Nawˬ Yaˬhoˉvaˬ ve Shaˉhkiˆhkanˍ ve chaw geh hpawnˬ daꞈ˗e jaw˗aw laˇ? Hpawnˬ daꞈ ve awˉ lawˉ teˇ pawˆ kʼai ve kʼo, nawˬ dawˇ hkiˉ tuˬ yoˬ hehˉ. ‘Hpawnˬ daꞈ ve hkʼaw aˬ htoꞈ ma te ve le? Aˬ htoꞈ ma pa taw hpawnˬ daꞈ ve lehˬ a yeˇ uiˍ ve le? Aˬ htoꞈ ma pa taw ngaˬ ca hpawnˬ daꞈ˗e cawˇ ve le?’ tehꞈ nawˬ chi hkʼe dawˇ tuˬ yoˬ hehˉ. Chi teˇ lawn hkʼaw awˬ nu ve chaw geh hpawnˬ daꞈ˗e ve lehˬ nawˬ Yaˬhoˉvaˬ geh meuˆ daꞈ maˇ la tuˬ hkʼaˬ hkʼe ga laˇ ve le, leh nawˬ aˬ htoꞈ ma awˬ bon gʼa tuˬ le, gʼa henˇ tuˬ yoˬ.

1. Aˬ htoꞈ ma pa taw Yaˬhoˉvaˬ ve Shaˉhkiˆhkanˍ ve chaw teˇ geh hpawnˬ daꞈ ve le?

Liꞈ hpu bvuhꞈ paˍ teˇ gʼaˇ aˬ htoꞈ ma te shu geh hpawnˬ daꞈ˗e ve a yeˇ uiˍ ve tehꞈ kʼoˆ maˍ laˇ ve yoˬ. Yawˇ kʼoˆ ve, “chaw moˍ lonˉ hpawnˬ daꞈ kuiˬ lo ngaˬ Gʼuiˬ sha htaꞈ chiˇ mvuh ve yoˬ.” (Chiˇ mvuh ve 26:12) Chi beuꞈ teˇ co˗e Yaˬhoˉvaˬ ve Shaˉhkiˆhkanˍ ve chaw kaꞈ teˇ geh gʼa hpawnˬ daꞈ ve ha lehˬ jaˇ. Yawˇ hui Yaˬhoˉvaˬ htaꞈ chiˇ mvuh tuˬ, liꞈ hkawˇ teˇ geh kʼa tuˬ, leh bon teˇ geh lawˬ tuˬ, teˇ shinˉ le le teˇ geh ca hpawnˬ daꞈ˗e ve yoˬ. Teˇ hkʼawꞈ le le hkʼaw yawˇ hui hpawnˬ daꞈ lonˉ kaꞈ kʼai ve yoˬ.

2. Hpawnˬ daꞈ ve hkʼaw nawˬ aˬ htoꞈ ma gʼa henˇ tuˬ le?

Hpawnˬ daꞈ ve hkʼaw Gʼuiˬ sha ve tawˇ hkawˇ maˍ leh “tcuhˉ kuiˬ kʼawꞈ yuˬ tawˆ maˍ piˇ ve yoˬ.” (Neˍhaˍmiˆ 8:8 gʼaw sheˍ.) Nawˬ hpawnˬ daꞈ ve hkʼaw kʼai htaˇ, Yaˬhoˉvaˬ ve awˬ lawn gʼa henˇ leh yawˇ hkʼaˬ hkʼe ve Gʼuiˬ sha hpehꞈ ve htaꞈ gʼa henˇ tuˬ yoˬ. Yaˬhoˉvaˬ nawˬ htaꞈ haꞈ ve tehꞈ nawˬ shiˍ htaˇ, yawˇ htaꞈ meuˆ daꞈ maˇ la tuˬ yoˬ. Nawˬ gawˬ lehˍ ve a shaꞈ cawˬ tuˬ yawˇ hkʼaˬ hkʼe te ga laˇ gʼa ve kaꞈ nawˬ gʼa henˇ tuˬ yoˬ.—Iˉsaˍyaˆ 48:17, 18.

