Nawˬ kawˆ ve teˇ yanˇ, aˬ htoꞈ ma te tuˬ le.— Ga laˇ tuˬ nawˬ awˬ pa awˬ e geh kʼai ve yoˬ hehˉ. Yaꞈ hkʼaˇ, nawˬ htaꞈ ga laˇ gʼa ve chaw teˇ gʼaˇ kʼawꞈ cawˬ ve yoˬ. Yawˇ shu aꞈ kehˉ kanˇ paˆ cawˬ jaˇ ve yoˬ. A shu le, nawˬ shiˍ˗aˬ laˇ.— Yawˇ lehˬ, Yaˬhoˉvaˬ Gʼuiˬ sha hpehꞈ ve yoˬ. Liꞈ hpu awˬ hkʼaw lo Daˍviˆ meh ve chaw haˉ paˍ teˇ gʼaˇ awˬ lawn htaꞈ teˇ geh dawˇ nyi sheˍ. Yaˬhoˉvaˬ yawˇ htaꞈ hkʼaˬ htaˆ kaꞈ ga laˇ tuˬ yoˬ tehꞈ shiˍ taˍ leh yawˇ maˇ kawˆ ve yoˬ.

Daˍviˆ yaˇ ehˉ htaˇ kaꞈ te leh Yaˬhoˉvaˬ htaꞈ haꞈ tuˬ awˬ pa awˬ e yawˇ htaꞈ maˍ piˇ ve yoˬ. Hkʼe te leh, yawˇ kawˆ lawꞈ lawꞈ ve awˬ ceuˬ htaꞈ gʼa hpuˇ htawˇ yawˇ maˇ kawˆ ve yoˬ. Yaˬhoˉvaˬ lehˬ, yawˇ ve Awˬ chawˇ hpehꞈ leh yawˇ htaꞈ ga laˇ tuˬ yoˬ tehꞈ shiˍ taˍ ve yoˬ. Teˇ pawˆ htaˇ, Daˍviˆ yawˬ teˇ moˍ hawˉ chehˇ ve teˇ yanˇ, laˇ caˬ shiˉ yawˬ teˇ hkeh htaꞈ cheꞈ gʼawˬ kʼai ve yoˬ. Daˍviˆ aˬ htoꞈ ma te ve le, nawˬ shiˍ˗aˬ laˇ. Yawˇ laˇ caˬ shiˉ hkʼaˇ suh gʼaꞈ yuˬ kʼai leh yawˇ ve kʼawˍ peˍ htaꞈ yuˬ tiˍ taˍ leh tiˇ pehˍ piˇ ve yoˬ. Yehˬ miˉ tawˍ kaꞈ yawˬ htaꞈ ca cheꞈ la htaˇ tiˇ pehˍ piˇ ve yoˬ. Nawˬ dawˇ kʼo, Daˍviˆ htaꞈ a shu ga piˇ ve le.— Cawˇ ve yoˬ, Yaˬhoˉvaˬ yawˇ htaꞈ ga piˇ ve yoˬ.

