Awˬ lawn 13
Maˇ heˆ heˆ ve bon liˇ Gʼuiˬ sha ve awˬ meh htaꞈ hkʼaˬ hkʼe te luˬ ve le?
Gʼuiˬ sha lehˬ haꞈ pehnˇ ve Gʼuiˬ sha hpehꞈ ve yoˬ. Hkʼe kʼo, bon liˇ teˇ hpaˍ Gʼuiˬ sha htaꞈ yonˍ ve tehꞈ kʼoˆ ve htawˇ, aˬ htoꞈ ma te maˇ daꞈ ve laiˉ ceuˬ te ve le? Awˬ lawn kʼo, yawˇ hui maˇ heˆ heˆ ve bon liˇ hpehꞈ ve yoˬ. Yawˇ hui chaw yaˇ htaꞈ sheh yaꞈ leh Gʼuiˬ sha ve tawˇ hkawˇ awˬ hkʼaˇ suh maˇ gʼaꞈ te ve yoˬ. Bon liˇ oˇ ve teˇ hpaˍ Gʼuiˬ sha ve awˬ meh htaꞈ hkʼaˬ hkʼe te luˬ piˇ ve le? Bon liˇ oˇ ve htaꞈ Gʼuiˬ sha hkʼaˬ hkʼe dawˇ ve le? Leh awˬ lawn chi htaꞈ Gʼuiˬ sha hkʼaˬ hkʼe gu tuˬ le?
1. Maˇ heˆ heˆ ve bon liˇ maˍ ve hkʼaw Gʼuiˬ sha ve awˬ meh htaꞈ hkʼaˬ hkʼe te luˬ piˇ ve le?
Maˇ heˆ heˆ ve bon liˇ, “Gʼuiˬ sha ve awˬ lawn hteˇ ve cawˇ ve teˇ hpaˍ htaꞈ yawˇ hui maˇ haꞈ yuˬ.” (Roˉmaꞈ 1:25) Tawˇ pa haˉ te kʼo, maˇ˗awˍ ve bon liˇ lehˬ, awˬ moˍ yaˇ htaꞈ Gʼuiˬ sha ve awˬ meh maˇ maˍ piˇ. Yaꞈ hkʼaˇ, Liꞈ hpu hkʼaw kʼoˆ laˇ ve Gʼuiˬ sha ve awˬ meh gʼa kuˬ ve yoˬ. (Roˉmaꞈ 10:13, 14) Maˇ daꞈ ve awˬ lawn hpehꞈ la htaˇ, chi lehˬ Gʼuiˬ sha ve a loˍ hpehꞈ ve tehꞈ, bon liˇ awˬ hoˉ teˇ hpaˍ kʼoˆ ve yoˬ. Yaꞈ hkʼaˇ, chi hkʼe kʼoˆ ve lehˬ heˍ ve yoˬ. Gʼuiˬ sha haiˬ ve awˬ ceuˬ maˇ te. (Yaˍkoˆ 1:13 gʼaw sheˍ.) Bon liˇ teˇ hpaˍ maˍ yaꞈ ve pa taw, chaw yaˇ Gʼuiˬ sha htaꞈ haꞈ tuˬ haˍ ve yoˬ.
2. Maˇ heˆ heˆ ve bon liˇ te ve hkʼaw Gʼuiˬ sha ve awˬ meh htaꞈ hkʼaˬ hkʼe te luˬ piˇ ve le?
Maˇ heˆ heˆ ve bon liˇ Gʼuiˬ sha htaꞈ maˇ henˇ yuˬ, yawˇ hui chaw yaˇ htaꞈ maˇ daꞈ ve awˬ ceuˬ te piˇ ve yoˬ. Liꞈ hpu hkʼaw kʼoˆ laˇ ve, ‘yawˇ hui ve venˇ baˆ teˇ hpaˍ lehˬ mvuhˇ naw ma htaꞈ dawꞈ htaˇ hkʼa gaˬ maˇ jaˇ.’ (Hpeuꞈ maˍ ve 18:5) Ponˬ laˬ ve laiˉ ha hkʼawꞈ hkʼaw bon liˇ teˇ hpaˍ hpaˍ mvuhˇ miˬ uˉ peunˍ ve htaꞈ caˉ daꞈ ve, maꞈ bawˆ ve htaꞈ awˬ gʼaˇ piˇ ve, leh chaw yaˇ maˇ maˇ suh tuˬ te piˇ ve yoˬ. Bon liˇ awˬ hoˉ teˇ gʼaˇ gʼaˇ kʼo, paw sha gaˇ leh awˬ moˍ yaˇ geh hpu tanˇ gʼaˇ hteꞈ lawˬ ve yoˬ. Chi hkʼe te ve lehˬ yawˇ hui Gʼuiˬ sha htaꞈ maˇ shiˍ ve tehꞈ hpeuꞈ maw laˇ ve, leh yawˇ hui htaꞈ Gʼuiˬ sha maˇ haꞈ yuˬ.—1 Yoˇhanˬ 4:8 gʼaw sheˍ.
