Suˇriꞈ jawˇ mawˇ Beˍhaˍdaˆ Iˉsaˍreˍlaˆ mvuhˇ miˬ htaꞈ hkʼaˬ htaˆ kaꞈ ca bawˆ la chehˇ ve yoˬ. Tcuh kaˍ paˍ Eˇliˇshehˇ Iˉsaˍreˍlaˆ ve jawˇ mawˇ htaꞈ hkʼaˬ htaˆ kaꞈ shaˍ tiꞈ piˇ chehˇ ve pa taw, yawˇ teˇ pawˆ le le gʼa ponˬ ve yoˬ. Hkʼe te leh, Beˍhaˍdaˆ Eˇliˇshehˇ htaꞈ hpehꞈ yuˬ gʼa tuˬ awˬ hkʼaˇ gu ve yoˬ. Eˇliˇshehˇ Dawˇtanˍ venˇ lo chehˇ taˍ ve htaꞈ gʼa shiˍ htaˇ, yawˇ ve maꞈ yaˇ Eˇliˇshehˇ htaꞈ ca hpeh yuˬ veu laˇ tcuh ve yoˬ.

Suˇriꞈ maꞈ yaˇ Dawˇtanˍ venˇ lo tanˇ hkuinˇ htaˇ gaˬ la ve yoˬ. Eˇliˇshehˇ ve awˬ ceˬ paˍ mvuhˇ shawˉ yehˬ baˬ lo tawˆ˗e htaˇ, venˇ htaꞈ maꞈ moˍ lonˉ hoꞈ taˍ ve htaꞈ gʼa mawˬ ve yoˬ. Yawˇ kawˆ jaˇ leh kʼoˆ ve, ‘Eˇliˇshehˇ˗oˬ, ngaˬ hui hkʼaˬ hkʼe te tuˬ le?’ Eˇliˇshehˇ hkʼawꞈ piˇ ve, ‘ngaˬ hui hpawˇ lo chehˇ ve chaw yawˇ hui hpawˇ lo chehˇ ve chaw aꞈ kehˉ maˇ jaˇ ve yoˬ.’ Hkʼe te leh, hkʼaw awˬ hkʼoˆ lo aˬ miˍ ha htaꞈ shuˍ ve maꞈ bawˆ daꞈ tuˬ ve iˉ mvuh lawˬ maˇ jaˇ ve venˇ htaꞈ hkʼa zuhˇ caw hoˆ taˍ ve Yaˬhoˉvaˬ Eˇliˇshehˇ ve awˬ ceˬ paˍ htaꞈ mawˬ tcuh ve yoˬ.

Suˇriꞈ ve maꞈ yaˇ Eˇliˇshehˇ htaꞈ ca hpeh yuˬ la htaˇ yawˇ bon lawˬ ve, ‘Yaˬhoˉvaˬ˗oˬ, chaw chi teˇ hpaˍ htaꞈ mehˆ cuˉ piˇ lawꞈ˗oꞈ.’ Awˬ tehˬ kʼo, maꞈ yaˇ mehˆ maˇ cuˉ. Yaꞈ hkʼaˇ, yawˇ hui hkʼaˬ kaˬ lo chehˇ taˍ ve maˇ shiˍ tuˬ Yaˬhoˉvaˬ te  piˇ ve yoˬ. Eˇliˇshehˇ yawˇ hui htaꞈ kʼoˆ piˇ ve, ‘nawˬ hui kʼai gaˇ ve venˇ chi ve maˇ heˆ. Ngaˬ hkʼaˇ suh laˬ˗oꞈ. Nawˬ hui ca chehˇ ve chaw geh lo ngaˬ shiˍ kʼai laˇ tuˬ yoˬ.’ Iˉsaˍreˍlaˆ jawˇ mawˇ chehˇ taˍ ve Saˍmaˍriˆ venˇ lo hkʼa gaˬ maꞈ yaˇ Eˇliˇshehˇ hkʼaˇ suh gʼaꞈ kʼai ve yoˬ.

Suˇriꞈ maꞈ yaˇ Saˍmaˍriˆ venˇ lo chehˇ taˍ ve tehꞈ gʼa shiˍ ve teˇ yanˇ, yawˇ hui hpaw maˇ gaˬ˗oˬ. Iˉsaˍreˍlaˆ jawˇ mawˇ Eˇliˇshehˇ htaꞈ na piˇ ve, ‘yawˇ hui htaꞈ tiˇ pehˍ cawˇ˗aw laˇ?’ Awˬ yanˇ chi ve awˬ hkʼaw lo Eˇliˇshehˇ htaꞈ tiˇ pehˍ gaˇ ve chaw chi teˇ hpaˍ htaꞈ yawˇ te hkʼawꞈ gaˇ˗aw laˇ? Yawˇ maˇ te hkʼawꞈ gaˇ. Eˇliˇshehˇ kʼoˆ ve, ‘yawˇ hui htaꞈ taˇ tiˇ pehˍ. Caˇ tuˬ caˍ piˇ taw piˇ leh kʼoꞈ˗e tcuh˗o.’ Jawˇmawˇ lehˬ Suˇriꞈ maꞈ yaˇ htaꞈ caˇ tuˬ maˇ maˇ te caˍ piˇ leh kʼoꞈ˗e tcuh ve yoˬ.