Yaˬhoˉvaˬ lehˬ hteˇ hteˇ shawˇ shawˇ ve Gʼuiˬ sha hpehꞈ ve yoˬ. (1 Kawˇrenˍhtuˆ 14:33) Chi htaꞈ pa taw, Gʼuiˬ sha ve chaw kaꞈ hteˇ hteˇ shawˇ shawˇ hpehꞈ ve yoˬ. Hkʼe kʼo, Hkriꞈ yaˇ awˬ moˍ hkʼaw hteˇ hteˇ shawˇ shawˇ hpehꞈ la tuˬ, hkʼaˬ hkʼe gu teh ve le, leh ngaˬ hui hkʼaˬ hkʼe te gʼa ve le?

1. A shu Hkriꞈ yaˇ awˬ moˍ htaꞈ sheh kʼai shehˍ hpaˇ hpehꞈ ve le?

“Hkriꞈ lehˬ yawˇ ve awˬ moˍ ve oˉ kʼoˍ hpehꞈ ve yoˬ.” (Eˇfeˇsuꞈ 5:23) Yeˍsuˆ lehˬ mvuhˇ naw ma hkʼoˆ chehˇ leh, miˬ guiˬ hkʼoˆ Yaˬhoˉvaˬ ve Shaˉhkiˆhkanˍ ve chaw te chehˇ ve kanˉ htaꞈ nyi haꞈ shaˉ chehˇ ve yoˬ. Yawˇ chi hkʼe te tuˬ “ka tiꞈ yeˬ leh cuˇ yiˍ cawˬ ve awˬ ceˬ” htaꞈ leuˆ yuˬ ve yoˬ. I ve awˬ moˍ chi htaꞈ Uˉ peunˍ ve Kawˍmiˍtiˍ tehꞈ kuˬ ve yoˬ. (Maꞈhtehˍ 24:45-47 gʼaw sheˍ.) Awˉ lawˉ peuˇ teˇ co˗e htaˇ, Yeˍruˆsaˍlehnˍ venˇ hkʼaw ve tcuh yaˇ hui leh nyi haꞈ shaˉ paˍ lehˬ Hkriꞈ yaˇ awˬ moˍ htaꞈ hkʼa dehꞈ nyi haꞈ shaˉ ve yoˬ. Chi beuꞈ teˇ co˗e htawˇ, Uˉ peunˍ ve Kawˍmiˍtiˍ kaꞈ miˬ guiˬ hkʼoˆ teˇ kaˬ le le lo cawˬ ve Hkriꞈ yaˇ awˬ moˍ htaꞈ nyi haꞈ shaˉ ve yoˬ. (Tcuh yaˇ 15:2) Chi hkʼe hpehꞈ ve htawˇ, Uˉ peunˍ ve Kawˍmiˍtiˍ lehˬ kanˉ hkʼaˇ ve awˬ shehˍ hpaˇ hpehꞈ ve maˇ heˆ. Awˬ lawn kʼo, yawˇ hui Yeˍsuˆ beˆ maˍ laˇ ve htaꞈ na yuˬ ve yoˬ. Chi hkʼoˆ kaꞈ, Yaˬhoˉvaˬ yawˇ hui htaꞈ aˬ htoꞈ ma te tcuh gaˇ ve shiˍ tuˬ, yawˇ hui Liꞈ hpu htaꞈ hpfuhˆ nyi ve yoˬ.

