Awˬ lawn 16
Yeˍsuˆ miˬ guiˬ hkʼoˆ chehˇ htaˇ aˬ htoꞈ ma te ve le?
Chaw laiˉ gʼaˇ Yeˍsuˆ htaꞈ shiˍ ve yoˬ. Yaꞈ hkʼaˇ, chaw teˇ hpaˍ Yeˍsuˆ yaˇ ehˉ hpehꞈ htaˇ ve awˬ lawn ceh tiˉ shiˍ ve yoˬ. Chaw teˇ hpaˍ kʼo, yawˇ cuˇ yiˍ cawˬ ve tcuh kaˍ paˍ hpehꞈ ve htaꞈ ceh tiˉ shiˍ ve yoˬ. Leh chaw teˇ hpaˍ kʼo, yawˇ suh htaˇ ve awˬ lawn ceh tiˉ shiˍ ve yoˬ. Yaꞈ hkʼaˇ, Yeˍsuˆ miˬ guiˬ hkʼoˆ chehˇ htaˇ aˬ htoꞈ ma te ve htaꞈ henˇ ve kʼo, ngaˬ hui yawˇ htaꞈ shiˍ daꞈ maˇ la tuˬ yoˬ. Yeˍsuˆ a yeˇ uiˍ jaˇ ve aˬ htoꞈ ma te ve le, leh awˬ lawn chi ngaˬ hui htaꞈ heuˆ la kuiˬ hkʼaˬ hkʼe cawˬ ve le, chi teˇ lawn hkʼaw teˇ geh henˇ tuˬ yoˬ.
1. Yeˍsuˆ te ve a yeˇ uiˍ jaˇ ve kanˉ lehˬ aˬ htoꞈ ma le?
Yeˍsuˆ te ve a yeˇ uiˍ jaˇ ve kanˉ lehˬ “Gʼuiˬ sha ve mvuhˇ miˬ” daꞈ ve awˬ lawn sha tanˇ ca hto toˇ ve yoˬ. (Luˉkaꞈ 4:43 gʼaw sheˍ.) Yeˍsuˆ miˬ guiˬ hkʼoˆ chehˇ htaˇ, Gʼuiˬ sha ve mvuhˇ miˬ lehˬ chaw yaˇ shoꞈ shaꞈ ve hkʼa peu˗eˬ htaꞈ gu tuˬ ve tehꞈ hto toˇ ve yoˬ. a Yawˇ awˬ yanˇ 3 hkʼawꞈ hpaˆ yehˇ leh daꞈ ve awˬ lawn sha tanˇ chi hto toˇ ve yoˬ.—Maꞈhtehˍ 9:35.
2. Aˬ htoꞈ ma pa taw Yeˍsuˆ anˇ tuˬ te ve le?
Liꞈ hpu hkʼaw kʼoˆ laˇ ve, Gʼuiˬ sha lehˬ “Yeˍsuˆ htaꞈ cuˇ leh kanˉ uiˍ ve teˇ hpaˍ, anˇ tuˬ teˇ hpaˍ leh awˬ heˆ teˇ hpaˍ” laiˉ ceuˬ te tcuh ve yoˬ. (Tcuh yaˇ 2:22) Yaˬhoˉvaˬ Yeˍsuˆ htaꞈ kanˇ paˆ piˇ ve pa taw, yawˇ mvuhˇ haw mvuhˇ yeˬ htaꞈ jehˇ piˇ gʼa ve, chaw laiˉ hinˉ gʼaˇ htaꞈ caˇ tuˬ caˍ piˇ gʼa ve, naˬ ve chaw htaꞈ gu na˗e piˇ gʼa ve, leh suh peuˬ ve chaw htaꞈ kʼawꞈ teꞈ tu la piˇ gʼa ve yoˬ. (Maꞈhtehˍ 8:23-27; 14:15-21; Maˍkuˆ 6:56; Luˉkaꞈ 7:11-17) Yeˍsuˆ anˇ tuˬ te ve chi lehˬ, Gʼuiˬ sha yawˇ htaꞈ peu laˇ ve tehꞈ hkʼa tawˍ lehˆ shiˍ gʼa ve yoˬ. Leh Yaˬhoˉvaˬ shoꞈ shaꞈ ve awˬ ceuˬ hkʼa peu˗eˬ gu gʼa tuˬ kanˇ paˆ cawˬ ve tehꞈ ngaˬ hui shiˍ gʼa ve yoˬ.
