HENˇ YUˬ TUˬ 3
Raˍhaˆ Yaˬhoˉvaˬ htaꞈ Yonˍ ve yoˬ
Ngaˬ hui kaꞈ teˇ gʼaˇ Yeˍriˆhkoˇ venˇ lo chehˇ taˍ ve kʼo, hkʼaˬ hkʼe hpehꞈ la tuˬ le. Venˇ chi lehˬ Hkaˍnanˍ mvuhˇ miˬ hkʼaw cawˬ taˍ ve yoˬ. Choˬ kaˬ lo chehˇ ve chaw Yaˬhoˉvaˬ htaꞈ maˇ yonˍ ve yoˬ. Raˍhaˆ meh ve yaˇ miˇ teˇ gʼaˇ htawˇ choˬ kaˬ lo chehˇ taˍ ve yoˬ.
Raˍhaˆ yaˇ ehˉ hpehꞈ chehˇ htaˇ, Moˉseˍ Laˇ tsuhˇ gʼuiˬ Nyi htaꞈ iˉ kaˆ fiˍ kʼai piˇ ve leh Iˉsaˍreˍlaˆ chaw htaꞈ Eˇjiˇtuꞈ mvuhˇ miˬ hkʼaw shiˍ tawˆ la piˇ ve awˬ lawn kaˇ jaw ve yoˬ. Yaˬhoˉvaˬ ga piˇ ve awˬ hkʼaw lo, yawˇ hui ve canˇ paˍ hkʼa peu˗eˬ htaꞈ bawˆ gʼaˇ ve awˬ lawn kaꞈ kaˇ jaw ve yoˬ. Chi teˇ hkui yawˇ kʼawꞈ gʼa kaˇ ve, Iˉsaˍreˍlaˆ chaw Yeˍriˆhkoˇ venˇ paˇ lo deh chehˇ taˍ ve yoˬ.
Raˍhaˆ Yaˬhoˉvaˬ htaꞈ yonˍ ve pa taw, chaw jaˆ htaꞈ haꞈ shaˉ piˇ ve yoˬ
Teˇ haˉ htaˇ, Yeˍriˆhkoˇ venˇ htaꞈ Iˉsaˍreˍlaˆ chaw nyiˇ gʼaˇ ca jaˆ nyi la ve yoˬ. Yawˇ huiˉ maˬ Raˍhaˆ ve yehˬ hkʼaw gaˬ la ve yoˬ. Yawˇ yawˇ huiˉ maˬ htaꞈ ha lehˬ ha kʼa haꞈ yuˬ ve yoˬ. Oˇ teˇ haˉ Yeˍriˆhkoˇ ve jawˇ mawˇ lehˬ, chaw jaˆ nyiˇ gʼaˇ venˇ hkʼaw lo laˬ leh Raˍhaˆ aˉ hkʼaw lo kʼai ve yoˬ tehꞈ gʼa kaˇ ve yoˬ. Hkʼe te leh, yawˇ huiˉ maˬ htaꞈ hpeh yuˬ tuˬ jawˇ mawˇ yawˇ ve chaw htaꞈ peu piˇ ve yoˬ. Raˍhaˆ lehˬ yawˇ ve yehˬ awˬ hkʼoˆ lo chaw jaˆ nyiˇ gʼaˇ htaꞈ yuˬ faˉ taˍ ve yoˬ. ‘Yawˇ huiˉ maˬ ngaˬ ve yehˬ hkʼaw loꞈ la ve yoˬ. Yaꞈ hkʼaˇ, yawˇ hui venˇ hkʼaw tawˆ kʼai peuˬ. Haˆ haˆ gʼaꞈ yuˬ ve kʼo gʼaꞈ mi tuˬ sheˍ ve yoˬ’ tehꞈ yawˇ jawˇ mawˇ ve chaw htaꞈ kʼoˆ piˇ ve yoˬ. Nawˬ shiˍ˗aˬ laˇ. Aˬ htoꞈ ma pa taw chaw jaˆ htaꞈ Raˍhaˆ haꞈ shaˉ piˇ ve le.— Awˬ lawn kʼo, yawˇ lehˬ Yaˬhoˉvaˬ htaꞈ yonˍ leh Yaˬhoˉvaˬ Iˉsaˍreˍlaˆ chaw htaꞈ Hkaˍnanˍ mvuhˇ miˬ piˇ tuˬ yoˬ tehꞈ yawˇ shiˍ taˍ ve yoˬ.