3. Maˇ heˆ heˆ ve bon liˇ htaꞈ Gʼuiˬ sha hkʼaˬ hkʼe dawˇ ve le?
Maˇ heˆ heˆ ve bon liˇ te ve htaꞈ nawˬ maˇ dawˇ cawˇ ve kʼo, Yaˬhoˉvaˬ kaꞈ hkʼaˬ hkʼe dawˇ tuˬ le? Yaˬhoˉvaˬ chaw yaˇ htaꞈ haꞈ jaˇ. Yaꞈ hkʼaˇ, maˇ heˆ heˆ ve bon liˇ awˬ hoˉ maˍ leh awˬ moˍ yaˇ htaꞈ maˇ daꞈ ve te piˇ ve htaꞈ Yaˬhoˉvaˬ canˇ jaˇ ve yoˬ. Gʼuiˬ sha maˇ heˆ heˆ ve bon liˇ htaꞈ te luˬ tuˬ ka tiꞈ te taˍ leh “awˬ hkʼawꞈ nawˉ venˇ oˇ ve htaꞈ maˇ kʼawꞈ mawˬ” tuˬ yoˬ. (Hpeuꞈ maˍ ve 18:21) Maˇ maw kʼo, Gʼuiˬ sha lehˬ maˇ heˆ heˆ ve bon liˇ htaꞈ te luˬ tuˬ yoˬ.—Hpeuꞈ maˍ ve 18:8.
Henˇ shiˍ maˇ la tuˬ
Maˇ heˆ heˆ ve bon liˇ htaꞈ Yaˬhoˉvaˬ hkʼaˬ hkʼe dawˇ ve le, maˇ heˆ heˆ ve bon liˇ aˬ htoꞈ ma te ve le, leh aˬ htoꞈ ma pa taw ngaˬ hui Yaˬhoˉvaˬ htaꞈ caˉ daꞈ ve awˬ lawn henˇ shiˍ maˇ la tuˬ maˇ jehˇ cawˇ ve le, teˇ geh henˇ sheˍ.
4. Bon liˇ teˇ maˬ le le htaꞈ Gʼuiˬ sha haꞈ yuˬ ve maˇ heˆ
Chaw laiˉ gʼaˇ dawˇ ve, bon liˇ teˇ hpaˍ lehˬ Gʼuiˬ sha geh gaˬ tuˬ sheh kʼai laˇ ve yaꞈ kʼaw laiˉ caˆ htaꞈ shuˍ ve yoˬ. Yaꞈ hkʼaˇ, chi awˬ tehˬ laˇ? Maꞈhtehˍ liꞈ 7:13, 14 gʼaw leh na hkawˇ chi htaꞈ tawˇ yaw daꞈ sheˍ:
-
A shaꞈ teꞈ kuiˬ lo loꞈ˗e ve yaꞈ kʼaw htaꞈ caˉ daꞈ ve Liꞈ hpu hkʼaw hkʼaˬ hkʼe kʼoˆ laˇ ve le?
VDO hpaw leh na hkawˇ chi htaꞈ tawˇ yaw daꞈ sheˍ:
-
Gʼuiˬ sha bon liˇ teˇ maˬ le le htaꞈ haꞈ yuˬ ve tehꞈ Liꞈ hpu hkʼaw kʼoˆ laˇ˗aw laˇ?
