Awˬ lawn 12
Nawˬ Liꞈ hpu kʼawꞈ caˉ leh henˇ gʼa tuˬ aˬ htoꞈ ma ga laˇ gʼa ve le?
Liꞈ hpu henˇ ve lehˬ awˬ bon cawˬ jaˇ. Yaꞈ hkʼaˇ, nawˬ dawˇ kʼo kʼawꞈ caˉ henˇ kʼai gʼa˗aw laˇ? Aˬ htoꞈ ma pa taw Liꞈ hpu kʼawꞈ caˉ henˇ kʼai ve lehˬ awˬ bon cawˬ jaˇ ve le? Nawˬ shoꞈ shaꞈ ve awˬ ceuˬ gʼa hpuˇ ve htawˇ, nawˬ Liꞈ hpu kʼawꞈ caˉ leh henˇ kʼai gʼa tuˬ aˬ htoꞈ ma ga laˇ gʼa ve le?
1. Aˬ htoꞈ ma pa taw Liꞈ hpu henˇ ve lehˬ awˬ bon cawˬ jaˇ ve le?
“Gʼuiˬ sha ve tawˇ hkawˇ lehˬ, teꞈ chehˇ leh kanˇ paˆ cawˬ ve yoˬ.” (Heˍbrehˇ 4:11) Liꞈ hpu lehˬ awˬ hpfuhˇ hkʼaˆ jaˇ. Awˬ lawn kʼo, Gʼuiˬ sha ngaˬ hui htaꞈ caˉ daꞈ ve hkʼaˬ hkʼe dawˇ ve shiˍ tuˬ ga laˇ ve yoˬ. Liꞈ hpu lehˬ cuˇ yiˍ leh dawˇ law kuiˬ peꞈ laˇ ve yoˬ. A yeˇ uiˍ jaˇ ve awˬ ceuˬ lehˬ nawˬ Yaˬhoˉvaˬ geh awˬ chawˇ te gʼa tuˬ Liꞈ hpu ga laˇ gʼa ve yoˬ. Chi hkʼoˆ kaꞈ, nawˬ Liꞈ hpu henˇ ve kʼo, nawˬ ve a shaꞈ teꞈ hkʼaˇ hkʼaw ha lehˬ ve cawˬ tuˬ yoˬ.
2. Aˬ htoꞈ ma pa taw Liꞈ hpu hkʼaw hteˇ ve cawˇ ve lehˬ awˬ hpfuhˆ hkʼaˆ jaˇ ve tehꞈ tawnˇ taˍ cawˇ ve le?
Liꞈ hpu hkʼaw hteˇ ve cawˇ ve lehˬ awˬ hpfuhˇ hkʼaˆ jaˇ ve mawˇ htaꞈ shuˍ ve yoˬ. Liꞈ hpu hkʼaw ngaˬ hui htaꞈ kʼoˆ laˇ ve, ‘hteˇ ve cawˇ ve htaꞈ vuiˬ yuˬ cawˇ ve yoˬ. Hawˇ baˬ ve maˇ te cawˇ.’ (Tawˇ naˉ ve 23:23) Liꞈ hpu hkʼaw hteˇ ve cawˇ ve awˬ hpfuhˇ hkʼaˆ jaˇ ve tehꞈ ngaˬ hui tawnˇ taˍ ve kʼo, shoꞈ shaꞈ ve gʼa hpuˇ ve htawˇ, ngaˬ hui Liꞈ hpu kʼawꞈ caˉ leh henˇ kʼai gʼa tuˬ yoˬ.—Tawˇ naˉ ve 2:4, 5 gʼaw sheˍ.
