Awˬ lawn 17
Yeˍsuˆ hkʼaˬ hkʼe ve chaw hpehꞈ ve le?
Yeˍsuˆ miˬ guiˬ hkʼoˆ chehˇ htaˇ, aˬ htoꞈ ma yaw ve leh te ve htaꞈ ngaˬ hui henˇ shiˍ ve kʼo, ngaˬ hui yawˇ leh yawˇ ve Awˬ pa Yaˬhoˉvaˬ htaꞈ kʼawꞈ meuˆ daꞈ maˇ la gaˇ tuˬ yoˬ. Yeˍsuˆ hkʼaˬ hkʼe ve chaw hpehꞈ ve le? Leh ngaˬ hui yawˇ htaꞈ hkʼaˬ hkʼe henˇ yuˬ gʼa ve le?
1. Yeˍsuˆ yawˇ ve Awˬ pa htaꞈ hkʼaˬ hkʼe shuˍ daꞈ ve le?
Yeˍsuˆ mvuhˇ naw ma hkʼoˆ lo laiˉ hinˉ lanˬ hkʼawꞈ chehˇ ve awˬ yanˇ hkʼaw yawˇ ve Awˬ pa htaꞈ nyi leh henˇ yuˬ ve yoˬ. Chi htaꞈ pa taw, yawˇ ve dawˇ hkʼaˇ leh te ve awˬ ceuˬ Awˬ pa htaꞈ shuˍ jaˇ ve yoˬ. (Yoˇhanˬ 5:19 gʼaw sheˍ.) Yeˍsuˆ lehˬ yawˇ ve Awˬ pa ve te hkʼaˇ dawˇ hkʼaˇ hkʼa peu˗eˬ henˇ yuˬ gʼa ve yoˬ. Hkʼe te leh, yawˇ kʼoˆ ve “ngaˬ htaꞈ mawˬ ve chaw lehˬ, Awˬ pa htaꞈ mawˬ peuˬ.” (Yoˇhanˬ 14:9) Yeˍsuˆ hkʼaˬ hkʼe ve chaw hpehꞈ ve htaꞈ nawˬ henˇ shiˍ maˇ la ve kʼo, nawˬ Yaˬhoˉvaˬ htaꞈ shiˍ daꞈ maˇ la tuˬ yoˬ. Yeˍsuˆ chaw yaˇ awˬ pon dawˇ nyi laˇ ve htaꞈ shiˍ htaˇ, Yaˬhoˉvaˬ nawˬ awˬ pon dawˇ nyi laˇ ve kaꞈ shiˍ gʼa ve yoˬ.
2. Yeˍsuˆ lehˬ Yaˬhoˉvaˬ htaꞈ haꞈ ve tehꞈ hkʼaˬ hkʼe hpeuꞈ maw piˇ ve le?
Yeˍsuˆ kʼoˆ ve, “Awˬ pa htaꞈ ngaˬ haꞈ ve yoˬ tehꞈ, miˬ guiˬ yaˇ hui gʼa shiˍ tuˬ, Awˬ pa ngaˬ htaꞈ tawˇ peꞈ laˇ ve hkʼe ngaˬ te ve yoˬ.” (Yoˇhanˬ 14:31) Yeˍsuˆ miˬ guiˬ hkʼoˆ chehˇ htaˇ, yawˇ ve Awˬ pa htaꞈ haꞈ jaˇ ve tehꞈ hpeuꞈ maw piˇ tuˬ, Awˬ pa ve hkawˇ hkʼaˬ htaˆ kaꞈ na yuˬ ve yoˬ. Chi hkʼe te tuˬ teˇ pawˆ pawˆ kʼo maˇ sha ve yoˬ. Chi hkʼoˆ kaꞈ, Yeˍsuˆ yawˇ ve Awˬ pa htaꞈ haꞈ jaˇ ve pa taw, Yaˬhoˉvaˬ ve awˬ lawn hkʼaˬ htaˆ kaꞈ shu htaꞈ hto maˍ piˇ leh yawˇ ve Awˬ pa htaꞈ shu meuˆ daꞈ maˇ la tuˬ ga piˇ ve yoˬ.—Yoˇhanˬ 14:23.
