Awˬ lawn 14
Ngaˬ hui oˉ kʼoˍ pui ve htaꞈ Gʼuiˬ sha haꞈ yuˬ laˇ tuˬ hkʼaˬ hkʼe gʼa te tuˬ le?
Gʼuiˬ sha bon liˇ teˇ maˬ le le htaꞈ haꞈ yuˬ ve maˇ heˆ tehꞈ, peuˬ taˉ ve teˇ lawn hkʼaw gʼa henˇ kʼai Peuˬ˗oˬ. Yaꞈ hkʼaˇ, ngaˬ hui Gʼuiˬ sha nyi hkʼaˇ suh ve hkʼe oˉ kʼoˍ pui gʼa ve yoˬ. Hkʼe kʼo, Gʼuiˬ sha haꞈ yuˬ ve “oˉ kʼoˍ pui ve” lehˬ hkʼaˬ hkʼe gʼa te ve le? (Yaˍkoˆ 1:27) Liꞈ hpu hkʼaw kʼoˆ laˇ ve htaꞈ ngaˬ hui teˇ geh nyi sheˍ.
1. Ngaˬ hui oˉ kʼoˍ pui ve htaꞈ Gʼuiˬ sha haꞈ yuˬ laˇ ve tehꞈ hkʼaˬ hkʼe te shiˍ gʼa ve le?
Awˬ lawn chi Liꞈ hpu hkʼaw shiˍ gʼa ve yoˬ. Yeˍsuˆ Gʼuiˬ sha htaꞈ kʼoˆ piˇ ve, “nawˬ ve tawˇ hkawˇ lehˬ hteˇ ve cawˇ ve teˇ ceuˬ hpehꞈ ve yoˬ.” (Yoˇhanˬ 17:17) Bon liˇ teˇ hpaˍ hpaˍ Liꞈ hpu hkʼaw cawˬ ve Gʼuiˬ sha ve tawˇ hkawˇ htaꞈ maˇ maˍ. Yawˇ hui ve chaw liˇ vaˇ liˇ leh yawˇ hui ve dawˇ hkʼaˇ htaꞈ maˍ ve yoˬ. Yaꞈ hkʼaˇ, Yaˬhoˉvaˬ lehˬ ‘yawˇ piˇ taˍ ve tawˇ hkawˇ teˇ hpaˍ htaꞈ baˬ taˉ’ ve chaw htaꞈ yawˇ nyi hkʼaˇ maˇ suh ve yoˬ. (Maˍkuˆ 7:9 gʼaw sheˍ.) Liꞈ hpu hkʼaw maˍ laˇ ve htaꞈ ngaˬ hui gʼaꞈ te ve kʼo, Yaˬhoˉvaˬ nyi hkʼaˇ suh tuˬ yoˬ.
2. Yaˬhoˉvaˬ htaꞈ ngaˬ hui oˉ kʼoˍ pui tuˬ hkʼaˬ hkʼe gʼa te ve le?
Yaˬhoˉvaˬ ngaˬ hui htaꞈ hpanˍ shehˍ hpaˇ hpehꞈ ve pa taw, yawˇ teˇ gʼaˇ htaꞈ ceh tiˉ ngaˬ hui oˉ kʼoˍ pui cawˇ ve yoˬ. (Hpeuꞈ maˍ ve 4:11) Chi kʼoˆ gaˇ ve lehˬ, ngaˬ hui yawˇ htaꞈ ceh tiˉ gʼa haꞈ leh yawˇ htaꞈ ceh tiˉ oˉ kʼoˍ gʼa pui ve yoˬ. Ngaˬ hui yawˇ htaꞈ oˉ kʼoˍ pui tuˬ shaˉ hoꞈ maˇ gʼa yehˇ.—Iˉsaˍyaˆ 42:8 gʼaw sheˍ.
