HENˇ YUˬ TUˬ 5
Saˍmo˗eˍlaˆ Cawˇ ve awˬ ceuˬ htaꞈ Tiˉ Te ve yoˬ
Saˍmo˗eˍlaˆ a shaꞈ i chehˇ sheˍ htaˇ kaꞈ aˉ po kʼo bon yehˬ lo chehˇ leh kanˉ te ve yoˬ. Oˇ kaˬ lo chaw yaˇ Yaˬhoˉvaˬ htaꞈ oˉ kʼoˍ ca pui la ve yoˬ. Nawˬ shiˍ˗aˬ laˇ, hkʼaˬ hkʼe te leh Saˍmo˗eˍlaˆ aˉ po kʼo bon yehˬ lo ca chehˇ la gʼa ve le. Saˍmo˗eˍlaˆ ve awˬ e Haˍnaˆ ve awˬ lawn htaꞈ awˉ lawˉ henˇ nyi sheˍ.
Haˍnaˆ yaˇ cawˬ gaˇ ve maw jaˇ peuˬ. Yaꞈ hkʼaˇ yawˇ yaˇ cawˬ maˇ gʼa. Hkʼe te leh yawˇ htaꞈ ga laˇ tuˬ Yaˬhoˉvaˬ geh bon lawˬ ve yoˬ. Yawˇ kʼoˆ ve, yaˇ paˍ cawˬ la kʼo, aˉ po kʼo bon yehˬ lo chehˇ leh kanˉ te tcuh tuˬ yoˬ. Yaˬhoˉvaˬ yawˇ bon lawˬ hkawˇ htaꞈ na yuˬ leh yawˇ yaˇ paˍ cawˬ la ve yoˬ. Yawˇ yawˇ htaꞈ Saˍmo˗eˍlaˆ tehꞈ meh piˇ ve yoˬ. Haˍnaˆ ka tiꞈ te taˍ ve hkʼe, Saˍmo˗eˍlaˆ a shaꞈ shehˆ hkʼawꞈ awˇ hkʼawꞈ hkʼe htaˇ, aˉ po kʼo bon yehˬ lo Gʼuiˬ sha ve kanˉ te tuˬ shiˍ laˬ ve yoˬ.
Eˇliˆ lehˬ, aˉ po kʼo bon yehˬ ve paw hkuˇ lonˉ te chehˇ ve yoˬ. Yawˇ ve yaˇ paˍ nyiˇ gʼaˇ kaꞈ oˇ kaˬ lo kanˉ te chehˇ ve yoˬ. Aˉ po kʼo bon yehˬ lo Gʼuiˬ sha htaꞈ oˉ kʼoˍ pui kuiˬ hpehꞈ ve tehꞈ taˇ leunˇ. Chi htaꞈ pa taw, oˇ kaˬ lo daꞈ ve awˬ ceuˬ htaꞈ tiˉ te cawˇ ve yoˬ. Yaꞈ hkʼaˇ, Eˇliˆ ve yaˇ paˍ nyiˇ gʼaˇ haiˬ ve htaꞈ te ve yoˬ. Yawˇ huiˉ maˬ te ve awˬ ceuˬ htaꞈ Saˍmo˗eˍlaˆ mawˬ ve yoˬ. Eˇliˆ ve yaˇ paˍ hkʼa shuˍ maˇ daꞈ ve awˬ ceuˬ htaꞈ Saˍmo˗eˍlaˆ te˗aw laˇ.— Maˇ te, awˬ pa awˬ e maˍ piˇ ve hkʼe yawˇ cawˇ ve awˬ ceuˬ htaꞈ tiˉ te ve yoˬ.
