Awˬ lawn 04
Gʼuiˬ sha a shu le?
Chaw yaˇ teˇ co˗e peuˬ teˇ co˗e hpanˍ laˬ ve hkʼaw, gʼuiˬ sha laiˉ gʼaˇ htaꞈ oˉ kʼoˍ pui ve yoˬ. Yaꞈ hkʼaˇ, Liꞈ hpu hkʼaw kʼoˆ ve “awˬ nu ve gʼuiˬ sha teˇ hpaˍ aꞈ kehˉ uiˍ jaˇ ve” Gʼuiˬ sha teˇ gʼaˇ cawˬ ve yoˬ. (2 Raˍsaˍvanˍ 2:5) Gʼuiˬ sha chi teˇ gʼaˇ lehˬ a shu le? Leh aˬ htoꞈ ma te yawˇ awˬ nu ve gʼuiˬ sha teˇ hpaˍ aꞈ kehˉ kanˇ paˆ uiˍ jaˇ ve le? Awˬ lawn chi ve hkʼaw Gʼuiˬ sha yawˇ htaꞈ caˉ daꞈ ve awˬ ceuˬ nawˬ htaꞈ aˬ htoꞈ ma shiˍ tcuh gaˇ ve gʼa henˇ tuˬ yoˬ.
1. Gʼuiˬ sha aˬ htoꞈ ma meh ve le? Gʼuiˬ sha yawˇ ve awˬ meh htaꞈ shiˍ tcuh gaˇ ve tehꞈ ngaˬ hui hkʼaˬ hkʼe te shiˍ gʼa ve le?
Gʼuiˬ sha ve awˬ meh Liꞈ hpu hkʼaw cawˬ taˍ ve yoˬ. Gʼuiˬ sha kʼoˆ ve “ngaˬ lehˬ Yaˬhoˉvaˬ chi lehˬ ngaˬ ve awˬ meh hpehꞈ ve yoˬ.” (Iˉsaˍyaˆ 42:8, Miˬ guiˬ awˬ suhˉ yuˬ tawˆ ve Liꞈ hpu) “Yaˬhoˉvaˬ” lehˬ Heˍbrehˇ hkawˇ hpehꞈ ve yoˬ. Liꞈ hpu chaˬ nyi tehˆ nyi paˍ laiˉ gʼaˇ kʼoˆ ve awˬ meh chi ve tcuhˉ kuiˬ lehˬ “Yawˇ hpehꞈ tcuh gaˇ ve hkʼe hpehꞈ piˇ gʼa ve yoˬ.” Yaˬhoˉvaˬ ngaˬ hui htaꞈ yawˇ ve awˬ meh shiˍ tcuh gaˇ ve yoˬ. (Tawˆ kʼai ve 3:15) Chi htaꞈ pa taw yawˇ ve awˬ meh Liꞈ hpu hkʼaw 7,000 pawˆ hpaˆ cawˬ tcuh taˍ ve yoˬ. a Yaˬhoˉvaˬ lehˬ “mvuhˇ naw miˬ guiˬ htaꞈ uˉ peunˍ shehˍ hpaˇ” awˬ tehˬ ve Gʼuiˬ sha ve awˬ meh hpehꞈ ve yoˬ.—Bon maˍ ve 4:39.
2. Yaˬhoˉvaˬ htaꞈ caˉ daꞈ ve Liꞈ hpu hkʼaw aˬ htoꞈ ma maˍ laˇ ve le?
Chaw yaˇ gʼuiˬ sha laiˉ gʼaˇ htaꞈ oˉ kʼoˍ pui chehˇ ve yoˬ. Yaꞈ hkʼaˇ, Liꞈ hpu hkʼaw kʼoˆ laˇ ve, Yaˬhoˉvaˬ teˇ gʼaˇ ceh tiˉ awˬ tehˬ awˬ na ve Gʼuiˬ sha hpehꞈ ve yoˬ. Aˬ htoꞈ ma te chi hkʼe kʼoˆ ve le? Awˬ lawn kʼo, Yaˬhoˉvaˬ uiˍ jaˇ mvuh jaˇ ve uˉ peunˍ shehˍ hpaˇ hpehꞈ leh yawˇ teˇ gʼaˇ ceh tiˉ ‘Gʼuiˬ sha hpehꞈ leh miˬ guiˬ hkʼa peu˗eˬ ve htaꞈ uˉ peunˍ chehˇ ve yoˬ.’ (Chiˇ mvuh ve 83:18 gʼaw sheˍ.) Chi hkʼoˆ kaꞈ, Yaˬhoˉvaˬ “kanˇ paˆ uiˍ ve Jawˇmawˇ Gʼuiˬ sha” hpehꞈ leh yawˇ aˬ htoꞈ ma teˇ ceuˬ te gaˇ ve kʼo te gʼa ve yoˬ. Yawˇ mvuhˇ naw ma miˬ naˆ ma leh miˬ guiˬ hkʼoˆ cawˬ ve ‘awˬ ceuˬ hkʼa peu˗eˬ htaꞈ hpanˍ taˍ’ ve yoˬ. (Hpeuꞈ maˍ ve 4:8, 11) Yaˬhoˉvaˬ teˇ gʼaˇ ceh tiˉ co co taiˍ taiˍ teꞈ chehˇ ve Gʼuiˬ sha hpehꞈ ve yoˬ.—Chiˇ mvuh ve 90:2.
