Awˬ lawn 07
Yaˬhoˉvaˬ hkʼaˬ hkʼe ve Gʼuiˬ sha hpehꞈ ve le?
Nawˬ dawˇ kʼo, Yaˬhoˉvaˬ lehˬ hkʼaˬ hkʼe ve Gʼuiˬ sha hpehꞈ ve le? Yawˇ uiˍ jaˇ mvuh jaˇ ve pa taw, ngaˬ hui yawˇ htaꞈ meuˆ daꞈ maˇ gʼa hehˉ laˇ? Maˇ heˆ kʼo, yawˇ kanˇ paˆ cawˬ ve Gʼuiˬ sha hpehꞈ ve htawˇ, maˇ jawˬ puiˉ ve Gʼuiˬ sha hpehꞈ ve tehꞈ, nawˬ chi hkʼe dawˇ˗aw laˇ? Gʼuiˬ sha ve te hkʼaˇ dawˇ hkʼaˇ hkʼaˬ hkʼe cawˬ ve, leh yawˇ ngaˬ hui awˬ pon dawˇ nyi puiˉ ve, Liꞈ hpu hkʼaw maˍ laˇ ve yoˬ.
1. Aˬ htoꞈ ma pa taw ngaˬ hui Gʼuiˬ sha htaꞈ maˇ mawˬ gʼa ve le?
“Gʼuiˬ sha lehˬ awˬ ha hpehꞈ ve yoˬ.” (Yoˇhanˬ 4:24) Yaˬhoˉvaˬ ngaˬ hui chaw yaˇ hkʼa shuˍ awˬ suhˍ awˬ shaˍ maˇ cawˬ. Yaꞈ hkʼaˇ, yawˇ mvuhˇ naw ma hkʼoˆ chehˇ leh ngaˬ hui maˇ mawˬ gʼa ve awˬ to cawˬ ve yoˬ.
2. Yaˬhoˉvaˬ ve te hkʼaˇ dawˇ hkʼaˇ hkʼaˬ hkʼe cawˬ ve le?
Ngaˬ hui Yaˬhoˉvaˬ htaꞈ maˇ mawˬ gʼa ve htawˇ, ngaˬ hui yawˇ htaꞈ shiˍ daꞈ maˇ la ve kʼo yawˇ htaꞈ haꞈ tuˬ yoˬ. Liꞈ hpu hkʼaw kʼoˆ ve Yaˬhoˉvaˬ lehˬ “cawˇ ve awˬ ceuˬ htaꞈ haꞈ leh, yawˇ htaꞈ ka tiꞈ yeˬ ve chaw teˇ hpaˍ htaꞈ yawˇ maˇ chiˇ baˬ.” (Chiˇ mvuh ve 37:28) Yaˬhoˉvaˬ lehˬ tuꞈ ve hkanˍ ve gʼa hpuˇ ve chaw htaꞈ ‘haꞈ leh ha kʼaˉ ve yoˬ.’ (Yaˍkoˆ 5:11) “Gʼuiˬ sha lehˬ nyi ma luˬ chehˇ ve chaw awˬ paˇ neˇ lo chehˇ taˍ ve yoˬ. Dawˇ law kuiˬ maˇ cawˬ ve chaw htaꞈ yawˇ ponˬ piˇ tuˬ yoˬ.” (Chiˇ mvuh ve 34:18) Ngaˬ hui te ve awˬ ceuˬ Yaˬhoˉvaˬ htaꞈ heuˆ la kuiˬ cawˬ ve tehꞈ nawˬ shiˍ˗aˬ laˇ? Ngaˬ hui maˇ daꞈ ve awˬ ceuˬ te ve kʼo, Yaˬhoˉvaˬ nyi ma luˬ ve yoˬ. (Chiˇ mvuh ve 78:40, 41) Yaꞈ hkʼaˇ, ngaˬ hui daꞈ ve awˬ ceuˬ te ve kʼo, yawˇ ha lehˬ tuˬ yoˬ.—Tawˇ naˉ ve 27:11 gʼaw sheˍ.