3. Yeˍsuˆ lehˬ chaw yaˇ htaꞈ haꞈ ve tehꞈ hkʼaˬ hkʼe hpeuꞈ maw laˇ ve le?
Liꞈ hpu hkʼaw kʼoˆ laˇ ve, Yeˍsuˆ lehˬ chaw yaˇ htaꞈ haꞈ jaˇ. Yeˍsuˆ chaw yaˇ htaꞈ haꞈ ve tehꞈ hpeuꞈ maw laˇ tuˬ, chaw yaˇ htaꞈ awˬ gʼaˇ piˇ leh nyi ma awˬ tawˬ hkʼa gaˬ ga piˇ ve yoˬ. Yawˇ anˇ tuˬ te ve lehˬ, yawˇ kanˇ paˆ cawˬ ve tehꞈ hpeuꞈ maw laˇ ve awˬ hkʼoˆ kaꞈ, yawˇ chaw yaˇ htaꞈ ha kʼaˉ ve tehꞈ hpeuꞈ maw laˇ ve yoˬ. (Maˍkuˆ 1:40-42) Yeˍsuˆ chaw mehˆ hpfuhˇ maˇ nyi leh teˇ gʼaˇ le le htaꞈ daꞈ ve awˬ ceuˬ te piˇ ve yoˬ. Yawˇ ve tawˇ hkawˇ chaw teˇ gʼaˇ le le htaꞈ awˬ gʼaˇ piˇ leh dawˇ law kuiˬ cawˬ tuˬ te piˇ ve yoˬ. Yeˍsuˆ chaw teˇ gʼaˇ le le htaꞈ haꞈ ve pa taw, yawˇ hkanˍ suh ve yoˬ. Yaꞈ hkʼaˇ, Yeˍsuˆ haꞈ jaˇ ve chaw lehˬ yawˇ ve tawˇ hkawˇ htaꞈ gʼaꞈ te ve chaw hpehꞈ ve yoˬ.—Yoˇhanˬ 15:13, 14 gʼaw sheˍ.
Henˇ shiˍ maˇ la tuˬ
Yeˍsuˆ hkʼaˬ hkʼe ve chaw hpehꞈ ve le, Yeˍsuˆ ve haꞈ pehnˇ ve leh nyi ma kʼehˬ ve htaꞈ ngaˬ hui hkʼaˬ hkʼe te henˇ yuˬ gʼa tuˬ le, teˇ geh henˇ sheˍ.
4. Yeˍsuˆ yawˇ ve Awˬ pa htaꞈ haꞈ ve
Yeˍsuˆ te maˍ laˇ ve hkʼe ngaˬ hui Gʼuiˬ sha htaꞈ haꞈ ve tehꞈ hkʼaˬ hkʼe te hpeuꞈ maw piˇ gʼa ve le? Luˉkaꞈ liꞈ 6:12 leh Yoˇhanˬ liꞈ 15:10; 17:26 gʼaw sheˍ. Liꞈ hpu awˬ tawn teˇ tawn peuˬ teˇ tawn gʼaw peuˬ hkʼawꞈ nawˉ, na hkawˇ chi htaꞈ tawˇ yaw daꞈ sheˍ:
-
Yeˍsuˆ te maˍ laˇ ve hkʼe ngaˬ hui Yaˬhoˉvaˬ htaꞈ haꞈ ve tehꞈ hkʼaˬ hkʼe te hpeuꞈ maw piˇ gʼa ve le?
Yeˍsuˆ lehˬ mvuhˇ naw ma hkʼoˆ chehˇ ve Awˬ pa htaꞈ haꞈ jaˇ ve, leh yawˇ ve Awˬ pa geh hkʼaˬ htaˆ kaꞈ bon lawˬ ve hkʼaw tawˇ yaw daꞈ ve
5. Yeˍsuˆ chaw yaˇ awˬ pon dawˇ nyi piˇ puiˉ ve
Yeˍsuˆ yawˇ awˬ pon awˉ lawˉ dawˇ nyi ve aꞈ kehˉ shu awˬ pon dawˇ nyi piˇ ve yoˬ. Yawˇ heuˬ jaˇ ve htawˇ, yawˇ ve awˬ gʼaˇ leh awˬ yanˇ yehˇ leh shu htaꞈ ga piˇ ve yoˬ. Maˍkuˆ liꞈ 6:30-44 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Yeˍsuˆ lehˬ shu htaꞈ ha kʼaˉ piˇ ve tehꞈ hkʼaˬ hkʼe te hpeuꞈ maw piˇ ve le?—Kaˇ nanˉ ehˉ 31, 34, 41, leh 42 hkʼaw nyi sheˍ.
-
Aˬ htoꞈ ma pa taw Yeˍsuˆ shu htaꞈ ga piˇ gaˇ ve le?—Kaˇ nanˉ ehˉ 34 hkʼaw nyi sheˍ.
-
Yeˍsuˆ Yaˬhoˉvaˬ ve te hkʼaˇ dawˇ hkʼaˇ htaꞈ henˇ yuˬ ve yoˬ. Chi htaꞈ pa taw, awˬ lawn chi Yaˬhoˉvaˬ htaꞈ caˉ daꞈ ve nawˬ htaꞈ aˬ htoꞈ ma maˍ laˇ ve le?
-
Yeˍsuˆ shu awˬ pon dawˇ nyi piˇ puiˉ ve htaꞈ ngaˬ hui hkʼaˬ hkʼe te henˇ yuˬ gʼa ve le?
6. Yeˍsuˆ nyi ma kʼehˬ ve chaw hpehꞈ ve
Yeˍsuˆ paw sha ve chaw maˇ heˆ ve htawˇ, yawˇ shu htaꞈ mawˇ pehˬ piˇ puiˉ ve yoˬ. Yawˇ ngaˬ hui htaꞈ chi hkʼe te tehꞈ kʼoˆ laˇ ve yoˬ. Tcuh yaˇ liꞈ 20:35 gʼaw leh na hkawˇ chi htaꞈ tawˇ yaw daꞈ sheˍ:
-
Yeˍsuˆ ve tawˇ hkawˇ htaꞈ nyi kʼo, ngaˬ hui htaꞈ ha lehˬ tuˬ te laˇ ve aˬ htoꞈ ma teˇ ceuˬ le?
