Awˬ lawn 02
Liꞈ hpu dawˇ law kuiˬ peꞈ laˇ ve
Chaw yaˇ lehˬ laiˉ ceuˬ dawˇ hkiˉ ve, nyi ma luˬ ve, leh dawˇ haˍ ve yoˬ. Nawˬ oˇ hkʼe ve awˬ ceuˬ gʼa hpuˇ jaw˗aw laˇ? Nawˬ kaꞈ naˬ chehˇ ve maˇ heˆ leh nawˬ haꞈ ve chaw suh kʼai ve pa taw, nyi ma luˬ chehˇ ve yoˬ hehˉ. ‘Ngaˬ ve a shaꞈ teꞈ hkʼaˇ daꞈ la tuˬ laˇ?’ tehꞈ, nawˬ htawˇ dawˇ nawˬ dawˇ cawˬ ve yoˬ hehˉ. Na hkawˇ chi htaꞈ Liꞈ hpu hkʼawꞈ laˇ gʼa ve yoˬ.
1. Liꞈ hpu ngaˬ hui htaꞈ aˬ htoꞈ ma dawˇ law kuiˬ peꞈ laˇ ve le?
Ngaˬ hui aˬ htoꞈ ma pa taw shoꞈ shaꞈ ve awˬ ceuˬ gʼa hpuˇ maˇ jaˇ ve le tehꞈ, Liꞈ hpu hkʼaw kʼoˆ maˍ laˇ ve yoˬ. Chi hkʼoˆ kaꞈ, maˇ maw kʼo shoꞈ shaꞈ ve awˬ ceuˬ mehˉ kʼai tuˬ yoˬ tehꞈ, Liꞈ hpu hkʼaw ka tiꞈ te taˍ laˇ ve yoˬ. Awˬ gʼuˇ suhˍ hpawˇ ve awˬ lawn Liꞈ hpu hkʼaw ka tiꞈ te taˍ laˇ ve nawˬ htaꞈ dawˇ law kuiˬ peꞈ laˇ gʼa ve yoˬ. (Yeˍraˍmiˆ 29:11, 12 gʼaw sheˍ.) Dawˇ law kuiˬ chi ve lehˬ ngaˬ hui shoꞈ shaꞈ ve gʼa hpuˇ htaˇ, yeunˇ hkanˍ gʼaˇ tuˬ ga laˇ leh chi teˇ hkui kaꞈ ha lehˬ ve cawˬ tuˬ ga laˇ ve yoˬ. Ka tiꞈ chi teˇ hpaˍ ngaˬ hui co co taiˍ taiˍ ha lehˬ gʼa ve tehꞈ maˍ laˇ ve yoˬ.
2. Liꞈ hpu hkʼaw awˬ gʼuˇ suhˍ hpawˇ ve awˬ lawn hkʼaˬ hkʼe maˍ laˇ ve le?
Liꞈ hpu hkʼaw kʼoˆ laˇ ve, awˬ gʼuˇ suhˍ hpawˇ kʼo, “suh ve teˇ ceuˬ maˇ kʼawꞈ cawˬ. Dawˇ haˍ ve, paˆ hawˬ ve, naˬ ve, awˬ ceuˬ chi teˇ hpaˍ htawˇ maˇ kʼawꞈ cawˬ.” (Hpeuꞈ maˍ ve 21:4 gʼaw sheˍ.) Haˍ gʼawˇ ve, maˇ hteˇ maˇ cawˇ ve, naˬ ve, suh ve leh shoꞈ shaꞈ ve hkʼa peu˗eˬ mehˉ kʼai tuˬ yoˬ. Ngaˬ hui miˬ guiˬ chi hkʼoˆ lo Paˍraˍdiˇsuˆ hko hkʼaw co co taiˍ taiˍ ha lehˬ gʼa ve tehꞈ, Liꞈ hpu hkʼaw ka tiꞈ te taˍ laˇ ve yoˬ.