3. Yaˬhoˉvaˬ ngaˬ hui htaꞈ haꞈ ve tehꞈ hkʼaˬ hkʼe te hpeuꞈ maw laˇ ve le?
Yaˬhoˉvaˬ ve te hkʼaˇ dawˇ hkʼaˇ daꞈ jaˇ ve teˇ ceuˬ lehˬ haꞈ pehnˇ ve yoˬ. Awˬ lawn kʼo, “Gʼuiˬ sha lehˬ haꞈ pehnˇ ve teˇ ceuˬ hpehꞈ ve yoˬ.” (1 Yoˇhanˬ 4:8) Yaˬhoˉvaˬ ngaˬ hui htaꞈ haꞈ ve tehꞈ Liꞈ hpu hkʼaw ceh kʼoˆ laˇ ve maˇ heˆ. Yaꞈ hkʼaˇ, yawˇ hpanˍ taˍ ve awˬ ceuˬ hkʼaw kaꞈ hpeuꞈ maw laˇ ve yoˬ. (Tcuh yaˇ 14:17 gʼaw sheˍ.) Dawˇ nyi sheˍ, Yaˬhoˉvaˬ ngaˬ hui htaꞈ aˬ htoꞈ ma te gʼa tuˬ hpanˍ laˇ ve le? Ngaˬ hui awˬ sheuˉ teˇ hpaˍ htaꞈ mawˬ puiˉ ve, na sha ve liꞈ hkawˇ kaˇ puiˉ ve, leh mehˬ ve caˇ tuˬ awˬ cheh htaꞈ shiˍ puiˉ ve yoˬ. Yaˬhoˉvaˬ ngaˬ hui htaꞈ ha lehˬ ve a shaꞈ cawˬ tcuh gaˇ ve yoˬ.
Henˇ shiˍ maˇ la tuˬ
Yaˬhoˉvaˬ anˇ tuˬ awˬ ceuˬ teˇ hpaˍ htaꞈ hkʼaˬ hkʼe te gʼa ve le, leh yawˇ ve te hkʼaˇ dawˇ hkʼaˇ htaꞈ ngaˬ hui mawˬ tuˬ yawˇ hkʼaˬ hkʼe te ve le, chi ve teˇ hpaˍ teˇ geh henˇ sheˍ.
4. Daꞈ ve kehˬ ve awˬ ha hpu lehˬ Gʼuiˬ sha ve kanˇ paˆ hpehꞈ ve
Chaw yaˇ kanˉ te tuˬ laꞈ sheh yehˇ ve hkʼa shuˍ, Yaˬhoˉvaˬ daꞈ ve kehˬ ve awˬ ha hpu yehˇ ve yoˬ. Liꞈ hpu hkʼaw kʼoˆ ve, daꞈ ve kehˬ ve awˬ ha hpu lehˬ awˬ to cawˬ ve maˇ heˆ. Yaꞈ hkʼaˇ, chi ve lehˬ teˇ ceuˬ le le te tuˬ Gʼuiˬ sha yehˇ ve kanˇ paˆ hpehꞈ ve yoˬ. Luˉkaꞈ liꞈ 11:13 leh Tcuh yaˇ liꞈ 2:17 gʼaw leh na hkawˇ chi htaꞈ tawˇ yaw daꞈ sheˍ:
-
Gʼuiˬ sha lehˬ yawˇ geh lawˬ ve chaw htaꞈ daꞈ ve kehˬ ve awˬ ha hpu “ngeuˍ pfuhˍ” piˇ tuˬ yoˬ. Nawˬ dawˇ kʼo, daꞈ ve kehˬ ve awˬ ha hpu lehˬ awˬ to cawˬ ve laˇ? Maˇ heˆ leh Gʼuiˬ sha ve kanˇ paˆ hpehꞈ ve laˇ? Aˬ htoꞈ ma pa taw nawˬ chi hkʼe dawˇ ve le?
