Awˬ lawn 05
Liꞈ hpu lehˬ Gʼuiˬ sha geh laˬ ve liꞈ hpehꞈ ve
Yaˬhoˉvaˬ ngaˬ hui htaꞈ Liꞈ hpu peꞈ laˇ ve yoˬ. Liꞈ chi lehˬ daꞈ jaˇ ve laꞈ shawnˍ hpehꞈ leh 66 daw cawˬ ve yoˬ. ‘Liꞈ hpu lehˬ hkʼaˬ kaˬ lo laˬ ve le? Liꞈ hpu lehˬ a shu ve dawˇ hkʼaˇ le?’ tehꞈ nawˬ htawˇ dawˇ nawˬ dawˇ cawˬ tuˬ yoˬ hehˉ. Hkʼawꞈ laˇ hkawˇ ca gʼa tuˬ, Gʼuiˬ sha ve tawˇ hkawˇ ngaˬ hui ve awˬ co˗e hkʼa gaˬ hkʼaˬ hkʼe te cawˬ la ve le, teˇ geh nyi sheˍ.
1. Chaw yaˇ bvuhꞈ taˍ ve kʼo, aˬ htoꞈ ma te Liꞈ hpu Gʼuiˬ sha geh laˬ ve tehꞈ kʼoˆ ve le?
Liꞈ hpu bvuhꞈ paˍ aˬ laˬ hkʼe 40 gʼaˇ cawˬ ve yoˬ. Awˬ yanˇ 1,600 hkʼawꞈ hpaˆ yehˇ leh bvuhꞈ ve yoˬ. Liꞈ hpu lehˬ 1513 hkʼawꞈ B.C.E htaˇ tanˬ bvuhꞈ leh 98 hkʼawꞈ C.E htaˇ bvuhꞈ peuˬ ve yoˬ. Liꞈ hpu bvuhꞈ paˍ a shaꞈ teꞈ hkʼaˇ peun daꞈ ve htawˇ, yawˇ hui bvuhꞈ ve awˬ lawn hawˍ daꞈ ve yoˬ. Aˬ htoꞈ ma pa taw chi hkʼe hpehꞈ gʼa ve le? Awˬ lawn kʼo, Liꞈ hpu lehˬ Gʼuiˬ sha ve tawˇ hkawˇ hpehꞈ ve yoˬ. (1 Hteˇsaˍlawˇniˆ 2:13 gʼaw sheˍ.) Liꞈ hpu bvuhꞈ paˍ a shu yawˇ ve dawˇ hkʼaˇ bvuhꞈ ve maˇ heˆ. Yaꞈ hkʼaˇ, ‘Gʼuiˬ sha lehˬ daꞈ ve kehˬ ve awˬ ha hpu yehˇ leh yawˇ hui htaꞈ dawˇ pawnˍ piˇ leh, yawˇ hui teˇ caˉ Gʼuiˬ sha ve tawˇ hkawˇ kʼawꞈ yaw ve yoˬ.’ a (2 Peˍtruˆ 1:21) Gʼuiˬ sha yawˇ ve daꞈ ve kehˬ ve awˬ ha hpu yehˇ leh chaw yaˇ htaꞈ dawˇ pawnˍ piˇ leh Liꞈ hpu bvuhꞈ tcuh ve yoˬ.—2 Tiˆmoˉseˍ 3:16.
2. A shu Liꞈ hpu gʼa gʼaw tuˬ le?
‘Miˬ guiˬ hkʼoˆ lo chehˇ ve chaw hkʼa peu˗eˬ, mvuhˇ miˬ teˇ peˆ le le, awˬ ceuˬ awˬ hkʼaˇ teˇ ceuˬ le le, tawˇ hkawˇ teˇ ceuˬ le le, chaw ceuˬ teˇ ceuˬ le le’ Liꞈ hpu gʼaw gʼa ve yoˬ. (Hpeuꞈ maˍ ve 14:6 gʼaw sheˍ.) Liꞈ hpu lehˬ awˬ nu ve liꞈ aꞈ kehˉ yanˍ tawˆ maˇ jaˇ ve yoˬ. Aˬ laˬ hkʼe, chaw teˇ gʼaˇ le le hkʼaˬ kaˬ lo chehˇ ve maˇ kʼoˆ, a shu yawˇ ve chaw ceuˬ tawˇ hkawˇ ca leh Liꞈ hpu gʼaw gʼa ve yoˬ.
