Daˍviˆ Gawˇliˇyaꞈ htaꞈ tiˇ pehˍ peuˬ hkʼawꞈ nawˉ, jawˇ mawˇ Sawˉluꞈ Daˍviˆ htaꞈ maꞈ yaˇ hkʼaw ve maꞈ poˍ te tcuh ve yoˬ. Daˍviˆ maꞈ bawˆ ve hkʼaw laiˉ pawˆ gʼaˇ leh shu yawˇ htaꞈ chiˇ mvuh piˇ jaˇ ve yoˬ. Daˍviˆ maꞈ bawˆ kʼawꞈ la ve teˇ pawˆ le le yaˇ miˇ teˇ hpaˍ pawehˇ te leh liꞈ hkawˇ kʼa ve, ‘Sawˉluꞈ canˇ paˍ htaꞈ awˬ hinˉ gʼaˇ tiˇ pehˍ gʼa ve yoˬ. Yaꞈ hkʼaˇ, Daˍviˆ lehˬ canˇ paˍ htaꞈ awˬ meunˍ gʼaˇ tiˇ pehˍ gʼa ve yoˬ.’ Sawˉluꞈ Daˍviˆ htaꞈ hkawehˉ leh tiˇ pehˍ gaˇ ve nyi ma cawˬ la ve yoˬ.

Daˍviˆ tinˍ hteˆ puiˉ jaˇ. Teˇ nyi htaˇ Daˍviˆ jawˇ mawˇ Sawˉluꞈ htaꞈ tinˍ hteˆ maˍ piˇ ve teˇ yanˇ, Sawˉluꞈ yawˇ htaꞈ gehˇ baˬ hpehˇ piˇ ve yoˬ. Daˍviˆ htaꞈ maˇ heuˆ leh gehˇ gʼoꞈ pa htaꞈ tcuhˉ sheˬ ve yoˬ. Oˇ ve hkʼawꞈ nawˉ, Sawˉluꞈ Daˍviˆ htaꞈ tiˇ pehˍ tuˬ laiˉ pawˆ coˇ caˇ ve yoˬ. Daˍviˆ lehˬ heh puiˉ hkʼaw lo ca hpaw vaꞈ chehˇ taˍ ve yoˬ.

Sawˉluꞈ maꞈ yaˇ 3,000 gʼaˇ htaꞈ shiˍ veu leh Daˍviˆ htaꞈ gʼaꞈ ca toˇ ve yoˬ. Daˍviˆ hpaw vaꞈ taˍ kuiˬ haˉ kʼoˍ hkʼaw loꞈ˗e cawˇ˗e ve yoˬ. Daˍviˆ ve chaw Daˍviˆ htaꞈ tawˇ tsuhˆ˗ehˆ te piˇ ve, ‘chi nawˬ awˬ pon Sawˉluꞈ htaꞈ tiˇ pehˍ tuˬ daꞈ ve awˬ yanˇ hpehꞈ ve  yoˬ.’ Daˍviˆ a yehˉ yehˉ gaˆ kʼai leh, Sawˉluꞈ ve aˉ poꞈ teˇ peˆ nuˆ yuˬ ve yoˬ. Sawˉluꞈ maˇ nawˇ. Yaꞈ hkʼaˇ, awˬ hkʼawꞈ nawˉ gaˬ leh Yaˬhoˉvaˬ leuˆ yuˬ taˍ ve jawˇ mawˇ htaꞈ maˇ yawˆ yan ve tehꞈ dawˇ leh nyi ma luˬ jaˇ ve yoˬ. Hkʼe te leh, Sawˉluꞈ htaꞈ maˇ gʼa yaꞈ tuˬ yawˇ yawˇ ve chaw htaꞈ kʼoˆ piˇ ve yoˬ. Daˍviˆ Sawˉluꞈ htaꞈ kʼoˆ piˇ ve, nawˬ htaꞈ tiˇ pehˍ tuˬ awˬ yanˇ gʼa ve htawˇ, ngaˬ maˇ tiˇ pehˍ. Sawˉluꞈ Daˍviˆ htaꞈ maˇ kʼawꞈ gʼaꞈ yuˬ tuˬ nyi ma pa˗aw laˇ?

Maˇ pa. Sawˉluꞈ caˉ leh Daˍviˆ htaꞈ gʼaꞈ yuˬ ve yoˬ. Teˇ haˉ htaˇ, Daˍviˆ leh yawˇ ve awˬ shaˍ paˍ Aˍbiˆshehˆ Sawˉluꞈ deh chehˇ taˍ kuiˬ hkʼaw hkʼawˇ loꞈ˗e ve yoˬ. Oˇ teˇ yanˇ maꞈ yaˇ zuhꞈ muiˉ kʼa peuˬ. Sawˉluꞈ htaꞈ haꞈ shaˉ shehˍ hpaˇ maꞈ poˍ lonˉ Aˍbaˍnaˍ kaꞈ zuhꞈ muiˉ kʼa taˍ ve yoˬ. Aˍbiˆshehˆ Daˍviˆ htaꞈ kʼoˆ piˇ ve, ‘chi ve lehˬ ngaˬ hui awˬ pon daꞈ ve awˬ yanˇ hpehꞈ ve yoˬ. Yawˇ htaꞈ tiˇ pehˍ tcuh laˇ˗oˆ.’ Daˍviˆ kʼoˆ piˇ ve, ‘Sawˉluꞈ htaꞈ ciˍ yanˍ piˇ tuˬ Yaˬhoˉvaˬ htaꞈ teh taˍ piˇ˗oˆ. Ngaˬ huiˉ maˬ yawˇ ve gehˇ leh iˉ kaˆ aˉ moꞈ kʼoˍ htaꞈ yuˬ leh tawˆ kʼai˗a veuˬ.’

Sawˉluꞈ ve maꞈ yaˇ chehˇ taˍ kuiˬ hkʼaw awˬ paˇ lo Daˍviˆ taˆ˗e leh awˬ hkawˇ bvuhˬ chaweh kuˬ ve, ‘Aˍbaˍnaˍ˗oˬ, aˬ htoꞈ ma te nawˬ ve jawˇ mawˇ htaꞈ hkʼa dehꞈ maˇ nyi haꞈ shaˉ ve le? Jawˇmawˇ ve gehˇ leh iˉ kaˆ aˉ moꞈ kʼoˍ hkʼaˬ kʼai˗o le?’ Sawˉluꞈ Daˍviˆ ve hkawˇ htaꞈ tawnˇ gʼa leh yawˇ Daˍviˆ htaꞈ kʼoˆ piˇ ve, ‘nawˬ ngaˬ htaꞈ tiˇ pehˍ tuˬ awˬ yanˇ gʼa ve htawˇ, maˇ tiˇ pehˍ laˇ? Nawˬ lehˬ Iˉsaˍreˍlaˆ chaw ve jawˇ mawˇ gʼa te kʼai tuˬ ve htaꞈ ngaˬ shiˍ taˍ ve yoˬ.’ Hkʼe te leh, Sawˉluꞈ hawˉ yehˬ lo kʼoꞈ˗e ve yoˬ. Yaꞈ hkʼaˇ, Sawˉluꞈ ve yehˬ kʼa hkʼaw ve chaw teˇ gʼaˇ le le Daˍviˆ htaꞈ maˇ nyi bawˬ.