5. Maˇ heˆ heˆ ve bon liˇ lehˬ haꞈ pehnˇ ve Gʼuiˬ sha htaꞈ maˇ henˇ yuˬ
Bon liˇ teˇ hpaˍ Gʼuiˬ sha ve awˬ lawn laiˉ lawn maˍ yaꞈ ve yoˬ. Haiˬ jaˇ ve teˇ lawn lehˬ chaw yaˇ maꞈ te daꞈ tuˬ awˬ gʼaˇ piˇ ve yoˬ. Chi ve awˬ lawn htaꞈ nyi tuˬ, VDO hpaw sheˍ. Peuˬ leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Maꞈ lonˉ nyiˇ pawˆ teˇ pawˆ htaˇ, bon yaˇ teˇ hpaˍ aˬ htoꞈ ma te ve le?
-
Yawˇ hui te ve awˬ ceuˬ htaꞈ nawˬ hkʼaˬ hkʼe dawˇ ve le?
Yoˇhanˬ liꞈ 13:34, 35 leh 17:16 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Nawˬ dawˇ kʼo, bon liˇ teˇ hpaˍ maꞈ bawˆ daꞈ ve Yaˬhoˉvaˬ mawˬ htaˇ, hkʼaˬ hkʼe dawˇ tuˬ le?
-
Maˇ heˆ heˆ ve bon liˇ maˇ daꞈ ve laiˉ ceuˬ te ve yoˬ. Yawˇ hui haꞈ pehnˇ ve Gʼuiˬ sha htaꞈ maˇ henˇ yuˬ ve tehꞈ nawˬ aˬ htoꞈ ma gʼa mawˬ ve le?
Maˇ heˆ heˆ ve bon liˇ lehˬ haꞈ pehnˇ ve Gʼuiˬ sha htaꞈ maˇ henˇ yuˬ
6. Gʼuiˬ sha lehˬ maˇ heˆ heˆ ve bon liˇ hkʼaw chehˇ taˍ ve chaw htaꞈ tawˆ la tcuh gaˇ ve
Hpeuꞈ maˍ ve liꞈ 18:4 gʼaw a leh na hkawˇ chi htaꞈ tawˇ yaw daꞈ sheˍ:
-
Maˇ heˆ heˆ ve bon liˇ hkʼaw chehˇ taˍ ve chaw htaꞈ Gʼuiˬ sha tawˆ la tcuh gaˇ ve tehꞈ nawˬ gʼa shiˍ htaˇ hkʼaˬ hkʼe dawˇ ve le?
7. Awˬ tehˬ awˬ na ve Gʼuiˬ sha htaꞈ shiˍ tuˬ kʼawꞈ caˉ leh henˇ sheˍ
Maˇ heˆ heˆ ve bon liˇ maˇ daꞈ ve awˬ ceuˬ te ve htaꞈ nawˬ mawˬ htaˇ, nawˬ Gʼuiˬ sha geh maˇ meuˆ daꞈ tuˬ te laˇ˗aw laˇ? Dawˇ nyi sheˍ. Yaˇ paˍ teˇ gʼaˇ awˬ pa beˆ maˍ piˇ ve htaꞈ maˇ na yuˬ ve yoˬ. Hkʼe te leh, yawˇ hkʼaˇ yawˇ teˇ kaˬ lo ca chehˇ˗e leh, maˇ daꞈ ve laiˉ ceuˬ te ve yoˬ. Yaˇ oˇ hkʼe te ve htaꞈ awˬ pa maˇ dawˇ cawˇ. Aˬ htoꞈ ma pa taw, yaˇ oˇ hkʼe te htaˇ awˬ pa htaꞈ venˇ baˆ maˇ taˍ cawˇ ve le?
-
Maˇ heˆ heˆ ve bon liˇ maˇ daꞈ ve awˬ ceuˬ te ve pa taw, Yaˬhoˉvaˬ ve awˬ lawn henˇ shiˍ tuˬ jehˇ leh yawˇ htaꞈ venˇ baˆ taˍ cawˇ˗aw laˇ?
Chaw teˇ hpaˍ kʼoˆ ve: “Bon liˇ teˇ maˬ le le daꞈ ve yoˬ. Chaw yaˇ daꞈ la tuˬ maˍ laˇ ve yoˬ.”
-
Nawˬ chi hkʼe dawˇ˗aw laˇ?
