Sawˉlaꞈmonˍ ve awˬ co˗e Yaˬhoˉvaˬ htaꞈ oˉ kʼoˍ pui htaˇ, Iˉsaˍreˍlaˆ chaw dawˇ sha gawˬ lehˍ ve ceh tiˉ cawˬ ve yoˬ. Yaꞈ hkʼaˇ, Sawˉlaꞈmonˍ lehˬ buiˇ shaˆ aˉ naˆ chaw shaˉ hoꞈ htaꞈ oˉ kʼoˍ pui ve yaˇ miˇ laiˉ gʼaˇ htaꞈ heuˆ ve yoˬ. Hkʼe te leh, Sawˉlaꞈmonˍ nyi ma pa leh shaˉ hoꞈ htaꞈ oˉ kʼoˍ tanˬ pui ve yoˬ. Yaˬhoˉvaˬ nyi ma zuhˆ jaˇ leh yawˇ Sawˉlaꞈmonˍ htaꞈ kʼoˆ piˇ ve, ‘Iˉsaˍreˍlaˆ mvuhˇ miˬ nawˬ ve yehˬ kʼa hkʼaw yuˬ tawˆ leh 2 peˆ pehˬ tuˬ yoˬ. Mvuhˇ miˬ uiˍ ve teˇ peˆ nawˬ ve awˬ ceˬ teˇ gʼaˇ htaꞈ piˇ leh i ve teˇ peˆ nawˬ ve yehˬ kʼa htaꞈ uˉ peunˍ tcuh laˇ tuˬ yoˬ.’

Sawˉlaꞈmonˍ ve awˬ ceˬ Yeˍyawˇbaoˍ htaꞈ kaꞈ Yaˬhoˉvaˬ awˬ lawn shiˍ tcuh piˇ ve yoˬ. Yeˍyawˇbaoˍ yaꞈ kʼaw juˇ kʼai chehˇ htaˇ, tcuh kaˍ paˍ Aˍbiˇyaˆ htaꞈ hpuˇ daꞈ ve yoˬ. Aˍbiˇyaˆ yawˇ ve aˉ poꞈ 12 peˆ tzuhꞈ suhˍ peuˬ leh yawˇ Yeˍyawˇbaoˍ htaꞈ kʼoˆ piˇ ve, ‘hpa 10 peˆ htaꞈ nawˬ yuˬ taˍ˗oꞈ. Awˬ lawn kʼo, Yaˬhoˉvaˬ lehˬ Iˉsaˍreˍlaˆ mvuhˇ miˬ 2 peˆ pehˬ leh Sawˉlaꞈmonˍ ve laꞈ sheh hkʼaw lo ngaˬ yuˬ tawˆ leh, nawˬ htaꞈ chaw 10 ceuˬ hkʼoˆ uˉ peunˍ tcuh laˇ tuˬ yoˬ.’ Jawˇmawˇ Sawˉlaꞈmonˍ awˬ lawn chi gʼa kaˇ htaˇ, Yeˍyawˇbaoˍ htaꞈ tiˇ pehˍ tuˬ awˬ hkʼaˇ ca ve yoˬ! Hkʼe te leh, Yeˍyawˇbaoˍ Eˇjiˇtuꞈ mvuhˇ miˬ lo hpaw˗e ve yoˬ. Sawˉlaꞈmonˍ suh peuˬ hkʼawꞈ nawˉ, yawˇ ve yaˇ paˍ Yawˇbaoˍ jawˇ mawˇ kʼawꞈ te ve yoˬ. Yeˍyawˇbaoˍ kawˆ tuˬ maˇ cawˬ ve htaꞈ gʼa kaˇ htaˇ, Iˉsaˍreˍlaˆ mvuhˇ miˬ lo kʼawꞈ la ve yoˬ.

 Iˉsaˍreˍlaˆ chaw mawˇ hui Yawˇbaoˍ htaꞈ kʼoˆ piˇ ve, ‘nawˬ ve chaw htaꞈ daꞈ ve te piˇ ve kʼo, yawˇ hui nawˬ htaꞈ ka tiꞈ yeˬ tuˬ yoˬ.’ Yaꞈ hkʼaˇ, Yawˇbaoˍ ve awˬ chawˇ yaˇ nehˬ yawˇ htaꞈ kʼoˆ piˇ ve, ‘mvuhˇ miˬ yaˇ htaꞈ taˇ ha kʼaˉ piˇ! Kanˉ gʼaˇ hteꞈ te tcuh˗o!’ Yawˇbaoˍ awˬ chawˇ beˆ maˍ piˇ ve hkʼe, yawˇ hui htaꞈ kanˉ gʼaˇ hteꞈ nyiˉ te ve yoˬ. Yawˇ hui Yawˇbaoˍ htaꞈ hpfuhˆ leh Iˉsaˍreˍlaˆ chaw 10 ceuˬ awˬ hkʼoˆ, Yeˍyawˇbaoˍ htaꞈ uˉ peunˍ tcuh ve yoˬ. Leuˉ taˍ ve 2 chaw ceuˬ Yuˇdaꞈ mvuhˇ miˬ jawˇ mawˇ Yawˇbaoˍ htaꞈ ka tiꞈ yeˬ chehˇ sheˍ. Oˇ htaˇ tanˬ leh Iˉsaˍreˍlaˆ 12 chaw ceuˬ lehˬ pehˬ kʼai ve yoˬ.

Yeˍyawˇbaoˍ lehˬ yawˇ ve chaw, Yawˇbaoˍ uˉ peunˍ chehˇ ve Yeˍruˆsaˍlehnˍ venˇ lo Yaˬhoˉvaˬ htaꞈ oˉ kʼoˍ maˇ ca pui tcuh gaˇ. Aˬ htoꞈ ma pa taw le? Awˬ lawn kʼo, Yeˍyawˇbaoˍ yawˇ ve chaw yawˇ htaꞈ baˬ taˉ leh Yawˇbaoˍ geh kʼoꞈ˗e ve htaꞈ kawˆ ve yoˬ. Hkʼe te leh, Yeˍyawˇbaoˍ shi nuˇ shaˉ hoꞈ 2 hkeh te leh yawˇ ve chaw htaꞈ kʼoˆ piˇ ve, ‘Yeˍruˆsaˍlehnˍ venˇ lo taˇ kʼai loˬ. Vuiˇ jaˇ. Nawˬ hui choˬ kaˬ lo gʼuiˬ sha htaꞈ oˉ kʼoˍ pui kaꞈ hpehꞈ ve yoˬ.’ Mvuhˇ miˬ yaˇ shi shaˉ hoꞈ htaꞈ oˉ kʼoˍ pui leh Yaˬhoˉvaˬ htaꞈ kʼawꞈ leunˇ kʼai ve yoˬ.