Nawˬ hkʼaˬ hkʼe dawˇ le, Eˇliˆ yawˇ yaˇ paˍ nyiˇ gʼaˇ htaꞈ hkʼaˬ hkʼe te piˇ cawˇ ve le.— Yawˇ yawˇ huiˉ maˬ htaꞈ ciˍ yanˍ piˇ leh Gʼuiˬ sha ve yehˬ lo kanˉ maˇ kʼawꞈ caˉ te tcuh cawˇ ve yoˬ. Yaꞈ hkʼaˇ, Eˇliˆ oˇ hkʼe maˇ te. Chi htaꞈ pa taw Yaˬhoˉvaˬ yawˇ leh yawˇ ve yaˇ paˍ nyiˇ gʼaˇ htaꞈ nyi ma zuhˆ ve yoˬ. Yawˇ hui htaꞈ ciˍ yanˍ tuˬ, Yaˬhoˉvaˬ dawˇ cheˆ peuˬ.
Saˍmo˗eˍlaˆ Eˇliˆ htaꞈ Yaˬhoˉvaˬ ve tawˇ hkawˇ hto piˇ chehˇ ve yoˬ
Teˇ haˉ Saˍmo˗eˍlaˆ zuhꞈ chehˇ htaˇ , ‘Saˍmo˗eˍlaˆ˗oˬ’ tehꞈ kuˬ hkawˇ gʼa kaˇ ve yoˬ. Yawˇ Eˇliˆ geh gʼuiˇ kʼai ve yoˬ. Yaꞈ hkʼaˇ, Eˇliˆ kʼoˆ ve, ‘ngaˬ nawˬ htaꞈ maˇ kuˬ.’ Chi hkʼe leˇ nyiˇ pawˆ kuˬ ve yoˬ. Shehˆ pawˆ teˇ pawˆ gaˬ leh Eˇliˆ yawˇ htaꞈ kʼoˆ piˇ ve, yawˇ nawˬ htaꞈ teˇ pawˆ kʼawꞈ kuˬ laˇ ve kʼo, ‘Yaˬhoˉvaˬ˗oˬ tawˇ yaw laˇ˗oˆ. Ngaˬ na chehˇ ve yoˬ’ tehꞈ kʼoˆ piˇ˗oˆ. Saˍmo˗eˍlaˆ oˇ hkʼe te ve yoˬ. Yaˬhoˉvaˬ Saˍmo˗eˍlaˆ htaꞈ tawˇ piˇ ve, ‘yawˇ hui ve yehˬ kʼa maˇ daꞈ ve awˬ ceuˬ te ve pa taw ciˍ yanˍ ve htaꞈ gʼa hkanˍ tuˬ yoˬ tehꞈ Eˇliˆ htaꞈ ca kʼoˆ piˇ˗oˆ.’ Awˬ lawn chi Eˇliˆ htaꞈ kʼoˆ piˇ tuˬ Saˍmo˗eˍlaˆ awˬ pon te sha ve laˇ.— Te maˇ sha ve yoˬ. Yaꞈ hkʼaˇ, Saˍmo˗eˍlaˆ kawˆ ve htawˇ, Yaˬhoˉvaˬ tawˇ piˇ ve awˬ ceuˬ htaꞈ te ve yoˬ. Yaˬhoˉvaˬ kʼoˆ piˇ ve awˬ ceuˬ awˬ tehˬ awˬ na hpehꞈ la ve yoˬ. Eˇliˆ yaˇ paˍ nyiˇ gʼaˇ htaꞈ shu tiˇ pehˍ piˇ ve htaꞈ gʼa hkanˍ leh Eˇliˆ awˬ to kaꞈ suh ve yoˬ.
Saˍmo˗eˍlaˆ ve awˬ lawn htaꞈ ngaˬ hui henˇ yuˬ tuˬ daꞈ ve yoˬ. Shu maˇ daꞈ ve awˬ ceuˬ te ve htaꞈ mawˬ htawˇ, yawˇ cawˇ ve htaꞈ tiˉ te ve yoˬ. Nawˬ hkʼaˬ hkʼe te tuˬ le, Saˍmo˗eˍlaˆ hkʼa shuˍ daꞈ ve awˬ ceuˬ htaꞈ tiˉ te tuˬ laˇ. Nawˬ oˇ hkʼe te ve kʼo, Yaˬhoˉvaˬ leh nawˬ pa nawˬ e ha lehˬ tuˬ yoˬ.
