Yaˬhoˉvaˬ nawˬ htaꞈ yawˇ geh shiˍ daꞈ maˇ la tcuh gaˇ ve yoˬ. Yaˬhoˉvaˬ hkʼaˬ hkʼe ve Gʼuiˬ sha hpehꞈ ve, ngaˬ hui awˬ pon aˬ htoꞈ ma te laˇ ve, leh nawˬ htaꞈ aˬ htoꞈ ma peꞈ laˇ gaˇ ve tehꞈ nawˬ shiˍ ve kʼo, nawˬ kaꞈ yawˇ geh awˬ chawˇ te gaˇ tuˬ yoˬ. Nawˬ Gʼuiˬ sha geh awˬ tehˬ tehˬ awˬ chawˇ te gʼa˗aw laˇ? (Chiˇ mvuh ve 25:14 gʼaw sheˍ.) Nawˬ Gʼuiˬ sha geh awˬ chawˇ te tuˬ aˬ htoꞈ ma gʼa te ve le? Na hkawˇ chi teˇ hpaˍ htaꞈ Liꞈ hpu hkʼaw hkʼawꞈ laˇ hkawˇ cawˬ ve yoˬ. Leh aˬ htoꞈ ma pa taw Yaˬhoˉvaˬ daꞈ jaˇ ve awˬ chawˇ hpehꞈ ve tehꞈ Liꞈ hpu hkʼaw maˍ laˇ ve yoˬ.

1. Yaˬhoˉvaˬ nawˬ htaꞈ aˬ htoꞈ ma te tcuh gaˇ ve le?

“Gʼuiˬ sha geh jiˆ laˬ˗oꞈ. Hkʼe te kʼo, yawˇ nawˬ hui geh jiˆ laˬ tuˬ yoˬ.” (Yaˍkoˆ 4:8) Chi kʼoˆ gaˇ ve lehˬ, Yaˬhoˉvaˬ nawˬ htaꞈ yawˇ geh awˬ chawˇ te tcuh gaˇ ve yoˬ. Chaw teˇ hpaˍ dawˇ ve, maˇ mawˬ gʼa ve Gʼuiˬ sha geh awˬ chawˇ te gʼa tuˬ haˍ jaˇ. Yaꞈ hkʼaˇ, Yaˬhoˉvaˬ yawˇ htaꞈ caˉ daꞈ ve Liꞈ hpu hkʼaw laiˉ ceuˬ kʼoˆ maˍ laˇ taˍ ve yoˬ. Ngaˬ hui Yaˬhoˉvaˬ htaꞈ maˇ mawˬ jaw ve htawˇ, ngaˬ hui Liꞈ hpu gʼaw ve kʼo yawˇ htaꞈ meuˆ daꞈ maˇ la tuˬ yoˬ.

2. Aˬ htoꞈ ma pa taw Yaˬhoˉvaˬ lehˬ daꞈ jaˇ ve awˬ chawˇ hpehꞈ ve le?

Shu nawˬ htaꞈ haꞈ laˇ ve aꞈ kehˉ Yaˬhoˉvaˬ nawˬ htaꞈ haꞈ jaˇ ve yoˬ. Yawˇ nawˬ htaꞈ ha lehˬ tcuh gaˇ leh nawˬ shoꞈ shaꞈ ve gʼa hpuˇ htaˇ yawˇ ga laˇ tuˬ lawˬ tcuh gaˇ ve yoˬ. “Gʼuiˬ sha nawˬ hui awˬ pon dawˇ nyi puiˉ ve pa taw, nawˬ hui ve dawˇ haˍ dawˇ hkiˉ tuˬ hkʼa peu˗eˬ yawˇ htaꞈ chiˇ aꞈ piˇ˗oˆ.” (1 Peˍtruˆ 5:7) Yaˬhoˉvaˬ yawˇ ve awˬ chawˇ htaꞈ ga piˇ tuˬ, awˬ gʼaˇ piˇ tuˬ, leh na piˇ tuˬ hkʼaˬ htaˆ kaꞈ gu hehnˇ taˍ ve yoˬ.—Chiˇ mvuh ve 94:18, 19 gʼaw sheˍ.