Henˇ shiˍ maˇ la tuˬ
Gʼuiˬ sha ve aˉ yaˇ teˇ hpaˍ leh yawˇ ve awˬ meh hkʼaˬ hkʼe peun daꞈ ve le, Gʼuiˬ sha yawˇ ve awˬ meh ngaˬ hui htaꞈ hkʼaˬ hkʼe kʼoˆ laˇ ve le, leh aˬ htoꞈ ma pa taw yawˇ ve awˬ meh ngaˬ hui htaꞈ shiˍ tcuh gaˇ ve le, teˇ geh henˇ sheˍ.
3. Gʼuiˬ sha aˉ yaˇ laiˉ ceuˬ cawˬ ve htawˇ, awˬ meh teˇ meh tiˉ cawˬ ve
Aˉ yaˇ leh awˬ meh hkʼaˬ hkʼe te peun daꞈ ve shiˍ tuˬ, VDO hpaw leh na hkawˇ chi htaꞈ tawˇ yaw daꞈ sheˍ:
-
Aˉ yaˇ leh awˬ meh hkʼaˬ hkʼe te peun daꞈ ve le?
Liꞈ hpu hkʼaw kʼoˆ laˇ ve, chaw yaˇ gʼuiˬ sha laiˉ gʼaˇ htaꞈ oˉ kʼoˍ pui ve yoˬ. Chiˇ mvuh ve liꞈ 136:1-3 gʼaw leh na hkawˇ chi htaꞈ tawˇ yaw daꞈ sheˍ:
-
“Awˬ nu ve gʼuiˬ sha teˇ hpaˍ aꞈ kehˉ kanˇ paˆ uiˍ jaˇ ve Gʼuiˬ sha” maˇ heˆ leh “awˬ nu ve jawˇ mawˇ teˇ hpaˍ aꞈ kehˉ kanˇ paˆ uiˍ jaˇ ve Jawˇmawˇ” lehˬ a shu le?
4. Yaˬhoˉvaˬ ngaˬ hui htaꞈ yawˇ ve awˬ meh shiˍ tcuh leh yehˇ tcuh gaˇ ve
Yaˬhoˉvaˬ ngaˬ hui htaꞈ yawˇ ve awˬ meh shiˍ tcuh gaˇ ve tehꞈ hkʼaˬ hkʼe te shiˍ ve le? VDO hpaw leh na hkawˇ chi htaꞈ tawˇ yaw daꞈ sheˍ:
-
Nawˬ dawˇ kʼo, Yaˬhoˉvaˬ yawˇ ve awˬ meh htaꞈ shiˍ tcuh gaˇ˗aw laˇ? Aˬ htoꞈ ma pa taw le?
Yaˬhoˉvaˬ chaw yaˇ htaꞈ yawˇ ve awˬ meh kuˬ tcuh gaˇ ve yoˬ. Roˉmaꞈ liꞈ 10:13 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Aˬ htoꞈ ma pa taw Gʼuiˬ sha ve awˬ meh Yaˬhoˉvaˬ tehꞈ kuˬ ve a yeˇ uiˍ jaˇ ve le?
-
Shu nawˬ ve awˬ meh htaꞈ shiˍ leh nawˬ ve awˬ meh htaꞈ kuˬ ve kʼo, nawˬ hkʼaˬ hkʼe dawˇ ve le?
-
Ngaˬ hui Yaˬhoˉvaˬ ve awˬ meh kuˬ ve kʼo, yawˇ hkʼaˬ hkʼe dawˇ tuˬ le?
5. Yaˬhoˉvaˬ lehˬ yawˇ nawˬ htaꞈ meuˆ daꞈ maˇ la tcuh gaˇ ve
Kanˬbawˇdiˇ˗aˇ mvuhˇ miˬ ve yaˇ miˇ teˇ gʼaˇ Soˍhteˍ meh ve Gʼuiˬ sha ve awˬ meh htaꞈ gʼa shiˍ ve pa taw ha lehˬ jaˇ ve yoˬ. VDO hpaw leh na hkawˇ chi htaꞈ tawˇ yaw daꞈ sheˍ:
-
VDO chi hkʼaw, Soˍhteˍ Yaˬhoˉvaˬ ve awˬ meh htaꞈ shiˍ la htaˇ hkʼaˬ hkʼe kʼai ve le?
Ngaˬ hui shu geh awˬ chawˇ te gaˇ ve kʼo, yawˇ ve awˬ meh htaꞈ awˉ lawˉ gʼa shiˍ ve yoˬ. Yaˍkoˆ liꞈ 4:8a gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Yaˬhoˉvaˬ nawˬ htaꞈ aˬ htoꞈ ma te tcuh gaˇ ve le?
