Awˬ pa awˬ e hkawˇ htaꞈ na yuˬ ve hkʼaˬ htaˆ kaꞈ sha ve laˇ.— Teˇ pawˆ pawˆ kʼo haˍ ve yoˬ. Yeˍsuˆ lehˬ, Yaˬhoˉvaˬ leh yawˇ ve awˬ pa awˬ e hkawˇ na yuˬ ve htaꞈ nawˬ shiˍ˗aˬ laˇ.— Haˍ ve teˇ yanˇ htawˇ, awˬ pa awˬ e hkawˇ na yuˬ tuˬ yawˇ te ve awˬ hkʼaˇ ngaˬ hui htaꞈ ga laˇ gʼa ve yoˬ. Awˬ lawn chi ve htaꞈ shiˍ maˇ la tuˬ ngaˬ hui teˇ geh henˇ nyi sheˍ.

Yeˍsuˆ miˬ guiˬ hkʼoˆ maˇ yaꞈ la sheˍ gʼuˇ suhˍ htaˇ, mvuhˇ naw ma hkʼoˆ yawˇ ve Awˬ pa Yaˬhoˉvaˬ geh chehˇ ve yoˬ. Yaꞈ hkʼaˇ, Yeˍsuˆ awˬ pa awˬ e miˬ guiˬ hkʼoˆ kaꞈ cawˬ ve yoˬ. Yawˇ huiˉ maˬ ve awˬ meh lehˬ Yoˇsehꞈ leh Maˍriˆ hpehꞈ ve yoˬ. Nawˬ shiˍ˗aˬ laˇ, yawˇ huiˉ maˬ yawˇ ve awˬ pa awˬ e hkʼaˬ hkʼe hpehꞈ la gʼa ve le.—

Yeˍsuˆ miˬ guiˬ hkʼoˆ paw la tuˬ awˬ pon, mvuhˇ naw ma hkʼoˆ Yeˍsuˆ ve a shaꞈ htaꞈ Yaˬhoˉvaˬ yuˬ leh Maˍriˆ hkʼaw keu piˇ ve yoˬ. Chi hkʼe te ve lehˬ anˇ tuˬ cawˬ ve yoˬ. Awˬ kaˍ awˬ nu yaˇ awˬ e awˬ hkʼaw uiˍ la ve hkʼe Yeˍsuˆ Maˍriˆ hkʼaw uiˍ la ve yoˬ. Kʼawˇ ha pa gaˬ leh Yeˍsuˆ paw la ve yoˬ. Chi hkʼe te ve pa taw, Yeˍsuˆ miˬ guiˬ hkʼoˆ chehˇ htaˇ, Maˍriˆ leh yawˇ ve awˬ hpawˇ Yoˇsehꞈ yawˇ ve awˬ pa awˬ e hpehꞈ la ve yoˬ.

Yeˍsuˆ a shaꞈ 12 hkʼawꞈ hkʼe ceh htaˇ, yawˇ ve Awˬ pa Yaˬhoˉvaˬ htaꞈ hkʼaˬ ma haꞈ ve htaꞈ yawˇ te ve awˬ ceuˬ hpeuꞈ maw laˇ ve yoˬ. Awˬ lawn chi hkʼe hpehꞈ la ve lehˬ, Yeˍsuˆ leh yawˇ ve yehˬ kʼa Yeˍruˆsaˍlehnˍ venˇ lo Paˍsaˍhkaˍ pawehˇ te tuˬ yaꞈ kʼaw juˇ kʼai vuiˇ jaˇ htaˇ yoˬ. Yawˇ hui yaꞈ kʼaw kʼaˉ lo kʼoꞈ˗e gaˬ htaˇ, Maˍriˆ leh Yoˇsehꞈ Yeˍsuˆ htaꞈ ca maˇ mawˬ. Nawˬ shiˍ˗aˬ laˇ, yawˇ hkʼaˬ lo chehˇ taˍ ve le.—

Maˍriˆ leh Yoˇsehꞈ Yeˍruˆsaˍlehnˍ venˇ lo haˆ kʼawꞈ kʼai leh teˇ kaˬ le le lo Yeˍsuˆ htaꞈ ca ve yoˬ. Ca maˇ mawˬ ve pa taw, yawˇ huiˉ maˬ dawˇ haˍ jaˇ. Yaꞈ hkʼaˇ, shehˆ nyi gaˬ leh bon yehˬ lonˉ hkʼaw yawˇ chehˇ taˍ ve htaꞈ yawˇ huiˉ maˬ gʼa mawˬ ve yoˬ. Nawˬ shiˍ˗aˬ laˇ, aˬ htoꞈ ma pa taw Yeˍsuˆ bon yehˬ lonˉ hkʼaw chehˇ taˍ ve le.— Awˬ lawn kʼo, yawˇ Awˬ pa Yaˬhoˉvaˬ ve awˬ lawn oˇ kaˬ lo henˇ shiˍ gʼa ve yoˬ. Yawˇ Yaˬhoˉvaˬ htaꞈ haꞈ leh yawˇ nyi hkʼaˇ suh tuˬ te piˇ gʼa ve awˬ hkʼaˇ henˇ shiˍ gaˇ ve yoˬ. Haˍ ve teˇ yanˇ htawˇ, Yeˍsuˆ Yaˬhoˉvaˬ hkawˇ htaꞈ hkʼaˬ htaˆ kaꞈ na yuˬ chehˇ ve yoˬ. Yeˍsuˆ Maˍriˆ leh Yoˇsehꞈ ve hkawˇ htaꞈ kaꞈ na yuˬ ve laˇ.— Yoˬ, Liꞈ hpu hkʼaw kʼoˆ ve, yawˇ na yuˬ ve yoˬ.

Yeˍsuˆ ve awˬ lawn nawˬ htaꞈ aˬ htoꞈ ma maˍ laˇ ve le.— Haˍ ve teˇ yanˇ htawˇ, nawˬ pa nawˬ e hkawˇ htaꞈ na yuˬ tuˬ loˍ ve yoˬ. Nawˬ oˇ hkʼe te tuˬ laˇ.—