Awˬ lawn 01
Liꞈ hpu nawˬ htaꞈ hkʼaˬ hkʼe ga laˇ gʼa ve le?
Ngaˬ hui ve a shaꞈ, tuꞈ ve hkanˍ ve, suh ve leh awˬ gʼuˇ suhˍ hpawˇ ve awˬ lawn htaꞈ caˉ daꞈ ve, htawˇ dawˇ nawˬ dawˇ cawˬ ve yoˬ. Teˇ nyi le le awˬ hkʼaw lo dawˇ haˍ ve laiˉ ceuˬ cawˬ ve yoˬ. Tawˇ pa haˉ te kʼo, hkʼaˬ hkʼe te leh hpu yehˇ lawꞈ tuˬ le? Yehˬ kʼa hkʼaw ha lehˬ ve cawˬ tuˬ, hkʼaˬ hkʼe te cawˇ ve le? Liꞈ hpu lehˬ, chaw laiˉ gʼaˇ a shaꞈ teꞈ hkʼaˇ a yeˇ uiˍ ve awˬ lawn hkʼawꞈ piˇ leh teˇ nyi le le a shaꞈ teꞈ kuiˬ hkʼaw yuˬ yehˇ tuˬ beˆ maˍ piˇ taˍ ve yoˬ. Nawˬ dawˇ kʼo, Liꞈ hpu lehˬ nawˬ leh nawˬ shiˍ daꞈ ve chaw awˬ pon awˬ bon cawˬ˗aw laˇ?
1. Liꞈ hpu lehˬ aˬ htoꞈ ma ve na hkawˇ htaꞈ hkʼawꞈ laˇ ve le?
Liꞈ hpu lehˬ na hkawˇ chi ve teˇ hpaˍ htaꞈ hkʼawꞈ laˇ ve yoˬ. Tawˇ pa haˉ te kʼo, a shaꞈ teꞈ ve awˬ ceuˬ hkʼaˬ hkʼe te cawˬ la gʼa ve le? Aˬ htoꞈ ma pa taw, ngaˬ hui paw la ve le? Aˬ htoꞈ ma te daꞈ ve chaw haiˬ ve awˬ ceuˬ htaꞈ gʼa hpuˇ ve le? Suh˗oˬ kʼo hkʼaˬ hkʼe kʼai le? Ngaˬ hui teˇ gʼaˇ le le gawˬ lehˍ ve awˬ hkʼaw lo chehˇ gaˇ ve htawˇ, aˬ htoꞈ ma te chaw yaˇ maꞈ bawˆ daꞈ chehˇ sheˍ ve le? Awˬ gʼuˇ suhˍ hpawˇ miˬ guiˬ chi hkʼaˬ hkʼe hpehꞈ la tuˬ le? Na hkawˇ chi teˇ hpaˍ htaꞈ hkʼawꞈ laˇ hkawˇ ngaˬ hui ca mawˬ tuˬ Liꞈ hpu ga laˇ ve yoˬ. Chaw laiˉ lanˬ gʼaˇ chi hkʼe te htaˇ, awˬ bon gʼa ve yoˬ.
2. Ngaˬ hui a shaꞈ teꞈ hkʼaˇ ha lehˬ ve cawˬ gʼa tuˬ Liꞈ hpu hkʼaˬ hkʼe ga laˇ gʼa ve le?
Liꞈ hpu hkʼaw daꞈ ve beˆ maˍ laˇ hkawˇ cawˬ ve yoˬ. Tawˇ pa haˉ te kʼo, yehˬ kʼa hkʼaw ha lehˬ ve cawˬ gʼa tuˬ, dawˇ tuiꞈ gaˇ tuiꞈ ve awˬ ceuˬ htaꞈ gu gʼa tuˬ, leh kanˉ te ve awˬ hkʼaw lo ha lehˬ ve cawˬ gʼa tuˬ, Liꞈ hpu ga laˇ ve yoˬ. Awˬ lawn chi ve leh awˬ nu ve awˬ lawn Liꞈ hpu ngaˬ hui htaꞈ hkʼaˬ hkʼe beˆ maˍ laˇ ve le tehꞈ teˇ geh nyi sheˍ. ‘Liꞈ hpu hkʼa peu˗eˬ lehˬ awˬ bon cawˬ ve yoˬ’ tehꞈ nawˬ kaꞈ dawˇ tuˬ yoˬ hehˉ.—2 Tiˆmoˉseˍ 3:16, 17.
Liꞈ chi teˇ kʼoˆ Liꞈ hpu hpehꞈ ve maˇ heˆ. Yaꞈ hkʼaˇ, nawˬ Liꞈ hpu hkʼaw shiˍ maˇ la tuˬ ga laˇ gʼa ve yoˬ. Chi htaꞈ pa taw, awˬ lawn teˇ hpaˍ hkʼaw cawˬ ve Liꞈ hpu awˬ tawn nawˬ htaꞈ gʼaw tcuh gaˇ ve yoˬ. Liꞈ hpu awˬ tawn oˇ ve teˇ hpaˍ leh nawˬ henˇ chehˇ ve awˬ lawn htaꞈ tehˆ daꞈ nyi tcuh gaˇ ve yoˬ.
