Mvuhˇ goˇ ve awˬ yanˇ htaˇ, Yaˬhoˉvaˬ Eˇliˇyaꞈ htaꞈ kʼoˆ piˇ ve, ‘Zaˍraˍtaˆ venˇ lo kʼai˗o. Oˇ kaˬ lo chehˇ ve mehˇ chawˇ ma teˇ gʼaˇ nawˬ htaꞈ te caˍ te taw laˇ tuˬ yoˬ.’ Venˇ taˍ meuꞈ hpeꞈ lo gaˬ htaˇ, mehˇ chawˇ ma teˇ gʼaˇ suhˆ gʼawˆ chehˇ ve htaꞈ Eˇliˇyaꞈ gʼa mawˬ ve yoˬ. Hkʼe te leh, Eˇliˇyaꞈ yawˇ geh iˉ kaˆ lawˬ dawˬ ve yoˬ. Leh yawˇ iˉ kaˆ ca yuˬ˗e htaˇ, Eˇliˇyaꞈ yawˇ htaꞈ kʼoˆ piˇ ve, “ngaˬ awˬ pon hkaoˍ monˇ kaꞈ a ciˉ yuˬ veu laˇ˗oˆ.” Yaꞈ hkʼaˇ, yawˇ hkʼawꞈ piˇ ve, ‘ngaˬ hkaoˍ monˇ maˇ cawˬ. Junˍ meu˗e leh shaˍlonˍ chu a ciˉ ceh tiˉ cawˬ ve yoˬ. Ngaˬ yaˇ paˍ ngaˬ huiˉ maˬ awˬ pon hkaoˍ monˇ teˇ diˬ ehˉ te caˇ tuˬ ceh cawˬ ve yoˬ.’ Yaꞈ hkʼaˇ, Eˇliˇyaꞈ kʼoˆ piˇ ve, ‘nawˬ ngaˬ htaꞈ hkaoˍ monˇ te caˍ laˇ ve kʼo, Junˍ meu˗e leh shaˍlonˍ chu mvuhˇ yeˬ kʼawꞈ la htaˇ hkʼa gaˬ cawˬ tuˬ yoˬ tehꞈ Yaˬhoˉvaˬ ka tiꞈ te taˍ ve yoˬ.’

Mehˇ chawˇ ma kʼoꞈ˗e leh tcuh kaˍ paˍ Eˇliˇyaꞈ htaꞈ hkaoˍ monˇ te caˍ piˇ ve yoˬ. Yaˬhoˉvaˬ ka tiꞈ te taˍ ve hkʼe, yawˇ ve Junˍ meu˗e leh shaˍlonˍ chu maˇ peuˬ kʼai. Yawˇ leh yawˇ yaˇ paˍ mvuhˇ goˇ ve awˬ yanˇ htaˇ hkʼa gaˬ caˇ tuˬ cawˬ ve yoˬ.

 Yaꞈ hkʼaˇ, nyi ma luˬ ve teˇ ceuˬ lehˬ mehˇ chawˇ ma ve yaˇ paˍ naˬ jaˇ leh suh˗e ve yoˬ. Yawˇ yaˇ htaꞈ taˆ taˍ leh Eˇliˇyaꞈ ga laˇ tuˬ lawˬ ve yoˬ. Eˇliˇyaꞈ lehˬ mehˇ chawˇ ma ve yaˇ paˍ htaꞈ awˬ na teˇ bawehˇ lo yuˬ kʼai leh ku˗iˍ hkʼoˆ lo teh taˍ leh yawˇ bon lawˬ leh kʼoˆ ve, ‘Yaˬhoˉvaˬ˗oˬ, yaˇ paˍ chi htaꞈ kʼawꞈ teꞈ la piˇ˗oˆ.’ Yaˬhoˉvaˬ te ve awˬ ceuˬ anˇ tuˬ cawˬ jaˇ ve yoˬ. Aˬ htoꞈ ma pa taw le shiˍ˗aˬ laˇ? Awˬ lawn kʼo, chaw teˇ gʼaˇ kaꞈ maˇ teꞈ tu la jaw sheˍ. Mehˇ chawˇ ma leh yawˇ ve yaˇ paˍ kaꞈ Iˉsaˍreˍlaˆ chaw hpehꞈ ve maˇ heˆ.

Mehˇ chawˇ ma ve yaˇ paˍ shaˉ gʼawˬ leh kʼawꞈ teꞈ la ve yoˬ! Eˇliˇyaꞈ mehˇ chawˇ ma htaꞈ kʼoˆ piˇ ve, ‘nyi sheˍ. Nawˬ yaˇ teꞈ tu la peuˬ!’ Yawˇ ha lehˬ jaˇ leh Eˇliˇyaꞈ htaꞈ kʼoˆ piˇ ve, ‘chi beuꞈ nawˬ Gʼuiˬ sha ve chaw hpehꞈ ve ngaˬ gʼa shiˍ peuˬ. Awˬ lawn kʼo, Yaˬhoˉvaˬ kʼoˆ tcuh laˇ ve awˬ ceuˬ ceh nawˬ kʼoˆ ve yoˬ.’