Awˬ lawn 21
Daꞈ ve awˬ lawn sha tanˇ hkʼaˬ hkʼe te htoˇ toˇ ve le?
Maˇ maw kʼo, Yaˬhoˉvaˬ yawˇ ve mvuhˇ miˬ htaꞈ cuˇ leh shoꞈ shaꞈ ve hkʼa peu˗eˬ htaꞈ te luˬ piˇ tuˬ yoˬ. Chi lehˬ daꞈ ve awˬ lawn sha tanˇ hpehꞈ leh ngaˬ hui teˇ gʼaˇ le le htaꞈ awˬ lawn chi ve shiˍ tcuh gaˇ ve yoˬ. Yeˍsuˆ yawˇ ve awˬ laꞈ gʼawˇ hui htaꞈ awˬ lawn chi chaw teˇ gʼaˇ le le htaꞈ hto piˇ tcuh gaˇ ve yoˬ! (Maꞈhtehˍ 28:19, 20) Yaˬhoˉvaˬ ve Shaˉhkiˆhkanˍ ve chaw Yeˍsuˆ tawˇ piˇ taˉ ve htaꞈ hkʼaˬ hkʼe gʼaꞈ te ve le?
1. Chi beuꞈ teˇ co˗e Maꞈhtehˍ liꞈ 24:14 awˬ tehˬ awˬ na hkʼaˬ hkʼe hpehꞈ la chehˇ ve le?
Yeˍsuˆ kʼoˆ taˍ ve, “Gʼuiˬ sha ve mvuhˇ miˬ htaꞈ caˉ daꞈ ve ha lehˬ ve bon hkawˇ chi, miˬ guiˬ hkʼoˆ teˇ kaˬ le le lo ca maˍ piˇ tuˬ yoˬ.” (Maꞈhtehˍ 24:14) Yaˬhoˉvaˬ ve Shaˉhkiˆhkanˍ ve chaw kanˉ chi te ve htaꞈ ha lehˬ jaˇ. Ngaˬ hui miˬ guiˬ chi hkʼoˆ teˇ kaˬ le le lo daꞈ ve awˬ lawn sha tanˇ 1,000 chaw ceuˬ tawˇ hkawˇ hpaˆ awˬ hkʼaw lo hto toˇ ve yoˬ! Uiˍ ve kanˉ chi htaꞈ te gʼa tuˬ, hteˇ hteˇ shawˇ shawˇ gʼa gu teh taˍ ve, leh awˬ gʼaˇ leh awˬ yanˇ kaꞈ gʼa yehˇ ve yoˬ. Yaˬhoˉvaˬ maˇ ga laˇ ve kʼo, kanˉ chi te peuˬ maˇ gʼa ve yoˬ.
2. Shu htaꞈ daꞈ ve awˬ lawn sha tanˇ hto piˇ tuˬ ngaˬ hui hkʼaˬ hkʼe te ve le?
Ngaˬ hui chaw chehˇ kuiˬ lo ca hto toˇ ve yoˬ. Awˉ lawˉ peuˇ ve Hkriꞈ yaˇ hkʼa shuˍ, ngaˬ hui “teˇ yehˬ peuˬ teˇ yehˬ” ca hto toˇ ve yoˬ. (Tcuh yaˇ 20:20) Ngaˬ hui chi hkʼe te ve pa taw teˇ hkʼawꞈ le le hkʼaw chaw laiˉ lanˬ gʼaˇ htaꞈ tawˇ yaw daꞈ gʼa ve yoˬ. Yaꞈ hkʼaˇ, teˇ pawˆ pawˆ kʼo yehˬ hkʼaw chaw maˇ chehˇ ve pa taw, ngaˬ hui chaw guiˇ kuiˬ lo ca hto toˇ ve yoˬ. Ngaˬ hui Yaˬhoˉvaˬ ve awˬ lawn leh yawˇ ve a loˍ shu htaꞈ hto piˇ tuˬ coˇ caˇ ve yoˬ.
