Awˬ lawn 06
A shaꞈ teꞈ ve awˬ ceuˬ hkʼaˬ hkʼe te cawˬ la gʼa ve le?
Gʼuiˬ sha lehˬ “a shaꞈ teꞈ ve hkʼa peu˗eˬ ve awˬ hkuiˉ puiˍ hpehꞈ ve yoˬ.” (Chiˇ mvuh ve 36:9) Nawˬ chi hkʼe yonˍ˗aw laˇ? Chaw teˇ hpaˍ dawˇ ve, hpanˍ shehˍ hpaˇ maˇ cawˬ. Chi hkʼe hpehꞈ ve kʼo, ngaˬ hui ve a shaꞈ yawˇ hkʼaˇ yawˇ cawˬ la leh dawˇ law kuiˬ maˇ cawˬ. Yaꞈ hkʼaˇ, Yaˬhoˉvaˬ ngaˬ hui htaꞈ hpanˍ ve kʼo, ngaˬ hui ve a shaꞈ dawˇ law kuiˬ cawˬ tuˬ yoˬ maˇ heˆ laˇ? a A shaꞈ teꞈ ve awˬ lawn Liꞈ hpu hkʼaw hkʼaˬ hkʼe maˍ laˇ ve le, leh aˬ htoꞈ ma te Liꞈ hpu maˍ laˇ ve htaꞈ ngaˬ hui yonˍ gʼa ve le, teˇ geh nyi sheˍ.
1. Mvuhˇ naw ma miˬ naˆ ma hkʼaˬ hkʼe te cawˬ la gʼa ve le?
Liꞈ hpu hkʼaw maˍ laˇ ve, “awˬ hkuiˉ puiˍ htaˇ, Gʼuiˬ sha miˬ guiˬ leh mvuhˇ naw ma htaꞈ te hpanˍ ve yoˬ.” (Awˬ hkuiˉ puiˍ 1:1) Maˇ˗awˍ ve chaˬ nyi tehˆ nyi paˍ kʼoˆ ve, mvuhˇ naw ma miˬ naˆ ma awˬ hkuiˉ puiˍ tanˬ kuiˬ cawˬ ve yoˬ. Gʼuiˬ sha teˇ ceuˬ le le htaꞈ hkʼaˬ hkʼe te hpanˍ ve le? Gʼuiˬ sha lehˬ mvuhˇ nyi, ha pa, meuꞈ keu shiˍ leh teˇ ceuˬ le le htaꞈ te hpanˍ tuˬ yawˇ ve “kanˇ paˆ” maˇ heˆ leh daꞈ ve kehˬ ve awˬ ha hpu yehˇ ve yoˬ.—Awˬ hkuiˉ puiˍ 1:2.
2. Aˬ htoꞈ ma pa taw Gʼuiˬ sha miˬ guiˬ htaꞈ hpanˍ taˍ ve le?
Yaˬhoˉvaˬ lehˬ miˬ guiˬ htaꞈ hkʼe leˇ hpanˍ taˍ ve maˇ heˆ. Yaꞈ hkʼaˇ, “chaw yaˇ teˇ hpaˍ ve chehˇ kuiˬ hpehꞈ la piˇ taˍ ve yoˬ.” (Iˉsaˍyaˆ 45:18) Chaw yaˇ miˬ guiˬ hkʼoˆ co co taiˍ taiˍ teꞈ chehˇ gʼa tuˬ, Gʼuiˬ sha daꞈ jaˇ ve chehˇ kuiˬ leh chaw yaˇ loˍ ve awˬ ceuˬ hpanˍ laˇ ve yoˬ. (Iˉsaˍyaˆ 40:28; 42:5 gʼaw sheˍ.) Chaˬ nyi tehˆ nyi paˍ kʼoˆ ve, ngaˬ hui ve miˬ guiˬ daꞈ jaˇ, awˬ nu ve meuꞈ keu shiˍ htaꞈ maˇ shuˍ. Ngaˬ hui a shaꞈ teꞈ chehˇ gʼa ve miˬ guiˬ ceh tiˉ cawˬ ve yoˬ.