3. Yeˍsuˆ ve a shaꞈ teꞈ hkʼaˇ htaꞈ ngaˬ hui aˬ htoꞈ ma henˇ gʼa ve le?
Yeˍsuˆ Yaˬhoˉvaˬ ve hkawˇ na yuˬ leh teˇ ceuˬ le le gʼaꞈ te ve yoˬ. (Yoˇhanˬ 8:29 gʼaw sheˍ.) Chaw teˇ hpaˍ Yeˍsuˆ htaꞈ tawˍ piˇ ve htawˇ, yawˇ ve a shaꞈ teꞈ hkʼaˇ hkʼaw Gʼuiˬ sha yawˇ htaꞈ kʼoˆ piˇ ve teˇ ceuˬ le le gʼaꞈ te ve yoˬ. Chaw yaˇ shoꞈ shaꞈ ve gʼa hpuˇ ve htawˇ, Gʼuiˬ sha hkawˇ htaꞈ na yuˬ leh gʼaꞈ te gʼa ve tehꞈ Yeˍsuˆ hpeuꞈ maw laˇ ve yoˬ. Hkʼe te leh, Yeˍsuˆ lehˬ ‘yawˇ ve hkui ha awˬ hkʼaˇ suh gʼaꞈ kʼai tuˬ, ngaˬ hui awˬ pon henˇ kuiˬ jawˬ kuiˬ yawˇ te taˉ peuˬ.’—1 Peˍtruˆ 2:21.
Henˇ shiˍ maˇ la tuˬ
Yeˍsuˆ chaw yaˇ htaꞈ daꞈ ve awˬ lawn sha tanˇ hto piˇ leh yawˇ anˇ tuˬ laiˉ ceuˬ te ve, teˇ geh henˇ sheˍ.
4. Yeˍsuˆ daꞈ ve awˬ lawn sha tanˇ hto toˇ ve
Yeˍsuˆ chaw maˇ maˇ htaꞈ daꞈ ve awˬ lawn sha tanˇ hto piˇ tuˬ yaꞈ kʼaw laiˉ ha kiˇ loˇ juˇ toˇ ve yoˬ. Luˉkaꞈ liꞈ 8:1 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Yeˍsuˆ yawˇ geh laˬ ve chaw htaꞈ ceh tiˉ daꞈ ve awˬ lawn sha tanˇ hto piˇ ve laˇ?
-
Chaw yaˇ htaꞈ gʼa mawˬ daꞈ tuˬ Yeˍsuˆ aˬ htoꞈ ma te ve le?
Meˍsiˉyaꞈ lehˬ daꞈ ve awˬ lawn sha tanˇ hto toˇ tuˬ yoˬ tehꞈ Gʼuiˬ sha kʼoˆ taˍ ve yoˬ. Iˉsaˍyaˆ liꞈ 61:1, 2 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Tcuh kaˍ paˍ ve tawˇ hkawˇ chi biˇ la tuˬ Yeˍsuˆ hkʼaˬ hkʼe te ve le?
-
Nawˬ dawˇ kʼo, chi beuꞈ teˇ co˗e ve chaw daꞈ ve awˬ lawn sha tanˇ chi gʼa kaˇ cawˇ˗aw laˇ?
5. Yeˍsuˆ lehˬ awˬ bon cawˬ ve awˬ lawn laiˉ lawn maˍ laˇ ve
Yeˍsuˆ lehˬ Gʼuiˬ sha ve mvuhˇ miˬ htaꞈ caˉ daꞈ ve awˬ lawn sha tanˇ maˍ ve awˬ hkʼoˆ kaꞈ, yawˇ maˍ laˇ ve laiˉ lawn lehˬ, awˬ bon cawˬ leh yuˬ yehˇ gʼa ve yoˬ. Yeˍsuˆ hkʼaw pui hkʼoˆ bon maˍ ve awˬ lawn teˇ hpaˍ htaꞈ teˇ geh nyi sheˍ. Maꞈhtehˍ liꞈ 6:14, 34 leh 7:12 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Liꞈ hpu awˬ tawn chi teˇ hpaˍ hkʼaw Yeˍsuˆ aˬ htoꞈ ma beˆ maˍ laˇ ve le?