3. Liꞈ hpu kʼawꞈ caˉ leh henˇ gʼa tuˬ Yaˬhoˉvaˬ nawˬ htaꞈ hkʼaˬ hkʼe ga laˇ gʼa ve le?
Yaˬhoˉvaˬ lehˬ ngaˬ hui htaꞈ hpanˍ shehˍ hpaˇ hpehꞈ leh ngaˬ hui ve awˬ chawˇ hpehꞈ ve pa taw, ngaˬ hui yawˇ htaꞈ shiˍ daꞈ tuˬ yawˇ ga laˇ gaˇ ve yoˬ. Yaˬhoˉvaˬ lehˬ “nawˬ hui te gaˇ ve nyi ma cawˬ tuˬ leh te gʼa tuˬ,” awˬ gʼaˇ peꞈ laˇ tuˬ yoˬ. (Hpiˇliˇpiˆ 2:13 gʼaw sheˍ.) Chi htaꞈ pa taw, nawˬ Liꞈ hpu henˇ gaˇ ve nyi ma cawˬ tuˬ leh henˇ taˍ ve htaꞈ gʼaꞈ te gaˇ tuˬ Yaˬhoˉvaˬ nawˬ htaꞈ ga laˇ gʼa ve yoˬ. Nawˬ Liꞈ hpu henˇ ve htaꞈ shu maˇ dawˇ cawˇ ve, maˇ heˆ leh shoꞈ shaꞈ ve awˬ ceuˬ gʼa hpuˇ ve kʼo, Yaˬhoˉvaˬ nawˬ htaꞈ awˬ gʼaˇ peꞈ laˇ gʼa ve yoˬ. Nawˬ Liꞈ hpu kʼawꞈ caˉ leh henˇ gʼa tuˬ, Yaˬhoˉvaˬ ga laˇ tuˬ hkʼaˬ htaˆ kaꞈ bon lawˬ sheˍ.—1 Hteˇsaˍlawˇniˆ 5:17.
Henˇ shiˍ maˇ la tuˬ
Nawˬ Liꞈ hpu henˇ tuˬ awˬ yanˇ hkʼa dehꞈ maˇ cawˬ ve, maˇ heˆ leh shu tawˍ laˇ ve gʼa hpuˇ ve htawˇ, kʼawꞈ caˉ leh henˇ gʼa tuˬ aˬ htoꞈ ma gʼa te ve le, Yaˬhoˉvaˬ nawˬ htaꞈ hkʼaˬ hkʼe ga laˇ gʼa ve le, teˇ geh henˇ sheˍ.
4. Nawˬ Liꞈ hpu henˇ ve htaꞈ a yeˇ te ve
Teˇ pawˆ pawˆ ngaˬ hui laiˉ ceuˬ te leh Liꞈ hpu henˇ tuˬ awˬ yanˇ maˇ cawˬ. Aˬ htoꞈ ma teˇ ceuˬ nawˬ htaꞈ ga laˇ gʼa ve le? Eˇfeˇsuꞈ liꞈ 5:16 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Nawˬ dawˇ kʼo, nawˬ ve a shaꞈ teꞈ hkʼaˇ hkʼaw “awˬ yanˇ htaꞈ vuiˬ hkʼawꞈ” leh a yeˇ uiˍ jaˇ ve awˬ ceuˬ htaꞈ te tuˬ aˬ htoꞈ ma te cawˇ ve le?
-
Liꞈ hpu henˇ ve htaꞈ a yeˇ uiˍ ve awˬ ceuˬ hpehꞈ tuˬ nawˬ hkʼaˬ hkʼe te gʼa ve le?
