HENˇ YUˬ TUˬ 12
Pawˇluꞈ ve Awˬ shaˍ paˍ Haꞈ hanˉ ve
Chaw haˉ paˍ teˇ gʼaˇ yawˇ ve taˉ te paˍ htaꞈ ga ponˬ piˇ ve awˬ lawn ngaˬ hui teˇ geh henˇ nyi sheˍ. Chaw haˉ paˍ chi teˇ gʼaˇ ve taˉ te paˍ lehˬ tcuh yaˇ Pawˇluꞈ hpehꞈ ve yoˬ. Ngaˬ hui chaw haˉ paˍ chi teˇ gʼaˇ ve awˬ meh htaꞈ maˇ shiˍ. Yaꞈ hkʼaˇ, ngaˬ hui shiˍ ve, teˇ pawˆ htaˇ yawˇ haꞈ hanˉ jaˇ. Nawˬ yawˇ ve awˬ lawn htaꞈ na gaˇ˗aˬ laˇ.—
Pawˇluꞈ htaꞈ Yeˍruˆsaˍlehnˍ venˇ lo htawnˍ hkʼaw haw taˍ ve yoˬ. Awˬ lawn kʼo, yawˇ Yaˬhoˉvaˬ ve awˬ lawn hto maˍ ve pa taw yoˬ. Maꞈ poˍ lehˬ Pawˇluꞈ htaꞈ Kehˉsaˍriˆ venˇ lo peu kʼai tuˬ dawˇ cheˆ taˍ ve yoˬ. Yaꞈ hkʼaˇ, haiˬ ve hawˉ hkʼaˆ teˇ hpaˍ hpaˍ Pawˇluꞈ htaꞈ tiˇ pehˍ gaˇ ve yoˬ. Kehˉsaˍriˆ lo kʼai ve yaꞈ kʼaw jaˇ lo vaꞈ taˍ leh Pawˇluꞈ leh maꞈ yaˇ gaˬ la htaˇ, yawˇ htaꞈ tiˇ pehˍ tuˬ jehˬ daꞈ ve yoˬ.
Pawˇluꞈ ve awˬ shaˍ paˍ lehˬ, awˬ haiˬ te tuˬ jehˬ daꞈ ve awˬ lawn Pawˇluꞈ leh maꞈ poˍ htaꞈ kʼoˆ piˇ ve yoˬ
Kehˉsaˍriˆ venˇ lo maˇ shiˍ kʼai sheˍ gʼuˇ suhˍ teˇ nyi hkʼe htaˇ, Pawˇluꞈ ve awˬ shaˍ paˍ lehˬ yawˇ hui hkʼaˬ hkʼe te tuˬ jehˬ daꞈ ve awˬ lawn gʼa kaˇ ve yoˬ. Yawˇ aˬ htoꞈ ma te tuˬ le. Yawˇ htawnˍ hkʼaw kʼai leh Pawˇluꞈ htaꞈ ca kʼoˆ piˇ ve yoˬ. Maꞈ poˍ htaꞈ yawˇ hui jehˬ daꞈ ve awˬ lawn laꞈ haˉ ca hto piˇ tuˬ Pawˇluꞈ yawˇ htaꞈ kʼoˆ piˇ ve yoˬ. Nawˬ dawˇ kʼo, Pawˇluꞈ ve awˬ shaˍ paˍ maꞈ poˍ htaꞈ kʼoˆ piˇ tuˬ sha ve laˇ.— Maˇ sha, awˬ lawn kʼo maꞈ poˍ lehˬ, chaw uiˍ teˇ gʼaˇ hpehꞈ ve yoˬ. Yaꞈ hkʼaˇ, Pawˇluꞈ ve awˬ shaˍ paˍ haꞈ hanˉ leh maꞈ poˍ htaꞈ kʼoˆ piˇ ve yoˬ.
Hkʼaˬ hkʼe te cawˇ ve htaꞈ maꞈ poˍ shiˍ ve yoˬ. Yawˇ Pawˇluꞈ htaꞈ haꞈ shaˉ piˇ tuˬ maꞈ yaˇ aˬ laˬ hkʼe 500 gʼaˇ htaꞈ gu teh taˍ ve yoˬ. Oˇ teˇ haˉ ceh kaꞈ Pawˇluꞈ htaꞈ Kehˉsaˍriˆ venˇ lo shiˍ kʼai tuˬ yawˇ yawˇ hui htaꞈ kʼoˆ piˇ ve yoˬ. Pawˇluꞈ kawˆ tuˬ htaꞈ gʼa hpuˇ ve laˇ.— Maˇ gʼa hpuˇ, haiˬ ve hawˉ hkʼaˆ oˇ teˇ hpaˍ Pawˇluꞈ htaꞈ teꞈ chiˉ te maˇ gʼa. Yawˇ hui jehˬ daꞈ taˍ ve haiˬ ve awˬ hkʼaˇ htaꞈ Pawˇluꞈ gʼa ponˬ ve yoˬ.
Pawˇluꞈ ve awˬ lawn ngaˬ hui htaꞈ aˬ htoꞈ ma maˍ laˇ ve le.— Nawˬ kaꞈ Pawˇluꞈ ve awˬ shaˍ paˍ hkʼa shuˍ haꞈ hanˉ gʼa ve yoˬ. Ngaˬ hui Yaˬhoˉvaˬ ve awˬ lawn kʼoˆ ve teˇ yanˇ gʼa haꞈ hanˉ ve yoˬ. Nawˬ haꞈ hanˉ ve awˬ hkʼaw lo Yaˬhoˉvaˬ ve awˬ lawn caˉ kʼoˆ tuˬ laˇ.— Nawˬ te ve kʼo, chaw yaˇ ve a shaꞈ htaꞈ ga ponˬ piˇ tuˬ yoˬ.