3. Aˬ htoꞈ ma pa taw chaw yaˇ to nuˇ to shaˆ htaꞈ maˇ shuˍ ve le?
Yaˬhoˉvaˬ miˬ guiˬ htaꞈ hpanˍ peuˬ hkʼawꞈ nawˉ, a shaꞈ teꞈ ve awˬ ceuˬ htaꞈ hpanˍ ve yoˬ. Suhˆ cehˬ hawˆ cehˬ leh to nuˇ to shaˆ htaꞈ hpanˍ peuˬ hkʼawꞈ nawˉ “Gʼuiˬ sha lehˬ yawˇ ve awˬ hoꞈ awˬ han htaꞈ shuˍ daꞈ ve chaw yaˇ htaꞈ te hpanˍ ve yoˬ.” (Awˬ hkuiˉ puiˍ 1:27 gʼaw sheˍ.) Aˬ htoꞈ ma pa taw chaw yaˇ to nuˇ to shaˆ htaꞈ maˇ shuˍ ve le? Gʼuiˬ sha lehˬ ngaˬ hui htaꞈ yawˇ ve awˬ hoꞈ awˬ han hkʼa shuˍ te hpanˍ ve pa taw, ngaˬ hui haꞈ pehnˇ ve leh hteˇ ve cawˇ ve cawˬ ve yoˬ. Gʼuiˬ sha ngaˬ hui htaꞈ chaw ceuˬ tawˇ hkawˇ henˇ gʼa puiˉ tuˬ hpanˍ laˇ ve, daꞈ ve awˬ ceuˬ mawˬ leh dawˇ cawˇ ve liꞈ hkawˇ gʼa kaˇ htaˇ ha lehˬ tuˬ hpanˍ laˇ ve yoˬ. Leh ngaˬ hui Gʼuiˬ sha htaꞈ oˉ kʼoˍ pui gʼa ve yoˬ.
Henˇ shiˍ maˇ la tuˬ
A shaꞈ teꞈ ve awˬ ceuˬ te hpanˍ shehˍ hpaˇ cawˬ ve, Liꞈ hpu hkʼaw hpanˍ taˍ ve awˬ lawn kʼoˆ taˍ ve htaꞈ ngaˬ hui hkʼaˬ hkʼe te yonˍ gʼa ve le, chaw yaˇ ve te hkʼaˇ dawˇ hkʼaˇ Gʼuiˬ sha htaꞈ caˉ daꞈ ve aˬ htoꞈ ma kʼoˆ laˇ ve le, chi teˇ hpaˍ teˇ geh henˇ tuˬ yoˬ.
4. A shaꞈ teꞈ ve awˬ ceuˬ te hpanˍ shehˍ hpaˇ cawˬ ve
Chaw teˇ hpaˍ awˬ paˇ awˬ kui cawˬ taˍ ve awˬ ceuˬ htaꞈ nyi leh, teˇ ceuˬ ceuˬ te tawˆ la ve pa taw, shu yawˇ htaꞈ chiˇ mvuh piˇ ve yoˬ. Yaꞈ hkʼaˇ, awˬ tehˬ kʼo a shu chiˇ mvuh ve htaꞈ gʼa keunˍ ve le? VDO hpaw leh na hkawˇ chi htaꞈ tawˇ yaw daꞈ sheˍ:
-
Chaw yaˇ awˬ paˇ awˬ kui cawˬ taˍ ve htaꞈ henˇ yuˬ leh te tawˆ la ve aˬ htoꞈ ma cawˬ ve le?
Yehˬ teˇ yehˬ le le lehˬ te shehˍ hpaˇ cawˬ ve yoˬ. Hkʼe kʼo, awˬ paˇ awˬ kui cawˬ taˍ ve awˬ ceuˬ hkʼa peu˗eˬ a shu te hpanˍ ve le? Heˍbrehˇ liꞈ 3:4 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Awˬ paˇ awˬ kui cawˬ taˍ ve awˬ ceuˬ nawˬ dawˇ cawˇ jaˇ ve aˬ htoꞈ ma le?
-
Nawˬ dawˇ kʼo, teˇ ceuˬ le le htaꞈ te hpanˍ shehˍ hpaˇ cawˬ ve tehꞈ yonˍ gʼa˗aw laˇ? Aˬ htoꞈ ma pa taw le?
Nawˬ shiˍ˗aˬ laˇ?