3. Liꞈ hpu hkʼaw ka tiꞈ te taˍ ve htaꞈ ngaˬ hui hkʼa dehꞈ yonˍ gʼa tuˬ aˬ htoꞈ ma gʼa te ve le?
Chaw laiˉ gʼaˇ daꞈ ve awˬ ceuˬ hpehꞈ la tuˬ dawˇ law ve yoˬ. Yaꞈ hkʼaˇ, yawˇ hui dawˇ taˍ ve hkʼe hpehꞈ la tuˬ naˍ maˇ shiˍ. Liꞈ hpu hkʼaw ka tiꞈ te taˍ ve awˬ tehˬ hpehꞈ la tuˬ yoˬ. Ngaˬ hui hkʼa dehꞈ yonˍ gʼa tuˬ, ‘Liꞈ hpu htaꞈ hkʼa dehꞈ gʼa hpfuhˆ nyi ve yoˬ.’ (Tcuh yaˇ 17:11) Nawˬ henˇ shiˍ maˇ la ve kʼo, Liꞈ hpu hkʼaw ka tiꞈ te taˍ ve htaꞈ nawˬ awˬ tehˬ yonˍ gʼa˗aw laˇ tehꞈ shiˍ gʼa tuˬ yoˬ.
Henˇ shiˍ maˇ la tuˬ
Liꞈ hpu hkʼaw awˬ gʼuˇ suhˍ hpawˇ ve awˬ lawn hkʼaˬ hkʼe ka tiꞈ te taˍ laˇ ve le, Liꞈ hpu hkʼaw cawˬ ve dawˇ law kuiˬ chaw laiˉ gʼaˇ htaꞈ hkʼaˬ hkʼe ga piˇ ve le, teˇ geh nyi sheˍ.
4. Ngaˬ hui tuꞈ hkanˍ ve maˇ gʼa hpuˇ leh co co taiˍ taiˍ gʼa chehˇ tuˬ yoˬ tehꞈ Liꞈ hpu hkʼaw ka tiꞈ te taˍ laˇ ve
Awˬ hawˉ hpawˇ lo Liꞈ hpu hkʼaw ka tiꞈ te taˍ laˇ ve nyi sheˍ. Nawˬ hkʼaˬ ve teˇ maˬ htaꞈ dawˇ cawˇ ve le? Aˬ htoꞈ ma pa taw le?
Ka tiꞈ te taˍ laˇ ve htaꞈ caˉ daꞈ ve Liꞈ hpu awˬ tawn gʼaw leh na hkawˇ chi teˇ hpaˍ htaꞈ hkʼawꞈ laˇ sheˍ:
-
Nawˬ dawˇ kʼo, Liꞈ hpu awˬ tawn chi teˇ hpaˍ nawˬ awˬ pon awˬ bon cawˬ˗aw laˇ? Nawˬ ve yehˬ kʼa leh nawˬ ve awˬ chawˇ awˬ pon awˬ bon cawˬ˗aw laˇ?
Miˬ guiˬ hkʼoˆ lo chi hkʼe hpehꞈ htaˇ, nawˬ ve a shaꞈ hkʼaˬ hkʼe hpehꞈ tuˬ le dawˇ nyi sheˍ.
|
Teˇ gʼaˇ kaꞈ . . . |
Teˇ gʼaˇ le le . . . |
|---|---|
|
|
|
|
|
|
|
|
|
|
5. Liꞈ hpu hkʼaw ka tiꞈ te taˍ ve awˬ ceuˬ a shaꞈ teꞈ hkʼaˇ daꞈ la tuˬ ga laˇ ve
Chaw laiˉ gʼaˇ shoꞈ shaꞈ ve awˬ ceuˬ gʼa mawˬ htaˇ, awˬ gʼaˇ nuˇ ve, maˇ heˆ kʼo nyi ma zuhˆ ve yoˬ. Daꞈ ve awˬ ceuˬ cawˬ la tuˬ chaw teˇ hpaˍ gʼaˇ hteꞈ coˇ caˇ leh te ve yoˬ. Liꞈ hpu hkʼaw ka tiꞈ te taˍ ve laiˉ gʼaˇ htaꞈ hkʼaˬ hkʼe ga piˇ gʼa ve teˇ geh nyi sheˍ. VDO hpaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
VDO chi hkʼaw Raˍfiˍkaˇ aˬ htoꞈ ma awˬ lawn htaꞈ nyi ma maˇ sha ve le?
-
Maˇ hteˇ maˇ cawˇ ve awˬ lawn cawˬ sheˍ ve htawˇ, Liꞈ hpu lehˬ Raˍfiˍkaˇ htaꞈ hkʼaˬ hkʼe ga piˇ ve le?