3. A shu daꞈ ve awˬ lawn sha tanˇ hto toˇ cawˇ ve le?
Awˬ tehˬ ve Hkriꞈ yaˇ teˇ gʼaˇ le le daꞈ ve awˬ lawn sha tanˇ hto toˇ cawˇ ve yoˬ. Kanˉ chi ngaˬ hui awˬ pon a yeˇ uiˍ jaˇ. Te gʼa ve hkʼe ngaˬ hui gʼaˇ hteꞈ te ve yoˬ. Awˬ lawn kʼo, kanˉ chi shu ve a shaꞈ htaꞈ ponˬ piˇ gʼa ve tehꞈ ngaˬ hui shiˍ ve yoˬ. (1 Tiˆmoˉseˍ 4:16 gʼaw sheˍ.) Kanˉ chi te ve htaꞈ ngaˬ hui ha pa hpuˇ maˇ gʼa. Awˬ lawn kʼo, Liꞈ hpu hkʼaw kʼoˆ laˇ ve, “nawˬ hui hkʼe leˇ gʼa ve hkʼa shuˍ shuˍ, shu htaꞈ hkʼe leˇ kʼawꞈ piˇ˗oˆ.” (Maꞈhtehˍ 10:7, 8) Chaw teˇ hpaˍ hpaˍ daꞈ ve awˬ lawn sha tanˇ htaꞈ a yeˇ maˇ te ve htawˇ, ngaˬ hui kʼawꞈ caˉ leh hto toˇ ve yoˬ. Awˬ lawn kʼo, ngaˬ hui Yaˬhoˉvaˬ hkawˇ na yuˬ leh yawˇ ha lehˬ tuˬ te piˇ gaˇ ve yoˬ.
Henˇ shiˍ maˇ la tuˬ
Miˬ guiˬ chi hkʼoˆ ca hto toˇ zuhˇ tuˬ Yaˬhoˉvaˬ ve Shaˉhkiˆhkanˍ ve chaw hkʼaˬ hkʼe te ve le, leh Yaˬhoˉvaˬ ngaˬ hui htaꞈ hkʼaˬ hkʼe ga laˇ ve le, teˇ geh henˇ sheˍ.
Miˬ guiˬ hkʼoˆ lo hto toˇ ve kanˉ te ve: (A) Koˬsaˍtaˍ Riˇkaˬ mvuhˇ miˬ, (B) Aˍmeˬriˆkaꞈ mvuhˇ miˬ, (C) Biˬniˬ mvuhˇ miˬ, (D) Htaiˇ mvuhˇ miˬ, (E) Yehˆ conˇ, (F) Suˬ˗e˗dinˬ mvuhˇ miˬ
4. Ngaˬ hui chaw teˇ gʼaˇ le le htaꞈ ca mawˬ daꞈ tuˬ coˇ caˇ leh kʼai ve
Chaw teˇ gʼaˇ le le daꞈ ve awˬ lawn sha tanˇ gʼa kaˇ tuˬ, Yaˬhoˉvaˬ ve Shaˉhkiˆhkanˍ ve chaw coˇ caˇ jaˇ ve yoˬ. VDO hpaw leh na hkawˇ chi htaꞈ tawˇ yaw daꞈ sheˍ:
-
Yaˬhoˉvaˬ ve Shaˉhkiˆhkanˍ ve chaw coˇ caˇ leh teˇ kaˬ le le lo ca hto toˇ ve htaꞈ, nawˬ dawˇ cawˇ ve aˬ htoꞈ ma cawˬ ve le?
Maꞈhtehˍ liꞈ 22:39 leh Roˉmaꞈ liꞈ 10:13-15 gʼaw leh na hkawˇ chi htaꞈ tawˇ yaw daꞈ sheˍ:
-
Aˬ htoꞈ ma pa taw ngaˬ hui hto toˇ ve lehˬ shu htaꞈ awˬ tehˬ haꞈ ve tehꞈ hpeuꞈ maw piˇ ve le?
-
Daꞈ ve awˬ lawn sha tanˇ hto toˇ ve chaw htaꞈ Yaˬhoˉvaˬ hkʼaˬ hkʼe dawˇ ve le?—Kaˇ nanˉ ehˉ 15 hkʼaw nyi sheˍ.