Nawˬ awˬ lawn chi ve gʼaw ve maˇ heˆ leh VDO nyi gʼa tuˬ, vehˆsaiˉ jw.org hkʼaw awˬ lawn lonˉ ma “Te hpanˍ shehˍ hpaˇ cawˬ˗aw laˇ?” leh “A shaꞈ teꞈ ve awˬ hkuiˉ puiˍ cawˬ la kuiˬ dawˇ ve awˬ hkʼaˇ” hkʼaw nyi gʼa ve yoˬ.
“Awˬ lawn kʼo, yehˬ teˇ yehˬ le le lehˬ, te shehˍ hpaˇ cawˬ ve yoˬ. Yaꞈ hkʼaˇ, teˇ ceuˬ le le htaꞈ te shehˍ hpaˇ lehˬ Gʼuiˬ sha yoˬ.”
5. Liꞈ hpu hkʼaw hpanˍ taˍ ve awˬ lawn maˍ laˇ ve htaꞈ yonˍ gʼa ve
Awˬ hkuiˉ puiˍ ve liꞈ kaˇ nanˉ uiˍ 1 hkʼaw Gʼuiˬ sha miˬ guiˬ leh a shaꞈ teꞈ ve awˬ ceuˬ htaꞈ hpanˍ taˍ ve awˬ lawn maˍ laˇ ve yoˬ. Nawˬ yonˍ gʼa˗aw laˇ? VDO hpaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Gʼuiˬ sha miˬ guiˬ leh a shaꞈ teꞈ ve awˬ ceuˬ htaꞈ hpanˍ ve hkawꞈ nyi ve hkʼaw, teˇ nyi leh teˇ nyi 24 naˍ riˍ ceh yehˇ ve tehꞈ kʼoˆ gaˇ ve laˇ?
-
Liꞈ hpu hkʼaw hpanˍ taˍ ve awˬ lawn maˍ laˇ ve awˬ tehˬ ve awˬ lawn hpehꞈ ve tehꞈ nawˬ yonˍ gʼa˗aw laˇ? Aˬ htoꞈ ma pa taw le?
Awˬ hkuiˉ puiˍ liꞈ 1:1 gʼaw leh na hkawˇ chi htaꞈ tawˇ yaw daꞈ sheˍ:
-
Chaˬ nyi tehˆ nyi paˍ kʼoˆ ve, mvuhˇ naw ma miˬ naˆ ma awˬ hkuiˉ puiˍ tanˬ kuiˬ cawˬ ve yoˬ. Chaˬ nyi tehˆ nyi paˍ kʼoˆ ve leh gʼaw kʼai peuˬ ve Liꞈ hpu awˬ tawn hkʼaw kʼoˆ ve hawˍ daꞈ˗aw laˇ?
Chaw teˇ hpaˍ dawˇ ve, Gʼuiˬ sha lehˬ a shaꞈ teꞈ ve teˇ ceuˬ ceh tiˉ hpanˍ leh, awˬ meu˗eˇ awˬ meu˗eˇ a shaꞈ teꞈ ve laiˉ ceuˬ hpehꞈ kʼai tcuh ve yoˬ. Awˬ hkuiˉ puiˍ liꞈ 1:21, 25, 27 gʼaw leh na hkawˇ chi htaꞈ tawˇ yaw daꞈ sheˍ:
-
Gʼuiˬ sha lehˬ a shaꞈ teꞈ ve teˇ ceuˬ ceh tiˉ hpanˍ peuˬ hkʼawꞈ nawˉ awˬ meu˗eˇ awˬ meu˗eˇ to nuˇ to shaˆ leh chaw yaˇ hpehꞈ kʼai tcuh ve tehꞈ Liꞈ hpu hkʼaw maˍ laˇ ve laˇ? Maˇ heˆ leh, Gʼuiˬ sha a shaꞈ teꞈ ve teˇ ceuˬ peuˬ teˇ ceuˬ htaꞈ hpanˍ ve laˇ?
6. Chaw yaˇ lehˬ awˬ nu ve a shaꞈ teꞈ ve awˬ ceuˬ htaꞈ maˇ shuˍ
Yaˬhoˉvaˬ chaw yaˇ htaꞈ hpanˍ taˍ ve lehˬ to nuˇ to shaˆ htaꞈ peun daꞈ ve yoˬ. Awˬ hkuiˉ puiˍ liꞈ 1:26 gʼaw leh na hkawˇ chi htaꞈ tawˇ yaw daꞈ sheˍ:
-
Gʼuiˬ sha chaw yaˇ htaꞈ yawˇ ve awˬ hoꞈ awˬ han hkʼa shuˍ hpanˍ taˍ ve yoˬ. Ngaˬ hui shu htaꞈ haꞈ leh ha kʼaˉ ve pa taw, Yaˬhoˉvaˬ kaꞈ hkʼaˬ hkʼe dawˇ ve le?