-
Nawˬ dawˇ kʼo, Yeˍsuˆ beˆ maˍ laˇ ve chi, chi beuꞈ teˇ co˗e kaꞈ yehˇ gʼa sheˍ ve laˇ?
6. Yeˍsuˆ anˇ tuˬ te ve
Yaˬhoˉvaˬ Yeˍsuˆ htaꞈ kanˇ paˆ piˇ ve pa taw, Yeˍsuˆ anˇ tuˬ laiˉ ceuˬ te gʼa ve yoˬ. Tawˇ pa haˉ teˇ maˬ htaꞈ nyi tuˬ, Maˍkuˆ liꞈ 5:25-34 gʼaw ve maˇ heˆ leh VDO hpaw sheˍ. Peuˬ leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Yaˇ miˇ chi teˇ gʼaˇ aˬ htoꞈ ma htaꞈ yonˍ ve le?
-
Awˬ lawn chi htaꞈ caˉ daꞈ ve nawˬ dawˇ cawˇ ve aˬ htoꞈ ma cawˬ ve le?
Yoˇhanˬ liꞈ 5:36 gʼaw leh na hkawˇ chi htaꞈ tawˇ yaw daꞈ sheˍ:
-
Yeˍsuˆ anˇ tuˬ te ve lehˬ, aˬ htoꞈ ma “shaˉ hkiˆ” hpeuꞈ maw laˇ ve le?
Nawˬ shiˍ˗aˬ laˇ?
Yeˍsuˆ htaꞈ caˉ daꞈ ve awˬ lawn maˇ˗awˍ ve kʼo, ha lehˬ ve bon hkawˇ liꞈ 4 daw hkʼaw cawˬ ve yoˬ. Chi lehˬ Maꞈhtehˍ liꞈ, Maˍkuˆ liꞈ, Luˉkaꞈ liꞈ, leh Yoˇhanˬ liꞈ hpehꞈ ve yoˬ. Ha lehˬ ve bon hkawˇ liꞈ bvuhꞈ paˍ teˇ gʼaˇ leh teˇ gʼaˇ Yeˍsuˆ ve awˬ lawn hkʼa tawˍ lehˆ bvuhꞈ taˍ ve yoˬ. Ngaˬ hui ha lehˬ ve bon hkawˇ liꞈ 4 daw htaꞈ gʼaw htaˇ, Yeˍsuˆ ve a shaꞈ teꞈ hkʼaˇ hkʼaw ve awˬ lawn hkʼa dehꞈ kʼawꞈ shiˍ maˇ la gʼa ve yoˬ.
-
Maꞈhtehˍ liꞈ
Ha lehˬ ve bon hkawˇ liꞈ awˉ lawˉ teˇ daw hpehꞈ ve yoˬ. Liꞈ chi teˇ daw Yeˍsuˆ maˍ ve awˬ lawn laiˉ lawn kʼoˆ maˍ laˇ ve, leh a yeˇ uiˍ jaˇ ve teˇ lawn lehˬ Gʼuiˬ sha ve mvuhˇ miˬ htaꞈ caˉ daꞈ ve awˬ lawn hpehꞈ ve yoˬ.
-
Maˍkuˆ liꞈ
Liꞈ chi lehˬ ha lehˬ ve bon hkawˇ liꞈ hkʼaw maˇ zuhˬ ve teˇ daw hpehꞈ ve yoˬ. Liꞈ chi teˇ daw lehˬ awˬ lawn teˇ hpaˍ ngeh ve awˬ hkʼaw lo kʼoˆ maˍ laˇ leh anˇ lawꞈ lawꞈ ve awˬ lawn cawˬ ve yoˬ.