Yaˬhoˉvaˬ yawˇ ve daꞈ ve kehˬ ve awˬ ha hpu yehˇ leh anˇ tuˬ laiˉ ceuˬ te ve yoˬ. Chiˇ mvuh ve liꞈ 33:6 leh 2 Peˍtruˆ liꞈ 1:20, 21 gʼaw leh na hkawˇ chi htaꞈ tawˇ yaw daꞈ sheˍ:
-
Yaˬhoˉvaˬ yawˇ ve daꞈ ve kehˬ ve awˬ ha hpu yehˇ leh aˬ htoꞈ ma te ve le?
5. Yaˬhoˉvaˬ lehˬ daꞈ jaˇ ve te hkʼaˇ dawˇ hkʼaˇ cawˬ ve
Moˉseˍ lehˬ ka tiꞈ yeˬ ve hkʼaw Gʼuiˬ sha ve kanˉ laiˉ hkʼawꞈ te ve yoˬ. Yaꞈ hkʼaˇ, Moˉseˍ yawˇ htaꞈ hpanˍ shehˍ hpaˇ htaꞈ kʼawꞈ shiˍ maˇ la gaˇ ve yoˬ. Chi htaꞈ pa taw, yawˇ Gʼuiˬ sha geh lawˬ ve, ‘nawˬ htaꞈ shiˍ hpehꞈ tuˬ, nawˬ ve dawˇ hkʼaˇ ngaˬ htaꞈ a ciˉ hpeuꞈ maˍ laˇ˗oˆ.’ (Tawˆ kʼai ve 33:13) Yaˬhoˉvaˬ yawˇ ve te hkʼaˇ dawˇ hkʼaˇ hkʼaˬ hkʼe cawˬ ve, Moˉseˍ htaꞈ kʼoˆ piˇ ve yoˬ. Tawˆ kʼai ve liꞈ 34:4-6 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Yaˬhoˉvaˬ yawˇ ve te hkʼaˇ dawˇ hkʼaˇ Moˉseˍ htaꞈ hpeuꞈ maw piˇ ve aˬ htoꞈ ma cawˬ ve le?
-
Nawˬ Yaˬhoˉvaˬ ve te hkʼaˇ dawˇ hkʼaˇ hkʼaˬ ve teˇ ceuˬ htaꞈ dawˇ cawˇ jaˇ ve le?
6. Yaˬhoˉvaˬ chaw yaˇ awˬ pon dawˇ nyi piˇ puiˉ ve
Oˇ htaˇ teˇ co˗e ve Heˍbrehˇ chaw Eˇjiˇtuꞈ mvuhˇ miˬ hkʼaw shu ve awˬ ceˬ hpehꞈ chehˇ htaˇ, yawˇ hui tuꞈ hkanˍ ve gʼa hpuˇ ve Yaˬhoˉvaˬ mawˬ htaˇ hkʼaˬ hkʼe dawˇ ve le? Awˬ hkawˇ hpaw leh Liꞈ hpu gʼaꞈ nyi sheˍ. Maˇ heˆ leh Tawˆ kʼai ve liꞈ 3:1-10 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Chaw yaˇ tuꞈ hkanˍ ve gʼa hpuˇ htaˇ, Yaˬhoˉvaˬ hkʼaˬ hkʼe dawˇ ve le?—Awˬ tawn 7 leh 8 hkʼaw nyi sheˍ.
-
Nawˬ dawˇ kʼo, Yaˬhoˉvaˬ chaw yaˇ htaꞈ ga laˇ gaˇ˗aw laˇ? Leh yawˇ ngaˬ hui htaꞈ ga laˇ gʼa˗aw laˇ? Aˬ htoꞈ ma pa taw le?
7. Hpanˍ taˍ ve awˬ ceuˬ lehˬ Yaˬhoˉvaˬ ve te hkʼaˇ dawˇ hkʼaˇ hpeuꞈ maw laˇ ve
Yaˬhoˉvaˬ lehˬ ngaˬ hui yawˇ ve te hkʼaˇ dawˇ hkʼaˇ htaꞈ shiˍ tuˬ yawˇ hpanˍ taˍ ve awˬ ceuˬ hkʼaw hpeuꞈ maw laˇ ve yoˬ. VDO hpaw sheˍ. Peuˬ leh Roˉmaꞈ liꞈ 1:20 gʼaw leh na hkawˇ chi htaꞈ tawˇ yaw daꞈ sheˍ:
-
Yaˬhoˉvaˬ hpanˍ taˍ ve awˬ ceuˬ htaꞈ nyi htaˇ, nawˬ yawˇ ve te hkʼaˇ dawˇ hkʼaˇ aˬ htoꞈ ma gʼa mawˬ ve le?