Chaw teˇ hpaˍ kʼoˆ ve: “Liꞈ hpu hkʼaw hpanˍ taˍ ve awˬ lawn maˍ laˇ ve lehˬ a ponˬ ceh hpehꞈ ve yoˬ.”
-
Nawˬ hkʼaˬ hkʼe dawˇ ve le? Aˬ htoꞈ ma pa taw le?
A yeˇ uiˍ ve awˬ lawn
Yaˬhoˉvaˬ lehˬ mvuhˇ naw ma miˬ naˆ ma leh a shaꞈ teꞈ ve teˇ ceuˬ le le htaꞈ hpanˍ taˍ ve yoˬ.
Kʼawꞈ gʼaꞈ na ve
-
Mvuhˇ naw ma leh meuꞈ keu shiˍ cawˬ la ve awˬ lawn Liꞈ hpu hkʼaw hkʼaˬ hkʼe maˍ laˇ ve le?
-
Gʼuiˬ sha lehˬ a shaꞈ teꞈ ve teˇ ceuˬ ceh tiˉ hpanˍ peuˬ hkʼawꞈ nawˉ awˬ nu ve a shaꞈ teꞈ ve awˬ ceuˬ hpehꞈ kʼai tcuh ve, maˇ heˆ leh Gʼuiˬ sha a shaꞈ teꞈ ve teˇ ceuˬ peuˬ teˇ ceuˬ htaꞈ hpanˍ ve laˇ?
-
Aˬ htoꞈ ma pa taw chaw yaˇ lehˬ awˬ nu ve a shaꞈ teꞈ ve awˬ ceuˬ htaꞈ peun daꞈ ve le?
Kʼawꞈ caˉ nyi gʼa ve
Hpanˍ shehˍ hpaˇ cawˬ ve tehꞈ yonˍ gʼa tuˬ te laˇ ve, tawˇ pa haˉ teˇ ceuˬ ceuˬ htaꞈ nyi sheˍ.
Awˬ pa yaˇ htaꞈ Liꞈ hpu hkʼaw hpanˍ taˍ ve awˬ lawn hkʼaˬ hkʼe maˍ piˇ gʼa ve nyi sheˍ.
Yawˇ hkʼaˇ yawˇ hpehꞈ la ve maˍ laˇ ve awˬ lawn leh Liꞈ hpu hkʼaw maˍ laˇ ve awˬ lawn hawˍ daꞈ˗aw laˇ, nyi sheˍ.
A shaꞈ teꞈ ve awˬ ceuˬ yawˇ hkʼaˇ yawˇ cawˬ la ve maˇ heˆ leh, hpanˍ shehˍ hpaˇ cawˬ ve laˇ, to nuˇ to shaˆ haˉ pui hpehꞈ kʼai ve shaˉ hkiˆ leh chaˬ nyi tehˆ nyi hpawˇ ve shaˉ hkiˆ ngaˬ hui htaꞈ aˬ htoꞈ ma maˍ laˇ ve le, nyi sheˍ.
A shaꞈ teꞈ ve awˬ hkuiˉ puiˍ htaꞈ caˉ daꞈ ve na hkawˇ 5 maˬ (liꞈ kʼo)
a Awˬ lawn 25 hkʼaw aˬ htoꞈ ma pa taw Gʼuiˬ sha chaw yaˇ htaꞈ hpanˍ ve gʼa henˇ tuˬ yoˬ.
You May Also Like
NGAˬ HUI HTAꞈ CAˉ DAꞈ VE AWˬ LAWN
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ ve hk’aˬ hk’e te henˇ ve le?
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ tuˬ nawˬ Liꞈ hpu hk’aˬ ve teˇ maˬ yehˇ ve kaꞈ hpehꞈ ve yoˬ. Awˬ chawˇ maˇ heˆ leh yehˬ k’a hk’aw ve chaw htaꞈ Liꞈ hpu teˇ geh henˇ tuˬ jehˬ piˇ kaꞈ g’a ve yoˬ.