2. Nyi haꞈ shaˉ paˍ lehˬ a shu le? Leh yawˇ hui aˬ htoꞈ ma te ve le?

Hkriꞈ yaˇ awˬ moˍ hkʼaw ve nyi haꞈ shaˉ paˍ lehˬ, laiˉ hkʼawꞈ ve hkʼaw ka tiꞈ yeˬ ve hawˉ hkʼaˆ hpehꞈ ve yoˬ. Yawˇ hui Gʼuiˬ sha ve chaw htaꞈ Liꞈ hpu hkʼaw laˬ ve awˬ ceuˬ maˍ piˇ ve, awˬ gʼaˇ piˇ ve, leh ga piˇ ve yoˬ. Yawˇ hui chi hkʼe te ve ha pa hpfuhˇ maˇ gʼa. Yawˇ hui “ha lehˬ ha kʼa te ve, hpu gʼa gaˇ leh te ve maˇ heˆ. Nyi ma pfuhˇ leh te ve yoˬ.” (1 Peˍtruˆ 5:1, 2) Chi hkʼoˆ kaꞈ, Hkriꞈ yaˇ awˬ moˍ hkʼaw ve kanˉ te tuˬ, nyi haꞈ shaˉ paˍ htaꞈ ga piˇ shehˍ hpaˇ cawˬ ve yoˬ. Leh awˬ gʼuˇ suhˍ hpawˇ kʼo, ga piˇ shehˍ hpaˇ kaꞈ nyi haꞈ shaˉ paˍ te keunˍ ve kʼo te gʼa ve yoˬ.

Uˉ peunˍ ve Kawˍmiˍtiˍ lehˬ, nyi haꞈ shaˉ paˍ teˇ hpaˍ htaꞈ leuˆ yuˬ leh toˇ nyi shehˍ hpaˇ te tcuh ve yoˬ. Yawˇ hui awˬ viˉ awˬ nyi htaꞈ Liꞈ hpu hkʼaw laˬ ve beˆ maˍ laˇ hkawˇ leh awˬ gʼaˇ piˇ tuˬ, Hkriꞈ yaˇ awˬ moˍ teˇ kaˬ peuˬ teˇ kaˬ lo kʼai ve yoˬ. Leh Hkriꞈ yaˇ awˬ moˍ hkʼaw kʼai htaˇ, awˬ viˉ awˬ nyi hawˉ hkʼaˆ hkʼaˬ ve teˇ gʼaˇ Liꞈ hpu hkʼaw kʼoˆ taˍ ve hkʼe keunˍ daꞈ ve kʼo, toˇ nyi shehˍ hpaˇ lehˬ yawˇ hui htaꞈ ga piˇ shehˍ hpaˇ maˇ heˆ leh nyi haꞈ shaˉ paˍ te tcuh gʼa ve yoˬ.—1 Tiˆmoˉseˍ 3:1-10, 12; Tiˇtuˆ 1:5-9.

3. Yaˬhoˉvaˬ ve Shaˉhkiˆhkanˍ ve chaw teˇ gʼaˇ le le aˬ htoꞈ ma te ve le?

Hkriꞈ yaˇ awˬ moˍ hkʼaw ve chaw teˇ gʼaˇ le le ‘Yaˬhoˉvaˬ ve awˬ meh htaꞈ chiˇ mvuh ve yoˬ.’ Yawˇ hui chi hkʼe te tuˬ, hpawnˬ daꞈ kuiˬ lo kʼai leh laꞈ sheh chiˇ leh hkʼawꞈ ve, hto toˇ tuˬ awˬ hkʼaˇ te maˍ ve, bon maˍ ve, leh yawˇ hui Gʼuiˬ sha htaꞈ kʼa muiˬ hkawˇ kʼa chiˇ mvuh ve yoˬ. Chi hkʼoˆ kaꞈ, Yaˬhoˉvaˬ ve Shaˉhkiˆhkanˍ ve chaw lehˬ te gʼa ve hkʼe gʼaˇ hteꞈ hto toˇ ve yoˬ.—Chiˇ mvuh ve 148:12, 13 gʼaw sheˍ.

 Henˇ shiˍ maˇ la tuˬ

4. Yeˍsuˆ lehˬ nyi ma nuˇ nehˬ ve sheh kʼai shehˍ hpaˇ hpehꞈ ve

Yeˍsuˆ haꞈ pehnˇ ve hkʼaw ngaˬ hui teˇ gʼaˇ le le htaꞈ kuˬ laˇ ve yoˬ. Maꞈhtehˍ liꞈ 11:28-30 gʼaw leh na hkawˇ chi htaꞈ tawˇ yaw daꞈ sheˍ:

• Yeˍsuˆ lehˬ hkʼaˬ hkʼe ve sheh kʼai shehˍ hpaˇ hpehꞈ ve le? Leh yawˇ ngaˬ hui htaꞈ hkʼaˬ hkʼe dawˇ tcuh gaˇ ve le?

