Yaˬhoˉvaˬ ve awˬ lawn chaw yaˇ htaꞈ kʼoˆ maˍ ve teˇ yanˇ, teˇ pawˆ pawˆ yawˇ hui ngaˬ hui htaꞈ kʼoˆ guiˇ gʼuiˬ guiˇ ve, maˇ heˆ leh nyi ma zuhˆ ve yoˬ. Chi htaꞈ pa taw, Gʼuiˬ sha ve awˬ lawn htaꞈ ngaˬ hui maˇ kʼoˆ gaˇ la ve yoˬ. Nawˬ chi hkʼe dawˇ jaw ve laˇ.— Yaˬhoˉvaˬ htaꞈ haꞈ ve hawˉ hkʼaˆ teˇ gʼaˇ yawˇ ve awˬ lawn kʼoˆ tuˬ aˬ laˬ hkʼe baˬ taˉ ve yoˬ tehꞈ Liꞈ hpu hkʼaw ngaˬ hui htaꞈ kʼoˆ maˍ laˇ taˍ ve yoˬ. Yawˇ lehˬ, Yeˍraˍmiˆ meh ve yoˬ. Yawˇ ve awˬ lawn htaꞈ shiˍ la tuˬ ngaˬ hui teˇ geh henˇ nyi sheˍ.

Chaw yaˇ maˇ daꞈ ve awˬ ceuˬ htaꞈ maˇ kʼawꞈ te tuˬ, Yaˬhoˉvaˬ lehˬ a shaꞈ i ve Yeˍraˍmiˆ htaꞈ shaˍ tiꞈ piˇ tcuh ve yoˬ. Awˬ lawn chi htaꞈ kʼoˆ tuˬ Yeˍraˍmiˆ kawˆ leh yawˇ awˬ pon haˍ ve yoˬ. Yawˇ Yaˬhoˉvaˬ htaꞈ kʼoˆ piˇ ve, ‘hkʼaˬ hkʼe kʼoˆ tuˬ ngaˬ maˇ shiˍ, ngaˬ a shaꞈ i sheˍ ve yoˬ.’ Yaꞈ hkʼaˇ, Yaˬhoˉvaˬ kʼoˆ ve, ‘taˇ kawˆ, ngaˬ nawˬ htaꞈ ga laˇ tuˬ yoˬ.’

 Chi htaꞈ pa taw, Yeˍraˍmiˆ chaw yaˇ htaꞈ nyi ma maˇ pa ve kʼo, ciˍ yanˍ ve htaꞈ gʼa hkanˍ ve yoˬ tehꞈ shaˍ tiꞈ piˇ ve yoˬ. Yeˍraˍmiˆ kʼoˆ piˇ ve hkʼe yawˇ hui te ve laˇ. — Maˇ te. Yawˇ hui yawˇ htaꞈ kʼoˆ guiˇ gʼuiˬ guiˇ ve, maˇ heˆ leh nyi ma zuhˆ ve yoˬ. Teˇ hpaˍ hpaˍ kʼo, yawˇ htaꞈ tiˇ pehˍ gaˇ ve yoˬ. Nawˬ dawˇ kʼo, Yeˍraˍmiˆ hkʼaˬ hkʼe dawˇ ve le.— Yawˇ kawˆ leh kʼoˆ ve, ngaˬ Yaˬhoˉvaˬ ve awˬ lawn htaꞈ maˇ kʼawꞈ kʼoˆ gaˇ˗o. Yaꞈ hkʼaˇ, yawˇ Yaˬhoˉvaˬ ve awˬ lawn htaꞈ maˇ kʼawꞈ kʼoˆ tehˬ tehˬ ve laˇ.— Maˇ heˆ. Yawˇ lehˬ Yaˬhoˉvaˬ htaꞈ haꞈ jaˇ. Chi htaꞈ pa taw, yawˇ ve awˬ lawn htaꞈ maˇ kʼoˆ kʼo, chehˇ maˇ gʼa ve yoˬ. Yeˍraˍmiˆ caˉ kʼoˆ chehˇ ve pa taw, Yaˬhoˉvaˬ yawˇ htaꞈ haꞈ shaˉ piˇ ve yoˬ.

Tawˇ pa haˉ te kʼo, teˇ pawˆ htaˇ maˇ daꞈ ve hawˉ hkʼaˆ teˇ hpaˍ hpaˍ Yeˍraˍmiˆ htaꞈ yuˬ leh mehꞈ gʼuˬ cawˬ ve naˉ jaˇ ve nanˬ bawˍ hkʼaw baˬ keu piˇ ve yoˬ. Yawˇ lehˬ caˇ tuˬ leh dawˬ tuˬ iˉ kaˆ maˇ cawˬ. Hawˉ hkʼaˆ oˇ ve teˇ hpaˍ yawˇ htaꞈ oˇ kaˬ lo suh˗e tcuh tuˬ baˬ taˉ ve yoˬ. Yaꞈ hkʼaˇ, Yaˬhoˉvaˬ ga piˇ leh yawˇ oˇ kaˬ lo tawˆ la gaˬ ve yoˬ.

Yeˍraˍmiˆ ve awˬ lawn ngaˬ hui htaꞈ aˬ htoꞈ ma maˍ laˇ ve le.— Teˇ pawˆ pawˆ yawˇ kawˆ ve htawˇ, Yaˬhoˉvaˬ ve awˬ lawn htaꞈ caˉ kʼoˆ chehˇ ve yoˬ. Nawˬ Yaˬhoˉvaˬ ve awˬ lawn htaꞈ kʼoˆ ve teˇ yanˇ chaw teˇ hpaˍ kʼoˆ guiˇ gʼuiˬ guiˇ ve, maˇ heˆ leh nyi ma zuhˆ la tuˬ yoˬ. Nawˬ yaꞈ taw leh kawˆ tuˬ yoˬ hehˉ. Yaꞈ hkʼaˇ, Yaˬhoˉvaˬ ve awˬ lawn kʼoˆ tuˬ taˇ baˬ taˉ. Yeˍraˍmiˆ htaꞈ yawˇ ga piˇ ve hkʼa shuˍ nawˬ htaꞈ htawˇ hkʼaˬ htaˆ kaꞈ ga laˇ tuˬ yoˬ.