Henˇ shiˍ maˇ la tuˬ
Liꞈ hpu chaw yaˇ htaꞈ hkʼaˬ hkʼe ga piˇ ve le, nawˬ Liꞈ hpu gʼaw ve htaꞈ hkʼaˬ hkʼe te dawˇ cawˇ tuˬ le, leh nawˬ Liꞈ hpu hkʼaw hkʼa dehꞈ shiˍ tuˬ ga laˇ ve aˬ htoꞈ ma te daꞈ jaˇ ve le, chi ve teˇ hpaˍ teˇ geh nyi sheˍ.
3. Liꞈ hpu hkʼaw ngaˬ hui htaꞈ beˆ maˍ laˇ gʼa ve
Liꞈ hpu lehˬ ngaˬ hui htaꞈ sheh kʼai laˇ tuˬ awˬ gʼeuˆ hpehꞈ ve yoˬ. Cawˇ ve awˬ ceuˬ dawˇ cheˆ gʼa tuˬ ga laˇ ve leh awˬ gʼuˇ suhˍ hpawˇ aˬ htoꞈ ma hpehꞈ la tuˬ kʼoˆ laˇ ve yoˬ.
Chiˇ mvuh ve liꞈ 119:105 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Chiˇ mvuh ve liꞈ bvuhꞈ paˍ chi teˇ gʼaˇ Liꞈ hpu htaꞈ hkʼaˬ hkʼe dawˇ ve le?
-
Nawˬ Liꞈ hpu htaꞈ hkʼaˬ hkʼe dawˇ ve le?
4. Ngaˬ hui ve na hkawˇ htaꞈ Liꞈ hpu hkʼawꞈ laˇ gʼa ve
Liꞈ hpu lehˬ yaˇ miˇ teˇ gʼaˇ laiˉ hkʼawꞈ ve awˬ yanˇ awˬ hkʼaw lo htawˇ dawˇ nawˬ dawˇ cawˬ ve awˬ lawn laiˉ lawn htaꞈ hkʼawꞈ piˇ ve yoˬ. VDO hpaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
VDO chi hkʼaw yaˇ miˇ teˇ gʼaˇ aˬ htoꞈ ma awˬ lawn htaꞈ htawˇ dawˇ nawˬ dawˇ cawˬ ve le?
-
Liꞈ hpu henˇ ve htaꞈ yawˇ aˬ htoꞈ ma awˬ bon gʼa ve le?
Ngaˬ hui coˇ caˇ leh hkʼawꞈ laˇ hkawˇ ca cawˇ ve tehꞈ Liꞈ hpu hkʼaw beˆ maˍ laˇ ve yoˬ. Maꞈhtehˍ liꞈ 7:7 gʼaw leh na hkawˇ chi htaꞈ tawˇ yaw daꞈ sheˍ:
-
Liꞈ hpu hkʼaw hkʼawꞈ laˇ hkawˇ ca gʼa tuˬ, nawˬ htawˇ dawˇ nawˬ dawˇ aˬ htoꞈ ma cawˬ ve le?
5. Nawˬ Liꞈ hpu gʼaw ve htaꞈ ha lehˬ gʼa ve
Chaw laiˉ gʼaˇ Liꞈ hpu gʼaw ve htaꞈ ha lehˬ leh awˬ bon gʼa ve yoˬ. VDO hpaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
VDO chi hkʼaw yaˇ nehˬ teˇ hpaˍ aˬ htoꞈ ma te liꞈ gʼaw ve htaꞈ maˇ dawˇ cawˇ ve le?
-
Yaꞈ hkʼaˇ, aˬ htoꞈ ma pa taw yawˇ hui Liꞈ hpu gʼaw ve htaꞈ dawˇ cawˇ ve le?
Liꞈ hpu hkʼaw maˍ laˇ ve awˬ ceuˬ lehˬ, ngaˬ hui dawˇ sha gaˇ sha ve leh dawˇ law kuiˬ cawˬ tuˬ ga laˇ ve yoˬ. Roˉmaꞈ liꞈ 15:4 gʼaw leh na hkawˇ chi htaꞈ tawˇ yaw daꞈ sheˍ:
-
Liꞈ hpu hkʼaw dawˇ sha ve leh dawˇ law kuiˬ cawˬ tuˬ ka tiꞈ te taˍ laˇ ve nawˬ htaꞈ dawˇ cawˇ tuˬ te laˇ˗aw laˇ?