5. Nyi haꞈ shaˉ paˍ lehˬ henˇ yuˬ tuˬ te maˍ laˇ ve

1. Nyi haꞈ shaˉ paˍ lehˬ a shu yawˇ awˬ to leh yawˇ ve yehˬ kʼa hkʼaw ve chaw htaꞈ co ha hpawˇ awˬ gʼaˇ hehnˇ tuˬ ga piˇ maˍ piˇ ve

2. Nyi haꞈ shaˉ paˍ lehˬ Hkriꞈ yaˇ awˬ moˍ hkʼaw ve awˬ viˉ awˬ nyi teˇ gʼaˇ le le awˬ pon dawˇ nyi piˇ ve

3.   Nyi haꞈ shaˉ paˍ hkʼaˬ htaˆ kaꞈ hto toˇ ve

4. Nyi haꞈ shaˉ paˍ maˍ ve awˬ vuiˬ te ve, daꞈ kehˬ tuˬ te ve, leh awˬ nu ve kanˉ kaꞈ te ve

6. Ngaˬ hui nyi haꞈ shaˉ paˍ hkawˇ na leh ga piˇ gʼa ve

Liꞈ hpu hkʼaw kʼoˆ laˇ ve, nyi haꞈ shaˉ paˍ hkawˇ na leh ga piˇ ve lehˬ a yeˇ uiˍ jaˇ ve yoˬ. Heˍbrehˇ liꞈ 13:17 gʼaw leh na hkawˇ chi htaꞈ tawˇ yaw daꞈ sheˍ:

• Aˬ htoꞈ ma pa taw ngaˬ hui Hkriꞈ yaˇ awˬ moˍ hkʼaw nyi haꞈ shaˉ paˍ htaꞈ na yuˬ cawˇ ve tehꞈ Liꞈ hpu hkʼaw kʼoˆ laˇ ve le? Leh awˬ lawn chi htaꞈ nawˬ hkʼaˬ hkʼe dawˇ ve le?

Luˉkaꞈ liꞈ 16:10 gʼaw leh na hkawˇ chi htaꞈ tawˇ yaw daꞈ sheˍ:

• I ve awˬ lawn hpehꞈ ve htawˇ, aˬ htoꞈ ma pa taw nyi haꞈ shaˉ paˍ hkawˇ na leh ga piˇ ve lehˬ a yeˇ uiˍ ve le?

 A yeˇ uiˍ ve awˬ lawn

Yeˍsuˆ lehˬ Hkriꞈ yaˇ awˬ moˍ htaꞈ sheh kʼai shehˍ hpaˇ hpehꞈ ve yoˬ. Nyi haꞈ shaˉ paˍ Yeˍsuˆ ve kanˇ paˆ awˬ hawˉ lo chehˇ ve, leh ngaˬ hui yawˇ hui hkawˇ na leh ga piˇ ve yoˬ. Yawˇ hui ngaˬ hui htaꞈ nyi ma sha leh awˬ gʼaˇ cawˬ tuˬ te laˇ ve, leh yawˇ hui henˇ yuˬ tuˬ te maˍ laˇ ve yoˬ.

Kʼawꞈ gʼaꞈ na ve

• A shu Hkriꞈ yaˇ awˬ moˍ htaꞈ sheh kʼai shehˍ hpaˇ hpehꞈ ve le?

• Nyi haꞈ shaˉ paˍ Hkriꞈ yaˇ awˬ moˍ htaꞈ hkʼaˬ hkʼe ga piˇ ve le?

• Yaˬhoˉvaˬ ve Shaˉhkiˆhkanˍ ve chaw teˇ gʼaˇ le le aˬ htoꞈ ma te ve le?