Awˬ lawn 15
Yeˍsuˆ lehˬ a shu le?
Yeˍsuˆ lehˬ miˬ guiˬ hkʼoˆ awˬ meh bvuhˬ jaˇ ve chaw teˇ gʼaˇ hpehꞈ ve yoˬ. Chaw laiˉ gʼaˇ Yeˍsuˆ ve awˬ meh htaꞈ shiˍ ve htawˇ, yawˇ ve awˬ lawn hkʼa dehꞈ maˇ shiˍ. Liꞈ hpu hkʼaw Yeˍsuˆ htaꞈ caˉ daꞈ ve awˬ lawn hkʼaˬ hkʼe kʼoˆ laˇ ve le?
1. Yeˍsuˆ lehˬ a shu le?
Yeˍsuˆ lehˬ mvuhˇ naw ma hkʼoˆ chehˇ leh kanˇ paˆ uiˍ jaˇ ve mvuhˇ naw ma tcuh yaˇ hpehꞈ ve yoˬ. Yaˬhoˉvaˬ awˬ nu ve awˬ ceuˬ maˇ hpanˍ sheˍ htaˇ Yeˍsuˆ htaꞈ awˉ lawˉ hpanˍ ve pa taw, yawˇ htaꞈ “hpanˍ taˍ ve hkʼa peu˗eˬ awˬ hkʼaw lo Yaˇ kaoˬ hpehꞈ ve” tehꞈ kʼoˆ ve yoˬ. (Kawˇlawˇsehˇ 1:15) Liꞈ hpu hkʼaw kʼoˆ ve, Yeˍsuˆ lehˬ Gʼuiˬ sha ve “Yaˇ hpu tiˍ” hpehꞈ ve yoˬ. Awˬ lawn kʼo, yawˇ htaꞈ teˇ gʼaˇ ceh tiˉ Yaˬhoˉvaˬ yawˇ hkʼaˇ yawˇ hpanˍ taˍ ve yoˬ. (Yoˇhanˬ 3:16) Yeˍsuˆ yawˇ ve Awˬ pa Yaˬhoˉvaˬ awˬ paˇ lo chehˇ leh awˬ ceuˬ hkʼa peu˗eˬ hpanˍ tuˬ ga piˇ ve yoˬ. (Tawˇ naˉ ve 8:30 gʼaw sheˍ.) Yeˍsuˆ lehˬ Yaˬhoˉvaˬ htaꞈ meuˆ daꞈ chehˇ leh ha lehˬ ve yoˬ. Yawˇ lehˬ Gʼuiˬ sha ve tawˇ hkawˇ awˬ tan kʼoˆ piˇ shehˍ hpaˇ hpehꞈ leh yawˇ htaꞈ “Tawˇ hkawˇ” tehꞈ kʼoˆ taˍ ve yoˬ.—Yoˇhanˬ 1:14.
2. Aˬ htoꞈ ma pa taw Yeˍsuˆ miˬ guiˬ hkʼoˆ laˬ ve le?
Ponˬ laˬ ve 2,000 hkʼawꞈ hpaˆ htaˇ, Yaˬhoˉvaˬ yawˇ ve daꞈ ve kehˬ ve awˬ ha hpu yehˇ leh anˇ tuˬ te ve yoˬ. Yawˇ Yeˍsuˆ ve a shaꞈ miˬ guiˬ hkʼoˆ jiˆ la piˇ leh daꞈ kehˬ ve yaˇ miˇ haˉ Maˍriˆ meh ve geh ca hu la tcuh ve yoˬ. Chi htaꞈ pa taw, yawˇ chaw yaˇ hkʼa shuˍ paw la ve yoˬ. (Luˉkaꞈ 1:34, 35 gʼaw sheˍ.) Gʼuiˬ sha ka tiꞈ te taˍ ve hkʼe, Yeˍsuˆ miˬ guiˬ hkʼoˆ paw la leh Meˍsiˉyaꞈ kaꞈ, Hkriꞈ kaꞈ hpehꞈ ve yoˬ. Yawˇ chaw yaˇ ve a shaꞈ htaꞈ ponˬ piˇ tuˬ laˬ ve yoˬ. a Meˍsiˉyaꞈ htaꞈ caˉ daꞈ ve tcuh kaˍ paˍ ve tawˇ hkawˇ hkʼa peu˗eˬ Yeˍsuˆ geh biˇ la ve yoˬ. Chi htaꞈ pa taw, Yeˍsuˆ htaꞈ “Hkriꞈ tehꞈ kʼoˆ ve Gʼuiˬ sha ve Yaˇ hpu hpehꞈ ve” tehꞈ chaw laiˉ gʼaˇ shiˍ la ve yoˬ.—Maꞈhtehˍ 16:16.
