Reˍbehˆkaꞈ lehˬ Yaˬhoˉvaˬ htaꞈ haꞈ ve yaˇ miˇ teˇ gʼaˇ hpehꞈ ve yoˬ. Yawˇ ve awˬ hpawˇ Iˉcaˆ meh ve yoˬ. Yawˇ kaꞈ Yaˬhoˉvaˬ htaꞈ haꞈ ve yoˬ. Reˍbehˆkaꞈ Iˉcaˆ htaꞈ hkʼaˬ hkʼe te mawˬ daꞈ ve le. Yawˇ Yaˬhoˉvaˬ ha lehˬ tuˬ hkʼaˬ hkʼe te ve le. Yawˇ ve awˬ lawn htaꞈ ngaˬ hui shiˍ maˇ la tuˬ teˇ geh gʼaw nyi sheˍ.

Iˉcaˆ ve awˬ pa awˬ e lehˬ Aˍbraˍhanˍ leh Saˍraˇ hpehꞈ ve yoˬ. Yawˇ hui Hkaˍnanˍ mvuhˇ miˬ hkʼaw chehˇ ve yoˬ. Oˇ kaˬ lo chehˇ ve chaw Yaˬhoˉvaˬ htaꞈ oˉ kʼoˍ maˇ pui. Yaꞈ hkʼaˇ, yawˇ ve yaˇ paˍ awˬ pon Yaˬhoˉvaˬ htaꞈ oˉ kʼoˍ pui ve yaˇ miˇ htaꞈ Aˍbraˍhanˍ leuˆ yuˬ gaˇ ve yoˬ. Chi htaꞈ pa taw, yawˇ ve awˬ viˉ awˬ nyi ve awˬ yaˇ awˬ duˬ awˬ hawehˍ awˬ haˆ chehˇ ve Haˍranˍ venˇ lo Iˉcaˆ awˬ pon awˬ miˇ ma ca piˇ tuˬ yawˇ ve awˬ ceˬ htaꞈ kʼai peu ve yoˬ. Awˬ ceˬ chi teˇ gʼaˇ lehˬ Eˇlaˍsaˍ yoˬ hehˉ.

Aˍbraˍhanˍ ve awˬ ceˬ Eˇlaˍsaˍ leh awˬ kaˍ awˬ nu awˬ ceˬ kaꞈ tawˆ kʼai ve yoˬ. Yawˇ hui yaꞈ kʼaw toˇ vuiˇ jaˇ ve yoˬ. Yawˇ hui lehˬ caˇ tuˬ dawˬ tuˬ leh laꞈ shawnˍ taˆ taˍ ve kaˍlaˍoˆ teˇ chi hkeh htaꞈ sheh kʼai ve yoˬ. Iˉcaˆ awˬ pon yaˇ miˇ leuˆ cawˇ tuˬ Eˇlaˍsaˍ hkʼaˬ hkʼe te shiˍ gʼa ve le. Eˇlaˍsaˍ leh awˬ kaˍ awˬ nu awˬ ceˬ Haˍranˍ venˇ lo gaˬ la htaˇ maˇ maw kʼo, chaw yaˇ iˉ kaˆ ca hkʼo la tuˬ yoˬ tehꞈ Eˇlaˍsaˍ shiˍ ve pa taw, nanˬ bawˍ paˇ lo chehˇ taˍ ve yoˬ. Yawˇ Yaˬhoˉvaˬ geh bon lawˬ leh kʼoˆ ve, ‘yaˇ miˇ teˇ gʼaˇ htaꞈ iˉ kaˆ a ciˉ taw laˇ˗oˆ tehꞈ kʼoˆ piˇ htaˇ, ngaˬ leh  ngaˬ ve kaˍlaˍoˆ teˇ hpaˍ awˬ pon iˉ kaˆ taw laˇ ve yaˇ miˇ teˇ gʼaˇ lehˬ nawˬ leuˆ yuˬ taˍ ve yaˇ miˇ yoˬ tehꞈ ngaˬ shiˍ tuˬ yoˬ.’