5. Ngaˬ hui Gʼuiˬ sha geh kanˉ teˇ geh te ve chaw hpehꞈ ve
Yaˬhoˉvaˬ lehˬ hto toˇ ve kanˉ htaꞈ nyi haꞈ shaˉ chehˇ ve tehꞈ chaw laiˉ gʼaˇ ve awˬ lawn cawˬ ve yoˬ. Tawˇ pa haˉ te kʼo, Nuˇziˬlehˬ mvuhˇ miˬ lo chehˇ ve awˬ viˉ awˬ nyi Pawˇluꞈ sha gʼuˇ hkʼawꞈ nawˉ teˇ yehˬ peuˬ teˇ yehˬ ca hto toˇ htaˇ, yaˇ miˇ teˇ gʼaˇ htaꞈ gʼa mawˬ daꞈ ve yoˬ. Yaˇ miˇ chi teˇ gʼaˇ mvuhˇ shawˉ htaˇ Gʼuiˬ sha geh bon lawˬ leh Yaˬhoˉvaˬ ve awˬ meh kuˬ ve, leh yawˇ geh chaw teˇ gʼaˇ gʼaˇ laˬ tuˬ kaꞈ lawˬ ve yoˬ. Pawˇluꞈ kʼoˆ ve, “yaˇ miˇ chi bon lawˬ peuˬ hkʼawꞈ nawˉ 3 naˍ riˍ gaˬ leh ngaˬ yawˇ ve aˉ hkʼaw lo ca hto toˇ˗e ve yoˬ.”
1 Kawˇrenˍhtuˆ liꞈ 3:9 gʼaw leh na hkawˇ chi htaꞈ tawˇ yaw daꞈ sheˍ:
-
Nuˇziˬlehˬ mvuhˇ miˬ leh awˬ nu ve teˇ kaˬ lo hpehꞈ chehˇ ve htaꞈ mawˬ htaˇ, aˬ htoꞈ ma pa taw Yaˬhoˉvaˬ hto toˇ ve kanˉ htaꞈ nyi haꞈ shaˉ chehˇ ve tehꞈ ngaˬ hui shiˍ gʼa ve le?
Tcuh yaˇ liꞈ 1:8 gʼaw leh na hkawˇ chi htaꞈ tawˇ yaw daꞈ sheˍ:
-
Aˬ htoꞈ ma pa taw hto toˇ ve kanˉ hkʼa biˇ te gʼa tuˬ, Yaˬhoˉvaˬ ga laˇ tuˬ ngaˬ hui loˍ ve le?
Nawˬ shiˍ˗aˬ laˇ?
Ngaˬ hui teˇ shinˉ le le mvuhˇ hpeuꞈ haˉ hpawnˬ daꞈ ve cawˬ ve yoˬ. Hpawnˬ daꞈ ve chi hkʼaw ngaˬ hui hto toˇ tuˬ awˬ hkʼaˇ maˍ laˇ ve yoˬ. Nawˬ hpawnˬ daꞈ ve chi kʼai jaw ve kʼo, chi hkʼe te maˍ laˇ ve htaꞈ nawˬ hkʼaˬ hkʼe dawˇ ve le?
6. Gʼuiˬ sha hto toˇ tcuh laˇ ve tawˇ hkawˇ htaꞈ ngaˬ hui na yuˬ ve
Awˉ lawˉ peuˇ ve Hkriꞈ yaˇ hto toˇ ve htaꞈ chaw teˇ hpaˍ hpaˍ tawˍ piˇ ve yoˬ. Chi htaꞈ pa taw, yawˇ hui mvuhˇ miˬ awˬ liˇ cawˇ ve hkʼe daꞈ ve awˬ lawn sha tanˇ hto toˇ gʼa tuˬ te ve yoˬ. (Hpiˇliˇpiˆ 1:7) Chi beuꞈ teˇ co˗e Yaˬhoˉvaˬ ve Shaˉhkiˆhkanˍ ve chaw kaꞈ chi hkʼe te ve yoˬ. a
Tcuh yaˇ liꞈ 5:27-42 gʼaw leh na hkawˇ chi htaꞈ tawˇ yaw daꞈ sheˍ:
-
Aˬ htoꞈ ma pa taw ngaˬ hui caˉ leh kʼawꞈ hto toˇ tuˬ ve le?—Kaˇ nanˉ ehˉ 29, 38, leh 39 hkʼaw nyi sheˍ.