3. Chi teˇ hkui Yeˍsuˆ hkʼaˬ kaˬ lo chehˇ taˍ ve le?
Yeˍsuˆ suh peuˬ hkʼawꞈ nawˉ Gʼuiˬ sha yawˇ htaꞈ kʼawꞈ teꞈ tu la piˇ leh mvuhˇ naw ma tcuh yaˇ kʼawꞈ hpehꞈ tcuh ve yoˬ. Yawˇ mvuhˇ naw ma hkʼoˆ kʼoꞈ˗e htaˇ, “Gʼuiˬ sha lehˬ yawˇ htaꞈ hkʼa peu˗eˬ awˬ hkʼoˆ yuˬ uiˍ yuˬ mvuh piˇ ve yoˬ.” (Hpiˇliˇpiˆ 2:9) Chi teˇ hkui Yeˍsuˆ kanˇ paˆ uiˍ jaˇ ve yoˬ. Yaˬhoˉvaˬ teˇ gʼaˇ ceh tiˉ Yeˍsuˆ aꞈ kehˉ kanˇ paˆ uiˍ ve yoˬ.
Henˇ shiˍ maˇ la tuˬ
Yeˍsuˆ a shu hpehꞈ ve le, leh aˬ htoꞈ ma pa taw yawˇ htaꞈ henˇ shiˍ maˇ la tuˬ a yeˇ uiˍ ve le, teˇ geh henˇ sheˍ.
4. Yeˍsuˆ lehˬ Gʼuiˬ sha hpehꞈ ve maˇ heˆ
Liꞈ hpu hkʼaw kʼoˆ laˇ ve Yeˍsuˆ kanˇ paˆ uiˍ ve mvuhˇ naw ma tcuh yaˇ hpehꞈ ve htawˇ, yawˇ yawˇ ve Awˬ pa Yaˬhoˉvaˬ Gʼuiˬ sha ve kanˇ paˆ awˬ hawˉ lo chehˇ taˍ ve yoˬ. Aˬ htoꞈ ma pa taw chi hkʼe kʼoˆ ve le? VDO hpaw leh Yeˍsuˆ lehˬ, kanˇ paˆ uiˍ jaˇ ve Gʼuiˬ sha hpehꞈ ve maˇ heˆ tehꞈ Liꞈ hpu hkʼaw aˬ htoꞈ ma kʼoˆ laˇ ve htaꞈ nyi sheˍ.
Liꞈ hpu awˬ tawn chi teˇ hpaˍ Yaˬhoˉvaˬ leh Yeˍsuˆ hkʼaˬ hkʼe te peun daꞈ ve ngaˬ hui shiˍ tuˬ ga laˇ ve yoˬ. Liꞈ hpu awˬ tawn chi teˇ hpaˍ teˇ tawn peuˬ teˇ tawn gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
Luˉkaꞈ liꞈ 1:30-32 gʼaw sheˍ.
-
Mvuhˇ naw ma tcuh yaˇ kʼoˆ ve htaꞈ nyi˗a kʼo, Yeˍsuˆ lehˬ “uiˍ jaˇ mvuh jaˇ ve Awˬ shehˍ hpaˇ” hpehꞈ˗aw laˇ?
Maꞈhtehˍ liꞈ 3:16, 17 gʼaw sheˍ.
-
Yeˍsuˆ Baˆtiˆsaˬ haꞈ yuˬ htaˇ mvuhˇ naw ma hkʼoˆ lo awˬ hkawˇ bvuhˬ la leh hkʼaˬ hkʼe kʼoˆ ve le?
-
Nawˬ dawˇ kʼo, awˬ hkawˇ oˇ ve lehˬ a shu ve awˬ hkawˇ hpehꞈ ve le?
Yoˇhanˬ liꞈ 14:28 gʼaw sheˍ.
-
Nawˬ dawˇ kʼo, awˬ pa leh awˬ yaˇ a shu teˇ gʼaˇ a shaꞈ maˇ leh kanˇ paˆ uiˍ ve le?
-
Yeˍsuˆ Yaˬhoˉvaˬ htaꞈ A pa˗oˬ tehꞈ kuˬ ve lehˬ, ngaˬ hui htaꞈ aˬ htoꞈ ma hpeuꞈ maw laˇ ve le?
Yoˇhanˬ liꞈ 12:49 gʼaw sheˍ.