-
Kawˆ kʼoˍ hkʼaw shehˇ shiˍ awˉ lawˉ toˆ keu ve kʼo, haˉ pui shiˍ hkʼa peu˗eˬ keu maˇ gʼa
-
Nawˬ haˉ pui shiˍ awˉ lawˉ yuˬ keu ve kʼo, shehˇ shiˍ hkʼa peu˗eˬ toˆ keu gʼa ve yoˬ. Chi hkʼa shuˍ shuˍ, nawˬ ve a shaꞈ teꞈ hkʼaˇ hkʼaw a yeˇ uiˍ jaˇ ve htaꞈ awˉ lawˉ teh ve kʼo, oˇ ve htaꞈ nawˬ hkʼa dehꞈ te gʼa leh awˬ nu ve awˬ ceuˬ te tuˬ kaꞈ awˬ yanˇ cawˬ sheˍ ve
Liꞈ hpu henˇ ve lehˬ, Gʼuiˬ sha htaꞈ shiˍ daꞈ leh yawˇ htaꞈ oˉ kʼoˍ pui tuˬ ga laˇ gʼa ve yoˬ. Maꞈhtehˍ liꞈ 4:4 gʼaw leh na hkawˇ chi htaꞈ tawˇ yaw daꞈ sheˍ:
-
Ngaˬ hui Liꞈ hpu henˇ ve htaꞈ a yeˇ te ve kʼo, ngaˬ hui aˬ htoꞈ ma awˬ bon gʼa tuˬ le?
5. Tawˍ laˇ ve gʼa hpuˇ htaˇ yeunˇ hkanˍ ve
Chaw teˇ hpaˍ nawˬ Liꞈ hpu henˇ ve htaꞈ jehˇ tuˬ coˇ caˇ leh te laˇ ve yoˬ hehˉ. Fa˗cheˆ˗ko ve awˬ lawn htaꞈ nyi sheˍ. VDO hpaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
VDO chi hkʼaw, Fa˗cheˆ˗ko yawˇ ve awˬ chawˇ leh awˬ e htaꞈ Liꞈ hpu henˇ chehˇ ve tehꞈ kʼoˆ piˇ htaˇ, yawˇ hui hkʼaˬ hkʼe dawˇ ve le?
-
Fa˗cheˆ˗ko yeunˇ hkanˍ ve pa taw, daꞈ ve awˬ lawn aˬ htoꞈ ma cawˬ ve le?
2 Tiˆmoˉseˍ liꞈ 2:24, 25 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Nawˬ Liꞈ hpu henˇ chehˇ ve htaꞈ nawˬ ve yehˬ kʼa leh awˬ chawˇ hkʼaˬ hkʼe dawˇ ve le?
-
Liꞈ hpu chi teˇ tawn hkʼaw maˍ laˇ ve hkʼe, nawˬ Liꞈ hpu henˇ ve htaꞈ maˇ dawˇ cawˇ ve chaw cawˬ ve kʼo, nawˬ yawˇ htaꞈ hkʼaˬ hkʼe hkʼawꞈ piˇ gʼa tuˬ le? Aˬ htoꞈ ma pa taw le?
6. Yaˬhoˉvaˬ htaꞈ gʼaˇ va ve
Nawˬ Yaˬhoˉvaˬ geh meuˆ daꞈ maˇ la ve kʼo, yawˇ nyi hkʼaˇ suh tuˬ te gaˇ ve yoˬ. Yaꞈ hkʼaˇ, teˇ pawˆ pawˆ kʼo Yaˬhoˉvaˬ kʼoˆ laˇ ve htaꞈ nawˬ gʼaꞈ te tuˬ haˍ jaˇ tehꞈ dawˇ ve yoˬ hehˉ. Nawˬ oˇ hkʼe dawˇ ve kʼo awˬ gʼaˇ taˇ nuˇ. Awˬ lawn kʼo, Yaˬhoˉvaˬ nawˬ htaꞈ ga laˇ gʼa ve yoˬ. VDO hpaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
VDO chi hkʼaw, Yaˬhoˉvaˬ nyi hkʼaˇ suh tuˬ hawˉ hkʼaˆ chi teˇ gʼaˇ yawˇ ve a shaꞈ teꞈ hkʼaˇ hkʼaˬ hkʼe pa ve le?
-
Yawˇ ve awˬ lawn nawˬ aˬ htoꞈ ma dawˇ cawˇ ve le?
Heˍbrehˇ liꞈ 11:6 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Yaˬhoˉvaˬ nyi hkʼaˇ suh tuˬ te piˇ gaˇ ve chaw leh “yawˇ htaꞈ ca ve chaw hui” htaꞈ Yaˬhoˉvaˬ aˬ htoꞈ ma te piˇ tuˬ le?
