HENˇ YUˬ TUˬ 11
Yawˇ hui Yeˍsuˆ ve Awˬ lawn Bvuhꞈ ve
Awˬ han hkʼaw hawˉ hkʼaˆ chi teˇ hpaˍ htaꞈ mawˬ˗aw laˇ— Maꞈhtehˍ, Maˍkuˆ, Luˉkaꞈ, Yoˇhanˬ, Peˍtruˆ, Yaˍkoˆ, Yuˇdaꞈ, leh Pawˇluꞈ hui hpehꞈ ve yoˬ. Hawˉ hkʼaˆ chi teˇ hpaˍ Yeˍsuˆ awˬ co˗e hkʼaw chehˇ leh, Yeˍsuˆ ve awˬ lawn bvuhꞈ ve yoˬ. Yawˇ hui ve awˬ lawn htaꞈ ngaˬ hui shiˍ maˇ la tuˬ teˇ geh henˇ nyi sheˍ.
Hawˉ hkʼaˆ chi teˇ hpaˍ a shu le. Yawˇ hui aˬ htoꞈ ma te ve le.
Yeˍsuˆ ve awˬ lawn bvuhꞈ ve hawˉ hkʼaˆ shehˆ gʼaˇ lehˬ yawˇ ve tcuh yaˇ hpehꞈ ve yoˬ. Nawˬ shiˍ˗aˬ laˇ, a shu le.— Maꞈhtehˍ, Yoˇhanˬ, leh Peˍtruˆ yoˬ. Tcuh yaˇ Maꞈhtehˍ leh Yoˇhanˬ Yeˍsuˆ htaꞈ shiˍ daꞈ jaˇ leh Yeˍsuˆ ve awˬ lawn bvuhꞈ keu ve yoˬ. Tcuh yaˇ Yoˇhanˬ lehˬ, Hpeuꞈ maˍ ve liꞈ, 1 Yoˇhanˬ liꞈ, 2 Yoˇhanˬ liꞈ leh 3 Yoˇhanˬ liꞈ htaꞈ kaꞈ bvuhꞈ ve yoˬ. Tcuh yaˇ Peˍtruˆ kaꞈ, Liꞈ hpu awˬ hkʼaw lo cawˬ ve liꞈ nyiˇ kʼoˆ htaꞈ bvuhꞈ ve yoˬ. Oˇ ve lehˬ, 1 Peˍtruˆ liꞈ leh 2 Peˍtruˆ liꞈ hpehꞈ ve yoˬ. Yaˬhoˉvaˬ ve hkawˇ mvuhˇ naw ma lo bvuhˬ la leh kʼoˆ ve, Yeˍsuˆ lehˬ yawˇ ve yaˇ paˍ hpehꞈ ve yoˬ. Yawˇ Yeˍsuˆ htaꞈ haꞈ leh yawˇ nyi hkʼaˇ suh ve yoˬ tehꞈ, kʼoˆ piˇ ve tawˇ htaꞈ Peˍtruˆ lehˬ 2 Peˍtruˆ liꞈ awˬ hkʼaw lo bvuhꞈ taˍ ve yoˬ.
Awˬ han awˬ hkʼaw lo ve awˬ nu ve hawˉ hkʼaˆ htawˇ, bvuhꞈ taˍ ve liꞈ hkʼaw Yeˍsuˆ ve awˬ lawn ngaˬ hui htaꞈ maˍ laˇ ve yoˬ. Teˇ gʼaˇ lehˬ Maˍkuˆ hpehꞈ ve yoˬ. Yeˍsuˆ htaꞈ hpeh yuˬ htaˇ, hpehꞈ la ve awˬ ceuˬ hkʼa peu˗eˬ htaꞈ yawˇ mawˬ ve yoˬ hehˉ. Leh Luˉkaꞈ kaꞈ teˇ gʼaˇ yoˬ. Yawˇ saˍ laꞈ gʼonˍ hpehꞈ leh Yeˍsuˆ suh peuˬ hkʼawꞈ nawˉ Hkriꞈ yaˇ hpehꞈ la ve yoˬ hehˉ.
Liꞈ hpu bvuhꞈ paˍ awˬ han hkʼaw lo nyiˇ gʼaˇ lehˬ, Yeˍsuˆ ve awˬ nyi paˍ hpehꞈ ve yoˬ. Yawˇ huiˉ maˬ ve awˬ meh htaꞈ shiˍ˗aˬ laˇ.— Yawˇ huiˉ maˬ ve awˬ meh lehˬ Yaˍkoˆ leh Yuˇdaꞈ hpehꞈ ve yoˬ. Awˉ lawˉ htaˇ Yeˍsuˆ htaꞈ maˇ yonˍ. Yawˇ huiˉ maˬ Yeˍsuˆ gʼuˇ ve yoˬ tehꞈ dawˇ jaw ve yoˬ. Yaꞈ hkʼaˇ, awˬ hkʼawꞈ nawˉ Yeˍsuˆ htaꞈ yonˍ leh Hkriꞈ yaˇ hpehꞈ la ve yoˬ.
Liꞈ hpu bvuhꞈ paˍ awˬ han hkʼaw mawˬ ve awˬ leh meuˇ teˇ gʼaˇ lehˬ Pawˇluꞈ hpehꞈ ve yoˬ. Hkriꞈ yaˇ maˇ hpehꞈ la sheˍ htaˇ yawˇ lehˬ Sawˉluꞈ meh ve yoˬ. Hkriꞈ yaˇ htaꞈ canˇ leh fawˉ mehˍ jaˇ ve yoˬ. Nawˬ shiˍ˗aˬ laˇ, aˬ htoꞈ ma pa taw Pawˇluꞈ Hkriꞈ yaˇ hpehꞈ la gaˇ ve le.— Teˇ nyi htaˇ, yaꞈ kʼaw teˇ caˆ hkʼoˆ juˇ kʼai chehˇ ve teˇ yanˇ, mvuhˇ naw ma hkʼoˆ lo awˬ hkawˇ bvuhˬ la leh chaw teˇ gʼaˇ yawˇ htaꞈ tawˇ yaw piˇ ve yoˬ. Oˇ ve lehˬ Yeˍsuˆ hpehꞈ ve yoˬ. Yawˇ Pawˇluꞈ htaꞈ na nyi piˇ ve, aˬ htoꞈ ma pa taw, ngaˬ htaꞈ yonˍ ve chaw htaꞈ chi tawn tawn fawˉ mehˍ piˇ ve le. Oˇ ve hkʼawꞈ nawˉ Pawˇluꞈ yonˍ la leh Hkriꞈ yaˇ hpehꞈ la ve yoˬ. Pawˇluꞈ bvuhꞈ taˍ ve Liꞈ hpu 14 kʼoˆ lehˬ, Roˉmaꞈ liꞈ te leh Heˍbrehˇ liꞈ gaˬ ve yoˬ.
Ngaˬ hui Liꞈ hpu teˇ nyi le le gʼaw ve maˇ heˆ laˇ. Ngaˬ hui chi hkʼe te ve kʼo, Yeˍsuˆ ve awˬ lawn laiˉ lawn gʼa henˇ tuˬ yoˬ. Nawˬ Yeˍsuˆ ve awˬ lawn henˇ gaˇ˗aˬ laˇ.
