Jawˇmawˇ ma Yeˍsaˍbeˍlaˆ yaˇ miˇ teˇ gʼaˇ cawˬ ve Aˍtaˍliˆ meh ve yawˇ ve awˬ e hkʼe leˇ haiˬ jaˇ. Aˍtaˍliˆ lehˬ Yuˇdaꞈ jawˇ mawˇ teˇ gʼaˇ htaꞈ heuˆ daꞈ ve yoˬ. Jawˇmawˇ suh peuˬ hkʼawꞈ nawˉ, Aˍtaˍliˆ ve yaˇ paˍ jawˇ mawˇ te ve yoˬ. Yawˇ ve yaˇ paˍ suh peuˬ hkʼawꞈ nawˉ, Yuˇdaꞈ mvuhˇ miˬ hkʼaw Aˍtaˍliˆ jawˇ mawˇ ma te ve yoˬ. Hkʼe te leh, jawˇ mawˇ te tuˬ a hkaw˗anˬ cawˬ ve awˬ yaˇ awˬ duˬ hkʼa peu˗eˬ htaꞈ tiˇ pehˍ ve yoˬ. Teˇ gʼaˇ le le kaꞈ yawˇ htaꞈ kawˆ ve yoˬ.

Aˍtaˍliˆ haiˬ ve awˬ ceuˬ te ve htaꞈ paw hkuˇ lonˉ Yawˇyaˍdaˆ leh yawˇ ve awˬ miˇ ma Yawˇsheˍbaˆ gʼa shiˍ ve teˇ yanˇ, yawˇ huiˉ maˬ kawˆ tuˬ cawˬ ve htawˇ, Aˍtaˍliˆ ve awˬ haweh paˍ ehˉ Yawˇshaˆ htaꞈ ga piˇ leh Gʼuiˬ sha ve bon yehˬ hkʼaw yuˬ faˉ taˍ ve yoˬ.

Yawˇshaˆ a shaꞈ 7 hkʼawꞈ gaˬ htaˇ, Yawˇyaˍdaˆ lehˬ awˬ hoˉ awˬ naˬ leh Leˍviˆ chaw hui htaꞈ kuˬ hpawnˬ leh kʼoˆ piˇ ve, ‘bon yehˬ ve yehˬ miˉ htaꞈ shaw taˍ˗oꞈ. Chaw teˇ gʼaˇ htaꞈ kaꞈ taˇ loꞈ la tcuh.’ Hkʼe te leh, Yawˇyaˍdaˆ Yuˇdaꞈ mvuhˇ miˬ hkʼaw Yawˇshaˆ htaꞈ jawˇ mawˇ te tcuh leh shi uˉ tcuhˍ hkʼawˆ piˇ ve yoˬ. ‘Jawˇmawˇ co zuhˬ ha zuhˬ cawˬ piˇ˗oˆ’ tehꞈ mvuhˇ miˬ yaˇ gʼaˇ hteꞈ kuˬ ve yoˬ!

Jawˇmawˇ ma Aˍtaˍliˆ chaw awˬ moˍ lonˉ duiˆ˗ehˍ shaˇ˗ehˍ te ve awˬ hkawˇ gʼa kaˇ leh bon yehˬ lo gʼuiˇ kʼai ve yoˬ. Jawˇmawˇ awˬ suhˉ teˇ gʼaˇ htaꞈ yawˇ mawˬ leh “hpfuhˆ ve! hpfuhˆ ve!” tehꞈ kʼoˆ ve yoˬ. Awˬ hoˉ awˬ naˬ teˇ hpaˍ haiˬ ve jawˇ mawˇ ma htaꞈ yuˬ leh tiˇ pehˍ ve yoˬ. Yaꞈ hkʼaˇ, Yuˇdaꞈ mvuhˇ miˬ hkʼaw yawˇ ve dawˇ hkʼaˇ haiˬ ve cawˬ sheˍ ve htaꞈ yawˇ hui hkʼaˬ hkʼe te tuˬ le?

Mvuhˇ miˬ yaˇ Yaˬhoˉvaˬ htaꞈ ceh tiˉ oˉ kʼoˍ pui tuˬ yoˬ tehꞈ Yawˇyaˍdaˆ yawˇ hui htaꞈ ka tiꞈ te tcuh ve yoˬ. Yawˇyaˍdaˆ yawˇ hui htaꞈ Baˍlaˆ ve bon yehˬ leh shaˉ hoꞈ hkʼa peu˗eˬ htaꞈ dawˆ paˆ tcuh ve yoˬ. Yawˇyaˍdaˆ lehˬ paw hkuˇ te tuˬ leuˆ leh mvuhˇ miˬ yaˇ Yaˬhoˉvaˬ htaꞈ oˉ kʼoˍ pui gʼa tuˬ bon yehˬ  hkʼaw kanˉ te tuˬ ve Leˍviˆ chaw htaꞈ kaꞈ leuˆ yuˬ ve yoˬ. Maˇ daꞈ kehˬ ve chaw bon yehˬ hkʼaw lo maˇ gʼa loꞈ la tuˬ, yehˬ miˉ teˇ hpaˍ htaꞈ chaw shaw tcuh taˍ ve yoˬ. Yawˇyaˍdaˆ leh awˬ hoˉ awˬ naˬ hui Yawˇshaˆ htaꞈ hawˉ yehˬ hkʼaw shiˍ kʼai leh kʼaw jaw hkʼoˆ mui tcuh ve yoˬ. Yuˇdaꞈ chaw ve mvuhˇ miˬ yaˇ ha lehˬ jaˇ. Oˇ ve hkʼawꞈ nawˉ, yawˇ hui jawˇ mawˇ ma Aˍtaˍliˆ htaꞈ maˇ kawˆ leh Baˍlaˆ gʼuiˬ sha htaꞈ oˉ kʼoˍ pui ve maˇ kʼawꞈ cawˬ. Yawˇ hui Yaˬhoˉvaˬ htaꞈ oˉ kʼoˍ kʼawꞈ pui gʼa ve yoˬ. Yawˇyaˍdaˆ haꞈ hanˉ ve pa taw, chaw maˇ maˇ htaꞈ ga piˇ gʼa ve mawˬ˗aw laˇ?