VDO hpaw leh na hkawˇ chi htaꞈ tawˇ yaw daꞈ sheˍ:
-
Ngaˬ hui mawˇ maˇ cawˬ maˇ ve htawˇ, shu htaꞈ aˬ htoꞈ ma piˇ gʼa ve le?
Nawˬ shiˍ˗aˬ laˇ?
Liꞈ hpu hkʼaw kʼoˆ laˇ ve, ngaˬ hui Yaˬhoˉvaˬ geh bon lawˬ htaˇ Yeˍsuˆ ve awˬ meh htaꞈ gʼa cuˇ ve yoˬ. (Yoˇhanˬ 16:23, 24 gʼaw sheˍ.) Ngaˬ hui bon chi hkʼe lawˬ htaˇ, ngaˬ hui Yaˬhoˉvaˬ geh meuˆ daꞈ tuˬ Yeˍsuˆ te laˇ ve htaꞈ awˬ bon uiˍ jaˇ tehꞈ hpeuꞈ maw piˇ chehˇ ve yoˬ.
Chaw teˇ hpaˍ kʼoˆ ve: “Ngaˬ hui shoꞈ shaꞈ ve gʼa hpuˇ chehˇ ve htaꞈ Gʼuiˬ sha a yeˇ maˇ te laˇ.”
-
Yeˍsuˆ Yaˬhoˉvaˬ ve te hkʼaˇ dawˇ hkʼaˇ htaꞈ henˇ yuˬ ve yoˬ. Chi htaꞈ pa taw, Yeˍsuˆ ve te hkʼaˇ dawˇ hkʼaˇ htaꞈ nyi htaˇ, Yaˬhoˉvaˬ ngaˬ hui htaꞈ a yeˇ te laˇ ve tehꞈ hkʼaˬ hkʼe hpeuꞈ maw laˇ ve le?
A yeˇ uiˍ ve awˬ lawn
Yeˍsuˆ lehˬ Yaˬhoˉvaˬ htaꞈ haꞈ leh, chaw yaˇ htaꞈ kaꞈ haꞈ ve yoˬ. Yeˍsuˆ yawˇ ve Awˬ pa htaꞈ shuˍ daꞈ jaˇ. Chi htaꞈ pa taw, ngaˬ hui Yeˍsuˆ htaꞈ shiˍ maˇ la ve kʼo, Yaˬhoˉvaˬ htaꞈ kaꞈ shiˍ maˇ la gʼa ve yoˬ.
Kʼawꞈ gʼaꞈ na ve
-
Yeˍsuˆ hkʼa shuˍ ngaˬ hui Yaˬhoˉvaˬ htaꞈ haꞈ ve tehꞈ hkʼaˬ hkʼe te hpeuꞈ maw piˇ gʼa ve le?
-
Yeˍsuˆ hkʼa shuˍ ngaˬ hui shu htaꞈ haꞈ ve tehꞈ hkʼaˬ hkʼe te hpeuꞈ maw piˇ gʼa ve le?
-
Yeˍsuˆ ve te hkʼaˇ dawˇ hkʼaˇ hkʼaˬ ve teˇ maˬ htaꞈ nawˬ dawˇ cawˇ jaˇ ve le?
Kʼawꞈ caˉ nyi gʼa ve
Yeˍsuˆ ve te hkʼaˇ dawˇ hkʼaˇ teˇ hpaˍ htaꞈ ngaˬ hui henˇ yuˬ leh gʼaꞈ te nyi sheˍ.
Aˬ htoꞈ ma pa taw ngaˬ hui Yeˍsuˆ ve awˬ meh htaꞈ cuˇ leh bon lawˬ cawˇ ve le, gʼaw nyi sheˍ.
Yeˍsuˆ ve awˬ to leh mehˆ hpfuhˇ hkʼaˬ hkʼe cawˬ ve tehꞈ Liꞈ hpu hkʼaw kʼoˆ laˇ˗aw laˇ?
“Yeˍsuˆ ve awˬ to leh mehˆ hpfuhˇ hkʼaˬ hkʼe cawˬ ve le?” (Vehˆsaiˉ hkʼaw ve awˬ lawn)
Yeˍsuˆ yaˇ miˇ htaꞈ yawˆ yan piˇ ve awˬ lawn, ngaˬ hui aˬ htoꞈ ma henˇ yuˬ gʼa ve le?
You May Also Like
NGAˬ HUI HTAꞈ CAˉ DAꞈ VE AWˬ LAWN
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ ve hk’aˬ hk’e te henˇ ve le?
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ tuˬ nawˬ Liꞈ hpu hk’aˬ ve teˇ maˬ yehˇ ve kaꞈ hpehꞈ ve yoˬ. Awˬ chawˇ maˇ heˆ leh yehˬ k’a hk’aw ve chaw htaꞈ Liꞈ hpu teˇ geh henˇ tuˬ jehˬ piˇ kaꞈ g’a ve yoˬ.