Chaw teˇ hpaˍ kʼoˆ ve: “Gʼuiˬ sha ngaˬ hui htaꞈ a yeˇ maˇ te laˇ.”
-
Nawˬ hkʼaˬ hkʼe dawˇ ve le?
-
Aˬ htoꞈ ma pa taw nawˬ chi hkʼe dawˇ ve le?
A yeˇ uiˍ ve awˬ lawn
Ngaˬ hui Yaˬhoˉvaˬ htaꞈ maˇ mawˬ gʼa ve yoˬ. Yawˇ daꞈ ve te hkʼaˇ dawˇ hkʼaˇ laiˉ ceuˬ cawˬ leh a yeˇ uiˍ ve teˇ ceuˬ lehˬ haꞈ pehnˇ ve yoˬ.
Kʼawꞈ gʼaꞈ na ve
-
Aˬ htoꞈ ma pa taw ngaˬ hui Yaˬhoˉvaˬ htaꞈ maˇ mawˬ gʼa ve le?
-
Daꞈ ve kehˬ ve awˬ ha hpu lehˬ aˬ htoꞈ ma le?
-
Yaˬhoˉvaˬ ve te hkʼaˇ dawˇ hkʼaˇ hkʼaˬ hkʼe cawˬ ve le?
Kʼawꞈ caˉ nyi gʼa ve
Yaˬhoˉvaˬ ve te hkʼaˇ dawˇ hkʼaˇ a yeˇ uiˍ ve 4 ceuˬ htaꞈ henˇ nyi sheˍ.
Yaˬhoˉvaˬ teˇ kaˬ le le chehˇ taˍ ve maˇ heˆ tehꞈ aˬ htoꞈ ma te ngaˬ hui yonˍ gʼa ve nyi sheˍ.
“Gʼuiˬ sha teˇ kaˬ le le chehˇ taˍ ve laˇ?” (Vehˆsaiˉ hkʼaw ve awˬ lawn)
Aˬ htoꞈ ma pa taw Liꞈ hpu hkʼaw daꞈ ve kehˬ ve awˬ ha hpu lehˬ Gʼuiˬ sha ve laꞈ sheh hkʼe hpehꞈ ve tehꞈ kʼoˆ ve le?
“Daꞈ ve kehˬ ve awˬ ha hpu lehˬ aˬ htoꞈ ma le?” (Vehˆsaiˉ hkʼaw ve awˬ lawn)
Mehˆ cuˉ ve chaw teˇ gʼaˇ, Gʼuiˬ sha yawˇ htaꞈ a yeˇ maˇ te laˇ ve tehꞈ dawˇ jaw ve yoˬ. Yaꞈ hkʼaˇ, aˬ htoꞈ ma teˇ ceuˬ yawˇ ve dawˇ hkʼaˇ htaꞈ pa piˇ ve le?
“Chi teˇ hkui ngaˬ shu htaꞈ ga piˇ gʼa ve” (Shaw nyi kuiˬ Taꞈ yehˬ 2015 hkʼawꞈ ha pa 10 maˬ 1 nyi)
You May Also Like
NGAˬ HUI HTAꞈ CAˉ DAꞈ VE AWˬ LAWN
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ ve hk’aˬ hk’e te henˇ ve le?
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ tuˬ nawˬ Liꞈ hpu hk’aˬ ve teˇ maˬ yehˇ ve kaꞈ hpehꞈ ve yoˬ. Awˬ chawˇ maˇ heˆ leh yehˬ k’a hk’aw ve chaw htaꞈ Liꞈ hpu teˇ geh henˇ tuˬ jehˬ piˇ kaꞈ g’a ve yoˬ.