Yaˬhoˉvaˬ haꞈ yuˬ laˇ tuˬ ngaˬ hui oˉ kʼoˍ pui ve lehˬ gʼa “daꞈ kehˬ ve” yoˬ. (Roˉmaꞈ 12:1) Chi kʼoˆ gaˇ ve lehˬ ngaˬ hui Gʼuiˬ sha ve awˬ liˇ awˬ hkʼaˇ htaꞈ gʼa gʼaꞈ te ve yoˬ. Tawˇ pa haˉ te kʼo, Yaˬhoˉvaˬ htaꞈ haꞈ ve chaw lehˬ yehˬ kʼa ca htaˇ, Gʼuiˬ sha ve awˬ liˇ tawˇ hkawˇ awˬ hkʼaˇ suh gʼa gʼaꞈ te ve yoˬ. Chi hkʼoˆ kaꞈ, yawˇ hui shuˉ maˇ dawˬ, maˉ laˇ maˇ behˇ, tzuhˬ maˇ dawˬ bvuhˆ, leh awˬ yeꞈ caˆ puiˉ ve naˆ tsuhˇ maˇ yehˇ. a
3. Aˬ htoꞈ ma pa taw awˬ nu ve chaw hui geh ngaˬ hui Yaˬhoˉvaˬ htaꞈ oˉ kʼoˍ pui cawˇ ve le?
Teˇ shinˉ le le ngaˬ hui hpawnˬ daꞈ ve cawˬ ve yoˬ. Leh ngaˬ hui kʼai ve kʼo, awˬ nu ve chaw geh “Gʼuiˬ sha htaꞈ . . . hpawnˬ daꞈ kuiˬ hkʼaw lo,” ngaˬ hui gʼa chiˇ mvuh tuˬ yoˬ. (Chiˇ mvuh ve 111:1, 2) Hpawnˬ daꞈ kuiˬ lo ngaˬ hui Gʼuiˬ sha htaꞈ chiˇ mvuh tuˬ, awˬ hkʼaˇ teˇ hkʼaˇ lehˬ kʼa muiˬ hkawˇ kʼa ve yoˬ. (Chiˇ mvuh ve 104:33 gʼaw sheˍ.) Yaˬhoˉvaˬ ngaˬ hui htaꞈ haꞈ ve pa taw, ngaˬ hui htaꞈ hpawnˬ daꞈ kuiˬ lo kʼai tcuh gaˇ ve yoˬ. Leh yawˇ shiˍ ve hpawnˬ daꞈ ve lehˬ ngaˬ hui co co taiˍ taiˍ ha lehˬ gʼa tuˬ ga laˇ gʼa ve yoˬ. Ngaˬ hui hpawnˬ daꞈ kuiˬ lo kʼai htaˇ, teˇ gʼaˇ leh teˇ gʼaˇ awˬ gʼaˇ piˇ daꞈ gʼa ve yoˬ.
Henˇ shiˍ maˇ la tuˬ
Aˬ htoꞈ ma pa taw ngaˬ hui Yaˬhoˉvaˬ htaꞈ oˉ kʼoˍ pui htaˇ, yawˇ ngaˬ hui htaꞈ shaˉ hoꞈ maˇ yehˇ tcuh laˇ ve le, leh ngaˬ hui Yaˬhoˉvaˬ htaꞈ hkʼaˬ hkʼe te chiˇ mvuh piˇ gʼa tuˬ le, teˇ geh henˇ sheˍ.
4. Aˬ htoꞈ ma pa taw ngaˬ hui Gʼuiˬ sha htaꞈ oˉ kʼoˍ pui htaˇ shaˉ hoꞈ maˇ yehˇ cawˇ ve le?
Ngaˬ hui shaˉ hoꞈ yehˇ ve kʼo, Gʼuiˬ sha nyi hkʼaˇ maˇ suh ve tehꞈ hkʼaˬ hkʼe te shiˍ ve le? VDO hpaw leh na hkawˇ chi htaꞈ tawˇ yaw daꞈ sheˍ:
-
Aˬ sho˗eˬ htaˇ Gʼuiˬ sha ve chaw teˇ hpaˍ Gʼuiˬ sha htaꞈ oˉ kʼoˍ pui tuˬ shaˉ hoꞈ yehˇ ve pa taw, aˬ htoꞈ ma hpehꞈ la ve le?