-
Luˉkaꞈ liꞈ
Liꞈ chi teˇ daw hkʼaw bon lawˬ ve lehˬ, Yeˍsuˆ awˬ pon a yeˇ uiˍ jaˇ ve teˇ ceuˬ hpehꞈ ve tehꞈ kʼoˆ laˇ ve yoˬ. Leh liꞈ chi teˇ daw hkʼaw kʼawꞈ kʼoˆ laˇ ve, Yeˍsuˆ lehˬ yaˇ miˇ htaꞈ yawˆ yan piˇ ve yoˬ.
-
Yoˇhanˬ liꞈ
Liꞈ chi teˇ daw hkʼaw Yeˍsuˆ yawˇ ve awˬ chawˇ leh awˬ nu ve chaw geh aˬ htoꞈ ma awˬ lawn yaw daꞈ ve kʼoˆ maˍ laˇ ve yoˬ. Chi lehˬ yawˇ hkʼaˬ hkʼe ve chaw hpehꞈ ve tehꞈ shiˍ tuˬ ga laˇ ve yoˬ.
Chaw teˇ hpaˍ kʼoˆ ve: “Yeˍsuˆ lehˬ uiˍ jaˇ mvuh jaˇ ve Gʼuiˬ sha hpehꞈ ve yoˬ.”
-
Nawˬ hkʼaˬ hkʼe dawˇ ve le?
A yeˇ uiˍ ve awˬ lawn
Yeˍsuˆ Gʼuiˬ sha ve mvuhˇ miˬ htaꞈ caˉ daꞈ ve awˬ lawn hto toˇ ve, yawˇ anˇ tuˬ laiˉ ceuˬ te ve, leh yawˇ Yaˬhoˉvaˬ ve hkawˇ hkʼaˬ htaˆ kaꞈ na yuˬ ve yoˬ.
Kʼawꞈ gʼaꞈ na ve
-
Yeˍsuˆ miˬ guiˬ hkʼoˆ chehˇ htaˇ, a yeˇ uiˍ jaˇ ve kanˉ aˬ htoꞈ ma te ve le?
-
Yeˍsuˆ anˇ tuˬ te ve lehˬ, aˬ htoꞈ ma hpeuꞈ maw laˇ ve le?
-
Yeˍsuˆ maˍ ve awˬ lawn hkʼaw awˬ bon cawˬ leh yuˬ yehˇ gʼa ve aˬ htoꞈ ma cawˬ ve le?
Kʼawꞈ caˉ nyi gʼa ve
Yeˍsuˆ aˬ htoꞈ ma awˬ lawn htaꞈ laiˉ pawˆ kʼoˆ ve le?
Yeˍsuˆ anˇ tuˬ te ve awˬ lawn awˬ tehˬ hpehꞈ ve tehꞈ ngaˬ hui hkʼaˬ hkʼe te yonˍ gʼa ve htaꞈ gʼaw sheˍ.
Yeˍsuˆ chaw laiˉ gʼaˇ awˬ pon dawˇ nyi piˇ ve tehꞈ, hawˉ hkʼaˆ teˇ gʼaˇ shiˍ htaˇ, yawˇ ve a shaꞈ teꞈ hkʼaˇ hkʼaˬ hkʼe pa kʼai ve le, gʼaw nyi sheˍ.
“Ngaˬ shu htaꞈ maˇ gʼaˇ va” (Shaw nyi kuiˬ Taꞈ yehˬ 2014 hkʼawꞈ ha pa 10 maˬ 1 nyi)
Yeˍsuˆ miˬ guiˬ hkʼoˆ chehˇ htaˇ ve awˬ lawn htaꞈ nyi sheˍ.
a Gʼuiˬ sha ve mvuhˇ miˬ htaꞈ caˉ daꞈ ve, Awˬ lawn 31-33 hkʼaw kʼoˆ maˍ laˇ tuˬ yoˬ.
You May Also Like
NGAˬ HUI HTAꞈ CAˉ DAꞈ VE AWˬ LAWN
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ ve hk’aˬ hk’e te henˇ ve le?
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ tuˬ nawˬ Liꞈ hpu hk’aˬ ve teˇ maˬ yehˇ ve kaꞈ hpehꞈ ve yoˬ. Awˬ chawˇ maˇ heˆ leh yehˬ k’a hk’aw ve chaw htaꞈ Liꞈ hpu teˇ geh henˇ tuˬ jehˬ piˇ kaꞈ g’a ve yoˬ.