-
Yeˍsuˆ kʼoˆ ve, yawˇ leh yawˇ ve Awˬ pa teˇ gʼaˇ tiˉ hpehꞈ˗aw laˇ? Nawˬ hkʼaˬ hkʼe dawˇ ve le?
5. Yeˍsuˆ Meˍsiˉyaꞈ hpehꞈ ve tehꞈ ngaˬ hui hkʼaˬ hkʼe te shiˍ gʼa ve le?
Liꞈ hpu hkʼaw tcuh kaˍ paˍ ve tawˇ hkawˇ laiˉ tawn Meˍsiˉyaꞈ ve awˬ lawn kʼoˆ taˍ ve yoˬ. Yawˇ htaꞈ Gʼuiˬ sha leuˆ yuˬ leh chaw yaˇ htaꞈ ponˬ laˇ tcuh ve yoˬ. Tcuh kaˍ paˍ ve tawˇ hkawˇ chi teˇ hpaˍ a shu Meˍsiˉyaꞈ hpehꞈ ve tehꞈ shiˍ tuˬ ga laˇ ve yoˬ. VDO hpaw leh Yeˍsuˆ miˬ guiˬ hkʼoˆ chehˇ htaˇ, tcuh kaˍ paˍ ve tawˇ hkawˇ teˇ hpaˍ yawˇ geh awˬ tehˬ hpehꞈ la ve htaꞈ nyi sheˍ.
Tcuh kaˍ paˍ ve tawˇ hkawˇ gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
Meˍsiˉyaꞈ hkʼaˬ kaˬ lo paw ve shiˍ tuˬ, Miˆhkaˍ liꞈ 5:2 gʼaw sheˍ. b
-
Tcuh kaˍ paˍ ve tawˇ hkawˇ chi Yeˍsuˆ geh awˬ tehˬ biˇ la˗aw laˇ?—Maꞈhtehˍ 2:1.
Meˍsiˉyaꞈ suh˗e ve htaꞈ caˉ daꞈ ve tcuh kaˍ paˍ ve tawˇ hkawˇ hkʼaˬ hkʼe kʼoˆ laˇ ve htaꞈ shiˍ tuˬ, Chiˇ mvuh ve liꞈ 34:20 leh Zaˍhkaˍriˆ liꞈ 12:10 gʼaw sheˍ.
-
Tcuh kaˍ paˍ ve tawˇ hkawˇ chi awˬ tehˬ biˇ la˗aw laˇ?—Yoˇhanˬ 19:33-37.
-
Nawˬ dawˇ kʼo, Yeˍsuˆ yawˇ ve awˬ to htaꞈ tcuh kaˍ paˍ ve tawˇ hkawˇ chi biˇ la tuˬ yawˇ hkʼaˇ yawˇ te gʼa˗aw laˇ?
-
Awˬ lawn chi henˇ peuˬ hkʼawꞈ nawˉ, nawˬ dawˇ kʼo Yeˍsuˆ a shu hpehꞈ ve le?
6. Ngaˬ hui Yeˍsuˆ ve awˬ lawn henˇ shiˍ la htaˇ aˬ htoꞈ ma awˬ bon gʼa tuˬ le?
Liꞈ hpu hkʼaw kʼoˆ laˇ ve, ngaˬ hui Yeˍsuˆ ve awˬ lawn shiˍ tuˬ, leh Gʼuiˬ sha Yeˍsuˆ htaꞈ aˬ htoꞈ ma te tcuh gaˇ ve tehꞈ shiˍ tuˬ a yeˇ uiˍ jaˇ ve yoˬ. Yoˇhanˬ liꞈ 14:6 leh 17:3 gʼaw leh na hkawˇ chi htaꞈ tawˇ yaw daꞈ sheˍ:
-
Aˬ htoꞈ ma pa taw Yeˍsuˆ htaꞈ caˉ daꞈ ve awˬ lawn henˇ ve lehˬ a yeˇ uiˍ ve le?
Chaw yaˇ Gʼuiˬ sha geh awˬ chawˇ te gʼa tuˬ Yeˍsuˆ yaꞈ kʼaw hpaw laˇ ve yoˬ. Yawˇ Yaˬhoˉvaˬ htaꞈ caˉ daꞈ ve hteˇ ve cawˇ ve awˬ lawn maˍ laˇ ve, leh yawˇ htaꞈ pa taw ngaˬ hui co co taiˍ taiˍ a shaꞈ cawˬ gʼa ve
Chaw teˇ hpaˍ kʼoˆ ve: “Yaˬhoˉvaˬ awˬ moˍ lehˬ Yeˍsuˆ htaꞈ maˇ yonˍ.”
