Yawˇnaˆtanˍ lehˬ jawˇ mawˇ Sawˉluꞈ ve yaˇ paˍ uiˍ hpehꞈ leh haꞈ hanˉ jaˇ ve maꞈ bawˆ paˍ hpehꞈ ve yoˬ. Yawˇnaˆtanˍ aˉ ceˬ aꞈ kehˉ gehˬ leh laˇ caˬ shiˉ aꞈ kehˉ awˬ gʼaˇ uiˍ ve yoˬ tehꞈ Daˍviˆ kʼoˆ jaw ve yoˬ. Teˇ nyi htaˇ Hpiˇliˇtiˆ maꞈ yaˇ 20 gʼaˇ haˉ hpawˇ hkʼoˆ chehˇ taˍ ve htaꞈ Yawˇnaˆtanˍ gʼa mawˬ ve yoˬ. Hkʼe te leh, Yawˇnaˆtanˍ yawˇ ve laꞈ caˉ pfuhˇ paˍ htaꞈ kʼoˆ piˇ ve, ‘Yaˬhoˉvaˬ awˬ heˆ maˍ laˇ ve htaꞈ ngaˬ hui law nyi tuˬ yoˬ. Hpiˇliˇtiˆ chaw ngaˬ hui htaꞈ kuˬ taˆ laˇ ve kʼo, Gʼuiˬ sha bawˆ daꞈ tcuh gaˇ ve yoˬ tehꞈ ngaˬ hui shiˍ ve yoˬ.’ Hkʼe te leh, Hpiˇliˇtiˆ chaw kʼoˆ ve, ‘taˆ la˗o bawˆ daꞈ˗a veuˬ!’ Yawˇ huiˉ maˬ Hpiˇliˇtiˆ chaw htaꞈ bawˆ gʼaˇ ve yoˬ.

Yawˇnaˆtanˍ Sawˉluꞈ ve yaˇ paˍ uiˍ hpehꞈ ve pa taw, jawˇ mawˇ gʼa te cawˇ ve yoˬ. Yaꞈ hkʼaˇ, Daˍviˆ Iˉsaˍreˍlaˆ chaw ve jawˇ mawˇ te tuˬ, Yaˬhoˉvaˬ leuˆ yuˬ ve yoˬ tehꞈ Yawˇnaˆtanˍ shiˍ ve yoˬ. Yawˇ Daˍviˆ htaꞈ maˇ hkawehˉ. Yawˇnaˆtanˍ leh Daˍviˆ awˬ chawˇ meuˆ daꞈ jaˇ. Yawˇ huiˉ maˬ nyi haꞈ shaˉ daꞈ leh ga daꞈ tuˬ ka tiꞈ te daꞈ ve yoˬ. Yawˇnaˆtanˍ yawˇ ve veuꞈ kʼaˇ, aˉ htaw, hkʼaˆ leh haˍ pi caˆ Daˍviˆ htaꞈ gʼawˆ teh tcuh ve yoˬ.

 Daˍviˆ Sawˉluꞈ htaꞈ hpaw˗e htaˇ, Yawˇnaˆtanˍ Daˍviˆ geh kʼai leh kʼoˆ ve, ‘taˇ kawˆ nyi ma haꞈ hanˉ sheˍ. Nawˬ jawˇ mawˇ te tuˬ Yaˬhoˉvaˬ leuˆ yuˬ taˍ peuˬ. Awˬ lawn chi ve ngaˬ pa htawˇ shiˍ peuˬ.’ Yawˇnaˆtanˍ hkʼa shuˍ, nawˬ daꞈ ve awˬ chawˇ cawˬ gaˇ˗aˬ laˇ?

Yawˇnaˆtanˍ laiˉ pawˆ a shaꞈ tanˇ leh Daˍviˆ htaꞈ ga piˇ ve yoˬ. Yawˇnaˆtanˍ yawˇ ve awˬ pa Daˍviˆ htaꞈ tiˇ pehˍ gaˇ ve yawˇ shiˍ ve yoˬ. Yawˇ awˬ pa htaꞈ kʼoˆ piˇ ve, ‘nawˬ Daˍviˆ htaꞈ tiˇ pehˍ ve kʼo, venˇ baˆ uiˍ jaˇ. Awˬ lawn kʼo, yawˇ maˇ te yaꞈ.’ Sawˉluꞈ Yawˇnaˆtanˍ htaꞈ nyi ma zuhˆ jaˇ. Laiˉ hkʼawꞈ gaˬ leh Sawˉluꞈ leh Yawˇnaˆtanˍ maꞈ bawˆ daꞈ kuiˬ lo suh˗e ve yoˬ.

Yawˇnaˆtanˍ suh peuˬ hkʼawꞈ nawˉ, Daˍviˆ Yawˇnaˆtanˍ ve yaˇ paˍ Meˍfiˆboˍshehˆ htaꞈ gʼaꞈ ca leh mawˬ peuˬ hkʼawꞈ nawˉ, yawˇ Meˍfiˆboˍshehˆ htaꞈ kʼoˆ piˇ ve, ‘nawˬ pa ngaˬ haꞈ ve awˬ chawˇ hpehꞈ ve yoˬ. Hkʼe te leh, yaꞈ nyi tanˬ leh ngaˬ nawˬ htaꞈ nyi haꞈ shaˉ laˇ tuˬ yoˬ. Nawˬ ngaˬ ve hawˉ yehˬ hkʼaw chehˇ leh hpui lawˇ hkʼoˆ ngaˬ ve caˇ tuˬ htaꞈ caˇ˗oˆ.’ Daˍviˆ yawˇ awˬ chawˇ Yawˇnaˆtanˍ htaꞈ maˇ leunˇ jaw.