Chaw teˇ hpaˍ na nyi laˇ ve: “Aˬ htoꞈ ma pa taw Yaˬhoˉvaˬ ve Shaˉhkiˆhkanˍ ve chaw teˇ yehˬ peuˬ teˇ yehˬ lo kʼai leh bon ca maˍ toˇ ve le?”
-
Nawˬ hkʼaˬ hkʼe hkʼawꞈ piˇ tuˬ le?
A yeˇ uiˍ ve awˬ lawn
Yeˍsuˆ yawˇ ve awˬ laꞈ gʼawˇ htaꞈ chaw teˇ ceuˬ le le geh ca hto toˇ tehꞈ kʼoˆ piˇ ve yoˬ. Yaˬhoˉvaˬ lehˬ yawˇ ve chaw htaꞈ kanˉ chi te gʼa tuˬ ga piˇ chehˇ ve yoˬ.
Kʼawꞈ gʼaꞈ na ve
-
Miˬ guiˬ hkʼoˆ daꞈ ve awˬ lawn sha tanˇ hkʼaˬ hkʼe hto toˇ chehˇ ve le?
-
Aˬ htoꞈ ma pa taw ngaˬ hui hto toˇ ve lehˬ shu htaꞈ awˬ tehˬ haꞈ ve tehꞈ hpeuꞈ maw piˇ ve le?
-
Nawˬ dawˇ kʼo, hto toˇ ve kanˉ lehˬ ngaˬ hui htaꞈ ha lehˬ tuˬ te laˇ gʼa˗aw laˇ? Aˬ htoꞈ ma pa taw le?
Kʼawꞈ caˉ nyi gʼa ve
Yaˬhoˉvaˬ ve Shaˉhkiˆhkanˍ ve chaw venˇ lonˉ hkʼaw lo hkʼaˬ hkʼe hto toˇ ve le, nyi sheˍ.
Chaw hpaw hkʼoˇ htaꞈ ga piˇ tuˬ Yaˬhoˉvaˬ ve Shaˉhkiˆhkanˍ ve chaw aˬ htoꞈ ma te ve le, nyi sheˍ.
Gʼuiˬ sha htaꞈ shiˍ daꞈ gaˇ ve chaw hpaw hkʼoˇ htaꞈ ga piˇ ve (5:59)
Aˬ htoꞈ ma pa taw yaˇ miˇ teˇ gʼaˇ yawˇ ve a shaꞈ teꞈ chehˇ ve hkʼaw hto toˇ ve kanˉ ha lehˬ ve hkʼaw hkʼa dehꞈ te ve le, nyi sheˍ.
Hto toˇ ve kanˉ htaꞈ caˉ daꞈ ve Yaˬhoˉvaˬ ve Shaˉhkiˆhkanˍ ve chaw shaˉ nanˉ hkʼaw aˬ htoꞈ ma awˬ lawn gʼaˇ ve le, gʼaw nyi sheˍ.
“Hto toˇ ve chaw shaˉ nanˉ hkʼaw suhˉ taˆ ve” (Gʼuiˬ sha ve mvuhˇ miˬ uˉ peunˍ˗oˬ!, awˬ lawn 13)
a Ngaˬ hui hto toˇ tuˬ Gʼuiˬ sha tawˇ peꞈ laˇ ve yoˬ. Chi htaꞈ pa taw, Yaˬhoˉvaˬ ve Shaˉhkiˆhkanˍ ve chaw daꞈ ve awˬ lawn sha tanˇ hto toˇ tuˬ mvuhˇ miˬ uˉ peunˍ paˍ geh a hkaw˗anˬ gʼa tuˬ maˇ loˍ.
You May Also Like
NGAˬ HUI HTAꞈ CAˉ DAꞈ VE AWˬ LAWN
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ ve hk’aˬ hk’e te henˇ ve le?
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ tuˬ nawˬ Liꞈ hpu hk’aˬ ve teˇ maˬ yehˇ ve kaꞈ hpehꞈ ve yoˬ. Awˬ chawˇ maˇ heˆ leh yehˬ k’a hk’aw ve chaw htaꞈ Liꞈ hpu teˇ geh henˇ tuˬ jehˬ piˇ kaꞈ g’a ve yoˬ.