3. Liꞈ hpu htaꞈ maˇ gʼa te luˬ tuˬ Yaˬhoˉvaˬ hkʼaˬ hkʼe te ve le?
Awˉ lawˉ htaˇ ve Liꞈ hpu lehˬ luˬ kʼai puiˉ ve awˬ ceuˬ hkʼoˆ bvuhꞈ keu taˍ ve yoˬ. Yaꞈ hkʼaˇ, Liꞈ hpu htaꞈ awˬ hpfuhˇ shiˍ ve chaw teˇ hpaˍ Liꞈ hpu htaꞈ hkʼa dehꞈ kʼawꞈ gʼaꞈ bvuhꞈ ve yoˬ. Aˉ yaˇ uiˍ ve chaw teˇ hpaˍ Liꞈ hpu htaꞈ te luˬ gaˇ ve yoˬ. Yaꞈ hkʼaˇ, kawˆ tuˬ cawˬ ve htawˇ chaw teˇ hpaˍ Liꞈ hpu htaꞈ haꞈ shaˉ tuˬ coˇ caˇ ve yoˬ. Yaˬhoˉvaˬ ngaˬ hui htaꞈ caˉ daꞈ tuˬ a shu teˇ gʼaˇ htaꞈ kaꞈ maˇ tawˍ laˇ tcuh. Liꞈ hpu hkʼaw kʼoˆ ve, “Gʼuiˬ sha ve tawˇ hkawˇ lehˬ teˇ pawˆ kaꞈ maˇ mehˉ kʼai taˍ tehꞈ kʼoˆ ve yoˬ.”—Iˉsaˍyaˆ 40:8.
Henˇ shiˍ maˇ la tuˬ
Liꞈ hpu bvuhꞈ tuˬ Gʼuiˬ sha chaw yaˇ htaꞈ hkʼaˬ hkʼe dawˇ pawnˍ piˇ ve le, yawˇ Liꞈ hpu htaꞈ hkʼaˬ hkʼe te haꞈ shaˉ ve le, leh chaw yaˇ teˇ gʼaˇ le le Liꞈ hpu gʼa gʼaw tuˬ yawˇ hkʼaˬ hkʼe te ve le, teˇ geh henˇ sheˍ.
4. Liꞈ hpu lehˬ a shu ve dawˇ hkʼaˇ le?
VDO hpaw sheˍ. Peuˬ leh 2 Tiˆmoˉseˍ liꞈ 3:16 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Chaw yaˇ bvuhꞈ taˍ ve kʼo, aˬ htoꞈ ma te Liꞈ hpu Gʼuiˬ sha geh laˬ ve liꞈ tehꞈ kʼoˆ ve le?
-
Nawˬ dawˇ kʼo, Gʼuiˬ sha yawˇ ve dawˇ hkʼaˇ Liꞈ hpu bvuhꞈ paˍ htaꞈ dawˇ pawnˍ piˇ leh bvuhꞈ tcuh gʼa˗aw laˇ?
Paw leˍ shu htaꞈ liꞈ bvuhꞈ piˇ gaˇ ve kʼo, yawˇ ve awˬ ceˬ htaꞈ aˬ htoꞈ ma bvuhꞈ tuˬ kʼoˆ piˇ ve hkʼe, Gʼuiˬ sha kaꞈ Liꞈ hpu bvuhꞈ paˍ htaꞈ aˬ htoꞈ ma bvuhꞈ tuˬ dawˇ pawnˍ piˇ ve yoˬ.
5. A shu kaꞈ Liꞈ hpu htaꞈ te luˬ maˇ gʼa
Liꞈ hpu lehˬ Gʼuiˬ sha geh laˬ ve pa taw, yawˇ Liꞈ hpu htaꞈ haꞈ shaˉ ve yoˬ. Aˬ sho˗eˬ htaˇ kanˇ paˆ cawˬ ve chaw coˇ caˇ leh Liꞈ hpu htaꞈ te luˬ gaˇ ve yoˬ. Bon moˍ awˬ hoˉ shu htaꞈ Liꞈ hpu maˇ gʼaw tcuh gaˇ ve yoˬ. Tawˍ ve tsuhˇ ve gʼa hpuˇ leh chaw laiˉ gʼaˇ kawˆ tuˬ cawˬ ve htawˇ, Liꞈ hpu htaꞈ haꞈ shaˉ ve yoˬ. Hawˉ hkʼaˆ teˇ gʼaˇ ve awˬ lawn htaꞈ nyi sheˍ. VDO hpaw leh na hkawˇ chi htaꞈ tawˇ yaw daꞈ sheˍ:
-
Chaw teˇ hpaˍ Liꞈ hpu htaꞈ haꞈ shaˉ tuˬ coˇ caˇ jaˇ. Chi hkʼe shiˍ ve pa taw nawˬ Liꞈ hpu gʼaw nyi gaˇ˗aw laˇ? Aˬ htoꞈ ma pa taw le?
Chiˇ mvuh ve liꞈ 119:97 gʼaw leh na hkawˇ chi htaꞈ tawˇ yaw daꞈ sheˍ:
-
Kawˆ tuˬ cawˬ ve htawˇ, aˬ htoꞈ ma pa taw chaw laiˉ gʼaˇ Liꞈ hpu yanˍ tawˆ leh shu htaꞈ piˇ ve le?
6. Teˇ gʼaˇ le le gʼaw gʼa ve liꞈ
Liꞈ hpu lehˬ yanˍ tawˆ leh te tawˆ ve maˇ jaˇ. Tcuh yaˇ liꞈ 10:34, 35 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Aˬ htoꞈ ma pa taw Gʼuiˬ sha lehˬ Liꞈ hpu maˇ maˇ yanˍ tawˆ tcuh ve le?
