Yuˇdaꞈ ve jawˇ mawˇ Yawˇshaˍhpaˆ yawˇ ve mvuhˇ miˬ hkʼaw Baˍlaˆ ve tuˉ tanˇ kuiˬ leh shaˉ hoꞈ hkʼa peu˗eˬ htaꞈ te luˬ piˇ ve yoˬ. Yawˇshaˍhpaˆ mvuhˇ miˬ yaˇ hui htaꞈ Yaˬhoˉvaˬ ve awˬ liˇ tawˇ hkawˇ shiˍ tcuh gaˇ ve yoˬ. Yuˇdaꞈ mvuhˇ miˬ hkʼaw chehˇ ve chaw hkʼa peu˗eˬ Yaˬhoˉvaˬ ve awˬ liˇ tawˇ hkawˇ shiˍ tuˬ, yawˇ lehˬ awˬ hoˉ awˬ naˬ leh Leˍviˆ chaw hui htaꞈ kʼai tcuh ve yoˬ.

Yaˬhoˉvaˬ yawˇ ve mvuhˇ miˬ yaˇ geh chehˇ ve yoˬ tehꞈ, awˬ paˇ awˬ kui chehˇ ve mvuhˇ miˬ shiˍ ve pa taw, Yuˇdaꞈ mvuhˇ miˬ htaꞈ ca bawˆ la maˇ haˆ. Hkʼe te leh, yawˇ hui jawˇ mawˇ Yawˇshaˍhpaˆ htaꞈ laꞈ shawnˍ maˇ maˇ yuˬ veu laˇ piˇ ve yoˬ. Awˬ hkʼawꞈ nawˉ htaˇ, Mawˇbaˆ chaw, Aˍmonˍ chaw, leh Eˇdonˍ chaw Yuˇdaꞈ mvuhˇ miˬ htaꞈ ca bawˆ la ve yoˬ. Yawˇshaˍhpaˆ Yaˬhoˉvaˬ gʼa ga laˇ tcuh cawˇ ve tehꞈ shiˍ ve yoˬ. hkʼe te leh, hawˉ hkʼaˆ, yaˇ miˇ, yaˇ ehˉ teˇ gʼaˇ le le Yeˍruˆsaˍlehnˍ venˇ lo hpawnˬ la tuˬ, yawˇ tawˇ piˇ ve yoˬ. Yawˇ mvuhˇ miˬ yaˇ hkʼa peu˗eˬ gʼuˇ suhˍ lo huˉ taˍ leh bon lawˬ ve, ‘Yaˬhoˉvaˬ˗oˬ, nawˬ maˇ ga laˇ ve kʼo, ngaˬ hui gʼaˇ tuˬ awˬ hkʼaˇ maˇ cawˬ. Ngaˬ hui hkʼaˬ hkʼe te cawˇ ve a ciˉ kʼoˆ laˇ˗oˆ.’

Yaˬhoˉvaˬ hkʼawꞈ piˇ ve, ‘taˇ kawˆ ngaˬ nawˬ hui htaꞈ ga laˇ tuˬ yoˬ. Ngaˬ nawˬ hui htaꞈ hkʼaˬ hkʼe ga laˇ tuˬ law nyi taˍ ve tiˉ te˗o.’ Yaˬhoˉvaˬ yawˇ hui htaꞈ hkʼaˬ hkʼe ga piˇ ve le?

Shawˉ pawˍ mvuhˇ shawˉ teˇ naꞈ Yawˇshaˍhpaˆ liꞈ hkawˇ kʼa paˍ teˇ moˍ htaꞈ leuˆ yuˬ ve yoˬ. Hkʼe te leh, Yeˍruˆsaˍlehnˍ venˇ lo tawˆ˗e leh Teˍkawˇ venˇ awˬ paˇ bawˆ daꞈ kuiˬ lo kʼai tuˬ maꞈ moˍ teˇ moˍ gʼuˇ suhˍ lo yawˇ hui kʼai tcuh ve yoˬ.

Liꞈ hkawˇ kʼa paˍ ha lehˬ ha kʼa awˬ hkawˇ bvuhˬ chaweh Yaˬhoˉvaˬ htaꞈ kʼa muiˬ chiˇ mvuh chehˇ htaˇ, yawˇ hui awˬ tan Yaˬhoˉvaˬ maꞈ bawˆ ve yoˬ. Yaˬhoˉvaˬ lehˬ Mawˇbaˆ chaw, Aˍmonˍ chaw hui htaꞈ kawˆ tuˬ te piˇ leh yawˇ hui hkʼaˇ yawˇ hui tiˇ pehˍ daꞈ tcuh ve yoˬ. Yaˬhoˉvaˬ lehˬ Yuˇdaꞈ chaw, maꞈ yaˇ leh paw hkuˇ hui htaꞈ haꞈ shaˉ piˇ ve yoˬ. Yaˬhoˉvaˬ te ve awˬ ceuˬ Yuˇdaꞈ mvuhˇ miˬ awˬ paˇ lo chehˇ ve mvuhˇ miˬ teˇ hpaˍ gʼa kaˇ htaˇ, Yaˬhoˉvaˬ yawˇ ve chaw hui htaꞈ haꞈ shaˉ piˇ chehˇ ve yoˬ tehꞈ yawˇ hui shiˍ ve yoˬ. Chaw yaˇ htaꞈ maˇ cuˇ ve htawˇ, yawˇ ve chaw htaꞈ ga ponˬ piˇ tuˬ laiˉ hkʼaˇ yehˇ ve yoˬ.