-
Nawˬ hkʼaˬ hkʼe hkʼawꞈ piˇ tuˬ le?
A yeˇ uiˍ ve awˬ lawn
Yeˍsuˆ lehˬ kanˇ paˆ uiˍ jaˇ ve mvuhˇ naw ma tcuh yaˇ hpehꞈ ve yoˬ. Yawˇ Gʼuiˬ sha ve Yaˇ hpehꞈ leh Meˍsiˉyaꞈ kaꞈ hpehꞈ ve yoˬ.
Kʼawꞈ gʼaꞈ na ve
-
Aˬ htoꞈ ma pa taw Yeˍsuˆ htaꞈ “hpanˍ taˍ ve hkʼa peu˗eˬ awˬ hkʼaw lo Yaˇ kaoˬ” hpehꞈ ve tehꞈ kʼoˆ ve le?
-
Yeˍsuˆ miˬ guiˬ hkʼoˆ maˇ yaꞈ la sheˍ htaˇ, aˬ htoꞈ ma te ve le?
-
Yeˍsuˆ lehˬ Meˍsiˉyaꞈ hpehꞈ ve tehꞈ ngaˬ hui hkʼaˬ hkʼe te shiˍ gʼa ve le?
Kʼawꞈ caˉ nyi gʼa ve
Aˬ htoꞈ ma pa taw Yeˍsuˆ Meˍsiˉyaꞈ hpehꞈ ve tehꞈ ngaˬ hui shiˍ gʼa ve le?
Liꞈ hpu hkʼaw kʼoˆ laˇ ve, Gʼuiˬ sha lehˬ Yeˍsuˆ ve Awˬ pa hpehꞈ ve yoˬ. Chi hkʼaˬ hkʼe kʼoˆ gaˇ ve le?
“Aˬ htoꞈ ma pa taw Yeˍsuˆ htaꞈ Gʼuiˬ sha ve Yaˇ tehꞈ kuˬ ve le?” (Vehˆsaiˉ hkʼaw ve awˬ lawn)
Aˬ htoꞈ ma pa taw Gʼuiˬ sha shehˆ gʼaˇ teˇ to tiˉ hpehꞈ ve awˬ lawn maˍ ve lehˬ Liꞈ hpu hkʼaw laˬ ve maˇ heˆ tehꞈ kʼoˆ gʼa ve le?
“Yeˍsuˆ lehˬ Gʼuiˬ sha hpehꞈ ve laˇ?” (Shaw nyi kuiˬ Taꞈ yehˬ 2009 hkʼawꞈ ha pa 4 maˬ 1 nyi)
Yaˇ miˇ teˇ gʼaˇ Liꞈ hpu hkʼaw Yeˍsuˆ htaꞈ caˉ daꞈ ve awˬ tehˬ ve awˬ lawn shiˍ la htaˇ, yawˇ ve a shaꞈ teꞈ hkʼaˇ hkʼaˬ hkʼe pa kʼai ve le, gʼaw nyi sheˍ.
a Aˬ htoꞈ ma pa taw chaw yaˇ ve a shaꞈ htaꞈ ponˬ piˇ tuˬ loˍ ve le, leh Yeˍsuˆ ngaˬ hui ve a shaꞈ htaꞈ ponˬ laˇ tuˬ hkʼaˬ hkʼe ga laˇ gʼa ve le, Awˬ lawn 26 leh 27 hkʼaw kʼoˆ maˍ laˇ tuˬ yoˬ.
b Yeˍsuˆ miˬ guiˬ hkʼoˆ lo hkʼaˬ htaˆ laˬ ve tehꞈ tcuh kaˍ paˍ ve tawˇ hkawˇ hkʼaˬ hkʼe kʼoˆ taˍ ve htaꞈ shiˍ tuˬ, Kʼoˆ maˍ ve awˬ lawn 2 htaꞈ nyi sheˍ.
You May Also Like
NGAˬ HUI HTAꞈ CAˉ DAꞈ VE AWˬ LAWN
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ ve hk’aˬ hk’e te henˇ ve le?
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ tuˬ nawˬ Liꞈ hpu hk’aˬ ve teˇ maˬ yehˇ ve kaꞈ hpehꞈ ve yoˬ. Awˬ chawˇ maˇ heˆ leh yehˬ k’a hk’aw ve chaw htaꞈ Liꞈ hpu teˇ geh henˇ tuˬ jehˬ piˇ kaꞈ g’a ve yoˬ.
