HENˇ YUˬ TUˬ 8
Yawˇshiˆ Daꞈ ve Awˬ chawˇ Cawˬ
Nawˬ dawˇ kʼo, cawˇ ve awˬ ceuˬ te ve haˍ ve laˇ.— Chaw maˇ˗awˍ ve dawˇ ve, te haˍ ve yoˬ. Liꞈ hpu hkʼaw kʼoˆ ve Yawˇshiˆ meh ve yaˇ paˍ teˇ gʼaˇ awˬ pon cawˇ ve awˬ ceuˬ te ve haˍ jaˇ ve yoˬ ceˇ. Yaꞈ hkʼaˇ, yawˇ htaꞈ ga piˇ ve daꞈ ve awˬ chawˇ cawˬ ve yoˬ. Yawˇshiˆ leh yawˇ ve awˬ chawˇ ve awˬ lawn htaꞈ teˇ geh henˇ nyi sheˍ.
Yawˇshiˆ ve awˬ pa Yuˇdaꞈ ve jawˇ mawˇ Aˍmonˍ hpehꞈ ve yoˬ. Aˍmonˍ lehˬ haiˬ leh shaˉ hoꞈ htaꞈ oˉ kʼoˍ pui ve yoˬ. Yawˇshiˆ ve awˬ pa suh ve teˇ yanˇ, Yawˇshiˆ Yuˇdaꞈ ve jawˇ mawˇ kʼawꞈ hpehꞈ la ve yoˬ. Yaꞈ hkʼaˇ, yawˇ lehˬ a shaꞈ hiˉ hkʼawꞈ ceh tiˉ sheˍ ve yoˬ. Nawˬ dawˇ kʼo, yawˇ awˬ pa hkʼa shuˍ yawˇ haiˬ ve laˇ.— Maˇ haiˬ taˬ.
Yuˇdaꞈ chaw shaˉ hoꞈ htaꞈ oˉ kʼoˍ maˇ gʼa pui tuˬ Zeˍhpaˍniˆ shaˍ tiꞈ piˇ ve yoˬ
Yawˇshiˆ a shaꞈ i jaˇ sheˍ ve htawˇ, yawˇ Yaˬhoˉvaˬ hkawˇ htaꞈ na yuˬ gaˇ ve yoˬ. Chi htaꞈ pa taw, yawˇ lehˬ Yaˬhoˉvaˬ htaꞈ haꞈ ve chaw htaꞈ ceh tiˉ awˬ chawˇ te daꞈ ve yoˬ. Leh yawˇ hui lehˬ, Yawˇshiˆ cawˇ ve awˬ ceuˬ htaꞈ te tuˬ ga piˇ ve yoˬ. Yawˇshiˆ ve awˬ chawˇ a shu hpehꞈ ve le.
Yawˇ ve awˬ chawˇ teˇ gʼaˇ lehˬ Zeˍhpaˍniˆ hpehꞈ ve yoˬ. Zeˍhpaˍniˆ lehˬ, tcuh kaˍ paˍ hpehꞈ leh Yuˇdaꞈ chaw shaˉ hoꞈ htaꞈ oˉ kʼoˍ pui ve kʼo, maˇ daꞈ ve awˬ ceuˬ hpehꞈ la tuˬ yoˬ tehꞈ shaˍ tiꞈ piˇ ve yoˬ. Yawˇsuˆ Zeˍhpaˍniˆ hkawˇ na yuˬ leh Yaˬhoˉvaˬ htaꞈ oˉ kʼoˍ pui ve yoˬ. Shaˉ hoꞈ htaꞈ oˉ kʼoˍ maˇ pui.
Yawˇshiˆ ve awˬ chawˇ teˇ gʼaˇ kʼawꞈ cawˬ ve lehˬ Yeˍraˍmiˆ hpehꞈ ve yoˬ. Yawˇ huiˉ maˬ a shaꞈ aˬ laˬ hkʼe hkʼa shuˍ shuˍ cawˬ leh hkʼaˆ kaꞈ awˬ paˇ paˇ cawˬ ve yoˬ. Yawˇ huiˉ maˬ awˬ chawˇ daꞈ jaˇ ve pa taw, Yawˇshiˆ suh ve teˇ yanˇ, Yawˇshiˆ htaꞈ hkʼaˬ ma dawˇ nawˇ ve awˬ lawn Yeˍraˍmiˆ liꞈ hkawˇ yanˍ tawˆ piˇ ve yoˬ. Yawˇshiˆ leh Yeˍraˍmiˆ teˇ gʼaˇ leh teˇ gʼaˇ ga piˇ daꞈ ve pa taw, yawˇ huiˉ maˬ cawˇ ve awˬ ceuˬ htaꞈ te leh Yaˬhoˉvaˬ hkawˇ na yuˬ gʼa ve yoˬ.
Yawˇshiˆ leh Yeˍraˍmiˆ cawˇ ve awˬ ceuˬ htaꞈ te tuˬ ga daꞈ ve yoˬ
Yawˇshiˆ ve awˬ lawn ngaˬ hui htaꞈ aˬ htoꞈ ma maˍ laˇ ve le.— Yawˇshiˆ yaˇ paˍ ehˉ ceh hpehꞈ ve htawˇ, cawˇ ve awˬ ceuˬ htaꞈ yawˇ te gaˇ ve yoˬ. Yawˇ lehˬ, Yaˬhoˉvaˬ htaꞈ haꞈ ve chaw htaꞈ awˬ chawˇ te cawˇ ve yoˬ tehꞈ yawˇ shiˍ ve yoˬ. Nawˬ htawˇ cawˇ ve awˬ ceuˬ htaꞈ te tuˬ ga laˇ gʼa ve, Yaˬhoˉvaˬ htaꞈ haꞈ ve chaw htaꞈ ceh tiˉ awˬ chawˇ te sheˍ.