Chaw teˇ hpaˍ dawˇ ve, Gʼuiˬ sha htaꞈ meuˆ daꞈ maˇ la tuˬ shaˉ hoꞈ yehˇ leh oˉ kʼoˍ pui ve yoˬ. Nawˬ dawˇ kʼo, chi hkʼe te ve lehˬ ga laˇ gʼa˗aw laˇ? Tawˆ kʼai ve liꞈ 20:4-6 leh Chiˇ mvuh ve liꞈ 106:35, 36 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Chaw yaˇ yehˇ leh oˉ kʼoˍ pui chehˇ ve htaꞈ nawˬ gʼa mawˬ ve aˬ htoꞈ ma cawˬ ve le?
-
Shaˉ hoꞈ yehˇ leh oˉ kʼoˍ pui ve htaꞈ Yaˬhoˉvaˬ hkʼaˬ hkʼe dawˇ ve le?
-
Shaˉ hoꞈ yehˇ leh oˉ kʼoˍ pui ve htaꞈ nawˬ hkʼaˬ hkʼe dawˇ ve le?
5. Ngaˬ hui Yaˬhoˉvaˬ htaꞈ ceh tiˉ oˉ kʼoˍ pui ve kʼo, maˇ heˆ heˆ ve yonˍ hkʼaˇ htaꞈ ponˬ laˇ ve
Yaˬhoˉvaˬ htaꞈ cawˇ ve awˬ hkʼaw lo oˉ kʼoˍ pui ve kʼo, maˇ heˆ heˆ ve yonˍ hkʼaˇ htaꞈ hkʼaˬ hkʼe ponˬ laˇ gʼa ve le? VDO hpaw sheˍ.
Chiˇ mvuh ve liꞈ 91:14 gʼaw leh na hkawˇ chi htaꞈ tawˇ yaw daꞈ sheˍ:
-
Ngaˬ hui Yaˬhoˉvaˬ htaꞈ haꞈ leh yawˇ htaꞈ ceh tiˉ oˉ kʼoˍ pui ve kʼo, yawˇ ngaˬ hui awˬ pon aˬ htoꞈ ma ka tiꞈ te taˍ laˇ ve le?
6. Hkriꞈ yaˇ awˬ moˍ hpawnˬ daꞈ ve hkʼaw ngaˬ hui Yaˬhoˉvaˬ htaꞈ oˉ kʼoˍ pui ve
Hkriꞈ yaˇ awˬ moˍ hpawnˬ daꞈ ve hkʼaw ngaˬ hui Yaˬhoˉvaˬ htaꞈ chiˇ mvuh tuˬ kʼa muiˬ hkawˇ kʼa ve yoˬ. Leh teˇ gʼaˇ leh teˇ gʼaˇ awˬ gʼaˇ piˇ daꞈ tuˬ laꞈ sheh chiˇ leh hkʼawꞈ ve yoˬ. Chiˇ mvuh ve liꞈ 22:22 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Hpawnˬ daꞈ kuiˬ lo shu laꞈ sheh chiˇ leh hkʼawꞈ laˇ ve htaꞈ nawˬ dawˇ cawˇ˗aw laˇ?
-
Hpawnˬ daꞈ kuiˬ hkʼaw nawˬ laꞈ sheh chiˇ leh hkʼawꞈ tuˬ gu gaˇ˗aw laˇ?
7. Ngaˬ hui henˇ taˍ ve awˬ ceuˬ shu htaꞈ kʼoˆ piˇ ve kʼo, Yaˬhoˉvaˬ ha lehˬ jaˇ
Ngaˬ hui Liꞈ hpu hkʼaw gʼa henˇ taˍ ve awˬ ceuˬ shu htaꞈ kʼoˆ piˇ gʼa tuˬ laiˉ hkʼaˇ cawˬ ve yoˬ. Chiˇ mvuh ve liꞈ 9:1 leh 34:1 gʼaw leh na hkawˇ chi htaꞈ tawˇ yaw daꞈ sheˍ:
-
Nawˬ Liꞈ hpu hkʼaw gʼa henˇ taˍ ve shu htaꞈ kʼoˆ piˇ gaˇ ve hkʼaˬ ve teˇ lawn cawˬ ve le?
Chaw teˇ hpaˍ kʼoˆ ve: “Ngaˬ hui Gʼuiˬ sha htaꞈ yonˍ ve ceh tiˉ kaꞈ lawꞈ˗oˬ. Oˉ kʼoˍ hkʼaˬ hkʼe te pui kaꞈ hpehꞈ ve yoˬ.”
