  paˍ ehˉ ceh tiˉ hpehꞈ sheˍ.’ Daˍviˆ hkʼawꞈ piˇ ve, ‘Yaˬhoˉvaˬ ngaˬ htaꞈ ga laˇ tuˬ yoˬ.’

Jawˇmawˇ Sawˉluꞈ kuiˇ te taˍ ve yawˇ ve veuꞈ kʼaˇ Daˍviˆ htaꞈ kʼehˆ feuˉ piˇ ve yoˬ. Yaꞈ hkʼaˇ, Daˍviˆ kʼoˆ ve, ‘venꞈ kʼaˇ chi htaꞈ veuꞈ ve kʼo, ngaˬ maꞈ hkʼa dehꞈ bawˆ maˇ sha.’ Daˍviˆ lehˬ hawˉ ma htaꞈ yuˬ leh iˉ kaˆ lawˬ kʼaˉ ehˉ hkʼaw haˉ pui shiˍ ngaˇ shiˍ htaꞈ gʼawˆ yuˬ leh yawˇ ve miˉ chaw hkʼaw keu peuˬ hkʼawꞈ nawˉ, Daˍviˆ Gawˇliˇyaꞈ geh gʼuiˇ kʼai ve yoˬ. Gawˇliˇyaꞈ Daˍviˆ htaꞈ mawˬ leh kʼoˆ ve, ‘yaˇ paˍ ehˉ˗oˬ, nawˬ ngaˬ geh laˬ˗oꞈ! Nawˬ ve awˬ to ngaˆ leh to nuˇ to shaˆ htaꞈ caˍ piˇ tuˬ yoˬ.’ Daˍviˆ maˇ kawˆ leh kʼoˆ piˇ ve, ‘nawˬ lehˬ aˉ htaw leh gehˇ pfuhˇ laˬ ve yoˬ. Yaꞈ hkʼaˇ, ngaˬ lehˬ Yaˬhoˉvaˬ ve awˬ meh hkʼaw laˬ ve yoˬ. Nawˬ ngaˬ hui htaꞈ bawˆ daꞈ ve maˇ heˆ. Gʼuiˬ sha htaꞈ bawˆ daꞈ ve yoˬ. Yaˬhoˉvaˬ aˉ htaw leh gehˇ aꞈ kehˉ kanˇ paˆ cawˬ ve yoˬ tehꞈ choˬ kaˬ lo chehˇ taˍ ve chaw teˇ gʼaˇ le le gʼa mawˬ tuˬ yoˬ. Yawˇ ngaˬ hui htaꞈ ga laˇ leh nawˬ hui htaꞈ bawˆ gʼaˇ tuˬ yoˬ!’

Daˍviˆ haˉ pui shiˍ teˇ shiˍ gʼawˆ yuˬ peuˬ hkʼawꞈ nawˉ, hawˉ ma hkʼaw keu sheˍ leh Gawˇliˇyaꞈ htaꞈ feu hpehˇ piˇ ve yoˬ. Yaˬhoˉvaˬ haˉ pui oˇ ve teˇ shiˍ Gawˇliˇyaꞈ ve naˍ kʼaˍ pui htaꞈ heuˆ˗e tcuh leh Gawˇliˇyaꞈ miˬ chaˇ hkʼoˆ lo paiˍ˗e leh suh˗e ve yoˬ. Hpiˇliˇtiˆ chaw lehˬ Gawˇliˇyaꞈ suh peuˬ ve htaꞈ mawˬ ve teˇ yanˇ, yawˇ hui hpaw˗e ve yoˬ. Nawˬ Daˍviˆ hkʼa shuˍ Yaˬhoˉvaˬ htaꞈ yonˍ˗aw laˇ?