-
Liˬ hpu htaꞈ caˉ daꞈ ve nawˬ dawˇ cawˇ ve aˬ htoꞈ ma cawˬ ve le?
Chaw yaˇ awˬ hkʼaw lo aˬ laˬ hkʼe
100%
a shu yawˇ ve chaw ceuˬ tawˇ hkawˇ Liꞈ hpu ca leh gʼaw gʼa ve
3,000
chaw ceuˬ tawˇ hkawˇ aꞈ kehˉ cawˬ maˇ ve
Chaw ceuˬ tawˇ hkawˇ teˇ hpaˍ kʼo Liꞈ hpu hkʼa peu˗eˬ cawˬ leh teˇ hpaˍ kʼo Liꞈ hpu teˇ tawn tawn ceh cawˬ ve
5,000,000,000
kʼoˆ aꞈ kehˉ te tawˆ maˇ ve
Awˬ nu ve liꞈ teˇ hpaˍ aꞈ kehˉ maˇ ve
Chaw teˇ hpaˍ kʼoˆ ve: “Liꞈ hpu lehˬ piˍ jaˇ˗oˬ leh chaw yaˇ ve dawˇ hkʼaˇ bvuhꞈ keu taˍ ve yoˬ.”
-
Nawˬ hkʼaˬ hkʼe dawˇ ve le?
-
Liꞈ hpu lehˬ Gʼuiˬ sha geh laˬ ve tehꞈ ngaˬ hui hkʼaˬ hkʼe te shiˍ ve le?
A yeˇ uiˍ ve awˬ lawn
Liꞈ hpu lehˬ Gʼuiˬ sha ve tawˇ hkawˇ hpehꞈ leh yawˇ chaw yaˇ teˇ gʼaˇ le le htaꞈ gʼaw tcuh gaˇ ve yoˬ.
Kʼawꞈ gʼaꞈ na ve
-
Gʼuiˬ sha chaw yaˇ htaꞈ dawˇ pawnˍ piˇ leh Liꞈ hpu bvuhꞈ tcuh ve hkʼaˬ hkʼe kʼoˆ gaˇ ve le?
-
Chi beuꞈ teˇ co˗e hkʼa gaˬ Liꞈ hpu cawˬ ve, yanˍ tawˆ ve, leh teˇ gʼaˇ le le ca leh gʼaw gʼa ve htaꞈ nawˬ hkʼaˬ hkʼe dawˇ ve le?
-
Gʼuiˬ sha nawˬ htaꞈ tawˇ yaw daꞈ tuˬ coˇ caˇ leh te laˇ ve htaꞈ nawˬ hkʼaˬ hkʼe dawˇ ve le?
Kʼawꞈ caˉ nyi gʼa ve
Liꞈ hpu tanˬ bvuhꞈ htaˇ leh chi beuꞈ teˇ co˗e hkʼa gaˬ cawˬ laˬ ve awˬ lawn htaꞈ gʼaw sheˍ.
Tawˍ ve tsuhˇ ve 3 ceuˬ gʼa hpuˇ ve htawˇ, Liꞈ hpu ngaˬ hui ve awˬ co˗e hkʼa gaˬ hkʼaˬ hkʼe te cawˬ la gʼa ve htaꞈ henˇ sheˍ.
Liꞈ hpu yanˍ tawˆ tuˬ chaw laiˉ gʼaˇ aˬ htoꞈ ma gʼa hpuˇ ve le?
Liꞈ hpu lehˬ laiˉ pawˆ kʼawꞈ gʼaꞈ bvuhꞈ tawˆ leh laiˉ pawˆ kʼawꞈ yanˍ tawˆ ve yoˬ. Yaꞈ hkʼaˇ, Liꞈ hpu lehˬ awˬ hkuiˉ puiˍ liꞈ daw htaꞈ hawˍ daꞈ ve tehꞈ ngaˬ hui hkʼaˬ hkʼe te yonˍ gʼa ve le?
“Liꞈ hpu hkʼaw ve tawˇ hkawˇ pa ve laˇ?” (Vehˆsaiˉ hkʼaw ve awˬ lawn)
a Daꞈ ve kehˬ ve awˬ ha hpu lehˬ Gʼuiˬ sha ve kanˇ paˆ hpehꞈ ve tehꞈ, Awˬ lawn 07 hkʼaw kʼoˆ maˍ laˇ tuˬ yoˬ.
You May Also Like
NGAˬ HUI HTAꞈ CAˉ DAꞈ VE AWˬ LAWN
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ ve hk’aˬ hk’e te henˇ ve le?
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ tuˬ nawˬ Liꞈ hpu hk’aˬ ve teˇ maˬ yehˇ ve kaꞈ hpehꞈ ve yoˬ. Awˬ chawˇ maˇ heˆ leh yehˬ k’a hk’aw ve chaw htaꞈ Liꞈ hpu teˇ geh henˇ tuˬ jehˬ piˇ kaꞈ g’a ve yoˬ.