-
Liꞈ hpu chi teˇ tawn hkʼaw kʼoˆ ve hkʼe, nawˬ Liꞈ hpu hkʼa dehꞈ henˇ ve htaꞈ Yaˬhoˉvaˬ mawˬ ve kʼo, yawˇ hkʼaˬ hkʼe dawˇ tuˬ le?
Chaw teˇ hpaˍ na nyi laˇ ve: “Aˬ htoꞈ ma pa taw nawˬ Liꞈ hpu henˇ ve le?”
-
Nawˬ hkʼaˬ hkʼe hkʼawꞈ piˇ tuˬ le?
A yeˇ uiˍ ve awˬ lawn
Liꞈ hpu henˇ ve lehˬ maˇ sha ve htawˇ, nawˬ ve a shaꞈ co co taiˍ taiˍ ha lehˬ tuˬ te laˇ gʼa ve yoˬ. Yaˬhoˉvaˬ htaꞈ gʼaˇ va ve kʼo, yawˇ nawˬ htaꞈ laꞈ shawnˍ peꞈ laˇ tuˬ yoˬ.
Kʼawꞈ gʼaꞈ na ve
-
Aˬ htoꞈ ma pa taw Liꞈ hpu hkʼaw hteˇ ve cawˇ ve lehˬ awˬ hpfuhˇ hkʼaˆ jaˇ ve le?
-
Nawˬ Liꞈ hpu henˇ ve htaꞈ a yeˇ hkʼaˬ hkʼe te gʼa ve le?
-
Aˬ htoꞈ ma pa taw nawˬ Liꞈ hpu kʼawꞈ caˉ leh henˇ gʼa tuˬ Yaˬhoˉvaˬ ga laˇ tuˬ lawˬ cawˇ ve le?
Kʼawꞈ caˉ nyi gʼa ve
Chaw laiˉ gʼaˇ awˬ yanˇ hkʼa dehꞈ yehˇ gʼa ve yoˬ. Yawˇ hui htaꞈ ga piˇ ve 4 hkʼaˇ htaꞈ gʼaw nyi sheˍ.
“Awˬ yanˇ yehˇ ve maˇ gʼa shonˇ tuˬ hkʼaˬ hkʼe te gʼa ve le” (Tu loˬ! 2014 hkʼawꞈ ha pa 2 maˬ)
Yaˇ miˇ teˇ gʼaˇ Liꞈ hpu henˇ leh gʼaꞈ te ve htaꞈ awˬ hpawˇ maˇ na gʼa ve yoˬ. Yaꞈ hkʼaˇ, Yaˬhoˉvaˬ yawˇ htaꞈ hkʼaˬ hkʼe ga piˇ ve nyi sheˍ.
Yaˇ miˇ teˇ gʼaˇ yeunˇ hkanˍ ve pa taw, awˬ hpawˇ htaꞈ hkʼaˬ hkʼe ga piˇ gʼa ve nyi sheˍ.
Chaw teˇ hpaˍ kʼoˆ ve, Yaˬhoˉvaˬ ve Shaˉhkiˆhkanˍ ve chaw lehˬ yehˬ kʼa hpaˆ daꞈ tuˬ te piˇ ve yoˬ. Yaꞈ hkʼaˇ, chi awˬ tehˬ laˇ?
You May Also Like
NGAˬ HUI HTAꞈ CAˉ DAꞈ VE AWˬ LAWN
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ ve hk’aˬ hk’e te henˇ ve le?
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ tuˬ nawˬ Liꞈ hpu hk’aˬ ve teˇ maˬ yehˇ ve kaꞈ hpehꞈ ve yoˬ. Awˬ chawˇ maˇ heˆ leh yehˬ k’a hk’aw ve chaw htaꞈ Liꞈ hpu teˇ geh henˇ tuˬ jehˬ piˇ kaꞈ g’a ve yoˬ.