Daˍviˆ haꞈ hanˉ jaˇ ve teˇ pawˆ cawˬ ve yoˬ. Iˉsaˍreˍlaˆ chaw lehˬ Hpiˇliˇtiˆ chaw htaꞈ bawˆ daꞈ chehˇ ve yoˬ. Hpiˇliˇtiˆ maꞈ yaˇ hawˉ hkʼaˆ teˇ gʼaˇ lehˬ uiˍ jaˇ mvuh jaˇ ve yoˬ. Yawˇ lehˬ Gawˇliˇyaꞈ meh ve yoˬ. Chaw lonˉ chi teˇ gʼaˇ Iˉsaˍreˍlaˆ maꞈ yaˇ leh Yaˬhoˉvaˬ htaꞈ maˇ shawˍ maˇ caˆ kʼoˆ piˇ chehˇ ve yoˬ. Yawˇ htaꞈ bawˆ daꞈ la tuˬ Iˉsaˍreˍlaˆ maꞈ yaˇ htaꞈ kuˬ ve yoˬ. Yaꞈ hkʼaˇ, Iˉsaˍreˍlaˆ chaw teˇ gʼaˇ le le yawˇ htaꞈ maˇ bawˆ daꞈ haˆ. Awˬ lawn chi htaꞈ Daˍviˆ gʼa kaˇ ve teˇ yanˇ, yawˇ Gawˇliˇyaꞈ htaꞈ kʼoˆ piˇ ve, ‘ngaˬ nawˬ htaꞈ bawˆ tuˬ yoˬ. Yaˬhoˉvaˬ ngaˬ htaꞈ ga laˇ leh ngaˬ nawˬ htaꞈ gʼaˇ tuˬ yoˬ.’ Nawˬ dawˇ kʼo, Daˍviˆ haꞈ hanˉ ve laˇ.— Yoˬ, yawˇ haꞈ hanˉ jaˇ ve yoˬ. Aˬ htoꞈ ma kʼawꞈ caˉ hpehꞈ la ve le, nawˬ shiˍ gaˇ˗aˬ laˇ.

Daˍviˆ lehˬ, hawˉ ma leh daꞈ jaˇ ve haˉ pui shiˍ ngaˇ shiˍ yuˬ veu leh chaw lonˉ htaꞈ bawˆ daꞈ tuˬ tawˆ kʼai ve yoˬ. Gawˇliˇyaꞈ Daˍviˆ a shaꞈ hkʼaˬ ma i ve htaꞈ mawˬ htaˇ, yawˇ Daˍviˆ htaꞈ kʼoˆ guiˇ gʼuiˬ guiˇ piˇ ve yoˬ. Yaꞈ hkʼaˇ, Daˍviˆ yawˇ htaꞈ kʼoˆ piˇ ve, ‘nawˬ lehˬ aˉ htaw pfuhˇ leh ngaˬ geh laˬ ve yoˬ. Yaꞈ hkʼaˇ, ngaˬ Gʼuiˬ sha ve awˬ meh hkʼaw nawˬ geh laˬ ve yoˬ.’ Peuˬ leh, yawˇ hawˉ ma hkʼaw haˉ pui teˇ shiˍ yuˬ keu ve yoˬ. Yawˇ Gawˇliˇyaꞈ geh gʼuiˇ kʼai gaˬ leh yawˇ htaꞈ bawˆ hpehˇ ve yoˬ. Haˉ pui shiˍ Gawˇliˇyaꞈ ve naˍ kʼaˍ pui htaꞈ  heuˆ ve yoˬ. Chaw lonˉ paiˍ leh suh˗e ve yoˬ. Hpiˇliˇtiˆ chaw kawˆ leh hpaw kʼai peuˬ ve yoˬ. Daˍviˆ hkʼe nehˬ ve chaw haˉ paˍ chaw lonˉ htaꞈ hkʼaˬ hkʼe gʼaˇ hpehꞈ tuˬ le.— Yaˬhoˉvaˬ yawˇ htaꞈ ga piˇ leh, chaw lonˉ oˇ ve aꞈ kehˉ Yaˬhoˉvaˬ lehˬ kanˇ paˆ cawˬ jaˇ ve yoˬ.

Daˍviˆ ve awˬ lawn nawˬ htaꞈ aˬ htoꞈ ma maˍ laˇ ve le.— Yaˬhoˉvaˬ lehˬ shu aꞈ kehˉ kanˇ paˆ cawˬ ve yoˬ. Leh yawˇ nawˬ ve Awˬ chawˇ hpehꞈ ve yoˬ. Chi htaꞈ pa taw, hkʼaˬ htaˆ maˇ kʼoˆ nawˬ kawˆ˗aˬ tehꞈ dawˇ kʼo, nawˬ haꞈ hanˉ tuˬ Yaˬhoˉvaˬ ga laˇ gʼa ve yoˬ tehꞈ tawnˇ taˍ loˬ.