-
Nawˬ hkʼaˬ hkʼe dawˇ ve le?
A yeˇ uiˍ ve awˬ lawn
Ngaˬ hui Gʼuiˬ sha htaꞈ ha lehˬ tuˬ te piˇ gʼa ve lehˬ yawˇ htaꞈ ceh tiˉ ngaˬ hui oˉ kʼoˍ pui ve, Hkriꞈ yaˇ awˬ moˍ hpawnˬ daꞈ ve hkʼaw yawˇ htaꞈ chiˇ mvuh ve, leh gʼa henˇ taˍ ve awˬ lawn shu htaꞈ kʼoˆ piˇ ve yoˬ.
Kʼawꞈ gʼaꞈ na ve
-
Gʼuiˬ sha htaꞈ oˉ kʼoˍ pui tuˬ awˬ hkʼaˇ yawˇ ngaˬ hui htaꞈ hkʼaˬ kaˬ lo kʼoˆ laˇ taˍ ve le?
-
Aˬ htoꞈ ma pa taw ngaˬ hui Yaˬhoˉvaˬ htaꞈ ceh tiˉ oˉ kʼoˍ pui cawˇ ve le?
-
Aˬ htoꞈ ma pa taw awˬ nu ve chaw hui geh ngaˬ hui Yaˬhoˉvaˬ htaꞈ oˉ kʼoˍ pui cawˇ ve le?
Kʼawꞈ caˉ nyi gʼa ve
Yaˇ miˇ teˇ gʼaˇ shaˉ hoꞈ htaꞈ oˉ kʼoˍ maˇ kʼawꞈ pui˗o. Nawˬ yawˇ ve awˬ lawn htaꞈ “Ngaˬ shaˉ hoꞈ ve awˬ ceˬ maˇ kʼawꞈ te˗o” tehꞈ kʼoˆ ve hkʼaw gʼaw nyi sheˍ.
“Liꞈ hpu a shaꞈ htaꞈ pa gʼa ve” (Shaw nyi kuiˬ Taꞈ yehˬ 2011 hkʼawꞈ ha pa 7 maˬ 1 nyi)
Hpawnˬ daꞈ kuiˬ hkʼaw nawˬ laꞈ sheh chiˇ leh hkʼawꞈ tuˬ aˬ htoꞈ ma teˇ ceuˬ ga laˇ gʼa ve le, gʼaw nyi sheˍ.
“Hpawnˬ daꞈ kuiˬ lo Yaˬhoˉvaˬ htaꞈ chiˇ mvuh˗o” (Shaw nyi kuiˬ Taꞈ yehˬ 2019 hkʼawꞈ ha pa 1 maˬ)
Hawˉ hkʼaˆ teˇ gʼaˇ hpawnˬ daꞈ kuiˬ lo kʼai ve maˇ sha ve htawˇ, yawˇ chi hkʼe te ve htaꞈ aˬ htoꞈ ma awˬ bon gʼa ve le, nyi sheˍ.
Chaw laiˉ gʼaˇ laꞈ ka htaꞈ Hkriꞈ yaˇ ve awˬ heˆ tehꞈ shawˍ ve yoˬ. Yaꞈ hkʼaˇ, ngaˬ hui laꞈ ka htaꞈ yehˇ leh Gʼuiˬ sha htaꞈ oˉ kʼoˍ pui hpehꞈ˗aw laˇ?
a Awˬ lawn chi htaꞈ caˉ daꞈ ve awˬ nu ve teˇ lawn hkʼaw ngaˬ hui tawˇ yaw daꞈ tuˬ yoˬ.
You May Also Like
NGAˬ HUI HTAꞈ CAˉ DAꞈ VE AWˬ LAWN
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ ve hk’aˬ hk’e te henˇ ve le?
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ tuˬ nawˬ Liꞈ hpu hk’aˬ ve teˇ maˬ yehˇ ve kaꞈ hpehꞈ ve yoˬ. Awˬ chawˇ maˇ heˆ leh yehˬ k’a hk’aw ve chaw htaꞈ Liꞈ hpu teˇ geh henˇ tuˬ jehˬ piˇ kaꞈ g’a ve yoˬ.
