Faˉ taˍ ve awˬ lawn shu nawˬ htaꞈ kʼoˆ laˇ jaw laˇ.— a “Faˉ taˍ ve awˬ ceuˬ” Liꞈ hpu awˬ hkʼaw lo kʼoˆ taˍ ve yoˬ. Daꞈ leuˉ ve faˉ taˍ ve awˬ lawn chi teˇ hpaˍ Gʼuiˬ sha geh laˬ ve yoˬ. Shu maˇ shiˍ ve pa taw, faˉ taˍ ve awˬ lawn tehꞈ kʼoˆ ve yoˬ. Awˬ lawn chi htaꞈ mvuhˇ naw ma tcuh yaˇ htawˇ shiˍ gaˇ jaˇ ve yoˬ. Nawˬ kaꞈ shiˍ gaˇ laˇ, faˉ taˍ ve awˬ lawn chi aˬ htoꞈ ma le.—

Teˇ pawˆ htaˇ, Gʼuiˬ sha lehˬ hawˉ hkʼaˆ yaˇ miˇ htaꞈ te hpanˍ ve yoˬ. Yawˇ huiˉ maˬ ve awˬ meh lehˬ Aˍdanˍ leh Eˇvaꞈ meh ve yoˬ. Gʼuiˬ sha yawˇ huiˉ maˬ htaꞈ daꞈ jaˇ ve chehˇ kuiˬ Eˍdenˍ hko piˇ ve yoˬ. Aˍdanˍ leh Eˇvaꞈ Gʼuiˬ sha hkawˇ na yuˬ ve kʼo, hko chi hkʼa shuˍ yawˇ huiˉ maˬ leh awˬ yaˇ awˬ duˬ hui miˬ guiˬ hkʼa peu˗eˬ hkʼoˆ paˍraˍdiˇsuˆ hpehꞈ tcuh tuˬ te gʼa ve yoˬ. Yawˇ hui paˍraˍdiˇsuˆ hkʼaw co co taiˍ taiˍ gʼa chehˇ tuˬ yoˬ. Yaꞈ hkʼaˇ, tawnˇ gʼa sheˍ laˇ, Aˍdanˍ leh Eˇvaꞈ aˬ htoꞈ ma te ve le.—

Aˍdanˍ leh Eˇvaꞈ Gʼuiˬ sha hkawˇ htaꞈ maˇ na yuˬ ve pa taw, ngaˬ hui paˍraˍdiˇsuˆ hko hkʼaw maˇ gʼa chehˇ ve yoˬ. Yaꞈ hkʼaˇ, Gʼuiˬ sha kʼoˆ ve, miˬ guiˬ hkʼa peu˗eˬ hkʼoˆ nyi sha jaˇ leh teˇ gʼaˇ le le co co taiˍ taiˍ chehˇ sha cawˬ sha tuˬ yoˬ. Yawˇ hkʼaˬ hkʼe te gʼa tuˬ le. Chaw maˇ shiˍ ve maw jaˇ ve yoˬ. Faˉ taˍ ve awˬ ceuˬ hpehꞈ ve yoˬ.

Yeˍsuˆ miˬ guiˬ hkʼoˆ laˬ htaˇ, faˉ taˍ ve awˬ lawn chi htaꞈ hpeuꞈ maˍ ve yoˬ. Yawˇ kʼoˆ ve, faˉ taˍ ve awˬ lawn chi Gʼuiˬ sha ve mvuhˇ miˬ htaꞈ caˉ daꞈ ve yoˬ. Yeˍsuˆ lehˬ Gʼuiˬ sha ve mvuhˇ miˬ gaˬ la tuˬ bon lawˬ˗oꞈ tehꞈ chaw yaˇ htaꞈ kʼoˆ piˇ ve yoˬ. Oˇ htaˇ, miˬ guiˬ hkʼoˆ paˍraˍdiˇsuˆ hpehꞈ piˇ lawˬ tuˬ yoˬ.

Faˉ taˍ ve awˬ lawn chi htaꞈ gʼa shiˍ ve nawˬ ha lehˬ jaˇ laˇ.— Yaˬhoˉvaˬ hkawˇ htaꞈ na yuˬ ve chaw ceh tiˉ Paˍraˍdiˇsuˆ hko hkʼaw gʼa chehˇ ve yoˬ tehꞈ tawnˇ taˍ loˬ. Yaˬhoˉvaˬ hkawˇ htaꞈ na yuˬ ve hawˉ hkʼaˆ leh yaˇ miˇ ve awˬ lawn laiˉ lawn Liꞈ hpu hkʼaw kʼaoˍ maˍ laˇ ve yoˬ. Yawˇ hui ve awˬ lawn htaꞈ nawˬ shiˍ gaˇ laˇ.— Yawˇ hui ve awˬ lawn htaꞈ henˇ shiˍ leh henˇ yuˬ tuˬ teˇ geh gʼaw nyi sheˍ.