Yuˇdaꞈ mvuhˇ miˬ hkʼaw Yawˇshiˆ a shaꞈ 8 hkʼawꞈ htaˇ, Jawˇmawˇ gʼa te ve yoˬ. Oˇ ve teˇ yanˇ, mvuhˇ miˬ yaˇ maˇ˗awˍ ve shaˉ hoꞈ htaꞈ oˉ kʼoˍ pui leh shaˉ yehˇ ve yoˬ. Yawˇshiˆ a shaꞈ 16 hkʼawꞈ gaˬ leh Yaˬhoˉvaˬ htaꞈ oˉ kʼoˍ pui ve cawˇ ve awˬ hkʼaˇ yehˇ ve yoˬ. Yawˇ a shaꞈ 20 hkʼawꞈ gaˬ htaˇ, shaˉ hoꞈ leh tuˉ tanˇ kuiˬ hkʼa peu˗eˬ htaꞈ te luˬ piˇ ve yoˬ. Yawˇ a shaꞈ 26 hkʼawꞈ gaˬ ve teˇ yanˇ, Yaˬhoˉvaˬ ve bon yehˬ kʼawꞈ gu te tcuh ve yoˬ.

Teˇ nyi htaˇ, paw hkuˇ lonˉ Hiˇlaˍhkiˆ bon yehˬ hkʼaw loꞈ˗e leh Moˉseˍ bvuhꞈ taˍ ve Yaˬhoˉvaˬ ve awˬ liˇ tawˇ hkawˇ liꞈ daw htaꞈ mawˬ ve yoˬ. Jawˇmawˇ ve a maꞈ lonˉ Shaˍhpanˍ liꞈ oˇ ve htaꞈ yuˬ leh jawˇ mawˇ Yawˇshiˆ htaꞈ gʼaw maˍ piˇ ve yoˬ. Mvuhˇ miˬ yaˇ Yaˬhoˉvaˬ ve awˬ liˇ tawˇ hkawˇ awˬ hkʼaˇ suh maˇ gʼaꞈ te ve maw jaˇ peuˬ ve htaꞈ Yawˇshiˆ gʼa shiˍ gʼa kaˇ htaˇ, yawˇ Hiˇlaˍhkiˆ htaꞈ kʼoˆ piˇ ve, ‘chi teˇ hkui Yaˬhoˉvaˬ ngaˬ hui htaꞈ nyi ma zuhˆ jaˇ peuˬ. Ngaˬ hui hkʼaˬ hkʼe te cawˇ ve nawˬ Yaˬhoˉvaˬ htaꞈ ca na nyi˗o.’ Yaˬhoˉvaˬ tcuh kaˍ ma Huˉlaˬdaˆ htaꞈ cuˇ leh hkʼawꞈ piˇ ve, ‘Yuˇdaꞈ chaw ngaˬ htaꞈ baˬ taˉ peuˬ. Ngaˬ yawˇ hui htaꞈ ciˍ yanˍ piˇ tuˬ yoˬ. Yaꞈ hkʼaˇ, Yawˇshiˆ nyi ma nuˇ nehˬ leh ngaˬ hkawˇ na yuˬ ve pa taw, yawˇ jawˇ mawˇ te ve teˇ co˗e htaˇ maˇ te luˬ piˇ.’

Jawˇmawˇ Yawˇshiˆ oˇ hkʼe gʼa kaˇ htaˇ, Yuˇdaꞈ chaw hui bon yehˬ hkʼaw hpawnˬ la tcuh ve yoˬ. Hkʼe te leh, Yaˬhoˉvaˬ ve awˬ liˇ tawˇ hkawˇ teˇ gʼaˇ le le htaꞈ gʼaw maˍ piˇ ve yoˬ. Yawˇshiˆ leh mvuhˇ miˬ yaˇ Yaˬhoˉvaˬ hkawˇ nyi ma awˬ tawˬ hkʼa gaˬ na yuˬ tuˬ yoˬ tehꞈ ka tiꞈ te ve yoˬ.

 Yuˇdaꞈ chaw hui Paˍsaˍhkaˍ pawehˇ maˇ te ve maw jaˇ peuˬ. Teˇ hkʼawꞈ le le Paˍsaˍhkaˍ pawehˇ gʼa te ve yoˬ tehꞈ kʼoˆ taˍ ve awˬ liˇ tawˇ hkawˇ htaꞈ Yawˇshiˆ gʼa gʼaw ve teˇ yanˇ, yawˇ mvuhˇ miˬ yaˇ htaꞈ kʼoˆ piˇ ve, ‘ngaˬ hui Yaˬhoˉvaˬ htaꞈ taˍ uiˍ taˍ mvuh piˇ tuˬ, Paˍsaˍhkaˍ pawehˇ gʼa te ve yoˬ. Oˇ ve hkʼawꞈ nawˉ, Yawˇshiˆ tuˉ tanˇ tuˬ laiˉ ceuˬ gu teh taˍ leh liꞈ hkawˇ kʼa paˍ awˬ moˍ bon yehˬ hkʼaw liꞈ hkawˇ kʼa tcuh ve yoˬ. Yuˇdaꞈ chaw Paˍsaˍhkaˍ pawehˇ te peuˬ hkʼawꞈ nawˉ, diˇ maˇ keu ve hkaoˍ monˇ caˇ ve pawehˇ 7 nyi kʼawꞈ caˉ te ve yoˬ. Pawehˇ chi hkʼe ve Saˍmo˗eˍlaˆ ve awˬ co˗e htaˇ hkʼa gaˬ maˇ te ve maw jaˇ peuˬ. Yawˇshiˆ Gʼuiˬ sha ve awˬ liˇ tawˇ hkawˇ htaꞈ awˬ tehˬ awˬ na haꞈ jaˇ ve yoˬ. Nawˬ Yawˇshiˆ hkʼa shuˍ Yaˬhoˉvaˬ ve awˬ lawn henˇ ve dawˇ cawˇ˗aˬ laˇ?