Liꞈ hpu hkʼaw ka tiꞈ te taˍ ve awˬ ceuˬ ngaˬ hui htaꞈ awˬ gʼaˇ peꞈ laˇ leh shoꞈ shaꞈ ve awˬ ceuˬ htaꞈ yeunˇ hkanˍ gʼaˇ tuˬ ga laˇ ve yoˬ. Tawˇ naˉ ve liꞈ 17:22 leh Roˉmaꞈ liꞈ 12:12 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Nawˬ dawˇ kʼo, Liꞈ hpu hkʼaw ka tiꞈ te laˇ ve awˬ ceuˬ chi teˇ hkui nawˬ ve a shaꞈ teꞈ hkʼaˇ daꞈ la tuˬ ga laˇ gʼa˗aw laˇ? Aˬ htoꞈ ma pa taw le?
Chaw teˇ hpaˍ kʼoˆ ve: “Liꞈ hpu hkʼaw ka tiꞈ te taˍ ve awˬ ceuˬ hpehꞈ kʼai maˇ gʼa taˬ.”
-
Nawˬ dawˇ kʼo, Liꞈ hpu hkʼaw ka tiꞈ te taˍ ve awˬ ceuˬ awˬ tehˬ hpehꞈ la tuˬ ve tehꞈ ngaˬ hui chaˬ nyi cawˇ˗aw laˇ?
A yeˇ uiˍ ve awˬ lawn
Liꞈ hpu lehˬ awˬ gʼuˇ suhˍ hpawˇ ngaˬ hui ha lehˬ ve cawˬ tuˬ ka tiꞈ te taˍ laˇ ve yoˬ. Ka tiꞈ te taˍ laˇ ve chi ngaˬ hui dawˇ law kuiˬ cawˬ leh shoꞈ shaꞈ ve awˬ lawn yeunˇ hkanˍ gʼaˇ tuˬ ga laˇ gʼa ve yoˬ.
Kʼawꞈ gʼaꞈ na ve
-
Aˬ htoꞈ ma te ngaˬ hui dawˇ law kuiˬ cawˬ tuˬ loˍ ve le?
-
Awˬ gʼuˇ suhˍ hpawˇ ve awˬ lawn Liꞈ hpu hkʼaw hkʼaˬ hkʼe kʼoˆ laˇ ve le?
-
Liꞈ hpu hkʼaw ka tiꞈ te taˍ ve nawˬ htaꞈ hkʼaˬ hkʼe ga laˇ gʼa ve le?
Kʼawꞈ caˉ nyi gʼa ve
Awˬ gʼuˇ suhˍ hpawˇ dawˇ law kuiˬ cawˬ ve lehˬ hkʼaˬ htaˆ kaꞈ naˬ chehˇ ve chaw htaꞈ hkʼaˬ hkʼe ga piˇ gʼa ve nyi sheˍ.
VDO chi nyi htaˇ, Liꞈ hpu hkʼaw ka tiꞈ te taˍ laˇ ve Paˍraˍdiˇsuˆ hko hkʼaw nawˬ leh nawˬ ve yehˬ kʼa chehˇ taˍ ve htaꞈ dawˇ mawˬ sheˍ.
Liꞈ hpu hkʼaw awˬ gʼuˇ suhˍ hpawˇ ve dawˇ law kuiˬ miˬ guiˬ htaꞈ daꞈ la tuˬ te gaˇ ve chaw teˇ gʼaˇ ve a shaꞈ teꞈ hkʼaˇ htaꞈ hkʼaˬ hkʼe pa piˇ ve gʼaw sheˍ.
You May Also Like
NGAˬ HUI HTAꞈ CAˉ DAꞈ VE AWˬ LAWN
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ ve hk’aˬ hk’e te henˇ ve le?
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ tuˬ nawˬ Liꞈ hpu hk’aˬ ve teˇ maˬ yehˇ ve kaꞈ hpehꞈ ve yoˬ. Awˬ chawˇ maˇ heˆ leh yehˬ k’a hk’aw ve chaw htaꞈ Liꞈ hpu teˇ geh henˇ tuˬ jehˬ piˇ kaꞈ g’a ve yoˬ.