Peuˬ leh yaˇ miˇ haˉ Reˍbehˆkaꞈ lehˬ nanˬ bawˍ lo laˬ ve yoˬ. Liꞈ hpu hkʼaw kʼoˆ ve, yawˇ daꞈ jaˇ ve yoˬ. Eˇlaˍsaˍ yawˇ geh iˉ kaˆ lawˬ dawˬ ve yoˬ. ‘Dawˬ˗oꞈ, nawˬ ve kaˍlaˍoˆ teˇ hpaˍ htaꞈ htawˇ iˉ kaˆ taw piˇ shaˍ’ tehꞈ yawˇ kʼoˆ ve yoˬ. Dawˇ nyi sheˍ. Iˉ kaˆ shiˉ jaˇ ve kaˍlaˍoˆ lehˬ iˉ kaˆ dawˬ maˇ jaˇ ve yoˬ. Reˍbehˆkaꞈ lehˬ teˇ pawˆ peuˬ teˇ pawˆ nanˬ bawˍ lo gʼuiˇ kʼai ve yoˬ. Awˬ han htaꞈ mawˬ˗aw laˇ. Yawˇ kanˉ hkʼaˬ ma te hehnˇ jaˇ ve le.— Eˇlaˍsaˍ yawˇ bon lawˬ hkawˇ htaꞈ Yaˬhoˉvaˬ yaw hkʼawꞈ piˇ ve awˬ hkʼaˇ yawˇ anˇ jaˇ ve yoˬ.

Eˇlaˍsaˍ lehˬ Reˍbehˆkaꞈ htaꞈ daꞈ jaˇ ve laꞈ shawnˍ laiˉ ceuˬ piˇ ve yoˬ. Yawˇ lehˬ Eˇlaˍsaˍ leh awˬ chawˇ teˇ hpaˍ yawˇ aˉ hkʼaw lo shiˍ kʼai ve yoˬ. Eˇlaˍsaˍ lehˬ Aˍbraˍhanˍ yawˇ htaꞈ peu laˇ ve awˬ hkʼaˇ leh, Yaˬhoˉvaˬ yawˇ bon lawˬ hkawˇ htaꞈ yaw hkʼawꞈ laˇ ve awˬ lawn kʼaoˍ maˍ piˇ ve yoˬ. Reˍbehˆkaꞈ lehˬ Iˉcaˆ ve awˬ miˇ ma hpehꞈ la tuˬ yawˇ ve yehˬ kʼa ha lehˬ ha kʼa yuˬ ka piˇ ve yoˬ.

Yaꞈ hkʼaˇ, nawˬ hkʼaˬ hkʼe dawˇ ve le. Reˍbehˆkaꞈ Iˉcaˆ htaꞈ heuˆ gaˇ tuˬ laˇ.— Eˇlaˍsaˍ htaꞈ Yaˬhoˉvaˬ peu laˇ ve yoˬ tehꞈ Reˍbehˆkaꞈ shiˍ ve yoˬ. Hkʼe te leh, Hkaˍnanˍ mvuhˇ miˬ lo kʼai leh Iˉcaˆ htaꞈ heuˆ tuˬ yoˬ laˇ tehꞈ yawˇ ve yehˬ kʼa yawˇ htaꞈ na nyi piˇ ve teˇ yanˇ, ‘Yoˬ, ngaˬ kʼai tuˬ yoˬ’ tehꞈ yawˇ kʼoˆ piˇ ve yoˬ. Eˇlaˍsaˍ hkʼaˇ suh laꞈ haˉ gʼaꞈ kʼai ve yoˬ. Hkaˍnanˍ mvuhˇ miˬ lo gaˬ ve teˇ yanˇ, yawˇ Iˉcaˆ htaꞈ heuˆ ve yoˬ.

Reˍbehˆkaꞈ lehˬ, Yaˬhoˉvaˬ te tcuh gaˇ ve awˬ ceuˬ htaꞈ te ve pa taw, yawˇ htaꞈ Yaˬhoˉvaˬ awˬ bon naꞈ piˇ ve yoˬ. Laiˉ hkʼawꞈ hkʼawꞈ nawˉ Yeˍsuˆ yawˇ ve awˬ ceuˬ awˬ hkʼaˇ awˬ hkʼaw lo paw la ve yoˬ. Reˍbehˆkaꞈ hkʼa shuˍ Yaˬhoˉvaˬ ha lehˬ tuˬ te piˇ ve kʼo, nawˬ htaꞈ kaꞈ yawˇ awˬ bon naꞈ laˇ tuˬ yoˬ.