Chaw jaˆ lehˬ Raˍhaˆ ve yehˬ hkʼaw tawˆ˗e yoˬ te htaˇ yawˇ huiˉ maˬ ka tiꞈ te piˇ ve, Yeˍriˆhkoˇ venˇ htaꞈ te luˬ la htaˇ, yawˇ leh yawˇ ve yehˬ yaˇ kʼa yaˇ gʼa ponˬ tuˬ yoˬ. Nawˬ shiˍ˗aˬ laˇ. Yawˇ hui yawˇ htaꞈ aˬ htoꞈ ma te tuˬ kʼoˆ piˇ ve le.— Yawˇ huiˉ maˬ kʼoˆ ve, ‘nyi˗ehˍ ve aˉ caˆ hkeh nawˬ ve yehˬ miˉ ehˉ htaꞈ hpeh taˍ˗oꞈ. Nawˬ chi hkʼe te ve kʼo, nawˬ ve yehˬ hkʼaw hkʼa chehˇ ve chaw gʼa ponˬ tuˬ yoˬ.’ Chaw jaˆ kʼoˆ piˇ ve hkʼe Raˍhaˆ hkʼa dehꞈ na yuˬ leh te ve yoˬ. Nawˬ shiˍ˗aˬ laˇ. Aˬ htoꞈ ma kʼawꞈ caˉ hpehꞈ kʼai tuˬ ve le.—
Yaˬhoˉvaˬ lehˬ Raˍhaˆ leh yawˇ ve yehˬ yaˇ kʼa yaˇ htaꞈ ponˬ piˇ ve yoˬ
Oˇ ve hkʼawꞈ nawˉ maˇ maw maw gaˬ leh Iˉsaˍreˍlaˆ chaw hui venˇ htaꞈ taꞈ iˉ gawˬ lehˍ caw toˇ ve yoˬ. Hkawꞈ nyi hkʼa gaˬ teˇ nyi teˇ caw caw toˇ ve yoˬ. Yaꞈ hkʼaˇ, suhˍ nyi teˇ nyi venˇ htaꞈ suhˍ caw caw toˇ ve yoˬ. Peuˬ hkʼawꞈ nawˉ yawˇ hui awˬ hkawˇ bvuhˬ chaweh kuˬ ve yoˬ. Yaˬhoˉvaˬ lehˬ venˇ jaˇ venˇ ji ve lanˇ venˇ paˆ ce la piˇ ve yoˬ. Yaꞈ hkʼaˇ, yehˬ miˉ ehˉ htaꞈ nyiˉ˗ehˍ ve aˉ caˆ hkeh hpeh taˍ ve yehˬ lehˬ yeˬ chehˇ sheˍ ve yoˬ. Awˬ han hkʼaw lo yehˬ chi htaꞈ mawˬ˗aw laˇ.— Raˍhaˆ leh yawˇ ve yehˬ yaˇ kʼa yaˇ gʼa ponˬ ve yoˬ.
Raˍhaˆ ve awˬ lawn htaꞈ nawˬ aˬ htoꞈ ma henˇ yuˬ gʼa ve le.— Raˍhaˆ lehˬ, Yaˬhoˉvaˬ te ve anˇ tuˬ uiˍ ve kanˉ laiˉ ceuˬ htaꞈ gʼa henˇ shiˍ ve pa taw yawˇ htaꞈ yonˍ ve yoˬ. Yaˬhoˉvaˬ te ve anˇ tuˬ uiˍ ve kanˉ laiˉ ceuˬ htaꞈ nawˬ kaꞈ henˇ chehˇ ve yoˬ. Raˍhaˆ yawˇ htaꞈ yonˍ ve hkʼa shuˍ, nawˬ kaꞈ yonˍ ve laˇ.— Nawˬ kaꞈ yonˍ tehˬ ma yoˬ tehꞈ ngaˬ hui shiˍ ve yoˬ.