-
Nawˬ dawˇ kʼo, nawˬ Yaˬhoˉvaˬ ve awˬ meh htaꞈ shiˍ la leh kuˬ ve kʼo, yawˇ geh meuˆ daꞈ maˇ la tuˬ laˇ?
Chaw teˇ hpaˍ kʼoˆ ve: “Gʼuiˬ sha teˇ gʼaˇ tiˉ cawˬ ve, yawˇ htaꞈ hkʼaˬ hkʼe kuˬ kaꞈ gʼa ve yoˬ.”
-
Gʼuiˬ sha Yaˬhoˉvaˬ meh ve nawˬ yonˍ˗aw laˇ?
-
Gʼuiˬ sha ngaˬ hui htaꞈ yawˇ ve awˬ meh yehˇ tcuh gaˇ ve tehꞈ, nawˬ hkʼaˬ hkʼe te shiˍ gʼa ve le?
A yeˇ uiˍ ve awˬ lawn
Gʼuiˬ sha ve awˬ meh lehˬ, Yaˬhoˉvaˬ meh ve yoˬ. Ngaˬ hui yawˇ htaꞈ meuˆ daꞈ maˇ la tuˬ yawˇ ve awˬ meh htaꞈ shiˍ leh yehˇ tcuh gaˇ ve yoˬ.
Kʼawꞈ gʼaꞈ na ve
-
Aˬ htoꞈ ma pa taw Yaˬhoˉvaˬ lehˬ shu oˉ kʼoˍ pui chehˇ ve gʼuiˬ sha teˇ hpaˍ htaꞈ peun daꞈ jaˇ ve le?
-
Aˬ htoꞈ ma pa taw ngaˬ hui Gʼuiˬ sha ve awˬ meh htaꞈ yehˇ cawˇ ve le?
-
Yaˬhoˉvaˬ ngaˬ hui yawˇ htaꞈ meuˆ daꞈ maˇ la tcuh gaˇ ve tehꞈ hkʼaˬ hkʼe te shiˍ ve le?
Kʼawꞈ caˉ nyi gʼa ve
Gʼuiˬ sha awˬ tehˬ awˬ na cawˬ ve tehꞈ 5 hkʼaˇ htaꞈ nyi sheˍ.
“Gʼuiˬ sha awˬ tehˬ cawˬ˗aw laˇ?” (Vehˆsaiˉ hkʼaw ve awˬ lawn)
Gʼuiˬ sha lehˬ co co taiˍ taiˍ ve Gʼuiˬ sha hpehꞈ taˍ ve tehꞈ, aˬ htoꞈ ma pa taw ngaˬ hui yonˍ gʼa ve le?
“A shu Gʼuiˬ sha htaꞈ hpanˍ ve le?” (Shaw nyi kuiˬ Taꞈ yehˬ 2014 hkʼawꞈ ha pa 8 maˬ 1 nyi)
Aˬ sho˗eˬ htaˇ ve chaw Gʼuiˬ sha ve awˬ meh htaꞈ hkʼaˬ hkʼe kuˬ ve ngaˬ hui hkʼa dehꞈ maˇ shiˍ ve htawˇ, aˬ htoꞈ ma te ngaˬ hui yawˇ ve awˬ meh htaꞈ kuˬ cawˇ ve le?
Gʼuiˬ sha htaꞈ hkʼaˬ hkʼe te kuˬ ve a yeˇ uiˍ˗aw laˇ? Aˬ htoꞈ ma pa taw yawˇ ve awˬ meh teˇ meh tiˉ cawˬ ve tehꞈ ngaˬ hui kʼoˆ gʼa ve le, gʼaw nyi sheˍ.
“Gʼuiˬ sha ve awˬ meh hkʼaˬ nyiˇ meh cawˬ ve le?” (Vehˆsaiˉ hkʼaw ve awˬ lawn)
a Gʼuiˬ sha ve awˬ meh tcuhˉ kuiˬ kʼawꞈ shiˍ maˇ la gaˇ ve, leh aˬ htoꞈ ma pa taw Liꞈ hpu teˇ hpaˍ hpaˍ Gʼuiˬ sha ve awˬ meh maˇ cawˬ ve shiˍ gaˇ ve kʼo, Awˬ tawn A4 Miˬ guiˬ awˬ suhˉ yuˬ tawˆ ve Liꞈ hpu hkʼaw nyi sheˍ.
You May Also Like
NGAˬ HUI HTAꞈ CAˉ DAꞈ VE AWˬ LAWN
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ ve hk’aˬ hk’e te henˇ ve le?
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ tuˬ nawˬ Liꞈ hpu hk’aˬ ve teˇ maˬ yehˇ ve kaꞈ hpehꞈ ve yoˬ. Awˬ chawˇ maˇ heˆ leh yehˬ k’a hk’aw ve chaw htaꞈ Liꞈ hpu teˇ geh henˇ tuˬ jehˬ piˇ kaꞈ g’a ve yoˬ.