3. Yaˬhoˉvaˬ geh awˬ chawˇ te gʼa tuˬ, yawˇ ngaˬ hui htaꞈ aˬ htoꞈ ma te tcuh gaˇ ve le?

Yaˬhoˉvaˬ chaw yaˇ teˇ gʼaˇ le le htaꞈ haꞈ ve yoˬ. Yaꞈ hkʼaˇ, yawˇ lehˬ “hteˇ ve cawˇ ve chaw htaꞈ awˬ chawˇ te piˇ ve yoˬ.” (Tawˇ naˉ ve 3:32) Yaˬhoˉvaˬ yawˇ ve awˬ chawˇ htaꞈ yawˇ daꞈ ve tehꞈ kʼoˆ ve htaꞈ coˇ caˇ leh te tcuh gaˇ ve, leh maˇ daꞈ tehꞈ kʼoˆ ve awˬ ceuˬ htaꞈ jaw kʼai tcuh gaˇ ve yoˬ. Chaw teˇ hpaˍ dawˇ ve, Gʼuiˬ sha ve awˬ liˇ awˬ hkʼaˇ gʼaꞈ te tuˬ haˍ jaˇ. Yaꞈ hkʼaˇ, Yaˬhoˉvaˬ lehˬ haꞈ pehnˇ ve Gʼuiˬ sha hpehꞈ ve yoˬ. Yawˇ htaꞈ awˬ tehˬ haꞈ ve chaw, leh yawˇ kʼoˆ taˍ ve teˇ ceuˬ le le htaꞈ coˇ caˇ leh gʼaꞈ te ve chaw htaꞈ haꞈ yuˬ ve yoˬ.—Chiˇ mvuh ve 147:11; Tcuh yaˇ 10:34, 35.

 Henˇ shiˍ maˇ la tuˬ

4. Aˍbraˍhanˍ Yaˬhoˉvaˬ geh awˬ chawˇ te ve

Gʼuiˬ sha ve awˬ chawˇ hpehꞈ ve hkʼaˬ hkʼe kʼoˆ gaˇ ve htaꞈ ngaˬ hui shiˍ tuˬ, Liꞈ hpu hkʼaw Aˍbraˍhanˍ (maˇ heˆ leh Aˍbranˍ) ve awˬ lawn kʼoˆ laˇ taˍ ve yoˬ. Aˍbraˍhanˍ ve awˬ lawn Awˬ hkuiˉ puiˍ liꞈ 12:1-4 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:

• Yaˬhoˉvaˬ Aˍbraˍhanˍ htaꞈ aˬ htoꞈ ma te tuˬ kʼoˆ piˇ ve le?

• Yaˬhoˉvaˬ Aˍbraˍhanˍ htaꞈ aˬ htoꞈ ma ka tiꞈ te piˇ ve le?

• Yaˬhoˉvaˬ kʼoˆ piˇ ve htaꞈ Aˍbraˍhanˍ hkʼaˬ hkʼe gʼaꞈ te ve le?

5. Yaˬhoˉvaˬ yawˇ ve awˬ chawˇ htaꞈ aˬ htoꞈ ma te tcuh gaˇ ve le?

Ngaˬ hui awˬ chawˇ htaꞈ teˇ ceuˬ ceuˬ te laˇ tcuh gaˇ ve yoˬ.

• Nawˬ awˬ chawˇ htaꞈ nawˬ awˬ pon aˬ htoꞈ ma te tcuh gaˇ ve le?

1 Yoˇhanˬ liꞈ 5:3 gʼaw leh na hkawˇ chi htaꞈ tawˇ yaw daꞈ sheˍ:

• Yaˬhoˉvaˬ yawˇ ve awˬ chawˇ htaꞈ aˬ htoꞈ ma te tcuh gaˇ ve le?

Yaˬhoˉvaˬ htaꞈ na yuˬ tuˬ, ngaˬ hui ve te hkʼaˇ dawˇ hkʼaˇ gʼa pa ve yoˬ. Iˉsaˍyaˆ liꞈ 48:17, 18 gʼaw leh na hkawˇ chi htaꞈ tawˇ yaw daꞈ sheˍ:

• Aˬ htoꞈ ma pa taw Yaˬhoˉvaˬ yawˇ ve awˬ chawˇ htaꞈ te hkʼaˇ dawˇ hkʼaˇ pa tcuh gaˇ ve le?

 6. Yaˬhoˉvaˬ yawˇ ve awˬ chawˇ awˬ pon aˬ htoꞈ ma te piˇ ve le?

 A yeˇ uiˍ ve awˬ lawn

Yaˬhoˉvaˬ nawˬ ve awˬ chawˇ hpehꞈ gaˇ ve, leh nawˬ yawˇ htaꞈ meuˆ daꞈ la tuˬ yawˇ ga laˇ tuˬ yoˬ.

Kʼawꞈ gʼaꞈ na ve

• Yaˬhoˉvaˬ yawˇ ve awˬ chawˇ htaꞈ hkʼaˬ hkʼe ga piˇ ve le?

• Aˬ htoꞈ ma pa taw Yaˬhoˉvaˬ yawˇ ve awˬ chawˇ htaꞈ te hkʼaˇ dawˇ hkʼaˇ pa tcuh gaˇ ve le?

• Nawˬ dawˇ kʼo, Yaˬhoˉvaˬ htaꞈ awˬ chawˇ te gʼa tuˬ haˍ jaˇ laˇ? Aˬ htoꞈ ma pa taw le?