-
Bon liˇ teˇ hpaˍ daꞈ ve awˬ ceuˬ ceh tiˉ maˍ ve tehꞈ kʼoˆ ve htawˇ, aˬ htoꞈ ma pa taw Gʼuiˬ sha yawˇ hui htaꞈ maˇ haꞈ yuˬ piˇ ve le?
A yeˇ uiˍ ve awˬ lawn
Maˇ heˆ heˆ ve bon liˇ Gʼuiˬ sha ve awˬ meh htaꞈ te luˬ piˇ ve, yawˇ hui maˍ yaꞈ leh maˇ daꞈ ve laiˉ ceuˬ te ve yoˬ. Gʼuiˬ sha maˇ heˆ heˆ ve bon liˇ htaꞈ te luˬ piˇ tuˬ yoˬ.
Kʼawꞈ gʼaꞈ na ve
-
Maˇ heˆ heˆ ve bon liˇ maˍ yaꞈ leh maˇ daꞈ ve laiˉ ceuˬ te ve htaꞈ nawˬ mawˬ htaˇ, hkʼaˬ hkʼe dawˇ ve le?
-
Maˇ heˆ heˆ ve bon liˇ htaꞈ Yaˬhoˉvaˬ hkʼaˬ hkʼe dawˇ ve le?
-
Maˇ heˆ heˆ ve bon liˇ htaꞈ Yaˬhoˉvaˬ aˬ htoꞈ ma te piˇ tuˬ le?
Kʼawꞈ caˉ nyi gʼa ve
Maˇ heˆ heˆ ve bon liˇ htaꞈ Gʼuiˬ sha maˇ haꞈ yuˬ ve 2 hkʼaˇ cawˬ ve htaꞈ henˇ sheˍ.
“Bon liˇ teˇ maˬ le le shuˍ daꞈ˗aw laˇ? Gʼuiˬ sha bon liˇ teˇ maˬ le le htaꞈ haꞈ yuˬ˗aw laˇ?” (Vehˆsaiˉ hkʼaw ve awˬ lawn)
Aˬ htoꞈ ma pa taw Yaˬhoˉvaˬ ngaˬ hui htaꞈ awˬ nu ve chaw geh yawˇ htaꞈ oˉ kʼoˍ pui tcuh gaˇ ve le?
“Bon liˇ awˬ moˍ yaˇ hpehꞈ tuˬ loˍ˗aw laˇ?” (Vehˆsaiˉ hkʼaw ve awˬ lawn)
Caˬbuˉ awˬ hoˉ teˇ gʼaˇ yawˇ oˉ kʼoˍ pui jaw ve bon liˇ htaꞈ nyi ma maˇ sha. Yaꞈ hkʼaˇ, awˬ lawn chi yawˇ Gʼuiˬ sha htaꞈ caˉ daꞈ ve awˬ tehˬ ve awˬ lawn shiˍ gaˇ ve htaꞈ maˇ jehˇ tcuh.
Gʼuiˬ sha chaw yaˇ htaꞈ a yeˇ maˇ te leh haiˬ jaˇ ve Gʼuiˬ sha hpehꞈ ve tehꞈ bon liˇ teˇ hpaˍ maˍ ve yoˬ. Yawˇ hui maˍ yaꞈ ve 3 hkʼaˇ htaꞈ nyi sheˍ.
a Hpeuꞈ maˍ ve liꞈ hkʼaw kʼoˆ ve, maˇ heˆ heˆ ve bon liˇ lehˬ Uiˍ ve Baˍbuˍlonˍ venˇ meh ve yaˇ miˇ teˇ gʼaˇ htaꞈ shuˍ ve yoˬ. Aˬ htoꞈ ma te chi hkʼe kʼoˆ ve htaꞈ shiˍ tuˬ, Kʼoˆ maˍ ve awˬ lawn 1 htaꞈ nyi sheˍ.
You May Also Like
NGAˬ HUI HTAꞈ CAˉ DAꞈ VE AWˬ LAWN
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ ve hk’aˬ hk’e te henˇ ve le?
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ tuˬ nawˬ Liꞈ hpu hk’aˬ ve teˇ maˬ yehˇ ve kaꞈ hpehꞈ ve yoˬ. Awˬ chawˇ maˇ heˆ leh yehˬ k’a hk’aw ve chaw htaꞈ Liꞈ hpu teˇ geh henˇ tuˬ jehˬ piˇ kaꞈ g’a ve yoˬ.