3. Nawˬ awˬ nu ve chaw geh teˇ geh ca hpawnˬ daꞈ˗e htaˇ, aˬ htoꞈ ma awˬ bon gʼa tuˬ le?

Liꞈ hpu hkʼaw maˍ laˇ ve, ‘teˇ gʼaˇ leh teˇ gʼaˇ haꞈ pehnˇ ve nyi ma cawˬ leh, daꞈ ve kanˉ teˇ hpaˍ htaꞈ te tuˬ, shu htaꞈ dawˇ nyi leh awˬ gʼaˇ piˇ˗a veuˬ. Hpawnˬ daꞈ ve teˇ ceuˬ htaꞈ taˇ baˬ taˉ.’ (Heˍbrehˇ 10:24, 25) Hpawnˬ daꞈ ve hkʼaw nawˬ teˇ gʼaˇ leh teˇ gʼaˇ haꞈ daꞈ ve htaꞈ gʼa mawˬ leh nawˬ hkʼa shuˍ yawˇ hui htawˇ, Yaˬhoˉvaˬ ve awˬ lawn henˇ ve htaꞈ dawˇ cawˇ ve yoˬ. Yawˇ hui Liꞈ hpu htaꞈ cuˇ leh awˬ gʼaˇ peꞈ laˇ ve htaꞈ nawˬ gʼa kaˇ tuˬ yoˬ. (Roˉmaꞈ 1:11, 12 gʼaw sheˍ.) Hpawnˬ daꞈ kuiˬ lo nawˬ hkʼa shuˍ shoꞈ shaꞈ ve awˬ lawn gʼa hpuˇ ve, chaw haˉ yaˇ miˇ haˉ, leh yehˬ kʼa cawˬ˗oˬ ve chaw htaꞈ mawˬ daꞈ tuˬ yoˬ. Chi htaꞈ pa taw, Yaˬhoˉvaˬ ngaˬ hui htaꞈ teˇ shinˉ le le hkʼaw teˇ geh hpawnˬ daꞈ tcuh gaˇ ve yoˬ!

 Henˇ shiˍ maˇ la tuˬ

4. Yaˬhoˉvaˬ ve Shaˉhkiˆhkanˍ ve chaw hpawnˬ daꞈ ve

Yaˬhoˉvaˬ htaꞈ oˉ kʼoˍ pui tuˬ, awˉ lawˉ peuˇ ve Hkriꞈ yaˇ hkʼaˬ htaˆ kaꞈ hpawnˬ daꞈ ve yoˬ. (Roˉmaꞈ 16:3-5) Kawˇlawˇsehˇ liꞈ 3:16 gʼaw leh na hkawˇ chi htaꞈ tawˇ yaw daꞈ sheˍ:

• Awˉ lawˉ peuˇ ve Hkriꞈ yaˇ Yaˬhoˉvaˬ htaꞈ oˉ kʼoˍ pui tuˬ hkʼaˬ hkʼe te ve le?

1. Ngaˬ hui hpawnˬ daꞈ ve hkʼaw bon maˍ hkawˇ cawˬ ve, Liꞈ hpu maˍ tuˬ awˬ hkʼaˇ te maˍ laˇ ve, leh VDO nyi ve yoˬ. Hpawnˬ daꞈ ve tanˬ leh hpehˇ htaˇ liꞈ hkawˇ kʼa leh bon lawˬ ve

2. Hpawnˬ daꞈ ve hkʼaw teˇ tawn tawn kʼo, na taˍ ve chaw laꞈ sheh chiˇ leh hkʼawꞈ laˇ hpehꞈ ve

3.   Teˇ gʼaˇ le le htaꞈ haꞈ yuˬ laˇ ve—yehˬ kʼa hkʼaw ve chaw geh laˬ ve, teˇ gʼaˇ tiˉ laˬ ve, chaw mawˇ leh yaˇ ehˉ kaꞈ laˬ hpehꞈ ve

4. Yaˬhoˉvaˬ ve Shaˉhkiˆhkanˍ ve chaw hpawnˬ daꞈ ve hkʼaw hpu tanˇ maˇ shaw

5. Ngaˬ hui hpawnˬ daꞈ tuˬ gʼa coˇ caˇ ve

• Aˬ htoꞈ ma pa taw ngaˬ hui hkʼaˬ htaˆ kaꞈ ca hpawnˬ daꞈ˗e cawˇ ve le?

 A yeˇ uiˍ ve awˬ lawn

Nawˬ hpawnˬ daꞈ˗e ve kʼo, Yaˬhoˉvaˬ htaꞈ meuˆ daꞈ maˇ la ve, yawˇ htaꞈ shiˍ daꞈ maˇ la ve, leh awˬ nu ve chaw geh yawˇ htaꞈ teˇ geh oˉ kʼoˍ pui gʼa tuˬ ga laˇ ve yoˬ.

Kʼawꞈ gʼaꞈ na ve

• Aˬ htoꞈ ma pa taw Yaˬhoˉvaˬ ngaˬ hui htaꞈ teˇ geh ca hpawnˬ daꞈ˗e tcuh gaˇ ve le?

• Yaˬhoˉvaˬ ve Shaˉhkiˆhkanˍ ve chaw geh ca hpawnˬ daꞈ˗e ve kʼo, nawˬ aˬ htoꞈ ma gʼa henˇ tuˬ le?

• Nawˬ dawˇ kʼo, hpawnˬ daꞈ˗e ve lehˬ nawˬ htaꞈ hkʼaˬ hkʼe hpawˇ kʼawꞈ ga laˇ gʼa ve le?