Aˍsuˇriˆ ve maꞈ yaˇ Iˉsaˍreˍlaˆ mvuhˇ miˬ 10 chaw ceuˬ htaꞈ bawˆ gʼaˇ ve yoˬ. Chi teˇ hkui Aˍsuˇriˆ ve jawˇ mawˇ Seˍnaˍhkaˍriˆ Yuˇdaꞈ mvuhˇ miˬ 2 chaw ceuˬ htaꞈ kaꞈ kʼawꞈ bawˆ yuˬ gaˇ ve yoˬ. Yawˇ Yuˇdaꞈ mvuhˇ miˬ teˇ venˇ peuˬ teˇ venˇ bawˆ yuˬ ve yoˬ. Yaꞈ hkʼaˇ, yawˇ heuˆ gaˇ jaˇ ve venˇ lehˬ Yeˍruˆsaˍlehnˍ venˇ hpehꞈ ve yoˬ. Yeˍruˆsaˍlehnˍ venˇ htaꞈ Yaˬhoˉvaˬ haꞈ shaˉ chehˇ ve htaꞈ yawˇ maˇ shiˍ.

Yuˇdaꞈ ve jawˇ mawˇ Heˍsaˍkiˆ lehˬ Seˍnaˍhkaˍriˆ Yeˍruˆsaˍlehnˍ venˇ htaꞈ maˇ gʼa bawˆ la tuˬ, hpu maˇ maˇ piˇ ve yoˬ. Seˍnaˍhkaˍriˆ hpu haꞈ yuˬ ve htawˇ, yawˇ maꞈ moˍ lonˉ htaꞈ kʼawꞈ kʼai tcuh ve yoˬ. Suˆriˆ maꞈ yaˇ gaˬ la paˇ neˇ ve pa taw, Yeˍruˆsaˍlehnˍ venˇ yaˇ kawˆ jaˇ. Heˍsaˍkiˆ mvuhˇ miˬ yaˇ htaꞈ kʼoˆ piˇ ve, ‘Aˍsuˇriˆ chaw hui htaꞈ taˇ kawˆ. Yawˇ hui aꞈ kehˉ awˬ gʼaˇ uiˍ ve Yaˬhoˉvaˬ ga laˇ tuˬ yoˬ.’

Yeˍruˆsaˍlehnˍ venˇ hkʼaw chehˇ ve chaw htaꞈ maˇ shawˍ maˇ caˆ kʼoˆ tuˬ Seˍnaˍhkaˍriˆ lehˬ yawˇ ve maꞈ poˍ htaꞈ kʼai tcuh ve yoˬ. Maꞈ poˍ lonˉ venˇ baˬ lo huˉ taˍ leh kʼoˆ ve, ‘Heˍsaˍkiˆ nawˬ hui htaꞈ heˍ chehˇ ve yoˬ. Yaˬhoˉvaˬ ga laˇ tuˬ ve maˇ heˆ. Nawˬ hui htaꞈ ga laˇ tuˬ gʼuiˬ sha teˇ gʼaˇ kaꞈ maˇ cawˬ.’

Ngaˬ hkʼaˬ hkʼe gʼa te tuˬ le tehꞈ, Heˍsaˍkiˆ Yaˬhoˉvaˬ htaꞈ na nyi ve yoˬ. Yaˬhoˉvaˬ hkʼawꞈ piˇ ve, ‘maꞈ poˍ lonˉ hkawˇ taˇ na. Seˍnaˍhkaˍriˆ Yeˍruˆsaˍlehnˍ venˇ htaꞈ bawˆ gʼaˇ tuˬ ve maˇ heˆ.’ Peuˬ leh Seˍnaˍhkaˍriˆ Heˍsaˍkiˆ htaꞈ liꞈ laiˉ kʼoˆ bvuhꞈ piˇ leh kʼoˆ ve, ‘taˇ ca bawˆ˗e loˬ. Yaˬhoˉvaˬ ga laˇ tuˬ ve maˇ heˆ.’ Hkʼe te leh Heˍsaˍkiˆ bon lawˬ ve, ‘Yaˬhoˉvaˬ˗oˬ, chaw teˇ gʼaˇ le le nawˬ awˬ tehˬ awˬ na Gʼuiˬ sha hpehꞈ ve yoˬ tehꞈ shiˍ tuˬ, ngaˬ hui htaꞈ a ciˉ ga laˇ˗oˆ.’ Yaˬhoˉvaˬ hkʼawꞈ piˇ ve, ‘Aˍsuˇriˆ ve jawˇ mawˇ Yeˍruˆsaˍlehnˍ venˇ hkʼaw gʼa loꞈ la tuˬ ve maˇ heˆ. Venˇ chi htaꞈ ngaˬ haꞈ shaˉ taˍ ve yoˬ.’

Seˍnaˍhkaˍriˆ Yeˍruˆsaˍlehnˍ venˇ htaꞈ bawˆ gʼaˇ tuˬ yawˇ yonˍ gʼa jaˇ ve yoˬ. Yaꞈ hkʼaˇ, teˇ haˉ htaˇ, Aˍsuˇriˆ ve maꞈ yaˇ venˇ baˬ lo chehˇ taˍ ve htaꞈ Yaˬhoˉvaˬ yawˇ ve mvuhˇ naw ma tcuh yaˇ teˇ gʼaˇ kʼai tcuh ve yoˬ. Yaˬhoˉvaˬ ve mvuhˇ naw ma tcuh yaˇ Aˍsuˇriˆ ve maꞈ yaˇ 185,000 gʼaˇ htaꞈ teˇ haˉ hkʼaw ceh tiˉ tiˇ pehˍ piˇ ve yoˬ. Jawˇmawˇ Seˍnaˍhkaˍriˆ ve maꞈ yaˇ cheuˬ jaˇ ve teˇ gʼaˇ kaꞈ maˇ leuˉ˗o. Yawˇ maꞈ bawˆ maˇ  gʼaˇ leh Aˍsuˇriˆ mvuhˇ miˬ lo kʼoꞈ˗e ve yoˬ. Yaˬhoˉvaˬ yawˇ ka tiꞈ te taˍ ve hkʼe, Heˍsaˍkiˆ leh Yeˍruˆsaˍlehnˍ venˇ htaꞈ haꞈ shaˉ piˇ ve yoˬ. Oˇ ve teˇ yanˇ awˬ hkʼaw lo nawˬ Yeˍruˆsaˍlehnˍ venˇ hkʼaw chehˇ taˍ ve kʼo, nawˬ Yaˬhoˉvaˬ htaꞈ gʼaˇ va˗aw laˇ?