Awˬ han chi hkʼaw yaˇ paˍ htaꞈ nyi sheˍ. Yawˇ chehˇ bawˬ leh kawˆ ve htaꞈ shuˍ ve maˇ heˆ laˇ. Nawˬ oˇ hkʼe hpehꞈ jaw laˇ.— Teˇ pawˆ teˇ yanˇ teˇ gʼaˇ le le oˇ hkʼe hpehꞈ jaw ve yoˬ. Yaˬhoˉvaˬ ve awˬ chawˇ kaꞈ chehˇ bawˬ leh kawˆ jaw ve yoˬ. Liꞈ hpu hkʼaw yawˇ hui ve awˬ lawn kʼoˆ taˍ ve yoˬ. Teˇ gʼaˇ lehˬ Eˇliˇyaꞈ hpehꞈ ve yoˬ. Ngaˬ hui yawˇ ve awˬ lawn htaꞈ teˇ geh henˇ nyi sheˍ.

Eˇliˇyaꞈ lehˬ Yeˍsuˆ maˇ paw la sheˍ htaˇ, Iˉsaˍreˍlaˆ mvuhˇ miˬ hkʼaw chehˇ ve maw jaˇ peuˬ ve yoˬ. Iˉsaˍreˍlaˆ jawˇ mawˇ Aˍhaˆ awˬ tehˬ ve Gʼuiˬ sha Yaˬhoˉvaˬ htaꞈ oˉ kʼoˍ maˇ pui. Aˍhaˆ leh yawˇ awˬ miˇ ma Yeˍsaˍbeˍlaˆ lehˬ Baˍlaˆ tehꞈ kʼoˆ ve gʼuiˬ sha awˬ kehˆ htaꞈ oˉ kʼoˍ pui ve yoˬ. Hkʼe te leh, Iˉsaˍreˍlaˆ chaw maˇ˗awˍ ve Baˍlaˆ gʼuiˬ sha htaꞈ oˉ kʼoˍ tanˬ pui kʼai ve yoˬ. Jawˇmawˇ ma Yeˍsaˍbeˍlaˆ lehˬ haiˬ jaˇ, Yaˬhoˉvaˬ htaꞈ oˉ kʼoˍ pui ve chaw teˇ gʼaˇ le le htaꞈ kaꞈ Eˇliˇyaꞈ htaꞈ kaꞈ tiˇ pehˍ gaˇ ve yoˬ. Eˇliˇyaꞈ hkʼaˬ hkʼe te ve le, nawˬ shiˍ˗aˬ laˇ.—

Eˇliˇyaꞈ hpaw˗e ve yoˬ. Goˇ choˆ jaˇ ve heh puiˉ hkʼaw lo cawˬ ve haˉ kʼoˍ hkʼaw hpaw vaꞈ taˍ ve yoˬ. Nawˬ dawˇ kʼo, aˬ htoꞈ ma  pa taw yawˇ oˇ hkʼe te ve le.— Yoˬ, yawˇ kawˆ ve pa taw yoˬ. Yaꞈ hkʼaˇ, Eˇliˇyaꞈ kawˆ tuˬ maˇ loˍ. Aˬ htoꞈ ma pa taw le. Awˬ lawn kʼo, Yaˬhoˉvaˬ yawˇ htaꞈ ga piˇ gʼa ve yoˬ tehꞈ yawˇ shiˍ ve yoˬ. Eˇliˇyaꞈ htaꞈ Yaˬhoˉvaˬ kanˇ paˆ hpeuꞈ maw piˇ jaw ve yoˬ. Teˇ pawˆ htaˇ, Eˇliˇyaꞈ ve bon lawˬ hkawˇ htaꞈ Yaˬhoˉvaˬ na yuˬ piˇ leh mvuhˇ naw ma hkʼoˆ aˬ miˍ yaꞈ la ve yoˬ. Hkʼe te leh chi teˇ hkui Yaˬhoˉvaˬ lehˬ, Eˇliˇyaꞈ htaꞈ awˬ tehˬ awˬ na ga piˇ gʼa ve yoˬ.

Eˇliˇyaꞈ haˉ kʼoˍ hkʼaw chehˇ htaˇ, Yaˬhoˉvaˬ tawˇ yaw leh yawˇ htaꞈ na nyi piˇ ve, ‘nawˬ choˬ kaˬ lo aˬ htoꞈ ma te chehˇ ve le.’ Eˇliˇyaꞈ yaw hkʼawꞈ piˇ ve, ‘nawˬ htaꞈ oˉ kʼoˍ pui chehˇ sheˍ ve ngaˬ ceh tiˉ yoˬ. Ngaˬ teˇ gʼaˇ ceh tiˉ cawˬ taˉ leh shu ngaˬ htaꞈ tiˇ pehˍ laˇ tuˬ ve htaꞈ kawˆ ve yoˬ.’ Eˇliˇyaꞈ dawˇ ve lehˬ, Yaˬhoˉvaˬ htaꞈ oˉ kʼoˍ pui ve chaw hkʼa peu˗eˬ htaꞈ shu tiˇ pehˍ peuˬ. Yaꞈ hkʼaˇ, Yaˬhoˉvaˬ Eˇliˇyaꞈ htaꞈ kʼoˆ piˇ ve, ‘Awˬ tehˬ maˇ heˆ. Ngaˬ htaꞈ oˉ kʼoˍ pui chehˇ ve chaw suhˍ hinˉ gʼaˇ cawˬ chehˇ sheˍ ve yoˬ. Haꞈ hanˉ loˬ. Ngaˬ nawˬ htaꞈ te tcuh laˇ tuˬ kanˉ cawˬ maˇ jaˇ sheˍ ve yoˬ.’ Nawˬ dawˇ kʼo, oˇ hkʼe gʼa kaˇ ve Eˇliˇyaꞈ ha lehˬ ve laˇ.—

Eˇliˇyaꞈ ve awˬ lawn ngaˬ hui htaꞈ aˬ htoꞈ ma maˍ laˇ ve le.— Nawˬ chehˇ bawˬ leh kawˆ tuˬ maˇ loˍ ve yoˬ. Nawˬ Yaˬhoˉvaˬ htaꞈ leh nawˬ htaꞈ haꞈ ve awˬ chawˇ cawˬ ve yoˬ. Yaˬhoˉvaˬ kanˇ paˆ uiˍ jaˇ leh nawˬ htaꞈ hkʼaˬ htaˆ kaꞈ ga laˇ ve yoˬ. Nawˬ chehˇ bawˬ ve awˬ nyi maˇ cawˬ, nawˬ ha lehˬ˗aˬ laˇ.—