6. Liꞈ hpu htaꞈ hkʼa dehꞈ shiˍ tuˬ awˬ nu ve chaw ga laˇ gʼa ve
A shu yawˇ hkʼaˇ yawˇ Liꞈ hpu gʼaw ve awˬ hkʼoˆ kaꞈ awˬ nu ve chaw ga laˇ ve kʼo, awˬ bon gʼa ve yoˬ tehꞈ laiˉ gʼaˇ kʼoˆ ve yoˬ. Tcuh yaˇ liꞈ 8:26-31 gʼaw leh na hkawˇ chi htaꞈ tawˇ yaw daꞈ sheˍ:
-
Ngaˬ hui Liꞈ hpu htaꞈ hkʼaˬ hkʼe te na gʼa tuˬ le?—Kaˇ nanˉ ehˉ 30 leh 31 htaꞈ nyi sheˍ.
Ehˇtaˍyoˇpiˆ chaw hawˉ hkʼaˆ teˇ gʼaˇ Liꞈ hpu hkʼaw na gʼa tuˬ ga piˇ tuˬ ve chaw htaꞈ loˍ ve yoˬ. Chi beuꞈ teˇ co˗e chaw laiˉ gʼaˇ htaꞈ awˬ nu ve chaw Liꞈ hpu maˍ piˇ leh awˬ bon gʼa ve
Chaw teˇ hpaˍ kʼoˆ ve: “Liꞈ hpu henˇ ve lehˬ awˬ yanˇ shonˇ ve ceh yoˬ.”
-
Nawˬ hkʼaˬ hkʼe dawˇ ve le? Aˬ htoꞈ ma te oˇ hkʼe dawˇ ve le?
A yeˇ uiˍ ve awˬ lawn
Liꞈ hpu lehˬ, teˇ nyi le le a shaꞈ teꞈ kuiˬ hkʼaw yuˬ yehˇ tuˬ beˆ maˍ laˇ ve, a yeˇ uiˍ ve awˬ lawn hkʼawꞈ laˇ ve, leh dawˇ sha gaˇ sha ve leh dawˇ law kuiˬ cawˬ tuˬ ga laˇ ve yoˬ.
Kʼawꞈ gʼaꞈ na ve
-
Liꞈ hpu lehˬ aˬ htoꞈ ma awˬ lawn beˆ maˍ laˇ hkawˇ cawˬ ve le?
-
Liꞈ hpu hkʼaw aˬ htoꞈ ma ve na hkawˇ htaꞈ hkʼawꞈ laˇ hkawˇ cawˬ ve le?
-
Liꞈ hpu hkʼaw ve awˬ lawn nawˬ aˬ htoꞈ ma awˬ lawn shiˍ gaˇ ve le?
Kʼawꞈ caˉ nyi gʼa ve
Liꞈ hpu hkʼaw beˆ maˍ laˇ hkawˇ chi beuꞈ teˇ co˗e aˬ htoꞈ ma te yuˬ yehˇ gʼa ve le tehꞈ nyi sheˍ.
Hawˉ hkʼaˆ teˇ gʼaˇ yaˇ ehˉ htaˇ kaꞈ yawˇ awˬ to htaꞈ maˇ yonˍ gʼa leh awˬ hpfuhˇ maˇ cawˬ tehꞈ dawˇ ve htaꞈ Liꞈ hpu hkʼaw hkʼaˬ hkʼe ga piˇ gʼa ve le tehꞈ nyi sheˍ.
Ngaˬ ve a shaꞈ awˬ suhˉ tanˬ ve htaꞈ hkʼaˬ hkʼe te ha lehˬ gʼa ve le? (2:53)
Yehˬ kʼa hkʼaw beˆ maˍ laˇ hkawˇ yuˬ yehˇ gʼa tuˬ Liꞈ hpu hkʼaw hkʼaˬ hkʼe maˍ laˇ ve le tehꞈ nyi sheˍ.
“Yehˬ kʼa hkʼaw ha lehˬ tuˬ te laˇ gʼa ve 12 hkʼaˇ” (Tu loˬ! 2018 hkʼawꞈ 2 kʼoˆ teˇ kʼoˆ)
Miˬ guiˬ chi a shu uˉ peunˍ ve le tehꞈ, chaw laiˉ gʼaˇ htawˇ dawˇ nawˬ dawˇ cawˬ ve yoˬ. Yaꞈ hkʼaˇ, awˬ lawn chi Liꞈ hpu hkʼaw hkʼaˬ hkʼe maˍ laˇ ve le tehꞈ nyi sheˍ.
You May Also Like
NGAˬ HUI HTAꞈ CAˉ DAꞈ VE AWˬ LAWN
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ ve hk’aˬ hk’e te henˇ ve le?
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ tuˬ nawˬ Liꞈ hpu hk’aˬ ve teˇ maˬ yehˇ ve kaꞈ hpehꞈ ve yoˬ. Awˬ chawˇ maˇ heˆ leh yehˬ k’a hk’aw ve chaw htaꞈ Liꞈ hpu teˇ geh henˇ tuˬ jehˬ piˇ kaꞈ g’a ve yoˬ.
